Ita sei halo tuir Jeová nia matadalan ka lae?
Ita sei halo tuir Jeová nia matadalan ka lae?
“Haʼu odi dalan hotu neʼebé falsu.”—SAL 119:128.
1, 2. (a) Kuandu ita buka-hatene dalan atubele toʼo fatin ruma, ita hakarak ema atu fó avizu saida, no tanbasá? (b) Jeová fó avizu oioin mai ita kona-ba saida, no tanbasá?
HANOIN toʼok kona-ba ida-neʼe: Ita presiza halo viajen ba fatin ruma. Atu hatene dalan, ita husu belun ida neʼebé ita fiar no hatene dalan. Kuandu nia esplika dalan ho klaru, karik nia hatete hanesan neʼe: “Kuidadu kona-ba fila ba dalan tuirmai tanba iha sinál ida neʼebé bele lohi ó. Ema barak tuir dalan ida-neʼe no laʼo-lakon.” Ita kontente tebes tanba nia hanoin ita, no ita halo tuir ninia avizu, loos ka lae? Maromak Jeová hanesan belun ida-neʼe. Nia hatudu ho didiʼak oinsá mak ita bele toʼo mundu foun atubele hetan moris rohan-laek, no nia mós fó avizu mai ita kona-ba perigu oioin neʼebé bele halo ita laʼo sala dalan.—Deut 5:32; Isa 30:21.
2 Iha lisaun ida-neʼe no mós iha ida tuirmai, ita sei koʼalia kona-ba perigu balu neʼebé ita-nia Belun, Jeová, fó avizu mai ita atu kuidadu. Nia fó avizu sira-neʼe tanba nia hanoin no hadomi ita. Nia mós hakarak ita atu toʼo mundu foun. Nia sente triste tebes kuandu nia haree ema la rona ba perigu no laʼo-lakon dalan. (Eze 33:11) Iha lisaun neʼe, ita sei koʼalia kona-ba perigu tolu. Perigu primeiru mai husi ema seluk. Perigu segundu mai husi ita-nia laran. Perigu terseiru mai husi buat neʼebé laʼós realidade. Tan neʼe, ita presiza aprende husi Jeová oinsá atu hasees an husi perigu sira-neʼe. Ema neʼebé hakerek salmu ida hatete ba Jeová ida-neʼe: “Haʼu odi dalan hotu neʼebé falsu.” (Sal 119:128) Ita mós sente hanesan neʼe ka lae? Mai ita haree oinsá mak ita bele hakaʼas an atu sees husi perigu sira neʼebé bele lori ita ba dalan sala.
Labele “tuir ema-lubun”
3. (a) Tanbasá mak perigu atu ita tuir deʼit ema seluk kuandu ita ladún hatene dalan neʼebé loos? (b) Matadalan importante saida mak ita bele hetan iha Êxodo 23:2?
3 Kuandu halo viajen neʼebé dook, saida mak ita halo se ita la hatene dalan neʼebé loos? Karik ita tuir deʼit ema seluk, liuliu se ita haree ema barak hili dalan hanesan. Maibé, dalan neʼe atu bá neʼebé loos? Karik ema sira-neʼe la bá fatin neʼebé ita hakarak bá, ka sira mós laʼo-lakon dalan. Nuneʼe, hanoin toʼok kona-ba ukun-fuan ida neʼebé Maromak fó ba ema Israel antigu. Kuandu iha kazu ruma neʼebé presiza hetan tesi-lia, Maromak fó avizu ba sira neʼebé serbí nuʼudar juis ka testemuña kona-ba perigu atu “tuir ema-lubun”. (Lee Êxodo 23:2. *) Maski fasil ba ema sala-naʼin atu halo tuir ema seluk nia hakarak, maibé halo ida-neʼe bele hanetik justisa. Maibé, matadalan atu labele “tuir ema-lubun” laʼós deʼit ba juis ka testemuña sira.
4, 5. Situasaun susar saida mak Josué no Caleb hasoru neʼebé bele book sira atu tuir ema-lubun? Saida mak ajuda sira atu aten-brani?
4 Tuir loloos, perigu kona-ba “tuir ema-lubun” bele mosu iha situasaun oioin no derrepente deʼit, no susar atu bele tahan ida-neʼe. Porezemplu, hanoin toʼok kona-ba saida mak akontese ba Josué no Caleb. Sira hamutuk ho espiaun naʼin-10 bá atu hafuhu Rai neʼebé Promete ona. Kuandu sira fila fali husi neʼebá, espiaun naʼin-10 hatoʼo informasaun neʼebé halo ema Israel sente taʼuk. Sira hatete katak ema balu husi rai neʼebá mak ema jigante, katak anju aat sira neʼebé kaben ho feto sira iha rai nia bei-oan. (Gên 6:4) Informasaun neʼe la loos tanba Maromak halakon ema jigante hotu iha Rai-Nabeen iha Noé nia tempu. Nuneʼe la iha jigante ida neʼebé sei hela. Maski nuneʼe, ideia neʼebé la loos bele iha kbiit atu book ema atu fiar ideia sira-neʼe, liuliu kuandu sira-nia fiar ba Maromak la metin. Informasaun la loos husi espiaun naʼin-10 halo ema hotu taʼuk tebetebes. Depois neʼe, ema barak hanoin katak sira labele halo tuir Maromak Jeová nia matadalan atu tama ba Rai neʼebé Promete ona. Iha situasaun susar neʼe, saida mak Josué no Caleb halo?—Núm 13:25-33.
