Lia-foun diʼak neʼebé ema hotu presiza
Lia-foun diʼak neʼebé ema hotu presiza
“Evanjellu [“lia-foun diʼak”, MF] neʼe mak Maromak nia kbiit atu soi ema.”—ROM 1:16.
1, 2. Tanbasá mak ita haklaken lia-foun diʼak Reinu nian? Kona-ba saida deʼit mak ita gosta koʼalia liu?
‘HAʼU kontente tebes atu haklaken lia-foun diʼak loron-loron.’ Karik Ita mós sente hanesan. Nuʼudar Testemuña ba Jeová, ita hatene katak importante tebes atu haklaken “lia-foun reinu nian neʼe”. Karik ita dekór Jesus nia liafuan iha ninia profesia kona-ba serbisu neʼe.—Mt 24:14.
2 Kuandu ita haklaken “lia-foun diʼak Maromak nia reinu nian”, ita halaʼo nafatin serbisu neʼebé uluk Jesus mak hahú. (Lee Lucas 4:43.) Karik buat ida neʼebé ita koʼalia liu ba ema mak oinsá lakleur tan Maromak sei halakon buat aat hotu neʼebé haterus ema. No mós katak liuhusi ‘terus boot’ neʼebé atu mai, Maromak sei halakon relijiaun falsu hotu. (Mt 24:21) Karik ita mós fó sai katak Maromak nia Reinu, ka ukun sei halo mundu neʼe sai fali paraízu iha neʼebé dame no haksolok sei buras ba nafatin. Tuir loloos, “lia-foun diʼak Maromak nia reinu nian” mak parte husi “liafuan diʼak [neʼebé fó sai tiha] ba Abraão: ‘Husi ó, Maromak sei fó-bensa ba ema hotu.’”—Gal 3:8.
3. Iha apóstolu Paulo nia karta ba ema kristaun iha Roma, kona-ba saida mak nia koʼalia dala barak liu?
3 Maibé, iha ka lae buat ruma neʼebé importante tebes ba ema atu hatene husi lia-foun diʼak neʼebé dala ruma ita ladún fó sai kuandu ita haklaken? Iha karta neʼebé apóstolu Paulo hakerek ba ema kristaun iha Roma, nia temi liafuan “reinu” dala ida deʼit, maibé dala barak nia uza mak liafuan hanesan “evanjellu”, “liafuan foun diʼak”, no “liafuan diʼak” neʼebé iha arti hanesan. (Lee Roma 14:17.) Iha Paulo nia karta, nia temi dala barak liu kona-ba saida husi lia-foun diʼak? Tanbasá mak ida-neʼe importante tebes nuʼudar parte husi lia-foun diʼak? No tanbasá mak ita presiza hanoin-hetan kona-ba ida-neʼe kuandu ita haklaken “Maromak nia liafuan diʼak” ba ema?—Mc 1:14; Rom 15:16; 1 Tes 2:2.
Buat neʼebé ema iha Roma presiza
4. Kuandu Paulo sai dadur iha Roma, nia haklaken kona-ba saida?
4 Diʼak atu ita hatene kona-ba informasaun saida mak Paulo fó sai kuandu nia sai dadur iha Roma. Iha ninia karta, ita lee katak kuandu ema judeu balu bá vizita nia, nia ‘hanorin ba sira hodi fó sasin kona-ba (1) Maromak nia reinu’, no nia mós “buka atu halo sira fiar duni kona-ba (2) Jesus”. Saida mak rezultadu husi ida-neʼe? “Balun fiar duni buat neʼebé nia hateten, maibé balun lae.” Depois, Paulo ‘simu sira hotu neʼebé hakbesik nia hodi haklaken (1) Maromak nia reinu, no nia hanorin sira kona-ba (2) Naʼi Jesus Kristu’. (Apos 28:17, 23-31) Ida-neʼe hatudu ho klaru katak Paulo koʼalia kona-ba Maromak nia Reinu, ka ukun. Maibé, nia mós koʼalia kona-ba saida tan? Nia koʼalia kona-ba buat ida neʼebé parte importante husi Maromak nia Reinu, neʼe mak Jesus nia serbisu atu halaʼo Maromak nia hakarak.
