Tau fiar tomak ba Maromak Jeová halo ita sente seguru
Tau fiar tomak ba Maromak Jeová halo ita sente seguru
“Kuandu haʼu bolu, Jeová rasik mak sei rona haʼu.”—SAL 4:3.
1, 2. (a) David hasoru situasaun perigu saida? (b) Ita sei koʼalia kona-ba David nia knananuk saida deʼit?
KLEUR ona David ukun nasaun Israel nuʼudar liurai, no agora nia hasoru situasaun neʼebé perigu tebes. Ninia oan-mane naran Absalão futu lia ho nia maluk sira hodi dehan sai ba povu katak nia mak sai ona liurai. Tan neʼe, David halai husi Jerusalém. David nia kolega diʼak ida mós nega nia no apoia fali Absalão, no agora, David tanis hodi laʼo ho ain-tanan iha Foho Oliveira, hamutuk ho ema uitoan deʼit neʼebé laran-metin ba nia. Liután neʼe, Liurai Saul nia família ida naran Simei tuda fatuk no soe rai-rahun ba David no hotar nia.—2 Sam 15:30, 31; 16:5-14.
2 Buat sira-neʼe halo David triste no moe. Nia sei mate iha situasaun susar neʼe ka lae? Lae, tanba nia tau fiar ba Maromak Jeová. David nia knananuk kona-ba tempu neʼebé nia halai husi Absalão, neʼebé hakerek iha Salmo 3, hatudu ho klaru katak David tau fiar tomak ba Maromak. David mós hakerek Salmo 4. Iha knananuk rua neʼe, David fó sai ninia fiar katak Maromak rona no hatán ba ninia atan sira-nia orasaun. (Sal 3:4; 4:3) Salmu rua neʼe fó fiar mai ita katak Jeová sempre hamutuk ho fiar-naʼin sira loron-kalan, hodi apoia sira no halo sira sente seguru no dame iha laran. (Sal 3:5; 4:8) Tan neʼe, mai ita koʼalia kona-ba salmu rua neʼe, no haree oinsá mak liafuan sira-neʼe hametin ita-nia fiar ba Maromak no halo ita sente seguru iha situasaun saida deʼit.
Kuandu ‘ema barak hamriik hasoru ita’
3. Tuir Salmo 3:1, 2, David nia situasaun oinsá?
3 David nia manu-ain ida hakbesik nia no hatete: “Ema Israel sira-nia laran komesa apoia Absalão.” (2 Sam 15:13) David la hatene oinsá mak Absalão konsege dada ema barak atu apoia nia. Tan neʼe, nia husu: “Oh, Jeová, tansá mak haʼu-nia funu-balun sai barak? Tansá mak ema barak hamriik hasoru haʼu? Ema barak hatete kona-ba haʼu-nia moris: ‘Maromak la fó salvasaun ba nia.’” (Sal 3:1, 2) Ema Israel barak hanoin katak Maromak Jeová sei la salva David husi Absalão ho ninia maluk sira-nia liman.
4, 5. (a) David fiar saida kona-ba Maromak Jeová? (b) Liafuan “Ida neʼebé foti haʼu-nia ulun” katak sá?
4 Maibé David sente seguru tanba nia tau ninia fiar tomak ba Maromak. Nia kanta: “Maibé Ita, oh, Jeová, Ita mak eskudu neʼebé taka haʼu, haʼu-nia glória no Ida neʼebé foti haʼu-nia ulun.” (Sal 3:3) Hanesan eskudu proteje soldadu, David fiar katak Maromak Jeová sei sai protesaun ba nia. Sin, liurai katuas neʼe halai husi ninia inimigu, nia taka ninia ulun no laʼo ho oin hateke ba rai hodi haree hanesan ema neʼebé la iha folin. Maski nuneʼe, Maromak neʼebé Aas Liu Hotu sei troka David nia situasaun no halo ema fó glória ba nia. Maromak Jeová sei ajuda nia hodi nia bele laʼo loos ho matan hateke ba oin. David nia liafuan hatudu katak nia fiar duni Maromak sei rona nia. Ita mós hatudu Ita-nia fiar metin hanesan neʼe ka lae?