5 Maski ema Israel lakohi rona ba sira, sira naʼin-rua la taʼuk atu fó sai lia-loos kona-ba rai neʼe no sira la tuir ema-lubun. Josué no Caleb halo buat neʼebé loos maski ema-lubun hakarak oho sira. Saida mak halo sira aten-brani? Sira-nia fiar ba Jeová. Kuandu ema ida iha fiar metin ba Jeová, nia tau fiar ba buat neʼebé Jeová hatete, laʼós ba ideia neʼebé la loos neʼebé ema hatete. Kuandu Josué no Caleb koʼalia kona-ba sira-nia fiar ba Jeová, sira fó-hatene ba ema hotu katak Jeová sempre kumpre buat hotu neʼebé nia promete. (Lee Josué 23:14. *) Josué no Caleb hadomi no tau fiar ba sira-nia Maromak. Sira lakohi atu halo buat naran deʼit neʼebé bele halo Jeová sente triste hodi tuir deʼit ema seluk nia hakarak. Nuneʼe, sira sai ezemplu kapás tebes mai ita ohin loron.—Núm 14:1-10.
6. Iha situasaun saida deʼit mak perigu mai ita atu tuir ema-lubun?
6 Dala ruma ita hakarak tuir ema-lubun ka lae? Ema barak neʼebé dook husi Jeová lakohi simu ninia matadalan kona-ba morál. Nuneʼe, sira haburas ideia katak la sala atu haree filme ka halimar video game neʼebé hatudu hahalok foʼer, violénsia, no matan-dook nia atividade. (2 Tim 3:1-5) Bainhira ita atu hili atividade halimar nian ba ita rasik ka ba ita-nia família, ita foti desizaun hodi tuir deʼit buat neʼebé ema seluk hatete no halo ka lae? Se ita halo nuneʼe, ita tuir ema-lubun.
7, 8. (a) Oinsá mak ita bele treinu ita-nia kbiit “atu hatene buat neʼebé loos husi buat neʼebé aat”? Tanbasá mak treinu hanesan neʼe diʼak liu fali tuir lista kona-ba saida mak bele ka labele halo? (b) Tanbasá mak joven kristaun barak nia ezemplu halo ita haksolok?
7 Maromak Jeová fó mai ita prezente ida atu ajuda ita foti desizaun, neʼe mak ita-nia kbiit “atu hatene buat neʼebé diʼak husi buat neʼebé aat”. Maibé, ita presiza treinu kbiit neʼe hodi uza beibeik. (Ebr 5:14) Porezemplu, ita la bele treinu ita-nia kbiit neʼe se ita halo tuir deʼit buat neʼebé ema seluk halo ka se ita hein deʼit atu ema seluk hatete mai ita kona-ba saida mak ita tenke halo. Nuneʼe, ita ida-idak presiza halo desizaun rasik ho matenek. Tan neʼe mak Jeová nia povu la hetan lista ida kona-ba filme saida, ka livru saida, ka sítiu saida iha internét mak sira presiza hadook an. Tanba mundu neʼe nia situasaun muda beibeik, karik lista hanesan neʼe mós presiza troka beibeik. (1 Kor 7:31, MF) Entaun, buat neʼebé importante liu mak ita uza ita-nia kbiit neʼebé Jeová fó mai ita atu halo desizaun rasik. Jeová hakarak ita atu hanoin didiʼak kona-ba matadalan husi Bíblia, halo orasaun, no depois foti desizaun neʼebé halo nia kontente.—Ef 5:10.
8 Dala ruma, desizaun sira neʼebé ita foti tuir Bíblia, bele halo ema seluk la gosta ita. Joven kristaun sira iha eskola dala ruma hetan susar husi kolega sira neʼebé obriga sira atu halo buat neʼebé estudante barak halo. (1 Ped 4:4) Nuneʼe, kuandu ita haree ita-nia maluk kristaun neʼebé joven ka idade ona hatudu fiar hanesan Josué no Caleb no lakohi tuir ema-lubun, ida-neʼe halo ita haksolok tebes.
Labele “tuir imi-nia laran no imi-nia matan”
9. (a) Bainhira atu halo viajen ba fatin ruma, tanbasá perigu atu tuir deʼit dalan neʼebé ita gosta? (b) Tanbasá ukun-fuan iha Números 15:38, 39 importante ba Maromak nia povu iha tempu antigu?