5. Iha livru Roma, Paulo fó sai katak ema presiza saida?
5 Iha livru Roma, Paulo fó sai katak ema hotu presiza hatene kona-ba Jesus no tau fiar ba nia. Nia hatete: “Maromak neʼebé haʼu serbí ho neon hodi haklaken nia Oan-Mane nia evanjellu.” Nia mós hatete: “Haʼu la moe kona-ba evanjellu. Evanjellu neʼe mak Maromak nia kbiit atu soi ema sira neʼebé fiar.” Paulo mós koʼalia kona-ba tempu neʼebé “Maromak sei tesi lia ba ema ida-ida nia laran, husi Jesus Kristu” tuir “evanjellu” ka lia-foun diʼak neʼebé nia haklaken. Nia mós dehan: “Husi Jerusalém toʼo Ilíriko haʼu haklaken tiha Kristu nia evanjellu.” * (Rom 1:9, 16; 2:16; 15:19) Tuir Ita-nia hanoin, tanbasá mak Paulo koʼalia liu kona-ba Jesus Kristu ba ema kristaun iha Roma?
6, 7. Saida mak ita hatene kona-ba oinsá kongregasaun Roma hahú no kona-ba ema iha neʼebá?
6 Tuir loloos, ita ladún hatene oinsá mak kongregasaun Roma hahú. Karik ema judeu ka ema neʼebé tuir ema judeu nia relijiaun neʼebé tuir selebrasaun Pentekostes iha tinan 33 iha Jerusalém fila fali ba Roma nuʼudar ema kristaun ona. (Apos 2:10, 11) Karik ema kristaun neʼebé halo negósiu ka neʼebé laʼo-rai mak habelar lia-loos iha Roma. Maibé, buat neʼebé ita hatene mak kuandu Paulo hakerek livru Roma, maizumenus iha tinan 56, kongregasaun Roma iha kleur tiha ona. (Rom 1:8) Ema sira iha kongregasaun neʼebá mai husi neʼebé?
7 Sira balu ema judeu neʼebé mai husi rai-Israel. Paulo kumprimenta Andrónico no Júnia nuʼudar “haʼu-nia parente”, karik hodi dehan katak sira ninia família neʼebé ema judeu. Áquila, neʼebé iha Roma, hamutuk ho ninia feen, Priscila, nia mós ema judeu. (Rom 4:1; 9:3, 4; 16:3, 7; Apos 18:2) Maibé, irmaun no irmán barak neʼebé Paulo haruka ninia kumprimentus, karik sira ema jentiu ka husi rai seluk. Sira balu karik “husi César nia uma laran”, karik neʼe dehan katak sira César nia atan sira ka ema neʼebé serbí nia.—Flp 4:22; Rom 1:6; 11:13.
8. Ema kristaun iha Roma hasoru situasaun saida?
8 Ema kristaun hotu iha Roma hasoru situasaun ida neʼebé ita ida-idak mós hasoru. Paulo hatete: “Ema hotu-hotu halo tiha sala no lakon ona Maromak nia glória.” (Rom 3:23) Ida-neʼe hatudu ho klaru katak ema hotu presiza rekoñese katak sira sala-naʼin no presiza tau fiar ba buat neʼebé Maromak uza atu ajuda sira sai husi situasaun neʼe.
Rekoñese katak ita sala-naʼin
9. Paulo nia liafuan hatudu katak lia-foun diʼak bele lori rezultadu saida?
9 Iha Paulo nia karta ba ema kristaun iha Roma, nia koʼalia kona-ba rezultadu diʼak husi lia-foun diʼak neʼebé nia haklaken, hodi dehan: “Haʼu la moe kona-ba evanjellu. Evanjellu neʼe mak Maromak nia kbiit atu soi ema sira neʼebé fiar: ba ema judeu sira, uluknanain, hafoin ba ema jentiu sira.” Sin, Maromak bele soi ka salva ema. Maibé, atu ema bele hetan salvasaun, sira presiza iha fiar, hanesan liafuan neʼebé Paulo temi husi Habacuque 2:4, neʼebé hatete: “Ida neʼebé loos tanba fiar sei moris.” (Rom 1:16, 17; Gal 3:11; Ebr 10:38) Maibé, oinsá mak lia-foun diʼak neʼe, neʼebé lori ba salvasaun, liga ho Paulo nia liafuan neʼebé dehan katak “ema hotu-hotu halo tiha sala”?
