Serbí Maromak Jeová ho sériu

“Hanoin nafatin kona-ba . . . buat sira neʼebé sériu.”—FLP 4:8, MF.

1, 2. Tanbasá mak ema barak iha mundu neʼe buka deʼit atu halo atividade neʼebé fó ksolok ba sira? Ida-neʼe hamosu pergunta saida deʼit?

ITA moris iha tempu neʼebé nakonu ho susar no problema, no ida-neʼe aat liu fali tempu uluk. Ema barak neʼebé la iha relasaun diʼak ho Maromak la hatene oinsá atu tahan hasoru susar oioin neʼebé mosu iha “loron ikus sira”. (2 Tim 3:1-5) Maski sira hakaʼas an atu tahan hasoru susar loroloron nian, maibé ladún hetan susesu. Tan neʼe, sira barak buka halimar oioin hodi fó ksolok ba sira-nia an no hodi haluha susar sira-neʼe.

² Ema kristaun presiza kuidadu atu labele tuir deʼit ema seluk nia hahalok hodi tau uluk hakarak atu hetan ksolok. Entaun, oinsá mak ita bele hasees an husi ida-neʼe? Neʼe katak ita labele halo atividade sira neʼebé bele fó ksolok ba ita ka lae? Oinsá mak ita bele tetu didiʼak kona-ba atividade neʼebé fó ksolok mai ita no ita-nia responsabilidade nuʼudar ema kristaun? Eskritura saida deʼit mak bele fó matadalan ba ita atu hanoin uluk kona-ba buat neʼebé importante liu, no iha tempu hanesan la sai sériu demais?

Buka buat neʼebé importante liu

3, 4. Oinsá mak eskritura sira ajuda ita atu nafatin hanoin kona-ba buat neʼebé sériu?

³ Klaru katak iha mundu neʼe, buat neʼebé importante liu ba ema mak “buka deʼit sira rasik nia ksolok”. (2 Tim 3:4) Mundu nia hanoin kona-ba hakarak deʼit atu goza moris bele kona ita no estraga ita-nia relasaun ho Maromak Jeová. (Prov 21:17) Iha apóstolu Paulo nia karta ba Timóteo no Tito, nia fó konsellu diʼak kona-ba hanoin buat neʼebé importante liu no sériu. Hodi halo tuir konsellu neʼe bele ajuda ita atu la simu mundu nia hanoin kona-ba buka deʼit moris haksolok.​—Lee 1 Timoteo 2:2, MF; * Tito 2:2-8.

⁴ Tinan atus balu antes neʼe, Salomão hakerek katak diʼak liu atu uza tempu atu hanoin kona-ba buat neʼebé importante liu duké buka deʼit ksolok. (Ecle 3:4; 7:2-4) Sin, tanba ita-nia moris mak badak deʼit, entaun ita presiza “hakaʼas an” atu hetan salvasaun. (Lc 13:24) Tan neʼe, ita presiza kontinua atu hanoin kona-ba “buat sira neʼebé sériu”. (Flp 4:8, 9, MF) Neʼe katak ita presiza atu hanoin didiʼak kona-ba buat hotu neʼebé ita tenke halo iha ita-nia moris nuʼudar ema kristaun.

5. Ema kristaun presiza hakaʼas an atu halo saida iha sira-nia moris?

⁵ Porezemplu, ema kristaun sente katak sira presiza serbisu ho badinas hodi banati-tuir Maromak Jeová no Jesus. (Joao 5:17) Tan neʼe, ema barak gaba sira-nia badinas no bele tau fiar ba sira. Liuliu família nia ulun sira hakarak atu serbisu makaʼas hodi tau matan ba família. Tuir loloos, se sira la tau matan didiʼak ba sira-nia família, neʼe hanesan sira ‘hewai tiha sira-nia fiar’ ba Maromak Jeová!​—1 Tim 5:8.

