Família kristaun, nafatin matan-moris bá

“Ita labele toba-dukur . . . maibé matan-moris no oin moos.”—1 TES 5:6.

1, 2. Saida mak ema ida-idak iha família laran tenke halo atubele matan-moris no nafatin hakbesik ba Maromak?

IHA apóstolu Paulo nia karta ba ema kristaun iha Tesalónika, nia hakerek kona-ba “Maromak Jeová nia loron neʼebé hamosu taʼuk”. Kona-ba loron neʼe, nia hatete: “Imi la moris iha nakukun laran, maun-alin sira, atu loron neʼe toman imi hanesan naʼok-teen ida. Lae, imi hotu naroman nia oan no loron nia oan; ita laʼós kalan nian ka nakukun nian.” No Paulo hatutan tan: “Tan neʼe, ita labele toba-dukur nuʼudar ema seluk, maibé matan-moris no oin moos.”—Joel 2:31; 1 Tes 5:4-6.

² Paulo nia konsellu ba kongregasaun Tesalónika mós kona ema kristaun ohin loron neʼebé moris iha “tempu nia rohan”. (Dan 12:4) Nuʼudar mundu aat neʼe besik atu lakon, Satanás kaan atu hapara ema kristaun loos barak atu sira la serbí tan Maromak. Tan neʼe, diʼak atu ita hotu halo tuir Paulo nia konsellu kona-ba matan-moris no nafatin hakbesik ba Maromak. Atu família kristaun ida bele nafatin matan-moris, importante katak ema ida-idak simu no halaʼo responsabilidade neʼebé Maromak Jeová fó ba nia. Entaun, saida mak laʼen, feen no oan sira tenke halo hodi sira-nia família nafatin “matan-moris”?

Laʼen sira, banati-tuir “Bibi-Atan Diʼak”

3. Tuir 1 Timoteo 5:8, saida mak laʼen nia responsabilidade nuʼudar ulun?

³ Bíblia hatete: “Laʼen mak nia feen nia ulun.” (1 Kor 11:3) Nuʼudar família nia ulun, laʼen iha responsabilidade saida? Bíblia hatete kona-ba laʼen sira: “Ema neʼebé la tau matan ba nia parente sira, liuliu sira neʼebé horik hamutuk ho nia, ema neʼe hewai tiha nia fiar no aat liu fali ema neʼebé fiar-laek.” (1 Tim 5:8) Sin, laʼen tenke fó buat neʼebé nia família presiza. Maski nia iha responsabilidade atu buka moris, maibé nia mós presiza ajuda nia família halo tuir konsellu atu matan-moris. Nia presiza harii ninia umakain hodi ajuda nia família atu hametin sira-nia relasaun ho Maromak. (Prov 24:3, 4) Oinsá mak nia bele halo ida-neʼe?

4. Saida mak bele ajuda laʼen atu harii umakain neʼebé iha relasaun besik ho Maromak?

⁴ Tanba ‘mane sira tenke hadomi sira-nia kaben nuʼudar Kristu hadomi kreda’, laʼen tenke hanoin didiʼak no banati-tuir Jesus nia ezemplu kona-ba oinsá nia halaʼo knaar nuʼudar ulun ba kreda, ka kongregasaun. (Ef 5:23, 25) Hanoin toʼok kona-ba buat neʼebé Jesus hatete kona-ba nia relasaun ho ninia dixípulu sira. (Lee Joao 10:14, 15.) Saida mak bele ajuda laʼen atu harii ninia umakain hodi família tomak iha relasaun neʼebé besik ho Maromak? Xave mak neʼe: Aprende kona-ba Jesus nia liafuan no hahalok nuʼudar “bibi-atan diʼak”, no “laʼo tuir nia ain-fatin”.—1 Ped 2:21.

