Ita haree oinsá Maromak hatudu dalan mai ita ka lae?

EMA Israel no mós ema Egiptu seidauk haree buat neʼe. Saida mak neʼe? Kuandu ema Israel sai husi rai-Egiptu, koluna kalohan nian mosu besik sira no kontinua hela ho sira. Iha kalan koluna neʼe sai fali koluna ahi nian. Neʼe mak buat neʼebé kapás tebes! Maibé, ida-neʼe mai husi neʼebé? Tanbasá ida-neʼe mosu? No saida mak ita, neʼebé moris tinan 3.500 depois tempu neʼebá, bele aprende husi dalan neʼebé ema Israel haree “koluna ahi nian no kalohan nian”?​—Êx 14:24.

Maromak nia Liafuan fó sai kona-ba sé mak hamosu koluna neʼe no tanbasá. Bíblia hatete: “Jeová laʼo uluk iha sira-nia oin, durante loron iha koluna kalohan nian atu hatudu dalan ba sira, no durante kalan iha koluna ahi nian atu fó naroman ba sira, atu nuneʼe sira bele laʼo iha loron no kalan.” (Êx 13:21, 22) Maromak Jeová uza koluna ahi nian no koluna kalohan nian atu hatudu dalan ba ninia povu atu sai husi rai-Egiptu no atu laʼo liuhusi rai-fuik maran. Sira tenke prontu atu muda hodi tuir koluna neʼe. Kuandu tropa Egiptu nian duni tuir no besik ona atu ataka Maromak nia povu, koluna neʼe muda no hela iha klaran entre grupu rua neʼe no proteje ema Israel. (Êx 14:19, 20) Maski koluna neʼe la hatudu dalan neʼebé lalais liu ba ema Israel atu laʼo, maibé nafatin laʼo tuir koluna neʼe mak dalan ida deʼit atubele toʼo rai neʼebé Maromak promete.

Koluna neʼebé mosu iha tempu neʼebá reprezenta Maromak Jeová no hatudu ba ema Israel katak nia hamutuk ho sira. Dala ruma, Maromak Jeová koʼalia sai husi koluna neʼe. (Núm 14:14; Sal 99:7) Liután neʼe, koluna neʼe hatudu katak Moisés mak ida neʼebé Maromak Jeová hili atu dirije nasaun neʼe. (Êx 33:9) Nuneʼe mós, iha tempu neʼebé Maromak Jeová hili Josué atu troka Moisés, koluna neʼe mosu atu hatudu katak Maromak Jeová rasik mak hili Josué atu dirije nasaun Israel. Neʼe mak dala ikus neʼebé Bíblia temi kona-ba koluna neʼe. (Deut 31:14, 15) Tuir loloos, atu ema Israel bele toʼo rai neʼebé Maromak promete, sira presiza haree oinsá Maromak hatudu dalan ba sira no halo tuir ida-neʼe.

Sira la fiar tan ba buat neʼebé sira haree

Kuandu ema Israel haree koluna neʼe ba dala primeiru, klaru katak sira hakfodak tebes. Maibé, triste katak maski sira haree beibeik milagre neʼe, maibé ikusmai ida-neʼe la toʼo atu halo sira atu tau fiar nafatin ba Maromak Jeová. Dala barak, sira kontra matadalan neʼebé Maromak fó. Kuandu tropa Egiptu nian duni tuir ema Israel, ema Israel la hatudu fiar ba Maromak Jeová nia kbiit atu salva sira. Duké halo ida-neʼe, sira duun Maromak nia atan Moisés katak Moisés lori sira ba mate. (Êx 14:10-12) Depois sira hetan tiha salvasaun liuhusi Tasi Mean, sira muramura hasoru Moisés, Aarão, no Maromak Jeová tanba sira hanoin katak sira la iha ai-han no la iha bee. (Êx 15:22-24; 16:1-3; 17:1-3, 7) No semana balu depois neʼe, sira obriga Aarão atu halo karau-oan osan-mean. Hanoin toʼok kona-ba neʼe! Iha fatin neʼebé ema Israel hela, sira bele haree koluna ahi nian no koluna kalohan nian neʼebé reprezenta Ida neʼebé lori sira sai husi rai-Egiptu. Maski nuneʼe, iha fatin neʼebé hanesan, sira hahú atu adora estátua neʼebé la iha moris, hodi hatete: “Oh, Israel, neʼe mak ó-nia Maromak, ida neʼebé lori ó sai husi rai-Egiptu.” Sin, sira halo “hahalok boot sira neʼebé la hatudu respeitu” duni!​—Êx 32:4; Neem 9:18.