10, 11. Tanbasá mak ema balu komprende Paulo nia liafuan iha Roma 3:23, maibé ema seluk lae?
10 Atu ema ida bele haburas fiar neʼebé bele salva nia, nia presiza rekoñese katak nia sala-naʼin. Ema neʼebé fiar ona Maromak no hatene uitoan kona-ba Bíblia, karik sira hatene katak sira sala-naʼin. (Lee Eclesiastes 7:20. *) Maski sira simu ka la simu katak sira sala-naʼin, maibé sira komprende Paulo nia liafuan kona-ba “ema hotu-hotu halo tiha sala”. (Rom 3:23) Maski nuneʼe, kuandu ita bá haklaken, dala ruma ita hasoru ema neʼebé la komprende Paulo nia liafuan neʼe.
11 Iha rai balu, ema la aprende katak sira moris mai nuʼudar sala-naʼin ka katak sira hetan sala husi Adão no Eva. Karik sira hatene katak ema hotu halo sala ka iha hahalok neʼebé ladún diʼak. Maibé, tanba buat neʼebé sira aprende husi kiʼik, sira ladún komprende tanbasá mak sira ka ema seluk halo sala. Tuir loloos, iha língua balu, se ema ida hatete katak nia sala-naʼin, ema seluk karik sei hanoin katak nia ema neʼebé halo krime ka ema neʼebé kontra lei. Nuneʼe, ema neʼebé ladún komprende kona-ba saida mak sala-naʼin mós sei la komprende Paulo nia liafuan.
12. Tanbasá mak ema barak la fiar katak sira sala-naʼin?
12 Maski ema barak moris iha rai neʼebé fiar Kristu, maibé sira la fiar katak sira sala-naʼin. Tanbasá? Tanba maski sira bá igreja, sira hanoin katak istória husi Bíblia kona-ba Adão no Eva mak istória neʼebé inventa deʼit. Ema seluk sai boot iha rai neʼebé ema ladún fiar katak Maromak iha. Tan neʼe, sira la komprende tansá mak sira tenke halo tuir ukun-fuan neʼebé Maromak fó ba ema kona-ba morál, no sira mós la komprende katak la halo tuir ukun-fuan sira-neʼe mak sala. Nuneʼe, hanesan apóstolu Paulo hatete, sira hanesan ema neʼebé “la iha esperansa no la iha Maromak iha mundu neʼe”.—Ef 2:12.
13, 14. (a) Tanba razaun ida saida mak ema labele nega katak Maromak iha? (b) Tanba ema barak la fiar Maromak, ida-neʼe book sira atu halo saida deʼit?
13 Iha Paulo nia karta ba ema kristaun iha Roma, nia fó sai razaun rua kona-ba tansá mak ema labele fase liman ka nega katak Maromak iha, maski sira sai boot hodi la fiar Maromak ka la fiar katak sira sala-naʼin, ida-neʼe mós hanesan ho ohin loron. Razaun primeiru mak kriasaun, ka buat hotu neʼebé moris ka iha, fó sasin katak Kriadór iha duni. (Lee Roma 1:19, 20.) Ida-neʼe hanesan ho buat neʼebé Paulo hakerek ba ema ebreu neʼebé kristaun kuandu nia iha Roma, hodi dehan: “Ema harii uma ida-ida, maibé Maromak harii buat hotu-hotu.” (Ebr 3:4) Paulo nia liafuan hatudu katak iha duni Kriadór ida neʼebé harii ka halo buat hotu-hotu iha lalehan no rai.
14 Tan neʼe, Paulo iha razaun diʼak atu hatete ba ema kristaun iha Roma katak ema naran deʼit, inklui mós ema Israel iha tempu antigu, neʼebé fó adorasaun ba imajen neʼebé la iha moris, sira “labele fase liman” ka labele nega katak Maromak iha. Nuneʼe mós sira neʼebé halo hahalok seksuál neʼebé sala no neʼebé la baibain, hanesan mane hamutuk ho mane no feto hamutuk ho feto, sira mós labele nega katak Maromak iha. (Rom 1:22-27) Nuneʼe, Paulo hatete katak “sala ukun ema hotu-hotu: ema judeu no ema gregu”.—Rom 3:9.