5 David nia Liafuan “Ida neʼebé foti haʼu-nia ulun” hatudu katak nia fiar Maromak Jeová sei ajuda nia. Kona-ba liafuan neʼe, livru ida esplika: “Kuandu Maromak foti . . . ema ida nia ‘ulun’, Maromak fó esperansa ba nia no halo nia sente seguru.” Tradusaun Bíblia ida (Todayʼs English Version) hatete: “Maibé Ita, oh, NAʼI, Ita mak sempre sai haʼu-nia eskudu husi perigu; Ita halo haʼu manán no fó aten-brani fali mai haʼu.” Tanba David nia oan hadau nia kadunan, nia laran-tun tebes. Maski nuneʼe, nia fiar katak kuandu Maromak Jeová ‘foti ninia ulun’, nia sei iha fali aten-brani no sente seguru.
‘Jeová sei hatán!’
6. Tanbasá mak David hatete katak resposta ba ninia orasaun mai husi Jeová nia foho santu?
6 Tanba David tau fiar tomak ba Maromak Jeová no hatene katak Maromak sei hatán ba ninia orasaun, nia hatutan tan: “Haʼu sei bolu Jeová rasik hodi hasaʼe haʼu-nia lian, no nia sei hatán mai haʼu husi ninia foho santu.” (Sal 3:4) David haruka ona nia ema atu lori arka aliansa nian, neʼebé reprezenta Maromak nia horik-fatin, ba Foho Sião. (2 Sam 15:23-25) Tan neʼe, David bele hatete katak resposta ba ninia orasaun sei mai husi Maromak Jeová nia foho santu.
7. Tanbasá mak David la taʼuk ba buat ida?
7 David fiar metin katak Maromak sei hatán duni ba ninia orasaun, tan neʼe nia la taʼuk ba buat ida. Nia kanta: “Kona-ba haʼu, haʼu sei latan hodi toba-dukur; haʼu fiar katak haʼu sei hadeer fali, tanba Jeová rasik mak apoia nafatin haʼu.” (Sal 3:5) Maski iha kalan, tempu neʼebé fasil liu ba inimigu atu ataka nia, David la taʼuk atu toba-dukur. Nia fiar katak nia sei hadeer fali, tanba nia hatene husi ninia esperiénsia rasik katak Maromak sempre fó tulun ba nia. Ita mós bele fiar katak Maromak sei fó tulun mai ita, se ita sempre halo tuir “Jeová nia dalan sira” no la hadook an husi nia.—2 Sam 22:21, 22.
8. Oinsá mak Salmo 24:1-4 hatudu David nia fiar metin ba Maromak?
8 David nia knananuk seluk mós hatudu katak nia tau fiar tomak ba Maromak no sente seguru. Nia hatete: “Jeová mak haʼu-nia naroman no haʼu-nia salvasaun. Ba sé mak haʼu sei taʼuk? Jeová mak abrigu ba haʼu-nia moris. Ba sé mak haʼu sei taʼuk? . . . Maski tropa sira monta tenda atu hasoru haʼu, haʼu-nia laran sei la taʼuk. . . . Haʼu husu ona buat ida ba Jeová, neʼe mak buat neʼebé haʼu hakarak duni, katak haʼu bele hela iha Jeová nia uma iha haʼu-nia moris tomak, atu haree Jeová nia laran-diʼak no atu hateke ba ninia templu ho laran-haksolok.” (Sal 27:1-4) Se Ita mós sente hanesan neʼe, no Ita-nia situasaun la hanetik Ita, Ita sei halibur hamutuk beibeik ho Ita-nia maluk neʼebé adora Maromak Jeová.—Ebr 10:23-25.
