“Tau matan ba Maromak nia luhan”
“Tau matan ba Maromak nia luhan”
“Tau matan ba Maromak nia luhan neʼebé Nia tau ba imi-nia liman, laʼós tanba laran-todan maibé ho laran-haksolok.”—1 PED 5:2.
1. Kuandu Pedro hakerek ninia karta primeiru, situasaun saida mak ema kristaun hasoru?
APÓSTOLU Pedro hakerek ninia karta primeiru iha tempu balu antes Liurai Nero komesa haterus ema kristaun iha Roma. Pedro hakarak atu hametin ninia maluk fiar-naʼin tanba Diabu “laʼo mai laʼo bá” hanesan leaun hodi buka atu han ema kristaun. Atubele hamriik metin hasoru Diabu, ema kristaun sira presiza atu “matan-moris” no atu ‘haraik an iha Maromak kbiit-naʼin nia liman’. (1 Ped 5:6, 8) Sira mós presiza hamutuk nafatin atu sai ida deʼit. Sira labele “tata malu no halo aat malu”.—Gal 5:15.
2, 3. Ita halo funu hasoru sé? Ita sei estuda kona-ba saida deʼit?
2 Ohin loron, ita mós hasoru situasaun hanesan. Diabu buka dalan oioin atu halakon ita. (Apok 12:12) Iha futuru mós, ita sei hasoru ‘terus neʼebé sei sai boot tebetebes neʼebé hori mundu hahú seidauk mosu terus hanesan neʼe’. (Mt 24:21) Hanesan ema kristaun iha tempu uluk, ita presiza kuidadu kona-ba istori malu. Tan neʼe, dala ruma ita presiza ajuda husi irmaun katuas sira.
3 Mai ita haree oinsá mak katuas sira bele hafolin liután sira-nia serbisu espesiál atu ‘tau matan ba Maromak nia luhan neʼebé Nia tau iha sira-nia liman’. (1 Ped 5:2) Ita mós sei haree kona-ba dalan loos oinsá atu halo serbisu neʼe. Iha lisaun tuirmai, ita sei haree oinsá mak ita bele “hanoin sira neʼebé serbisu” atu tau matan ba bibi sira, katak irmaun-irmán sira iha kongregasaun. (1 Tes 5:12) Hodi estuda kona-ba neʼe sei ajuda ita atu hamriik metin hasoru Diabu Satanás, no ajuda ita atu hatene oinsá ita bele funu hasoru nia.—Ef 6:12.
Tau matan ba Maromak nia bibi sira
4, 5. Oinsá mak katuas sira presiza haree bibi sira? Fó toʼok ezemplu.
4 Pedro fó laran-manas ba katuas sira, neʼebé iha responsabilidade atu tau matan ba bibi sira, atu haree Maromak nia bibi sira hanesan Maromak haree sira. (Lee 1 Pedro 5:1, 2.) Maski ema haree Pedro nuʼudar ulun ida iha kongregasaun, maibé nia la koʼalia iha dalan neʼebé hatún katuas sira seluk. Duké halo ida-neʼe, Pedro fó konsellu ho laran-diʼak ba sira nuʼudar maluk katuas. (Gal 2:9) Hanesan Pedro, ohin loron Grupu Administradór mós fó laran-manas ba katuas sira iha kongregasaun atu hakaʼas an atu kumpre sira-nia responsabilidade boot kona-ba tau matan ba Maromak nia bibi sira.
