Ita haksolok atu lee Maromak nia Liafuan ka lae?

IRMÁN ida naran Lorraine hatete: “Foufoun, kuandu haʼu lee Bíblia loroloron, haʼu lee deʼit no haʼu ladún sente haksolok. Tanba susar atu komprende Bíblia, haʼu-nia neon sempre halai ba fatin seluk.”

Ema seluk mós hatete katak kuandu sira komesa haburas toman atu lee Bíblia, sira lee maibé ladún sente kontente. Maski nuneʼe, sira hakaʼas an atu kontinua tanba sira hatene katak lee Bíblia mak buat neʼebé importante. Irmaun ida naran Marc hatete: “Fasil atu husik buat ruma hanetik ita-nia tempu atu lee Bíblia no estuda mesak. Hodi halo orasaun beibeik no hakaʼas an, agora haʼu toman ona atu lee Bíblia loroloron, no haree ida-neʼe nuʼudar buat neʼebé importante liu.”

Entaun, ita bele halo saida deʼit atu haburas liután domin ba Maromak nia Liafuan? Oinsá mak ita bele haksolok atu lee Bíblia? Hanoin toʼok kona-ba sujestaun sira tuirmai neʼe.

Dalan atu lee no estuda

Antes komesa lee Bíblia, halo orasaun hodi prepara ita-nia neon atu tau atensaun ba buat neʼebé ita atu lee. Husu Maromak Jeová atu ajuda ita haburas laran-manas atu estuda ninia Liafuan no atu loke ita-nia neon no fuan atu komprende liután ninia matenek. (Sal 119:34) Se ita la halo ida-neʼe, kuandu ita estuda Bíblia, karik ita sei lee liu deʼit, no ikusmai ita sei ladún hakarak atu kontinua. Irmán ida naran Lynn hatete: “Dala ruma haʼu lee lalais liu no la hanoin kona-ba informasaun neʼebé haʼu lee. Dala barak haʼu ladún komprende ho klaru pontu neʼebé importante. Maibé haʼu halo orasaun atu kontrola haʼu-nia hanoin, hodi haʼu-nia neon la bá fatin seluk.”

Hafolin buat neʼebé ita aprende. La haluha katak atu komprende no moris tuir lia-loos iha Bíblia, ida-neʼe kona duni ita-nia futuru. Tan neʼe, hakaʼas an atu buka informasaun neʼebé ita bele uza iha ita-nia moris. Irmaun ida naran Chris hatete: “Haʼu buka informasaun neʼebé bele ajuda haʼu atu hatene haʼu-nia hahalok neʼebé ladún diʼak no buat neʼebé la loos iha haʼu-nia laran. Haʼu kontente atu haree oinsá Bíblia no ita-nia livru sira fó informasaun neʼebé ajuda haʼu rasik, maski sira neʼebé hakerek livru sira-neʼe la koñese haʼu.”

Halo planu neʼebé ita bele kumpre. Koko atu buka informasaun foun kona-ba ema sira iha Bíblia laran. Ita bele hetan informasaun liután kona-ba sira hodi lee livru Pemahaman Alkitab no ita-nia livru sira seluk. Se ita halo ida-neʼe, ita bele haree katak mane no feto sira iha Bíblia mós ema neʼebé iha hahalok no sentimentu hanesan ita, no sira-nia ezemplu bele ajuda ita liután.

Buka dalan foun atu esplika eskritura sira. (Apos 17:2, 3) Irmán ida naran Sofia iha planu hanesan neʼe bainhira nia estuda mesak. Nia hatete: “Haʼu hakarak atu aprende dalan foun oinsá atu uza eskritura sira bainhira haʼu bá haklaken no mós iha tempu seluk, atu nuneʼe haʼu bele esplika ho klaru lia-loos husi Bíblia. Haʼu aprende buat barak kona-ba neʼe husi dalan neʼebé Livru Haklaken esplika eskritura sira.”—2 Tim 2:15, MF.

Envolve ita-nia an iha situasaun iha Bíblia. Ebreu 4:12 hatete katak “Maromak nia liafuan moris”. Nuʼudar ita lee eskritura sira, koko atu haree iha ita-nia neon buat neʼebé ema iha Bíblia haree, hodi Maromak nia Liafuan bele moris iha ita-nia neon. Koko atu rona buat neʼebé sira rona no sente buat neʼebé sira sente. Hanoin  oinsá mak sira-nia situasaun liga ho situasaun neʼebé ita rasik hasoru iha ita-nia moris, no aprende husi dalan neʼebé sira hasoru situasaun neʼe. Hodi halo buat hirak-neʼe, ita bele komprende diʼak liután istória sira iha Bíblia no hanoin-hetan ba tempu kleur.

Uza tempu atu estuda eskritura sira neʼebé susar hodi ita bele komprende ho klaru. Fó tempu barak ba ita-nia an atu estuda mesak. Karik ita lee informasaun neʼebé hamosu pergunta iha ita-nia neon, neʼebé book ita atu halo riset kona-ba neʼe. Uza livru seluk atu komprende liafuan neʼebé susar, no se ita iha Bíblia iha língua seluk neʼebé iha referensi silang, bele uza mós. Kuandu ita komprende barak liután no moris tuir buat neʼebé ita lee, neʼe sei halo ita haksolok liután atu lee Maromak nia Liafuan. Nuneʼe, ita sei sente hanesan ema neʼebé hakerek salmu ida dehan: “Haʼu simu Ita-nia [Jeová nia] avizu nuʼudar buat neʼebé haʼu-nian toʼo tempu neʼebé la bele sura, tanba sira-neʼe mak buat neʼebé halo haʼu-nia laran haksolok tebes.”—Sal 119:111.