9, 10. Tanbasá mak ita bele fiar katak David la hanoin atu selu fali aat ho aat?
9 Maski David hasoru situasaun susar tebes tanba Absalão kontra hasoru nia no ema barak husik ona nia, maibé David kanta: “Haʼu sei la taʼuk ba ema rihun ba rihun neʼebé hamutuk haleʼu haʼu hodi kontra haʼu. Hamriik bá, oh, Jeová! Salva haʼu, oh, haʼu-nia Maromak! Tanba Ita sei tuku haʼu-nia inimigu sira hotu iha sira-nia hasan. Ita sei harahun ema aat sira-nia nehan.”—Sal 3:6, 7.
10 David la iha hanoin atu selu fali aat ho aat. Nia husik Maromak mak deside atu ‘tuku . . . sira-nia hasan’. Nuʼudar liurai, David hakerek tuir ona Moisés nia Ukun-Fuan tomak no nia hatene eskritura ida neʼebé dehan kona-ba Maromak Jeová: “Haʼu mak selu aat ba aat, haʼu sei selu fali.” (Deut 17:14, 15, 18; 32:35) Maromak mós deside se nia sei “harahun ema aat sira-nia nehan”. Harahun sira-nia nehan katak halo sira la iha forsa atu halo aat. Maromak Jeová hatene sé mak ema aat tanba “nia haree ema nia laran”. (1 Sam 16:7) Ita agradese tebes ba Maromak tanba nia ajuda ita atu fiar metin no fó forsa mai ita atu hamriik metin hasoru aat-naʼin neʼebé boot, katak Satanás, neʼebé lakleur sei sai hanesan leaun neʼebé hasaʼe lian maibé nehan la iha hodi hein deʼit atu mate iha rai-kuak neʼebé la iha rohan!—1 Ped 5:8, 9; Apok 20:1, 2, 7-10.
“Salvasaun mai husi Jeová”
11. Tanbasá mak ita presiza halo orasaun kona-ba ita-nia maluk fiar-naʼin sira?
11 David hatene katak Maromak Jeová deʼit mak bele salva nia husi ninia situasaun neʼe. Maski nuneʼe, nia la hanoin kona-ba ninia an deʼit. David ramata ninia knananuk ho liafuan tuirmai neʼe: “Salvasaun mai husi Jeová. Ita-nia bensaun hela ho Ita-nia povu.” (Sal 3:8) Maski David rasik hasoru problema boot, maibé nia hanoin kona-ba Maromak Jeová nia povu, no fiar metin katak Maromak sei haraik bensaun ba sira. Ita mós presiza hanoin kona-ba ita-nia maluk fiar-naʼin sira, loos ka lae? Mai ita nafatin halo orasaun kona-ba sira, hodi husu Maromak Jeová atu haraik ninia espíritu santu ba sira atubele haklaken lia-foun diʼak ho aten-brani no fiar-metin.—Ef 6:17-20.
12, 13. Saida mak akontese ba Absalão? David sente oinsá kona-ba neʼe?
12 Ikusmai, Absalão mate iha dalan neʼebé lori moe no la hetan glória. Ida-neʼe sai nuʼudar avizu ba ema hotu neʼebé halo aat ba ema seluk, liuliu ba ema hanesan David, neʼebé Maromak rasik mak fó knaar espesiál. (Lee Provérbios 3:32. *) Absalão no nia tropa sira lakon iha funu. Absalão rasik halai sai husi funu fatin neʼe hodi saʼe kuda-burru, no derrepente deʼit, ninia fuuk naruk kaʼit iha ai-sanak. Nia sei moris, maibé nia tara hela no la bele halo buat ida. Ikusmai, Joab sona nia ba dala tolu iha Absalão nia fuan ho kroʼat neʼebé hanesan diman, no Absalão mate.—2 Sam 18:6-17.