5. Bibi-Atan Diʼak hatene saida deʼit kona-ba kongregasaun?

⁵ Mai ita koʼalia kona-ba saida mak família nia ulun bele aprende husi Kristu nia ezemplu. Ita bele dehan katak bibi-atan no ninia bibi sira iha relasaun neʼebé diʼak tanba bibi-atan hatene buat hotu kona-ba nia bibi sira, no bibi sira hatene no fiar ba bibi-atan. Bibi sira hatene no halo tuir nia lian. Jesus hatete: “Haʼu hatene haʼu-nia bibi sira, no haʼu-nia bibi sira hatene haʼu.” Nuʼudar ulun ba kongregasaun, Jesus la haree buat neʼebé matan bele haree deʼit. Liafuan gregu neʼebé tradús nuʼudar “hatene” iha  arti “hatene buat kleʼan kona-ba ema ida”. Sin, Bibi-Atan Diʼak hatene ninia bibi ida-idak. Nia hatene sira ida-idak nia presiza no fraku, no hatene sira-nia kbiit no buat neʼebé sira bele halo. Ita hakarak banati-tuir ita-nia Bibi-Atan neʼebé hatene buat hotu kona-ba nia bibi sira. No ita hakarak sai nuʼudar ninia bibi sira neʼebé hatene didiʼak no tau fiar ba bibi-atan.

6. Oinsá mak laʼen sira bele banati-tuir Bibi-Atan Diʼak?

⁶ Atu laʼen ida bele banati-tuir Kristu nia ezemplu nuʼudar ulun, nia tenke aprende atu hanoin nia an nuʼudar bibi-atan ida no sira neʼebé nia tau matan nuʼudar bibi. Nia tenke hakaʼas an atu hatene buat kleʼan kona-ba nia família. Loloos laʼen ida bele halo ida-neʼe ka lae? Sin, hodi koʼalia ba malu ho didiʼak ba ema ida-idak iha uma laran, rona ba sira-nia problema, hola parte iha buat neʼebé família halo, no mós tetu didiʼak atubele halo desizaun neʼebé matenek kona-ba halo adorasaun nuʼudar família, tuir reuniaun, bá haklaken, no halo atividade halimar nian. Kuandu laʼen kristaun hatene didiʼak Maromak nia Liafuan no hatene didiʼak ema ida-idak iha família laran, no hatudu ezemplu diʼak kona-ba halo desizaun neʼebé matenek, ninia hahalok sira-neʼe sei ajuda duni nia família atu tau fiar ba nia nuʼudar ulun. Laʼen hanesan neʼe bele sente kontente kuandu haree nia família hela nafatin iha adorasaun neʼebé loos.

7, 8. Oinsá mak laʼen bele banati-tuir Bibi-Atan Diʼak hodi hatudu domin ba nia família?

⁷ Bibi-atan neʼebé diʼak mós hadomi nia bibi sira. Kuandu ita estuda istória kona-ba Jesus nia moris no ninia serbisu, neʼe book duni ita-nia laran tanba domin neʼebé nia hatudu ba nia dixípulu sira. Nia mós ‘saran nia moris ba nia bibi sira’. Laʼen sira mós tenke banati-tuir Jesus hodi hatudu sai domin ba sira neʼebé nia tau matan. Duké domina nia feen, laʼen neʼebé hakarak halo kontente Maromak sei kontinua hatudu domin ba nia feen “nuʼudar Kristu hadomi kreda”. (Ef 5:25) Laʼen tenke koʼalia ho laran-diʼak hodi hanoin feen nia sentimentu, tanba nia merese simu respeitu neʼebé kleʼan.—1 Ped 3:7.

⁸ Kuandu fó treinu ba oan sira, aman ida tenke hakaʼas an ajuda família hotu atu halo tuir Maromak nia matadalan. Maibé, nia mós presiza hatudu sai nia domin ba nia oan. Kuandu oan presiza dixiplina, nia sei halo ida-neʼe ho domin. Dala ruma labarik kiʼik presiza tempu kleur liu atu komprende saida mak inan-aman hakarak sira atu halo. Se nuneʼe, aman tenke hatudu pasiénsia boot liu ba oan sira hanesan neʼe. Kuandu laʼen sira halo tuir nafatin Jesus nia ezemplu, neʼe halo sira-nia uma laran sai fatin neʼebé hakmatek. Sira-nia família sente seguru no besik liu ba Maromak.