Hetan ksolok iha ita-nia adorasaun

6. Saida mak hatudu katak ita-nia adorasaun ba Maromak Jeová importante tebes?

⁶ Horiuluk kedas, Maromak Jeová sempre sente katak importante atu adora nia iha dalan neʼebé loos. Porezemplu, kuandu ema Israel la  adora tan Maromak Jeová iha dalan neʼebé loos, sira hetan rezultadu neʼebé aat tebes. (Jos 23:12, 13) Iha apóstolu sira-nia tempu, ema kristaun presiza hakaʼas an duni atu proteje adorasaun loos husi hanorin no hahalok neʼebé la loos. (2 Joao 7-11; Apok 2:14-16) Ohin loron mós, ema kristaun loos haree sira-nia adorasaun nuʼudar buat neʼebé importante tebes.​—1 Tim 6:20.

7. Oinsá mak Paulo prepara ba ninia serbisu haklaken?

⁷ Ita-nia serbisu haklaken bele fó ksolok duni mai ita. Maibé, hodi nafatin sente haksolok iha serbisu haklaken, ita presiza hafolin no prepara nanis atu halo serbisu neʼe ho didiʼak. Paulo esplika katak nia hanoin didiʼak kona-ba ema sira neʼebé nia hanorin. Nia hakerek: “Haʼu sai tiha buat hotu ba ema hotu, atu bele manán balun. Buat hirak-neʼe hotu haʼu halo tan evanjellu, atu haʼu mós bele hetan liman-rohan iha nia.” (1 Kor 9:22, 23) Paulo sente haksolok hodi ajuda ema atu hakbesik ba Maromak, no nia hanoin didiʼak kona-ba oinsá nia bele ajuda ninia rona-naʼin tuir sira ida-idak nia presiza. Tan neʼe, nia bele fó laran-manas no ajuda sira atu hatene tanbasá sira adora Maromak Jeová.

8. (a) Oinsá mak ita sente kona-ba ema neʼebé ita hanorin? (b) Tanbasá mak estuda Bíblia ho ema seluk bele halo ita sente haksolok?

⁸ Saida mak hatudu katak Paulo haree ninia serbisu haklaken nuʼudar buat neʼebé importante? Nia prontu atu “sai atan” ba Maromak Jeová no mós ba ema sira neʼebé hakarak rona ba mensajen lia-loos nian. (Rom 12:11; 1 Kor 9:19) Kuandu ita hanorin ema kona-ba Maromak nia Liafuan iha ema nia uma, iha reuniaun kristaun sira, ka durante Adorasaun Família nian, ita sente ka lae katak ita iha responsabilidade atu ajuda sira? Karik ita sente katak hodi estuda beibeik Bíblia ho ema seluk mak buat neʼebé todan mai ita. Tuir loloos, hodi estuda ho ema ita presiza uza ita-nia tempu rasik neʼebé karik ita hakarak uza atu halo buat seluk. Maibé ita hakarak halo tuir Jesus nia liafuan neʼebé dehan: “Diʼak liu fó liu fali simu,” loos ka lae? (Apos 20:35) Hodi hola parte atu hanorin ema kona-ba dalan atu hetan salvasaun sei halo ita sente haksolok duni, no ida-neʼe la bele kompara ho ksolok neʼebé ita hetan kuandu halo serbisu seluk.

9, 10. (a) Sai ema neʼebé sériu, neʼe dehan katak ita labele halimar no labele iha tempu diʼak ho ema seluk ka lae? Esplika toʼok. (b) Saida mak sei ajuda katuas kristaun sira atu ema la taʼuk atu hakbesik ba sira?

⁹ Sai ema neʼebé sériu, neʼe la dehan katak ita labele halimar no labele iha tempu diʼak ho ema seluk. Jesus hatudu ezemplu diʼak kona-ba fahe tempu atu hanorin ema no atu halimar ka atu haburas relasaun neʼebé metin ho ema seluk nuʼudar belun. (Lc 5:27-29; Joao 12:1, 2) Sai ema sériu mós la dehan katak ita sempre hatudu oin-buis. Se Jesus mak ema neʼebé sériu demais karik, ema sei taʼuk atu hakbesik ba nia. Tuir loloos, labarik sira mós gosta atu hakbesik ba Jesus. (Mc 10:13-16) Oinsá mak ita bele banati-tuir Jesus hodi tetu didiʼak kona-ba buat hotu?