Keta ansi kuandu estuda. Fahe ho didiʼak oras neʼebé ita uza atu estuda mesak no oras atu prepara ba reuniaun sira. Irmán ida naran Raquel hatete: “Dala barak haʼu sente estrese tebes no neʼe halo haʼu la hanoin didiʼak. Tan neʼe, haʼu uza tempu badak atu estuda no halo ida-neʼe dala barak. Neʼe ajuda haʼu duni.” Irmaun ida naran Chris hatete: “Kuandu haʼu estuda ho ansi, haʼu-nia laran fó-sala mai haʼu tanba haʼu haluha lalais buat neʼebé haʼu foin aprende. Informasaun neʼe la book haʼu-nia fuan.” Tan neʼe, lee no estuda neineik-neineik.

Haburas liután hakarak ba Maromak nia liafuan. Apóstolu Pedro dehan: “Nuʼudar kosok-oan sira neʼebé foin moris buka susubeen, imi mós haburas hakarak atu buka hanorin husi liafuan neʼebé hanesan susubeen neʼebé moos. Liuhusi neʼe imi bele sai boot daudaun ba salvasaun.” (1 Ped 2:2, MF) Bebé la presiza haburas hakarak atu buka susubeen tanba sira moris mai ho hakarak neʼe. Maibé Bíblia hatete katak ita presiza atu haburas hakarak atu buka hanorin husi Maromak nia liafuan. Nuneʼe, se ita lee pájina ida iha Bíblia loroloron, lakleur tan, ita sei iha hakarak neʼe. Entaun neineik-neineik, buat neʼebé uluk ita sente susar atu halo, ita sei kontente atu halo.

Hanoin kleʼan kona-ba eskritura sira. Kuandu ita hanoin kleʼan kona-ba buat neʼebé ita lee, ida-neʼe lori rezultadu diʼak tebes ba ita. Ida-neʼe sei ajuda ita atu haree oinsá informasaun oioin neʼebé ita estuda tiha ona liga malu. Lakleur ita sei halibur informasaun barak neʼebé iha folin boot,  neʼebé hanesan korrente ho fatuk-murak oioin.—Sal 19:14; Prov 3:3.

Toman diʼak lori bensaun

Tuir loloos, ita tenke hakaʼas an atu haburas toman hodi lee no estuda Bíblia. Maibé, ida-neʼe sei lori bensaun barak duni. Ita sei komprende Bíblia diʼak liután. (Ebr 5:12-14) Matenek neʼebé ita hetan husi Bíblia sei halo ita sente ksolok no lori dame. Neʼe hanesan “ai-hun moris nian” ba sira neʼebé kaer metin no uza matenek neʼe.—Prov 3:13-18.

Kuandu estuda kleʼan Maromak nia Liafuan, ida-neʼe bele halo ita iha fuan neʼebé komprende. (Prov 15:14) Neʼe sei ajuda ita atu fó konsellu neʼebé mai husi Bíblia. Se ita husik buat neʼebé ita lee iha Eskritura sira no iha livru sira husi ‘atan laran-metin no matenek’ hatudu dalan ba ita kuandu ita atu halo desizaun sira, ita rasik sei haree katak Maromak Jeová nia Liafuan ajuda duni ita atu sente kmaan no hakmatek. (Mt 24:45) Ita sei sai ema neʼebé kontente liu, haree buat oioin iha dalan neʼebé diʼak, no hatudu hahalok neʼebé tuir Bíblia. Liután neʼe, buat hotu neʼebé kona ita-nia relasaun ho Maromak sei laʼo ho susesu.—Sal 1:2, 3.

Hodi haburas domin ba Maromak, ida-neʼe sei book ita atu fó-hatene ba ema seluk kona-ba ita-nia fiar. Neʼe mós bele halo ita kontente tebes. Sofia, neʼebé temi uluk, kumpre daudaun ninia planu atu hanoin-hetan no uza eskritura oioin atu dada ema nia atensaun bainhira nia bá haklaken. Hodi halo nuneʼe, nia bele hetan rezultadu diʼak iha nia serbisu haklaken. Nia hatete: “Haʼu sente haksolok tebes kuandu haʼu haree oinsá ema simu mensajen husi Bíblia.”

Maibé, kuandu ita haksolok atu lee no estuda Maromak nia Liafuan, buat neʼebé diʼak liu hotu mak ita sei iha relasaun neʼebé besik liu ho Maromak Jeová. Estuda Bíblia bele ajuda ita hatene ninia matadalan no hafolin ninia domin, laran-luak no justisa. La iha buat seluk neʼebé importante liu ka halo ita sente kontente liu. Entaun, mai ita badinas nafatin atu estuda Maromak nia Liafuan. Ida-neʼe mak toman diʼak neʼebé lori duni bensaun boot.—Sal 19:7-11.

[Kaixa/Dezeñu iha pájina 5]

DALAN ATU LEE MAROMAK NIA LIAFUAN

▪ Antes komesa lee Bíblia, halo orasaun hodi prepara ita-nia neon atu tau atensaun ba buat neʼebé ita atu lee.

▪ Hafolin buat neʼebé ita aprende.

▪ Halo planu neʼebé ita bele kumpre.

▪ Buka dalan foun atu esplika eskritura sira.

▪ Envolve ita-nia an iha situasaun iha Bíblia.

▪ Uza tempu atu estuda eskritura sira neʼebé susar hodi ita bele komprende ho klaru.

▪ Keta ansi kuandu estuda.

▪ Haburas liután hakarak ba Maromak nia liafuan.

▪ Hanoin kleʼan kona-ba eskritura sira.

[Dezeñu iha pájina 4]

Envolve ita-nia an iha situasaun neʼebé ita lee daudaun iha Bíblia