9. Hanesan Noé, laʼen kristaun iha responsabilidade saida? Saida mak sei ajuda sira atu halo ida-neʼe?

⁹ Ulun ba família kristaun mós bele halo tuir Noé nia ezemplu. Noé moris iha loron ikus sira, iha tempu neʼebé Maromak atu halakon ema aat sira. Maibé Maromak Jeová “soi deʼit Noé, . . . hamutuk ho ema naʼin-hitu, wainhira nia halo rai-nabeen ba ema sira neʼebé la fiar Maromak”. (2 Ped 2:5) Noé iha responsabilidade atu ajuda nia família atu hetan salvasaun husi Rai-Nabeen Boot. Nuʼudar ita moris iha loron ikus sira, família kristaun nia ulun mós iha responsabilidade neʼebé hanesan. (Mt 24:37) Entaun importante ba família nia ulun atu aprende husi “bibi-atan diʼak” nia ezemplu no hakaʼas an atu halo tuir!

Feen sira, ‘harii imi-nia umakain’

10. Feen halo tuir nia laʼen, neʼe katak sá?

¹⁰ Apóstolu Paulo hakerek: “Feto sira, halo tuir imi-nia laʼen nia hakarak, hanesan imi halo tuir Naʼi.” (Ef 5:22) Paulo nia liafuan neʼe la dehan katak feto nia pozisaun la iha folin. Antes kria feto primeiru, Eva, Maromak hatete: “La diʼak atu mane neʼe kontinua hela mesak. Haʼu sei halo ba nia ajuda-naʼin ida, atu halo nia sai kompletu.” (Gên 2:18) Feto nia knaar atu sai “ajuda-naʼin” no “halo nia [laʼen] sai kompletu”, ka apoia nia laʼen, mak knaar neʼebé iha folin duni.

11. Oinsá mak feen neʼebé matenek ‘harii nia umakain’?

 ¹¹ Feen neʼebé matenek hakaʼas an atu halo buat neʼebé diʼak ba nia família. (Lee Provérbios 14:1. *) La hanesan feto neʼebé beik, neʼebé la hatudu respeitu ba arranju ulun nian, feto neʼebé matenek iha respeitu ba arranju neʼe. Nia hakruʼuk ba nia laʼen, duké haleno mundu nia hahalok hanesan la halo tuir no hakarak livre deʼit. (Ef 2:2) Feen neʼebé beik la dada an atu koʼalia hodi hatún nia laʼen, maibé feen neʼebé matenek koʼalia iha dalan neʼebé halo nia oan no ema seluk respeitu liután nia laʼen. Feen hanesan neʼe kuidadu atu la harahun laʼen nia pozisaun nuʼudar ulun hodi koʼalia litik ka diskute malu ho nia. Buat ida tan mak kona-ba uza família nia osan. Feen neʼebé la matenek soe leet deʼit osan neʼebé nia laʼen serbisu makaʼas atu manán. Maibé feen neʼebé apoia nia laʼen sei la halo ida-neʼe. Nia serbisu hamutuk ho nia laʼen atu halo planu kona-ba família nia osan. Nia uza osan ho matenek no hatene poupa osan. Nia la hakaʼas nia laʼen atu halo serbisu barak liu hodi manán osan.

12. Saida deʼit mak feen bele halo atu ajuda nia família “matan-moris” nafatin?

¹² Atu família “matan-moris” nafatin, feen neʼebé matenek ajuda nia laʼen hanorin oan sira kona-ba Maromak Jeová. (Prov 1:8) Nia ho badinas apoia Adorasaun Família nian. Liután neʼe, nia apoia nia laʼen kuandu laʼen fó konsellu no dixiplina ba sira-nia oan. Feen neʼebé matenek nia hahalok diʼak sira-neʼe la hanesan duni ho feen neʼebé la apoia nia laʼen. Kuandu feen la apoia laʼen, ida-neʼe bele halo oan sira sente la kontente no hanetik sira-nia hakarak atu haburas sira-nia relasaun ho Maromak.

13. Tanbasá mak importante ba feen atu apoia nia laʼen kuandu nia halo Maromak nia serbisu?

¹³ Oinsá mak feen neʼebé apoia nia laʼen sente kuandu laʼen halo knaar sira ba kongregasaun? Nia sente kontente duni! Se nia laʼen iha knaar atu serbí nuʼudar atan ba kongregasaun, katuas, ka karik sai membru ba Grupu neʼebé Komunika ho Ospitál sira ka Grupu atu Arranja Harii Reuniaun-Fatin, nia kontente ho ida-neʼe. Nia apoia nia laʼen liuhusi nia liafuan no hahalok, maski hodi halo ida-neʼe dala ruma nia tenke tau ba kotuk nia rasik nia hakarak. Nia hatene katak bainhira nia laʼen hola parte iha Maromak nia serbisu, ida-neʼe sei ajuda família tomak atu matan-moris hodi nafatin hakbesik ba Maromak.