5 Apóstolu Pedro hatete katak katuas sira presiza ‘tau matan ba Maromak nia luhan neʼebé Nia tau iha sira-nia liman’. Importante tebes ba katuas sira iha tempu neʼebá atu hanoin nafatin katak bibi sira mak Maromak Jeová no Jesus Kristu nian. Sira mós sei hatán ba Maromak kona-ba oinsá sira tau matan ba Maromak nia bibi sira. Hanoin toʼok katak ita-nia kolega diʼak ida husu ita atu tau matan ba ninia oan sira kuandu nia sai ba fatin ruma. Ita sei tau matan didiʼak no fó-han ba ninia oan sira. Se ita-nia kolega nia oan ida sai moras, ita fó ai-moruk ruma atu ajuda nia sai isin-diʼak fali. Nuneʼe mós katuas sira iha kongregasaun presiza “tau matan ba Maromak nia kongregasaun neʼebé nia sosa ho ninia Oan rasik nia raan”. (Apos 20:28, MF) Katuas sira hanoin nafatin katak Maromak sosa bibi ida-idak ho Kristu Jesus nia raan neʼebé folin-boot. Tanba sira sei hatán ba Maromak, sira fó-han, proteje, no tau matan ba bibi sira.
6. Saida deʼit mak bibi-atan sira iha tempu uluk presiza halo?
6 Hanoin toʼok kona-ba buat neʼebé bibi-atan sira iha tempu Bíblia nian presiza halo atu tau matan ba bibi-malae sira. Sira tahan hasoru rai-manas iha loron, no iha kalan, sira tahan hasoru rai-malirin. (Gên 31:40) Atubele proteje bibi sira, sira mós tau sira-nia moris iha perigu laran. Porezemplu, kuandu David sei joven, nia bibi-atan ida, no nia salva ninia bibi sira husi animál fuik, hanesan leaun no ursu. Kona-ba animál ida-idak neʼe, David hatete katak nia “kaer ninia fulun iha hasahún no tuku nia toʼo monu no oho nia”. (1 Sam 17:34, 35) Nia brani tebes! Karik nia besik tebes animál nia ibun! Maski nuneʼe, nia halo buat hotu neʼebé nia bele atu salva ninia bibi.
7. Oinsá mak katuas sira bele salva bibi sira husi Satanás nia ibun?
7 Ohin loron, katuas sira presiza matan-moris kona-ba Diabu neʼebé ataka ita hanesan leaun. Dala ruma, sira hatudu aten-brani hodi ajuda irmaun-irmán sira neʼebé hasoru situasaun susar ruma, ida-neʼe hanesan sira salva bibi husi Diabu nia ibun. Katuas sira bele halo ida-neʼe hodi fó konsellu husi Bíblia ba irmaun ka irmán ruma neʼebé besik atu monu ba Satanás nia lasu ruma. (Lee Judas 22, 23.) Klaru katak katuas sira presiza Jeová nia ajuda atubele halo ida-neʼe. Katuas sira tau matan ho domin ba bibi neʼebé kanek hodi uza Maromak nia Liafuan hanesan falun sira ho ligadura no kose ho mina.
8. Katuas sira lori bibi sira ba neʼebé? Iha dalan saida mak sira halo ida-neʼe?
8 Iha tempu uluk, bibi-atan sira lori sira-nia bibi-lubun ba fatin diʼak hodi fó-han no fó-hemu ba sira. Nuneʼe mós katuas sira lori ka dirije irmaun-irmán sira ba kongregasaun hodi fó laran-manas ba sira atu tuir reuniaun beibeik atu sira bele simu ai-han ka hanorin “iha tempu loloos”. (Mt 24:45) Katuas sira karik presiza uza tempu atu ajuda sira neʼebé moras iha dalan espirituál atu simu ai-han husi Maromak nia Liafuan. Se irmaun ida neʼebé hadook an husi kongregasaun no hakarak atu fila fali ba kongregasaun, hanesan bibi ida neʼebé lakon no koko atu fila fali ba ninia luhan, iha situasaun neʼe katuas sira esplika ho laran-diʼak ba nia oinsá mak nia bele halo tuir matadalan sira husi Bíblia iha ninia moris.
9, 10. Oinsá mak katuas sira ajuda ema neʼebé moras iha dalan espirituál?