‘Ema nia laran fó sasin’ kona-ba sala
15. Saida mak hatudu katak ukun-fuan hakerek nanis iha ema nia laran?
15 Livru Roma fó sai razaun ida seluk atu ema rekoñese katak sira sala-naʼin no tansá sira presiza sai husi situasaun nuʼudar sala-naʼin. Kona-ba ukun-fuan sira neʼebé Maromak fó ba nasaun Israel antigu, Paulo hatete: “Sira hotu neʼebé halo sala . . . iha ukun-fuan nia [okos] sei hetan todan tuir ukun-fuan nia sasukat.” (Rom 2:12) Hodi koʼalia liután kona-ba neʼe, Paulo hatete katak maski ema jentiu la hatene kona-ba ukun-fuan neʼe, maibé dala barak sira “moris tuir buat neʼebé ukun-fuan haruka”. Porezemplu, tanbasá mak sira bandu atu oho ema, naʼok, ka halo relasaun seksuál ho ema ruma iha família laran? Paulo fó-hatene katak sira halo ida-neʼe tanba sira-nia laran ka konxiénsia.—Lee Roma 2:14, 15.
16. Tanbasá mak ema halo sala nafatin maski sira-nia laran fó sasin kona-ba sira-nia hahalok?
16 Maibé, ita hatene katak maski ema nia laran fó sasin kona-ba sira-nia hahalok, ida-neʼe la dehan katak sira halo tuir sira-nia laran. Istória kona-ba Israel antigu hatudu ida-neʼe. Porezemplu, maski Maromak fó ba ema Israel konxiénsia no ninia ukun-fuan kona-ba labele naʼok no labele halo sala-foʼer ho ema nia kaben, maibé dala barak sira la halo tuir sira-nia laran ka konxiénsia no la halo tuir Maromak Jeová nia Ukun-Fuan. (Rom 2:21-23) Hodi la halo tuir buat rua neʼe, sira halo sala duni tanba sira kontra Maromak nia matadalan no ninia hakarak. Ida-neʼe estraga sira-nia relasaun ho sira-nia Kriadór.—Lev 19:11; 20:10; Rom 3:20.
17. Iha livru Roma, saida mak fó laran-manas mai ita?
17 Buat neʼebé ita koʼalia ona husi livru Roma karik hatudu katak ema hotu nia situasaun ladún diʼak iha Maromak nia oin, inklui mós ita-nian. Maibé, apóstolu Paulo hatete buat seluk tan kona-ba neʼe. Hodi temi David nia liafuan iha Salmo 32:1, 2, nia hatete: “Rahun-diʼak ba sira neʼebé hetan perdua ba sira-nia hahalok aat no sira-nia sala taka tiha, rahun-diʼak ba ema neʼebé Maromak la hakerek nia sala.” (Rom 4:7, 8) Neʼe hatudu katak Maromak loke dalan atu fó perdua ba ema nia sala.
Lia-foun diʼak kona-ba Jesus
18, 19. (a) Iha livru Roma, Paulo temi dala barak liu kona-ba saida husi lia-foun diʼak? (b) Atubele hetan bensaun, ita tenke rekoñese saida deʼit?
18 Karik ita hanoin: “Ida-neʼe mak liafuan diʼak tebes!” Loos duni, no ida-neʼe lori ita fali ba buat neʼebé Paulo temi dala barak liu kona-ba lia-foun diʼak ka evanjellu iha livru Roma. Hanesan temi uluk, Paulo hatete: “Haʼu la moe kona-ba evanjellu. Evanjellu neʼe mak Maromak nia kbiit atu soi ema.”—Rom 1:15, 16.