14. (a) Karik feen neʼebé apoia nia laʼen bele hasoru susar saida? Oinsá mak nia hasoru situasaun neʼe? (b) Oinsá mak feen bele ajuda família tomak atu moris kontente?

¹⁴ Karik susar ba feen atu apoia nia laʼen kuandu nia ladún gosta desizaun neʼebé laʼen halo. Maski nuneʼe, feen neʼebé matenek hatudu “laran-kmaus no diʼak”, no serbisu hamutuk ho laʼen atu halo desizaun neʼe laʼo ho susesu. (1 Ped 3:4) Feen diʼak sei hakaʼas an atu halo  tuir ezemplu diʼak husi feto sira neʼebé adora Maromak iha tempu antigu hanesan Sara, Rut, Abigail, no Jesus nia inan, Maria. (1 Ped 3:5, 6) Nia mós banati-tuir irmán sira neʼebé idade liu ohin loron, neʼebé “moris nuʼudar ema neʼebé hamtaʼuk Maromak”. (Tito 2:3, 4) Hodi hatudu domin no respeitu ba laʼen, feen neʼebé matenek hametin ninia relasaun ho nia laʼen no ajuda família tomak atu moris kontente. Sin, ninia família sente kmaan no seguru. Ba laʼen neʼebé hadomi Maromak no hakaʼas an atu halo Maromak nia serbisu, feen hanesan neʼe iha folin boot duni!—Prov 18:22.

Joven sira, ‘hateke ba buat neʼebé la bele haree’

15. Oinsá mak joven sira bele serbisu hamutuk ho inan-aman atu família bele nafatin “matan-moris”?

¹⁵ Oinsá mak imi joven sira bele serbisu hamutuk ho inan-aman atu família bele “matan-moris” no hakbesik nafatin ba Maromak? Hanoin kona-ba bensaun neʼebé imi bele simu husi Maromak Jeová. Karik husi kiʼik kedas, inan-aman hatudu ba imi dezeñu furak kona-ba moris iha mundu foun. No kuandu imi sai boot, karik sira uza Bíblia no livru sira atu ajuda imi atu haree iha imi-nia neon kona-ba moris ba nafatin iha mundu foun hanesan saida. Hodi tau uluk Maromak Jeová nia serbisu, no halo planu kona-ba oinsá imi bele halo tuir Maromak nia hakarak iha imi-nia moris tomak, ida-neʼe sei ajuda imi atu nafatin “matan-moris”.

16, 17. Saida deʼit mak joven sira bele halo atu manán iha halai-taru moris nian?

¹⁶ Apóstolu Paulo kompara ita-nia serbisu ba Maromak ho halai-taru, no bensaun atu moris ba nafatin hanesan prémiu halai-taru nian. Entaun, diʼak atu hakaʼas an hodi halo tuir apóstolu Paulo nia liafuan iha 1 Korinto 9:24. (Lee.) Imi hakarak duni atu manán iha halai-taru moris nian. Nuneʼe, hili dalan neʼebé sei lori imi atu hetan bensaun moris ba nafatin. Joven barak husik hakarak atu buka deʼit sasán mundu nian lohi sira, toʼo sira la hateke tan ba bensaun neʼebé Maromak promete iha futuru. Neʼe la matenek! Ema neʼebé halo planu atu uza sira-nia moris atu hetan deʼit rikusoin sei la hetan kontente neʼebé loos. Buat neʼebé bele sosa ho osan sei la tahan ba nafatin. Maibé imi, favór ida, halo imi-nia matan hateke ba “buat neʼebé la bele haree”. Tanbasá? Tanba ‘buat neʼebé la bele haree mak rohan-laek’.—2 Kor 4:18.

