Família kristaun, hein hela bá
Família kristaun, hein hela bá
“Imi hein hela bá, basá iha oras neʼebé imi la hanoin kona, Oan-Mane sei hiʼit an mai.”—LC 12:40.
1, 2. Tanbasá mak ita hakarak simu ho laran Jesus nia konsellu atu “hein hela bá”?
“WAINHIRA Oan-Mane mai iha nia glória” no tesi lia hodi “haketak ema sira”, saida mak sei akontese ba Ita no Ita-nia família? (Mt 25:31, 32) Tanba ida-neʼe sei akontese iha oras neʼebé ita la hanoin kona, importante tebes ba ita atu simu ho laran Jesus nia konsellu atu “hein hela bá”!—Lc 12:40.
2 Iha lisaun antes neʼe, ita koʼalia kona-ba oinsá ema ida-idak iha família laran bele halaʼo sira-nia responsabilidade hodi família tomak nafatin matan-moris. Agora mai ita koʼalia kona-ba buat seluk tan neʼebé ita bele halo atu ita-nia família nafatin hakbesik ba Maromak.
Halo ita-nia matan “moos”
3, 4. (a) Família kristaun sira tenke matan-moris atu labele halo saida? (b) Oinsá mak ita bele halo ita-nia matan “moos” nafatin?
3 Hodi hein hela ba tempu neʼebé Kristu atu mai, família sira tenke matan-moris atu la husik buat naran deʼit dada sira-nia atensaun husi sira-nia adorasaun ba Maromak. Tanba família kristaun barak monu tiha ba lasu kona-ba buka uluk rikusoin no sasán, hanoin toʼok buat neʼebé Jesus hatete kona-ba halo ita-nia matan “moos”. (Lee Lucas 11:34.) Hanesan ahi-oan bele fó naroman ba ita-nia dalan hodi ita bele haree moos no la monu, buat neʼebé ita haree liuhusi ita-nia “laran nia matan” bele fó naroman ba ita-nia moris hodi ajuda ita atu hatudu hahalok diʼak no labele monu.—Ef 1:18.
4 Oinsá mak ita bele halo ita-nia laran nia matan moos nafatin? Atu halo ita-nia matan moos, ita tenke hanoin deʼit kona-ba buat neʼebé importante liu. Duké halaʼo ita-nia moris hodi buka uluk rikusoin no sasán no hanoin demais kona-ba ita-nia família nia presiza loron-loron nian, ita halo ita-nia matan hateke liuliu ba buat neʼebé kona ita-nia relasaun ho Maromak. (Mt 6:33) Neʼe katak ita kontente ho buat neʼebé ita iha ona, no ita tau uluk Maromak nia serbisu iha ita-nia moris.—Ebr 13:5.
5. Oinsá mak feto joven ida hatudu katak nia halo nia “matan” hateke deʼit ba Maromak nia serbisu?
5 Bainhira ita treinu ita-nia oan sira atu halo sira-nia matan moos nafatin, ita bele hetan rezultadu neʼebé kapás tebes! Hanoin toʼok kona-ba ezemplu husi feto joven ida iha rai-Etiópia. Kuandu nia ramata eskola, ninia rezultadu diʼak tebes toʼo ema hakarak fó bolsa-estudu ba nia atu bá eskola boot. Maibé, tanba nia halo nia matan moos hodi hanoin liu kona-ba Maromak Jeová nia serbisu, nia la simu bolsa-estudu neʼe. Lakleur, ema oferese serbisu ho saláriu hamutuk dolar 4.200 fulan-fulan, neʼe osan boot tebes iha ninia rai. Maibé feto neʼe nia “matan” hateke deʼit ba serbisu pioneiru. Nia la presiza husu ninia inan-aman kona-ba ninia desizaun atu la simu serbisu ho saláriu boot neʼe. Entaun oinsá mak inan-aman sente kuandu sira hatene kona-ba sira-nia oan nia desizaun? Sira sente haksolok no gaba nia tanba nia halo desizaun diʼak neʼe!