9 Kuandu ita moras, doutór ida-neʼebé mak ita hakarak liu atu bá konsulta? Doutór neʼebé ladún rona kona-ba ita-nia moras no lalais deʼit fó ai-moruk tanba nia hakarak atende ema moras seluk? Ka doutór neʼebé rona didiʼak ita, esplika didiʼak ita-nia moras, no fó sai tratamentu diʼak ba ita?
10 Nuneʼe mós katuas sira, kuandu ema ida moras iha dalan espirituál, sira rona no ajuda nia atu sai diʼak fali. (Lee Tiago 5:14, 15.) Maromak nia Liafuan bele halo ema sente kmaan, hanesan mina husi Gilead neʼebé uza atu kose isin. (Jer 8:22; Eze 34:16) Kuandu ema neʼebé moras iha dalan espirituál halo tuir matadalan husi Bíblia, ida-neʼe bele ajuda nia atu serbí fali Jeová ho laran tomak. Sin, kuandu katuas sira rona ba bibi neʼebé moras nia laran-susar no halo orasaun hamutuk ho nia, ida-neʼe bele ajuda duni bibi neʼe.
Tau matan ho laran-haksolok
11. Saida mak book katuas sira atu tau matan ba Maromak nia bibi sira ho laran-haksolok?
11 Apóstolu Pedro mós fó-hanoin katuas sira kona-ba saida mak sira bele no labele halo hodi tau matan ba Maromak nia bibi sira. Katuas sira presiza halo ida-neʼe “laʼós tanba laran-todan maibé ho laran-haksolok”. Saida mak book katuas sira atu serbí sira-nia maluk ho laran-haksolok? Hanoin toʼok, saida mak book Pedro atu tau matan no fó-han ba Jesus nia bibi sira? Ninia domin ba Naʼi Jesus. (Joao 21:15-17) Nuneʼe mós katuas sira, tanba domin, sira “la moris tan ba sira an rasik, maibé moris ba ida neʼebé mate . . . tanba sira”. (2 Kor 5:14, 15) Nuneʼe, domin ba Jesus, no mós domin ba Maromak no ba sira-nia maluk sira, mak book sira atu hakaʼas an, atu fó sira-nia tempu, no atu uza buat hotu neʼebé sira iha atu tau matan ba bibi sira. (Mt 22:37-39) Sira halo ida-neʼe laʼós ho laran-todan maibé ho laran-haksolok.
12. Paulo prontu atu halo saida hodi bele serbí ninia irmaun-irmán sira?
12 Katuas sira presiza sai prontu atu halo saida hodi bele serbí sira-nia irmaun-irmán sira? Sira tau matan ba bibi sira hodi halo tuir apóstolu Paulo nia ezemplu, hanesan nia halo tuir Jesus nia ezemplu. (1 Kor 11:1) Tanba Paulo no ninia maluk sira hadomi sira-nia irmaun-irmán iha Tesalónika, nia ho ninia maluk sira ho laran-haksolok hatoʼo ba sira ‘laʼós deʼit liafuan foun diʼak, maibé sira-nia moris rasik’. Sira halo ida-neʼe ho laran-maus “hanesan inan ida neʼebé tau matan ba nia oan sira”. (1 Tes 2:7, 8) Paulo komprende oinsá inan ida sente kona-ba ninia oan sira. Inan prontu atu halo buat naran deʼit ba sira, inklui mós hadeer iha kalan boot atu fó-han sira.