19 Lia-foun diʼak ka evanjellu neʼe mak kona-ba oinsá Maromak uza Jesus atu kumpre Ninia hakarak. Paulo hein ba “loron neʼebé . . . Maromak sei tesi lia ba ema ida-ida nia laran, [liu] husi Jesus Kristu” tuir evanjellu neʼe. (Rom 2:16) Maski nia koʼalia kona-ba ida-neʼe, maibé neʼe la dehan katak “Kristu no Maromak nia reinu”, ka buat neʼebé Maromak sei halo liuhusi ninia Ukun, la importante. (Ef 5:5) Paulo hatudu katak atu ita bele moris haksolok ho bensaun sira neʼebé ita sei hetan iha Maromak nia Ukun okos, ita tenke rekoñese (1) ita-nia situasaun nuʼudar ema sala-naʼin iha Maromak nia oin no (2) tansá ita presiza tau fiar ba Jesus Kristu atubele hetan perdua ba ita-nia sala. Kuandu ema komprende ona no simu buat rua neʼe nuʼudar buat neʼebé Maromak hakarak no nuʼudar buat neʼebé fó esperansa ba nia, entaun nia bele dehan: “Loos duni, ida-neʼe mak liafuan diʼak tebes!”
20, 21. Kuandu ita haklaken, tanbasá mak ita presiza koʼalia kona-ba lia-foun diʼak neʼebé temi beibeik iha livru Roma? Rezultadu saida mak ita bele hetan?
20 Kuandu ita halaʼo ita-nia serbisu haklaken, ita presiza hanoin-hetan katak importante atu koʼalia kona-ba Jesus. Apóstolu Paulo koʼalia kona-ba Jesus kuandu nia temi Isaías nia liafuan, hodi dehan: “La iha ema ida neʼebé fiar iha nia sei moe lerek.” (Rom 10:11; Isa 28:16) Mensajen neʼebé ita hatoʼo ba ema kona-ba Jesus, karik laʼós buat foun ba sira neʼebé hatene uitoan kona-ba saida mak Bíblia hatete kona-ba sala. Maibé, karik ba ema seluk, mensajen neʼe foun duni tanba sira seidauk hatene ka ladún fiar kona-ba buat neʼe. Kuandu ema hanesan neʼe komesa ona tau fiar ba Maromak no ba Bíblia, ita sei presiza esplika ba sira kona-ba oinsá mak Maromak uza Jesus. Iha lisaun tuirmai, ita sei estuda kona-ba oinsá livru Roma kapítulu 5 esplika liután lia-foun diʼak kona-ba Jesus. Ita sei haree katak estudu neʼe sei ajuda ita iha ita-nia serbisu haklaken.
21 Ita haksolok tebes atu ajuda ema laran-moos atu komprende kona-ba lia-foun diʼak neʼebé temi beibeik iha livru Roma. Tuir loloos, lia-foun diʼak ka “evanjellu neʼe mak Maromak nia kbiit atu soi ema sira neʼebé fiar”. (Rom 1:16) Nuʼudar ita halo ida-neʼe, ita sei haree ema seluk hatete liafuan hanesan Paulo temi iha Roma 10:15, neʼebé dehan: “Furak oinsá ain sira neʼebé lori liafuan foun diʼak mai!”—Isa 52:7.
[Nota–rodapé]
^ par. 5 Bele hetan liafuan hanesan neʼe iha livru seluk iha Bíblia, no mós “liafuan diʼak nian kona-ba Jesus Kristu”.—Mc 1:1; 1 Kor 9:12; Flp 1:27.
^ par. 10 Eclesiastes 7:20: “Tanba la iha ema loos iha rai tomak neʼebé nafatin halo buat diʼak no la halo sala.”
Ita hanoin-hetan?
• Livru Roma temi dala barak liu kona-ba buat saida husi lia-foun diʼak?
• Ita presiza ajuda ema seluk atu komprende kona-ba saida?
• Oinsá mak lia-foun diʼak kona-ba Jesus bele lori bensaun barak mai ita no ba ema seluk?
[Pergunta estudu nian]
[Liafuan ne’ebé foti husi pájina 8]
Livru Roma fó sai “lia-foun diʼak” kona-ba oinsá Maromak uza Jesus atu kumpre Ninia hakarak
[Dezeñu iha pájina 9]
Ita hotu moris mai ho sala, tan neʼe ita mate