¹⁰ Irmaun ida koʼalia kona-ba katuas kristaun ida, hodi dehan: “[Katuas neʼe] rasik hakaʼas an tebes atu halo buat hotu ho didiʼak, maibé nia nunka hein katak ema seluk halo buat hotu ho loos.” Ita mós ema hanesan neʼe ka lae? Klaru katak dala ruma la sala atu ita hein katak ema seluk bele halo buat ruma neʼebé ita hakarak. Porezemplu, inan-aman bele ajuda oan sira atu laʼo ba oin hodi husu sira atu halo buat oioin iha sira-nia moris, tuir sira-nia tinan no matenek. Nuneʼe mós, katuas kristaun sira karik hakarak fó laran-manas ba ema ida iha kongregasaun laran atu laʼo ba oin no fó ideia balu kona-ba oinsá sira bele halo ida-neʼe. Liután neʼe, se katuas kristaun ida iha hanoin neʼebé loos kona-ba ninia an, ema iha kongregasaun sei la taʼuk atu hakbesik ba nia. (Rom 12:3) Irmán ida hatete: “Haʼu lakohi katuas kristaun ida haree buat hotu nuʼudar halimar deʼit. Maibé, se nia sempre sériu demais, karik difisil ba ema atu hakbesik ba nia.” Irmán ida seluk hatete katak nia sente katuas balu “halo ema sente taʼuk tanba sira mak ema sériu tebes”. Sin, importante ba katuas sira atu la halakon ksolok neʼebé maluk kristaun sira iha, tanba ita  hotu serbí Jeová, “Maromak neʼebé kontente”.​—1 Tim 1:11, MF.

Hetan responsabilidade iha kongregasaun

11. “Hakaʼas an” atu serbí iha kongregasaun envolve saida?

¹¹ Kuandu Paulo fó laran-manas ba mane sira iha kongregasaun atu hakaʼas an atu hetan responsabilidade boot liután, ida-neʼe la dehan katak Paulo hakarak sira atu sai ema-boot. Tuir loloos, nia hatete: “Se mane ida hakaʼas an atu hetan knaar nuʼudar katuas iha kongregasaun, nia hakarak halo serbisu neʼebé diʼak loos.” (1 Tim 3:1, 4, MF) Liafuan “hakaʼas an” hatudu katak mane kristaun sira presiza haburas hakarak atu serbisu makaʼas atu bele iha hahalok neʼebé espíritu lori mai hodi sira bele serbí sira-nia maluk kristaun. Se irmaun ida hetan ona batizmu ba tinan ida no kumpre ona kritériu husi Bíblia kona-ba atan ba kongregasaun, hanesan hakerek iha 1 Timoteo 3:8-13, nia bele simu knaar neʼe. Versíkulu 8 [MF] dehan ho klaru katak “atan ba kongregasaun mós presiza sériu”.

12, 13. Esplika toʼok dalan oioin atu irmaun joven sira hatudu katak sira hakaʼas an atu hetan responsabilidade.

¹² Ita mak irmaun ida neʼebé besik ona tinan ruanulu no batizmu ona ka lae? Se nuneʼe, iha dalan balu neʼebé Ita bele hakaʼas an atu hetan responsabilidade iha kongregasaun. Dalan ida mak hadiʼa dalan neʼebé Ita haklaken. Porezemplu, Ita kontente atu halo serbisu haklaken ho maluk hotu ho idade neʼebé la hanesan ka lae? Ita koko atu hetan ema ida no estuda Bíblia ho nia ka lae? Kuandu Ita halaʼo estudu Bíblia hodi halo tuir matadalan sira neʼebé Ita simu iha reuniaun kristaun sira, ida-neʼe sei aumenta Ita-nia matenek atu hanorin. Liután neʼe, ida-neʼe sei ajuda Ita atu hanoin ema neʼebé aprende kona-ba Maromak Jeová nia dalan. No se ema neʼe sente katak nia presiza troka buat ruma iha ninia moris, Ita mós sei aprende atu hatudu pasiénsia no matenek hodi ajuda nia atu halo tuir Bíblia nia matadalan.