Israel nia hahalok aat sira-neʼe hatudu katak sira la hafolin duni Maromak Jeová nia matadalan! Sira halo ida-neʼe laʼós tanba sira la haree  sinál neʼebé hatudu katak Maromak hamutuk ho sira, maibé sira halo ida-neʼe tanba sira la hafolin no la simu dalan neʼebé Maromak Jeová hatudu ba sira. Sira haree koluna neʼe, maibé sira haluha tiha kona-ba ida-neʼe reprezenta saida. Maski sira-nia hahalok neʼe “hakanek Ida neʼebé Santu ba Israel”, maibé Maromak Jeová ho laran-sadiʼa kontinua hatudu dalan ba sira liuhusi koluna neʼe toʼo tempu neʼebé ema Israel atu tama ba rai neʼebé Maromak promete.​—Sal 78:40-42, 52-54; Neem 9:19.

Haree oinsá Maromak hatudu dalan ba ita ohin-loron

Iha tempu uluk, Maromak la husik nasaun Israel atu buka dalan rasik atu laʼo, no ohin loron nia mós la husik ninia povu atu buka dalan rasik atu tama ba mundu foun. Maromak Jeová kontinua hatudu ho klaru dalan ba ita atu laʼo. Maromak hili Jesus Kristu nuʼudar Ulun-Naʼin atu hatudu dalan ba kongregasaun. (Mt 23:10, MF; Ef 5:23) Jesus fó responsabilidade balu ba atan laran-metin no matenek, atan neʼe mak ema kose-mina sira nuʼudar grupu ida. Tuirmai, grupu neʼe hili katuas sira atu serbí iha kongregasaun kristaun.​—Mt 24:45-47; Tito 1:5-9.

Oinsá mak ita bele hatene loos sé mak atan laran-metin no matenek neʼe? Mai ita haree Jesus rasik nia liafuan kona-ba grupu neʼe, nia dehan: “Neʼe duni, sé loos mak emar laran-metin no matenek neʼebé naʼi haruka atu tau matan ba nia atan sira hodi fó han sira iha tempu loloos? Ksolok ba atan neʼebé, wainhira naʼi fila mai, nia sei hetan nia badinas nuneʼe.”​—Mt 24:45, 46.

Jesus nia liafuan hatudu katak atan neʼe “laran-metin” hodi nunka husik Maromak Jeová no Jesus, no mós nunka husik lia-loos husi Bíblia ka Maromak nia povu. Atan neʼe mós hatudu “matenek” hodi dirije serbisu importante atu haklaken “lia-foun reinu nian” no atu “hanorin” ema atu sai Jesus nia dixípulu. (Mt 24:14; 28:19, 20) Atan laran-metin no matenek fó ai-han espirituál “iha tempu loloos” hodi hametin no haburas ita-nia fiar. Maromak Jeová hatudu katak nia simu atan neʼe hodi haraik bensaun ba ninia povu. Porezemplu, liuhusi atan neʼe Maromak halo ninia povu aumenta ba beibeik, fó matadalan kuandu sira halo desizaun importante, ajuda atu komprende lia-loos husi Bíblia diʼak liután, proteje sira husi sira-nia inimigu, no halo sira sente dame iha laran.​—Isa 54:17; Flp 4:7.

Halo tuir dalan neʼebé Maromak hatudu

Oinsá mak ita bele hatudu katak ita hafolin Maromak nia matadalan? Apóstolu Paulo dehan: “Rona imi-nia naʼi-ulun sira no halo tuir buat neʼebé sira dehan ba imi.” (Ebr 13:17) Dala ruma, karik la fasil atu halo ida-neʼe. Porezemplu, hanoin toʼok katak ita mak ema Israel ida neʼebé moris iha Moisés nia tempu. Depois ita laʼo tiha ba tempu balu, koluna neʼe para. Tempu hira mak koluna neʼe sei para iha fatin neʼe? Loron ida? Semana ida? Fulan balu? Karik ita hanoin: ‘Haʼu sei hasai haʼu-nia sasán hotu ka lae?’ Ulukliu, karik ita hasai deʼit sasán uitoan neʼebé ita presiza. Depois loron balu liutiha, tanba sai ulun-moras ona hodi buka sasán balu, ita komesa hasai sasán hotu. Maibé, depois ita foin hasai hotu ita-nia sasán, ita haree katak koluna kalohan nian komesa hiʼit saʼe, no ita presiza haloot fali ita-nia sasán hotu! Klaru katak ida-neʼe laʼós buat neʼebé fasil. Maski nuneʼe, ema Israel presiza “muda sai kedas depois neʼe”.​—Núm 9:17-22.