13 Kuandu David rona kona-ba buat neʼebé akontese ba ninia oan, nia sente kontente ka lae? Lae. Nia laʼo bá-mai no komesa tanis no halerik, hodi dehan: “Haʼu-nia oan Absalão, haʼu-nia oan, haʼu-nia oan Absalão! Oh, diʼak liu haʼu rasik mak mate duké ó, Absalão, haʼu-nia oan, haʼu-nia oan!” (2 Sam 18:24-33) David laran-susar tebes toʼo ikusmai Joab nia liafuan deʼit mak halo nia sente kalma fali. Absalão lakon nia moris saugati deʼit. Nia foti an tebes toʼo kontra hasoru nia aman rasik, neʼebé Maromak Jeová mak foti nuʼudar liurai, no ikusmai nia lori dezastre boot ba ninia an rasik.—2 Sam 19:1-8; Prov 12:21; 24:21, 22.
David hatudu fali ninia fiar metin ba Maromak
14. Ita bele hatete saida kona-ba knananuk iha Salmo 4?
14 Hanesan ho Salmo 3, Salmo 4 mós fó sai David nia orasaun, neʼebé hatudu ninia fiar-metin ba Maromak Jeová. (Sal 3:4; 4:3) Karik David hakerek knananuk neʼe atu hatudu sai ninia agradese ba Maromak depois Absalão nia planu la hetan susesu. Ka, karik nia hakerek salmu neʼe ba ema levita sira neʼebé iha knaar atu kanta knananuk sira. Maski ita la hatene ho klaru kona-ba neʼe, hodi hanoin kleʼan kona-ba Salmo 4, neʼe sei ajuda ita atu hametin ita-nia fiar ba Maromak Jeová.
15. Tanbasá mak ita bele halo orasaun ba Maromak Jeová hodi fiar katak nia sei rona ita?
15 Dala ida tan, David hatudu katak nia tau fiar tomak ba Maromak no hatudu katak nia sente seguru hodi hatene katak Maromak sei hatán ba ninia orasaun. Nia kanta: “Kuandu haʼu bolu, hatán bá, oh, haʼu-nia Maromak neʼebé loloos. Iha susar laran, Ita tenke halo fatin luan ida mai haʼu. Hatudu laran-diʼak mai haʼu, no rona haʼu-nia orasaun bá.” (Sal 4:1) Hanesan mós ho ita, se ita kontinua halo buat neʼebé loos, ita bele sente seguru hodi tau fiar tomak ba Maromak. Hodi hatene katak Jeová mak “Maromak neʼebé loloos” no katak nia sei haraik bensaun ba ninia povu neʼebé halo buat neʼebé loos, ita bele halo orasaun ho laran-metin liuhusi ninia Oan-Mane hodi tau fiar ba ninia sakrifísiu. (Joao 3:16, 36) Ida-neʼe halo ita-nia laran nakonu ho dame!
16. Tanbasá mak David sente laran-tun?
16 Klaru katak dala ruma ita hasoru situasaun neʼebé bele halakon dame iha ita-nia laran. Karik David mós sente nuneʼe ba tempu uitoan, tanba nia kanta: “Imi, oan-mane sira, toʼo bainhira mak imi hatún haʼu-nia glória, kontinua hadomi buat neʼebé leet deʼit, no kontinua buka lia-bosok?” (Sal 4:2) Klaru katak David uza liafuan “oan-mane sira” atu koʼalia kona-ba ema sira neʼebé hatudu hahalok ladiʼak. David nia inimigu sira “hadomi buat neʼebé leet deʼit”. Tradusaun Bíblia ida (New International Version) dehan: “Toʼo bainhira mak imi hadomi buat neʼebé laloos no buka maromak falsu sira?” Maski dala ruma ita sente laran-tun tanba ema seluk nia hahalok, mai ita kontinua halo orasaun ho laran no tau fiar tomak ba Maromak loos mesak ida deʼit.