13. Katuas sira presiza tetu didiʼak kona-ba saida?
13 Katuas sira presiza tetu didiʼak sira-nia responsabilidade atu tau matan ba irmaun-irmán sira iha kongregasaun no mós sira-nia família rasik. (1 Tim 5:8) Tempu neʼebé katuas sira uza atu tau matan ba kongregasaun, ida-neʼe mak tempu neʼebé folin-boot neʼebé sira prontu atu fó maski la uza tempu neʼe hamutuk ho sira rasik nia família. Dalan ida atu katuas sira tetu didiʼak sira-nia responsabilidade rua neʼe mak dala ruma konvida ema seluk atu tuir sira-nia Adorasaun Família nian. Durante tinan barak, katuas ida iha rai-Japaun, naran Masanao, konvida ema klosan no mós família sira neʼebé aman la tuir lia-loos atu estuda hamutuk ho ninia família. Ikusmai, sira balu neʼebé hetan ajuda neʼe agora mós serbí nuʼudar katuas no halo tuir irmaun Masanao nia ezemplu.
Tau matan ho laran laʼós hodi manán buat ruma
14, 15. Tanbasá mak katuas sira presiza kuidadu atu la iha hakarak atu “manán buat ruma”? Oinsá mak sira bele halo tuir Paulo nia ezemplu kona-ba neʼe?
14 Pedro fó laran-manas ba katuas sira atu tau matan ba bibi sira “laʼós atu manán buat ruma . . . maibé ho laran-kmaan [“ho laran”, MF]”. Maski serbisu neʼebé katuas sira halo han tempu barak, maibé sira la hein atu simu osan. Pedro sente katak nia presiza fó avizu ba ninia maluk katuas atu kuidadu kona-ba tau matan ba bibi sira hodi hakarak “manán buat ruma”. Ida-neʼe bele sai perigu tanba ita bele haree oinsá ulun-naʼin relijiaun nian barak husi ‘Babilónia Boot’ moris diʼak ho rikusoin barak maski ema barak moris iha kiak nia laran. (Apok 18:2, 3, MF) Nuneʼe, katuas sira ohin loron presiza kuidadu duni atu la iha hakarak hanesan neʼe.
15 Paulo fó ezemplu diʼak ba katuas kristaun sira. Maski nia apóstolu ida, maibé nia la “fó todan” ba ema kristaun iha Tesalónika, no nia “serbisu kalan loron” atu bele selu hodi bele “han iha ema nia meza”. (2 Tes 3:8) Ohin loron, katuas barak, inklui sira neʼebé iha knaar atu vizita kongregasaun sira, mós hatudu ezemplu diʼak kona-ba neʼe. Maski sira kontente kuandu sira-nia maluk kristaun hatudu laran-luak ba sira hodi simu sira iha sira-nia uma ka fó ajuda ruma ba sira, maibé sira la “fó todan” ba ema ida.—1 Tes 2:9.
16. Oinsá mak katuas sira tau matan ba bibi sira “ho laran”?
16 Katuas sira tau matan ba bibi sira “ho laran”. Ita bele haree katak sira halo sira-nia serbisu ho laran tanba sira sempre prontu atu ajuda bibi sira. Maski nuneʼe, ida-neʼe la dehan katak sira obriga bibi sira atu serbí Jeová; katuas sira mós la hakaʼas irmaun ida atu serbí Maromak hodi irmaun neʼe bele sai diʼak liu fali irmaun ida seluk. (Gal 5:26, MF) Katuas sira hatene katak bibi ida-idak la hanesan. Sira prontu atu ajuda ho laran sira-nia irmaun-irmán sira atu serbí Jeová ho laran-kontente.
Tau matan hodi sai ezemplu
17, 18. (a) Tanbasá mak dala ruma susar ba apóstolu sira atu komprende Jesus nia hanorin kona-ba haraik-an? (b) Ohin loron mós, irmaun sira presiza kuidadu kona-ba saida?
17 Hanesan ita foin estuda iha lisaun neʼe, katuas sira presiza hanoin nafatin katak bibi sira neʼebé sira tau matan mak Maromak ninian, laʼós sira-nian. Nuneʼe, katuas sira presiza kuidadu atu labele ‘ukun ho kroʼat sira neʼebé iha sira-nia liman’. (Lee 1 Pedro 5:3.) Dala ruma, Jesus nia apóstolu sira hakarak atu hetan pozisaun neʼebé boot. Sira hakarak hetan pozisaun neʼebé boot hanesan ukun-naʼin sira neʼebé ukun nasaun sira.—Lee Marcos 10:42-45.