Entaun, saida mak ita halo kuandu ita simu matadalan husi Maromak? Ita hakaʼas an atu halo tuir “kedas depois neʼe” ka lae? Ka, ita kontinua halo deʼit buat neʼebé ita toman atu halo? Ita hatene didiʼak matadalan foun neʼebé ita simu ka lae? Porezemplu, matadalan kona-ba halaʼo estudu Bíblia, haklaken ba ema neʼebé koʼalia língua neʼebé la hanesan ho ita-nian, hola parte beibeik iha adorasaun família nian, serbisu hamutuk ho Grupu neʼebé Komunika ho Ospitál sira, ka matadalan kona-ba oinsá atu hatudu hahalok diʼak iha reuniaun boot sira. Liután neʼe, ita mós hatudu katak ita hafolin Maromak nia matadalan hodi simu ninia konsellu sira. Kuandu ita halo desizaun neʼebé importante, ita hakarak buka matadalan husi Maromak Jeová no ninia organizasaun duké fiar deʼit ba ita-nia matenek rasik. Hanesan labarik buka protesaun iha ninia inan-aman kuandu anin huu makaʼas no rai-tarutu, nuneʼe ita mós buka protesaun iha  Maromak Jeová nia organizasaun kuandu problema mundu neʼe nian kona ita hanesan anin neʼebé boot.

Klaru katak ema neʼebé tau matan ba Maromak nia organizasaun iha rai mak ema neʼebé sala-naʼin, hanesan ho Moisés. Maski nuneʼe, iha tempu uluk, koluna kalohan nian hatudu ho klaru katak Maromak mak hili no apoia Moisés. Hanoin-hetan mós katak ema Israel ida-idak la halo desizaun rasik kona-ba tempu neʼebé sira bele komesa atu muda ba fatin seluk. Bíblia dehan katak povu sira “tuir mandamentu neʼebé Jeová fó liuhusi Moisés”. (Núm 9:23) Nuneʼe, Maromak uza Moisés atu dirije ninia povu, no karik Moisés mak fó sinál ba povu atu muda.

Ohin loron, Maromak Jeová nia atan laran-metin no matenek fó sinál neʼebé klaru kona-ba bainhira mak ita presiza atu halo mudansa ruma. Oinsá mak atan neʼe halo ida-neʼe? Atan neʼe halo ida-neʼe liuhusi informasaun iha Livru Haklaken, iha Ita-nia Serbisu Kristaun, iha livru foun sira, no iha diskursu iha reuniaun boot sira. Atan neʼe mós fó matadalan ba kongregasaun sira liuhusi katuas sira neʼebé iha knaar atu vizita kongregasaun, liuhusi karta sira, no hodi fó treinu ba irmaun sira neʼebé iha responsabilidade iha kongregasaun.

Ita haree ho klaru oinsá mak Maromak hatudu dalan ba ita iha loron ikus sira-neʼe ka lae? Maromak Jeová uza ninia organizasaun atu hatudu dalan ba ninia povu atu laʼo ho seguru liuhusi Satanás nia mundu aat neʼebé hanesan rai-fuik maran. Nuneʼe, ita haksolok ho unidade no domin.

Kuandu povu Israel toʼo rai neʼebé Maromak promete ba sira, Josué hatete ba sira: “Imi hatene ho imi-nia laran tomak no ho imi-nia moris tomak katak husi liafuan diʼak hotu neʼebé Jeová, imi-nia Maromak, hatete ba imi, la iha ida mak la sai loos. Sira hotu sai loos ba imi.” (Jos 23:14) Nuneʼe mós ohin loron, Maromak nia povu sei tama duni ba mundu foun neʼebé Maromak promete nanis ona. Maibé, kona-ba se ita ida-idak tama ka lae, ida-neʼe depende ba oinsá ita ho haraik-an halo tuir Maromak nia matadalan. Tan neʼe, mai ita hotu hakaʼas an nafatin atu haree oinsá Maromak Jeová hatudu dalan mai ita!

[Dezeñu iha pájina 5]

Ohin loron, Maromak Jeová nia organizasaun hatudu dalan mai ita

Livru foun sira

Eskola oioin

Ita hetan treinu iha reuniaun atu bá haklaken