17. Esplika toʼok oinsá mak ita bele halo tuir matadalan iha Salmo 4:3.
17 David nia liafuan hatudu ho klaru katak nia tau fiar duni ba Maromak. Nia hatete: “Entaun, hatene bá katak Jeová sei hatene loloos sé mak ema neʼebé laran-metin ba nia; Kuandu haʼu bolu, Jeová rasik mak sei rona haʼu.” (Sal 4:3) Atu nafatin laran-metin ba Maromak Jeová, ita presiza aten-brani no tau fiar tomak ba nia. Porezemplu, kuandu kongregasaun hasai ema ida tanba nia halo sala boot ruma no lakohi arrepende an, ninia família kristaun presiza hatudu hahalok diʼak sira-neʼe. Maromak sei haraik bensaun ba ema neʼebé laran-metin ba nia no kaer metin ba ninia dalan. No ida-neʼe sei lori dame no haksolok iha Maromak Jeová nia povu nia leet.—Sal 84:11, 12.
18. Se ema ruma koʼalia ka halo buat neʼebé ladiʼak mai ita, oinsá mak ita bele halo tuir Salmo 4:4?
18 Maibé oinsá se ema ruma koʼalia ka halo buat ruma neʼebé halo ita sente hirus? Se ita halo tuir David nia liafuan tuirmai neʼe, ita bele haksolok nafatin. Nia dehan: “Sai hirus, maibé keta halo sala. Koʼalia deʼit iha imi-nia laran, iha imi-nia toba-fatin, no nonook deʼit bá.” (Sal 4:4) Se ema ruma koʼalia ka halo buat neʼebé ladiʼak, mai ita hakaʼas an atu la halo sala hodi selu fali aat ba sira. (Rom 12:17-19) Ita bele temi problema neʼe iha ita-nia laran kuandu ita iha toba-fatin. Se ita halo orasaun kona-ba neʼe, karik ida-neʼe sei ajuda ita atu troka ita-nia hanoin no sai fasil liu atu hatudu domin no fó perdua ba nia. (1 Ped 4:8) Karik apóstolu Paulo temi fila fali Salmo 4:4 kuandu nia fó konsellu neʼebé dehan: “Imi hirus karik, keta halo sala; keta husik loron monu ba imi-nia laran-nakali. Keta fó fatin ba Diabu.”—Ef 4:26, 27.
19. Oinsá mak Salmo 4:5 ajuda ita atu hanoin ho loos kona-ba ita-nia adorasaun?
19 David hatudu ho klaru katak importante tebes atu tau fiar ba Maromak, hodi kanta: “Hasaʼe sakrifísiu hahalok loos nian bá, no tau fiar iha Jeová.” (Sal 4:5) Kuandu ema Israel hasaʼe sakrifísiu ruma, ema neʼe tenkesér halo ida-neʼe ho laran neʼebé loos atubele halo Maromak kontente. (Isa 1:11-17) Ohin loron mós ita tenkesér iha laran neʼebé loos no tau fiar tomak ba Maromak atu nia bele simu ita-nia adorasaun.—Lee Provérbios 3:5, 6; * Ebreu 13:15, 16.
20. ‘Naroman husi Jeová nia oin’ katak sá?
20 David hatutan tan: “Ema barak hatete: ‘Sé mak sei hatudu buat diʼak mai ita?’ Leno saʼe naroman mai ami husi Ita-nia oin, oh, Jeová.” (Sal 4:6) ‘Naroman husi Jeová nia oin’ katak Maromak nia laran-diʼak. (Sal 89:15) Tan neʼe, kuandu David husu: “Leno saʼe naroman mai ami husi Ita-nia oin”, nia hakarak dehan ‘hatudu laran-diʼak mai ami’. Tanba ita tau fiar ba Maromak Jeová, ita simu ninia laran-diʼak no sente haksolok nuʼudar ita halo tuir ninia hakarak.