6, 7. Ita tenke “matan-moris” kona-ba perigu saida?
6 Iha Lucas 11:34, Jesus ho klaru fó avizu kona-ba hahalok kaan-teen. Nia kompara matan “moos” ho matan “aat”. Liafuan neʼebé tradús “aat” mós iha arti katak laran-moras ka kaan-teen. Oinsá mak Maromak Jeová sente kona-ba hahalok kaan-teen ka karak-teen? Bíblia hatete: “Keta husik ema ida iha imi leet temi sala-foʼer eh buat foʼer tomak, eh laran karak-teen [ka, kaan-teen] nian.”—Ef 5:3.
7 Maski fasil atu hatene kuandu ema seluk mak hatudu hahalok kaan-teen, maibé dala ruma susar atu hatene se ita rasik hatudu hahalok neʼe. Nuneʼe, diʼak atu halo tuir Jesus nia konsellu, neʼebé dehan: “Matan-moris bá no kuidadu imi-nia an atu labele kaan buat naran deʼit.” (Lc 12:15, MF) Atu halo nuneʼe, ita tenke hanoin didiʼak kona-ba ita rasik nia hanoin no hakarak sira. Família kristaun sira tenke hanoin didiʼak kona-ba oinsá mak sira gasta sira-nia tempu no osan atu hola sasán no atu halo atividade halimar nian.
8. Oinsá mak ita bele “matan-moris” kuandu ita hakarak hola sasán ruma?
8 Antes ita-nia família hola sasán ruma, ita tenke hanoin laʼós deʼit kona-ba se ita-nia osan toʼo ka lae, maibé ita mós presiza hanoin kona-ba buat tuirmai neʼe: ‘Haʼu iha tempu atu uza sasán neʼe no atu tau matan ba sasán neʼe ka lae? Haʼu presiza gasta oras ka loron hira atu aprende uza sasán neʼe?’ Imi labarik no joven sira, labele fiar deʼit iklan sira hodi husu inan-aman atu hola roupa ka sasán jeitu neʼebé karun tebes. Ita-nia família tomak tenke kontrola an. No mós, hanoin toʼok kona-ba neʼe: ‘Se haʼu-nia família hola sasán ruma neʼebé ami hakarak, ida-neʼe bele ajuda ami atu hein hela ba Oan-Mane nia hiʼit an mai ka lae?’ Tau fiar ba Maromak Jeová nia promete: “Haʼu sei la husik ka hadook an husi imi.”—Ebr 13:5.
Halo planu atu laʼo ba oin
9. Oinsá mak halo planu kona-ba laʼo ba oin iha lia-loos bele ajuda família?
9 Dalan ida tan neʼebé família sira bele hametin sira-nia fiar no haburas sira-nia relasaun ho Maromak mak halo planu nuʼudar família kona-ba laʼo ba oin iha lia-loos. Hodi halo nuneʼe bele ajuda família sira atu buka-hatene se sira kontinua atu halo kontente Maromak Jeová ka lae. Ida-neʼe mós ajuda sira atu buka-hatene se atividade ruma iha duni folin ka lae.—Lee Filipe 1:10.
10, 11. Planu saida deʼit mak Ita-nia família halo daudauk? Planu saida deʼit mak Ita hakarak halo iha futuru?
10 Hodi halo planu neʼebé fasil atu kumpre, neʼebé envolve ema hotu iha família laran, bele lori rezultadu diʼak. Porezemplu, planu atu iha toman atu lee no koʼalia kona-ba eskritura loroloron nian. Hodi rona buat neʼebé ema iha família hatete bele ajuda família nia ulun atu buka-hatene oinsá ema ida-idak laʼo ba oin. Planu atu haburas toman atu lee Bíblia hamutuk nuʼudar família fó oportunidade ba labarik sira atu hadiʼa dalan neʼebé sira lee no ajuda sira atu hatene diʼak liután lia-loos husi Bíblia. (Sal 1:1, 2) No ita bele halo planu atu hatoʼo orasaun neʼebé diʼak liután ka lae? Planu ida tan neʼebé diʼak mak haburas liután hahalok furak sira neʼebé espíritu lori mai. (Gal 5:22, 23) Ka, oinsá ho planu atu haburas toman atu hatudu interese ba ema seluk kuandu ita bá haklaken? Hodi hakaʼas an nuʼudar família atu halo nuneʼe sei ajuda ita-nia oan sira atu haburas laran-sadiʼa, no karik ida-neʼe bele mós ajuda sira atu haburas sira-nia hakarak atu serbí nuʼudar pioneiru ka misionáriu.