¹³ Imi irmaun joven sira bele fó imi-nia tempu hodi bele ajuda ferik-katuas sira iha kongregasaun ka lae? Imi mós bele hatudu katak imi hafolin imi-nia Reuniaun-Fatin, hodi ajuda atu halo fatin neʼe moos nafatin ka lae? Kuandu imi prontu atu ajuda iha dalan oioin, ida-neʼe hatudu katak imi haree imi-nia serbisu ba Maromak nuʼudar buat neʼebé importante tebes. Hanesan Timóteo, imi bele aprende atu tau matan ba kongregasaun nia presiza ho laran.​—Lee Filipe 2:19-22.

14. Oinsá mak katuas sira bele “koko” irmaun joven sira atu serbí iha kongregasaun?

¹⁴ Diʼak atu katuas kristaun sira fó knaar ba irmaun joven sira neʼebé hakaʼas an atu ‘husik sira-nia hakarak foin-saʼe nian’ no neʼebé “buka moris loloos, iha fiar, iha domin no dame” no iha hahalok diʼak seluk. (2 Tim 2:22) Hodi fó knaar ba sira, ida-neʼe bele “koko sira” atu hatene se sira bele ka lae kaer responsabilidade ruma iha kongregasaun laran. No hodi halo nuneʼe, “ema hotu bele haree oinsá [sira] laʼo ba oin”.​—1 Tim 3:10; 4:15.

Hatudu respeitu iha kongregasaun no iha família laran

15. Tuir 1 Timoteo 5:1, 2, oinsá mak ita bele hatudu respeitu ba ema seluk?

¹⁵ Sériu mós inklui hatudu respeitu ba ita-nia irmaun-irmán sira. Apóstolu Paulo fó  konsellu ba Timóteo kona-ba hatudu respeitu ba ema seluk. (Lee 1 Timoteo 5:1, 2.) Ida-neʼe importante, liuliu kuandu irmaun no irmán koʼalia ba malu. Diʼak atu ita banati-tuir Job nia ezemplu kona-ba hatudu respeitu ba feto sira. Job hatudu respeitu, liuliu ba ninia kaben, no nia hakaʼas an atu la hateke ba feto seluk ho hakarak atu halo sala-foʼer. (Jó 31:1) Hatudu respeitu ba irmaun-irmán sira inklui la hatudu sentimentu gosta ba ema neʼebé laʼós ita-nia kaben, no la halo buat ruma neʼebé halo sira sente la diʼak atu besik ba ita. No mós, importante tebes atu hatudu respeitu ba malu kuandu ema naʼin-rua namora ho planu atu kaben. Ema kristaun neʼebé sériu sei nunka halimar ho ema seluk nia sentimentu.​—Prov 12:22.

16. Oinsá mak mundu nia hanoin kona-ba laʼen no aman nia knaar la hanesan ho buat neʼebé Bíblia fó sai?

¹⁶ Ita mós presiza atu hafolin knaar sira neʼebé Maromak fó ba ema ida-idak iha família laran nuʼudar buat neʼebé importante. Satanás nia mundu neʼe la hafolin laʼen no aman nia knaar iha família laran. Filme, livru no buat seluk hatún beibeik família nia ulun hodi goza sira no la hatudu respeitu. Maibé, Bíblia fó sai katak Maromak fó responsabilidade boot ba laʼen sira nuʼudar “feen nia ulun”.​—1 Kor 11:3; Ef 5:23.

17. Esplika toʼok oinsá mak hola parte iha adorasaun família nian hatudu katak ita hafolin ita-nia responsabilidade iha família laran.