21. David nia knananuk fó fiar saida mai ita neʼebé hakaʼas an atu hola parte iha serbisu haklaken ohin loron?
21 David hein katak Maromak Jeová sei fó haksolok neʼebé boot liu fali haksolok iha tempu koʼa trigu ka halibur ai-han, hodi dehan: “Ita sei fó mai haʼu haksolok iha laran, neʼe boot liu fali tempu neʼebé sira-nia ai-han no tua-uvas foun sai barak.” (Sal 4:7) Se ita badinas ho serbisu haklaken neʼebé bele kompara ho serbisu koʼa nian, ita mós bele fiar katak ida-neʼe lori haksolok boot mai ita. (Lc 10:2) Hodi serbisu hamutuk ho ema kose-mina sira neʼebé hatudu ezemplu, ita sente haksolok nuʼudar ‘serbisu-naʼin’ sira aumenta ba beibeik. (Isa 9:3) Ita mós hola parte iha serbisu koʼa nian ho laran-haksolok ka lae?
Kontinua tau fiar tomak ba Maromak
22. Hanesan ho liafuan iha Salmo 4:8, ema Israel sira moris oinsá kuandu sira halo tuir Maromak nia Ukun-Fuan?
22 David ramata ninia knananuk ho liafuan tuirmai neʼe: “Iha dame laran haʼu sei latan no toba-dukur, tanba Ita, oh, Jeová, Ita mesak deʼit mak halo haʼu hela ho hakmatek.” (Sal 4:8) Kuandu ema Israel sira halo tuir Maromak Jeová nia Ukun-Fuan, sira iha relasaun diʼak ho Maromak no sente seguru. Porezemplu, kuandu Liurai Salomão komesa ninia ukun, ‘Judá no Israel hela ho hakmatek’. (1 Reis 4:25) Maski nasaun sira neʼebé haleʼu ema Israel ameasa sira, maibé sira neʼebé tau fiar ba Maromak bele haksolok ho dame. Hanesan ho David, ita mós bele toba-dukur tanba Maromak ajuda ita atu sente dame no seguru.
23. Se ita tau fiar tomak ba Maromak, ita bele sente oinsá?
23 Entaun, mai ita kontinua hakaʼas an atu halo Maromak Jeová nia serbisu. Mai ita halo orasaun ho fiar-metin hodi nuneʼe ita bele sente dame neʼebé mai husi Maromak. (Flp 4:6, 7) Ida-neʼe lori haksolok boot mai ita! No se ita kontinua tau fiar tomak ba Maromak Jeová, ita bele sente seguru duni kona-ba ita-nia futuru.
[Nota–rodapé]
^ par. 12 Provérbios 3:32: “Tanba Jeová hakribi ema neʼebé koʼalia ho lia-bobar, maibé nia besik liu ho ema neʼebé laran-moos.”
^ par. 19 Provérbios 3:5: “Fiar ba Maromak Jeová ho laran tomak no labele sadere ba ó-nia matenek rasik. 6 Iha ó-nia dalan hotu fó atensaun ba nia, no nia rasik sei halo ó-nia dalan sai loos.”
Oinsá ita hatán?
• Problema saida deʼit mak David hasoru tanba Absalão?
• Oinsá mak Salmo 3 ajuda ita atu sente seguru?
• Oinsá mak Salmo 4 hametin ita-nia fiar ba Maromak Jeová?
• Tanbasá mak diʼak atu tau fiar tomak ba Maromak?
[Pergunta estudu nian]
[Dezeñu iha pájina 29]
Maski iha tempu neʼebé David halai husi Absalão, nia tau fiar tomak ba Maromak Jeová
[Dezeñu iha pájina 32]
Ita tau fiar tomak ba Maromak Jeová ka lae?