¹⁷ “Buat neʼebé la bele haree” ho matan inklui bensaun neʼebé mai husi Maromak nia Ukun. Halo planu iha imi-nia moris atu imi bele hetan bensaun sira-neʼe. Hodi uza imi-nia moris atu halo Maromak Jeová nia serbisu, ida-neʼe mak lori kontente neʼebé loos. Imi neʼebé serbí Maromak neʼebé loos, imi iha oportunidade atu halo planu sira neʼebé matenek duni, planu ba tempu badak no mós ba tempu naruk. * Hodi halo planu sira kona-ba serbisu ba Maromak, ida-neʼe sei ajuda imi atu nafatin hametin imi-nia relasaun ho Maromak no bele lori imi ba bensaun moris ba nafatin.—1 Joao 2:17.

18, 19. Pergunta saida deʼit mak joven ida bele husu ba nia an hodi hatene katak nia foti ona desizaun rasik atu moris tuir lia-loos husi Bíblia?

¹⁸ Joven sira, hakat primeiru atu tuir dalan moris nian mak foti desizaun rasik atu moris tuir lia-loos husi Bíblia tanba domin ba Maromak. Imi halo tiha ona ida-neʼe ka lae? Husu imi-nia an: ‘Haʼu hola parte iha atividade kristaun  nian tanba haʼu hafolin haʼu-nia relasaun ho Maromak, ka tanba haʼu-nia inan-aman hakarak haʼu atu halo nuneʼe? Haʼu haburas hahalok sira neʼebé halo kontente Maromak ka lae? Haʼu hakaʼas an atu iha toman diʼak hodi halo atividade kristaun sira hanesan halo orasaun, estuda Bíblia, tuir reuniaun no bá haklaken ka lae? Haʼu sente besik liután ho Maromak hodi nafatin haburas haʼu-nia relasaun ho nia ka lae?’—Tgo 4:8.

¹⁹ Hanoin kleʼan mós kona-ba Moisés nia ezemplu. Maski nia hamutuk ho ema neʼebé la serbí Maromak, maibé nia hakarak ema koñese nia nuʼudar ema neʼebé adora Maromak Jeová duké nuʼudar Faraun nia oan-feto nia oan. (Lee Ebreu 11:24-27.) Joven kristaun sira, imi mós presiza foti desizaun atu serbí Maromak Jeová ho laran-metin. Hodi halo nuneʼe, imi sei hetan kontente neʼebé loos, iha moris neʼebé diʼak liu agora, no iha esperansa atu “hetan moris neʼebé mesak mak loloos” iha futuru.—1 Tim 6:19.

20. Iha halai-taru moris nian, sé mak sei manán?

²⁰ Iha halai-taru iha tempu uluk, ema ida deʼit mak sei manán. Ida-neʼe la hanesan ho halai-taru moris nian. Maromak nia hakarak mak “ema hotu hetan maksoin no simu matenek kona-ba lia-loos”. (1 Tim 2:3, 4) Ema barak ramata ona sira-nia halai-taru ho susesu, no barak tan sei halai iha Ita-nia sorin. (Ebr 12:1, 2) Ema hotu neʼebé la rende an mak sei manán. Entaun, hakaʼas an bá atu manán!

21. Saida mak ita sei aprende iha lisaun tuirmai?

²¹ “Jeová nia loron boot neʼebé hamosu taʼuk” sei toʼo mai duni. (Mal 4:5) Loron neʼe sei la toman família kristaun neʼebé nafatin matan-moris. Tan neʼe, importante atu ema hotu iha família laran halo responsabilidade sira neʼebé Maromak fó ba sira. Saida tan mak Ita bele halo atu nafatin matan-moris no hametin Ita-nia relasaun ho Maromak? Iha lisaun tuirmai sei koʼalia kona-ba buat tolu neʼebé bele kona família tomak nia relasaun ho Maromak.

[Nota–rodapé]

Saida mak Ita aprende?

• Tanbasá mak importante ba família kristaun atu nafatin “matan-moris”?

• Oinsá mak laʼen bele banati-tuir Bibi-Atan Diʼak?

• Feen neʼebé matenek halo saida deʼit atubele apoia nia laʼen?

• Oinsá mak joven sira bele ajuda sira-nia família atu nafatin matan-moris no hakbesik ba Maromak?

[Pergunta estudu nian]

[Dezeñu iha pájina 9]

Feen neʼebé apoia nia laʼen atu halo Maromak nia serbisu iha folin boot duni