11 Diʼak se ita-nia família bele tuur no koʼalia hamutuk kona-ba planu balu neʼebé ita hakarak halo tuir, loos ka lae? Ita-nia família bele halo planu atu uza tempu barak liután ba serbisu haklaken ka lae? Se ita sente taʼuk atu haklaken uma ba uma, ka atu haklaken iha dalan seluk tan, ita bele hakaʼas an atu manán problema neʼe ka lae? Oinsá ho haklaken iha fatin neʼebé presiza liután haklaken-naʼin sira? Ema ida iha ita-nia família bele aprende língua seluk atubele haklaken ba ema husi rai seluk ka lae?
12. Oinsá família nia ulun bele ajuda nia família atu hametin liután sira-nia relasaun ho Maromak?
12 Nuʼudar família nia ulun, buka-hatene saida mak Ita-nia família tenke halo atu hametin liután sira-nia relasaun ho Maromak Jeová. Tuirmai, halo planu balu neʼebé tuir sira-nia presiza. Tetu didiʼak atu la halo planu neʼebé susar liu atu kumpre, maibé halo planu neʼebé tuir família nia situasaun no kapasidade. (Prov 13:12) La haluha katak atu kumpre planu sira neʼebé diʼak, neʼe presiza tempu. Entaun, uza ho matenek Ita-nia tempu maski ida-neʼe katak Ita presiza hamenus tempu atu haree televizaun. (Ef 5:15, 16) Hakaʼas an atu kumpre planu neʼebé Ita halo ba Ita-nia família. (Gal 6:9) Kuandu família koko makaʼas atu kumpre sira-nia planu atu hametin liután sira-nia relasaun ho Maromak, ‘ema hotu bele haree oinsá sira laʼo ba oin’.—1 Tim 4:15.
Halaʼo beibeik Adorasaun Família nian
13. Iha tinan 2009, ita iha mudansa saida kona-ba reuniaun semana-semana nian? Diʼak atu husu pergunta saida deʼit ba ita-nia an?
13 Komesa husi fulan-Janeiru 2009, ita iha mudansa kona-ba reuniaun semana-semana nian, neʼebé ajuda família sira atu “hein hela” ba tempu neʼebé Oan-Mane sei mai. Uluk ita iha reuniaun kongregasaun nian ba dala tolu iha semana ida nia laran, maibé hodi halo reuniaun Grupu Estudu Livru hamutuk ho Eskola Serbisu Kristaun no Reuniaun Serbisu, agora ita iha reuniaun ba dala rua deʼit. Arranju foun furak neʼe fó oportunidade ba família kristaun sira atu hametin sira-nia fiar hodi uza tempu atu halo adorasaun nuʼudar família semana-semana. Nuʼudar tempu balu liu daudauk, diʼak atu husu ba ita-nia an: ‘Haʼu aproveita oportunidade neʼe atu halo Adorasaun Família nian ka atu estuda Bíblia mesak ka lae? Haʼu sente katak arranju foun neʼe ajuda duni haʼu ka lae?’
14. (a) Saida mak razaun importante liu atu halaʼo Adorasaun Família nian ka estuda mesak? (b) Tanbasá mak importante atu fahe tempu ba estuda Bíblia?