18 Ohin loron, se irmaun ida “hakaʼas an atu hetan knaar nuʼudar katuas iha kongregasaun”, nia presiza hanoin didiʼak kona-ba tansá mak nia hakarak atu serbí nuʼudar katuas. (1 Tim 3:1, MF) Irmaun sira neʼebé serbí nuʼudar katuas mós presiza husu ba sira-nia an: ‘Haʼu serbí nuʼudar katuas tanba haʼu iha hakarak atu hetan pozisaun neʼebé boot ka lae?’ Tanba susar ba apóstolu sira atu halakon hakarak hanesan neʼe, ida-neʼe hatudu katak katuas sira mós presiza hakaʼas an atu halakon hakarak mundu neʼe nian kona-ba ukun ema seluk.
19. Iha dalan saida mak katuas sira presiza tau matan ba bibi sira?
19 Dala ruma, katuas sira presiza uza sira-nia kbiit hodi fó konsellu makaʼas. Sira presiza halo ida-neʼe liuliu atubele proteje bibi sira iha kongregasaun husi “asu-fuik sira”. (Apos 20:28-30) Paulo hatete ba Tito atu “hanorin . . . ho kbiit tomak”. (Tito 2:15) Maski katuas sira dala ruma presiza fó konsellu makaʼas, maibé sira nafatin hatudu respeitu ba sira neʼebé simu konsellu. Duké kritika makaʼas, katuas sira hatene katak atubele book ema nia laran atu halo tuir, sira presiza fó konsellu ho laran-maus.
20. Oinsá mak katuas sira bele halo tuir Jesus nia ezemplu?
20 Kristu nia ezemplu book katuas sira atu hadomi irmaun-irmán sira. (Joao 13:12-15) Kuandu ita lee kona-ba dalan neʼebé Jesus hanorin ninia dixípulu sira atu haklaken no atu ajuda ema seluk sai dixípulu, ida-neʼe book ita-nia laran. Jesus nia ezemplu kona-ba hatudu haraik-an book ninia dixípulu sira atu hatudu ‘haraik-an hodi hanoin katak ema seluk diʼak liu fali sira’. (Flp 2:3) Katuas sira mós halo tuir Jesus nia ezemplu hodi hakarak ‘sai ezemplu ba luhan’ ka ba irmaun-irmán sira.
21. Katuas sira iha esperansa atu hetan saida iha futuru?
21 Pedro ramata ninia liafuan ba katuas sira hodi koʼalia kona-ba esperansa neʼebé sira bele hetan iha futuru. (Lee 1 Pedro 5:4.) Katuas sira neʼebé kose-mina “sei simu kolen glória nian ida kmanek liu” hamutuk ho Kristu iha lalehan. Katuas sira neʼebé parte husi “bibi seluk” sei iha oportunidade espesiál atu tau matan ba Maromak nia bibi sira iha rai iha Jesus nia ukun okos. (Joao 10:16) Iha lisaun tuirmai, ita sei estuda kona-ba dalan oioin neʼebé irmaun-irmán sira bele apoia katuas sira neʼebé iha responsabilidade atu tau matan ba kongregasaun.
Hodi hanoin-hetan fali
• Tanbasá mak Pedro presiza fó konsellu ba ninia maluk katuas atu tau matan ba Maromak nia bibi sira?
• Oinsá mak katuas sira bele ajuda sira neʼebé moras iha dalan espirituál?
• Saida mak book katuas sira atu tau matan ba Maromak nia bibi sira?
[Pergunta estudu nian]
[Dezeñu iha pájina 21]
Hanesan bibi-atan iha tempu uluk, katuas sira ohin loron mós tenke tau matan ba Maromak nia “bibi sira”