¹⁷ Maski laʼen tenke tau matan ba ninia família nia presiza loroloron nian, maibé se nia la ajuda família atu iha relasaun diʼak ho Maromak, neʼe katak nia la halaʼo ninia responsabilidade ho matenek. (Deut 6:6, 7) Tan neʼe, 1 Timoteo 3:4 dehan katak família nia ulun neʼebé hakarak atu simu responsabilidade iha kongregasaun laran tenkesér “tau matan didiʼak ba nia família hodi hanorin nia oan sira atu halo tuir nia haruka no sai ema ho hahalok diʼak”. Entaun, diʼak atu husu ba ita-nia an: ‘Haʼu uza tempu beibeik atu halaʼo adorasaun nuʼudar família ka lae?’ Triste katak, dala ruma feen kristaun balu presiza husu ba sira-nia laʼen atu kaer sira-nia responsabilidade atu ajuda família halaʼo adorasaun ba Maromak. Nuneʼe, importante ba laʼen ida-idak atu hafolin sira-nia responsabilidade iha família laran. Klaru katak importante mós ba feen kristaun sira atu apoia arranju Adorasaun Família nian hodi arranju neʼe bele laʼo ho diʼak.

18. Oinsá mak labarik sira bele aprende atu hafolin buat neʼebé importante liu?

¹⁸ Labarik sira mós presiza atu hanoin kona-ba buat neʼebé importante liu iha sira-nia moris. (Ecle 12:1) La sala atu hanorin labarik kiʼik atu serbisu makaʼas, hodi halo serbisu oioin iha uma laran tuir sira-nia tinan no sira-nia matenek. (Lam 3:27) Kuandu Liurai David sei labarik hela, nia aprende atu sai bibi-atan neʼebé diʼak. Nia mós aprende atu toka múzika no hakerek knananuk. Ninia matenek neʼe lori nia atu serbí Israel nia liurai ida. (1 Sam 16:11, 12, 18-21) Klaru katak kuandu David sei kiʼik, nia  gosta atu halimar, maibé nia mós aprende buat oioin neʼebé ikusmai nia bele uza atu hahiʼi Maromak Jeová. Ninia esperiénsia nuʼudar bibi-atan mós ajuda nia atu ukun nasaun Israel ho pasiénsia. Imi joven sira, saida deʼit mak imi aprende daudauk neʼebé sei ajuda imi atu serbí imi-nia Kriadór no prepara imi atu kaer responsabilidade iha aban-bainrua?

Importante atu iha hanoin neʼebé loos

19, 20. Ita presiza hakaʼas an kona-ba saida?

¹⁹ Ita hotu presiza hanoin kona-ba ita-nia an iha dalan neʼebé loos hodi la sai sériu demais. Ita lakohi atu sai “ema neʼebé loos liu”. (Ecle 7:16) Kuandu ita hamnasa uitoan no la sériu demais, ida-neʼe bele hamenus estrese iha uma laran, iha serbisu-fatin, no mós bainhira ita hamutuk ho maluk kristaun sira. Ema ida-idak iha família laran tenke kuidadu atu la buka deʼit ema seluk nia sala, tanba ida-neʼe bele halakon dame iha uma laran. Ita hakarak ita-nia uma atu sai fatin neʼebé seguru no hakmatek. Iha kongregasaun laran, ita hotu bele ransu malu hodi koʼalia iha dalan neʼebé fó kmaan ba malu, no haksolok hodi simu hanorin neʼebé irmaun sira hatoʼo ho laran-diʼak.​—2 Kor 13:10; Ef 4:29.

²⁰ Ita hela iha mundu neʼebé la hafolin Maromak Jeová no ninia ukun-fuan sira. Maibé, Maromak Jeová nia povu haree sira-nia laran-metin ba Maromak nuʼudar buat neʼebé importante liu. Ita haksolok tebes atu sai parte husi povu ida neʼebé adora Maromak Jeová ho sériu! Mai ita hakaʼas an atu iha hanoin neʼebé sériu kona-ba ita-nia moris no ita-nia adorasaun ba Maromak.

[Nota–rodapé]

Oinsá ita hatán?

• Tanbasá mak importante atu la simu mundu nia hanoin kona-ba buka deʼit moris haksolok?

• Oinsá mak ita bele haksolok nafatin maski ita presiza sériu iha ita-nia serbisu haklaken?

• Oinsá mak ita hatudu katak ita sériu kona-ba kaer responsabilidade sira?

• Tanbasá mak importante atu hatudu respeitu ba ita-nia irmaun-irmán sira no ita-nia família?

[Pergunta estudu nian]

[Dezeñu iha pájina 12]

Laʼen tenke tau matan ba família nia presiza no mós ajuda família atu adora Maromak