14 Razaun importante liu tansá mak ita halaʼo Adorasaun Família nian ka estuda mesak mak atu hakbesik liután ba Maromak. (Tgo 4:8) Kuandu ita uza tempu atu estuda Bíblia no hatene diʼak liután kona-ba ita-nia Kriadór, ida-neʼe hametin liután ita-nia relasaun ho nia. Nuʼudar ita hakbesik liután ba Maromak Jeová, ida-neʼe sei book ita atu hadomi nia liután. Sin, ita hakarak hadomi nia ‘ho neon ho laran tomak, ho ita-nia kbiit tomak, ho ita-nia hanoin tomak’. (Lc 10:27) Liután neʼe, Ita hakarak duni atu halo tuir Maromak no banati-tuir nia, loos ka lae? (Ef 5:1) Se nuneʼe, halaʼo beibeik Adorasaun Família nian mak xave neʼebé importante atu ajuda ema ida-idak iha ita-nia família atu “hein hela” ba ‘terus boot’ neʼebé Bíblia fó-hatene nanis ona. (Mt 24:21) Sin, importante atu halo nuneʼe hodi bele hetan salvasaun.
15. Hodi fahe tempu semana-semana atu halaʼo Adorasaun Família, oinsá mak ida-neʼe book ema ida-idak iha família laran?
15 Iha razaun ida tan atu halaʼo Adorasaun Família nian. Neʼe mak atu ajuda ema ida-idak iha família laran atu hakbesik liután ba malu. Kuandu família gasta tempu hamutuk semana-semana atu koʼalia kona-ba Maromak, neʼe book família atu hadomi no hafolin malu liután. Kuandu kaben-naʼin sira koʼalia ho matan nabilan kona-ba buat foun neʼebé sira foin hetan hodi estuda Bíblia hamutuk, ida-neʼe sei hametin duni sira-nia unidade! (Lee Eclesiastes 4:12. *) Inan-aman neʼebé halo adorasaun hamutuk ho oan sira hametin sira-nia domin neʼebé “kesi metin sira . . . atu sai buat furak ida deʼit”.—Kol 3:14.
16. Konta toʼok kona-ba irmán naʼin-tolu neʼebé haksolok ho rezultadu diʼak tanba estuda Bíblia hamutuk.
16 Hanoin toʼok kona-ba irmán naʼin-tolu neʼebé haksolok ho rezultadu diʼak tanba tuir arranju atu fahe tempu semana-semana atu estuda Bíblia. Feto-faluk sira-neʼe ferik ona no hela iha sidade neʼebé hanesan. Maski sira laʼós família, maibé sira sai belun diʼak ba tempu kleur ona. Sira hakarak gasta tempu hamutuk no sira hakarak uza tempu neʼe atu hametin sira-nia fiar duké tuur halimar deʼit. Tan neʼe, sira deside atu halibur an iha kalan ida semana-semana atu estuda Bíblia hamutuk. Sira komesa lee no koʼalia kona-ba livru “Memberikan Kesaksian yang Saksama tentang Kerajaan Allah”. Sira ida hatete: “Ami haksolok ho ami-nia tempu neʼe, no baibain ami estuda ba oras ida liu.” Nia hatutan: “Ami koko atu haree no sente buat neʼebé ita-nia maluk kristaun iha apóstolu nia tempu haree no sente kuandu sira hasoru situasaun ruma. No ami koʼalia kona-ba saida mak ami sei halo se situasaun hanesan neʼe mosu duni iha ami-nia moris. Tuirmai, ami hakaʼas an atu halo tuir buat neʼebé ami estuda kuandu ami bá haklaken. Ida-neʼe halo ami kontente liu no lori rezultadu diʼak liu iha ami-nia serbisu haklaken kona-ba Kristu nia Ukun no kuandu ami hanorin ema seluk atu sai Kristu nia dixípulu.” Arranju neʼe ajuda sira kumpre sira-nia hakarak atu hakbesik liután ba Maromak, no mós ajuda sira atu hakbesik liután ba malu. Sira hatete: “Ami hafolin tebes arranju ida-neʼe.”
17. Saida deʼit mak bele ajuda ita atu hetan rezultadu diʼak iha Adorasaun Família nian?
17 Oinsá ho Ita? Oinsá mak fahe tempu atu halaʼo adorasaun família nian ajuda ona Ita? Ita sei ladún hetan rezultadu diʼak husi arranju neʼe se ita la toman halo tuir. Ema ida-idak iha família laran tenke prontu atu estuda tuir tempu neʼebé deside ona. Ita lakohi husik buat ruma neʼebé ladún importante atu hapara ita-nia estudu iha tempu neʼebé ita hili ona. Liután neʼe, hili didiʼak informasaun neʼebé atu estuda hodi bele ajuda Ita-nia família iha sira-nia moris loron-loron nian. Oinsá mak ita bele halaʼo estudu neʼe iha dalan neʼebé halo família kontente? Hanorin iha dalan neʼebé envolve família tomak, no kontrola situasaun hodi ema hotu hatudu respeitu ba malu no sente kmaan.—Tgo 3:18. *
Nafatin “matan-moris” no “hein hela” bá
18, 19. Hodi hatene katak lakleur tan Oan-Mane sei hiʼit an mai, oinsá mak ida-neʼe kona Ita no Ita-nia família nia moris?
18 Husi tinan 1914, situasaun iha mundu neʼebé sai aat ba beibeik hatudu ho klaru katak Satanás nia mundu aat neʼe besik atu ramata. Neʼe hatudu katak Armagedon besik ona. Lakleur tan Oan-Mane sei hiʼit an mai atu halaʼo Maromak Jeová nia tesi-lia ba ema sira neʼebé la halo tuir nia. (Prov 2:21, 22; 2 Tes 1:8) Hodi hatene ida-neʼe sei akontese, oinsá mak ida-neʼe kona Ita no Ita-nia família nia moris?
19 Ita halo tuir daudauk Jesus nia konsellu atu halo Ita-nia matan “moos” nafatin ka lae? Maski ema iha mundu neʼe hanoin liu kona-ba buka rikusoin ka naran-boot, maibé Ita-nia família hakaʼas an atu kumpre imi-nia planu atu laʼo ba oin iha lia-loos ka lae? Hodi halaʼo arranju kona-ba Adorasaun Família nian ka estuda Bíblia mesak, ida-neʼe ajuda duni Ita ka lae? Arranju ida-neʼe mós ajuda Ita-nia família atu hakbesik liután ba Maromak Jeová no ba malu ka lae? Hanesan ita aprende ona husi lisaun iha semana kotuk, Ita halaʼo Ita-nia responsabilidade neʼebé Maromak fó ba Ita nuʼudar laʼen, feen, ka oan, hodi nuneʼe ajuda família tomak atu nafatin “matan-moris” ka lae? (1 Tes 5:6) Se nuneʼe, Ita bele “hein hela” hodi sai prontu ba loron neʼebé Oan-Mane sei hiʼit an mai.
[Nota–rodapé]
^ par. 15 Eclesiastes 4:12: “No se ema ida bele manán hasoru ida deʼit, naʼin-rua hamutuk bele hamriik hasoru nia. No tali tolu neʼebé bobar hamutuk la bele kotu lalais.”
^ par. 17 Atu hetan ideia diʼak kona-ba oinsá atu halaʼo Adorasaun Família iha dalan neʼebé halo família kontente no loloos ajuda sira, haree Livru Haklaken 15 Outubru 2009, pájina 29-31.
Saida mak Ita aprende?
• Esplika toʼok oinsá mak família kristaun bele “hein hela” hodi . . .
halo matan “moos”.
halo planu no hakaʼas an atu laʼo ba oin iha lia-loos.
fahe tempu atu halaʼo beibeik Adorasaun Família nian.
[Pergunta estudu nian]
[Dezeñu iha pájina 13]
Halo ita-nia matan “moos” hodi la husik buat mundu neʼe nian dada ita-nia atensaun