9 Perigu segundu neʼebé ita atu koʼalia mai husi ita-nia laran rasik. Hanoin toʼok ida-neʼe: Ita atu halo viajen ba fatin ida, no ita iha mapa atu ajuda ita toʼo iha neʼebá. Maibé, saida mak sei akontese se ita deside atu soe mapa no tuir deʼit dalan hotu neʼebé lori ita ba fatin neʼebé haree furak? Ita sei nunka toʼo fatin neʼebé ita hakarak atu bá. Ezemplu neʼe ajuda ita atu komprende kona-ba Jeová nia ukun-fuan ida tan neʼebé nia fó ba ema Israel antigu. Ita bele lee kona-ba neʼe iha Números 15:38, 39. (Lee. *) Ohin loron, ema barak ladún komprende ukun-fuan kona-ba tau kabas kór-azúl haleʼu saren iha faru ninin. Tanbasá mak ukun-fuan neʼe importante tebes? Tanba hodi halo tuir ukun-fuan neʼe ajuda Maromak nia povu atu hatudu katak sira la hanesan ho ema husi nasaun sira seluk. Ida-neʼe importante tebes atu sira bele halo kontente Jeová. (Lev 18:24, 25) Maibé, ukun-fuan neʼe mós hatudu katak perigu neʼebé mai husi ita-nia laran rasik bele halo ita laʼo sees dalan ba moris rohan-laek. Oinsá?
10. Oinsá mak Maromak Jeová hatudu katak nia hatene buat hotu kona-ba ema?
10 Haree toʼok tanba razaun saida mak Maromak Jeová fó ukun-fuan neʼe ba ninia povu, nia hatete: “Imi labele tuir imi-nia laran no imi-nia matan.” Jeová hatene buat hotu kona-ba ema. Nia hatene katak buat neʼebé ita haree ho ita-nia matan bele lohi ita-nia laran. Nuneʼe, Bíblia fó avizu mai ita hodi dehan: “Laran mak makerek liu buat hotu-hotu no la bele kontrola. Sé mak bele hatene kona-ba nia?” (Jer 17:9) Tan neʼe mak Jeová hatete ba ema Israel atu labele tuir sira-nia laran no sira-nia matan. Jeová hatene katak se ema Israel haree ba nasaun sira seluk neʼebé la adora nia, karik ema Israel sei hakarak halo tuir ema husi nasaun sira-neʼe hodi sai hanesan sira, atu iha hanoin, sentimentu no hahalok hanesan sira.—Prov 13:20.
11. Ita-nia laran no matan bele book ita atu halo saida?
11 Ohin loron, fasil liután ba ita-nia laran neʼebé makerek atu hakarak buat neʼebé ita haree. Ita moris iha mundu neʼebé iha buat barak neʼebé book ita atu tuir hakarak aat. Entaun, oinsá mak matadalan iha Números 15:39 bele ajuda ita? Porezemplu, kuandu ita haree kolega eskola, kolega serbisu, ka ema seluk hatais roupa neʼebé hatudu isin, neʼe book ita oinsá? Karik ida-neʼe bele book ita atu hakarak ‘tuir ita-nia laran no matan’. Lakleur, karik ita mós sei hatais hanesan ita-nia kolega sira.—Rom 12:1, 2.
12, 13. (a) Ita presiza halo saida se ita-nia matan haree ba buat neʼebé bele hamosu hanoin aat? (b) Tanbasá mak ita lakohi halo buat ruma neʼebé bele hamosu hakarak aat iha ema seluk nia laran?
12 Importante tebes mai ita atu haburas hahalok kontrola an. Kuandu ita-nia matan haree ba buat neʼebé bele hamosu hanoin aat, ita presiza hanoin fali Job nia desizaun. Nia halo aliansa ho ninia matan atu la hatudu sentimentu romántiku ba feto seluk neʼebé laʼós ninia feen. (Jó 31:1) Liurai David mós foti desizaun hanesan neʼe, hodi dehan: “Haʼu sei la tau iha haʼu-nia oin buat neʼebé la iha folin.” (Sal 101:3) “Buat neʼebé la iha folin” mak buat naran deʼit neʼebé bele estraga ita-nia relasaun ho Jeová. Ida-neʼe inklui buat naran deʼit neʼebé ita-nia matan haree hodi book ita atu iha hakarak neʼebé sala no depois book ita atu halo buat neʼebé sala.
13 No ita mós bele sai nuʼudar “buat neʼebé la iha folin” ba ema seluk se ita halo buat ruma neʼebé hamosu hakarak aat iha sira-nia laran. Tan neʼe, ita presiza halo tuir Bíblia nia konsellu kona-ba “hatais loloos” neʼebé hatudu respeitu. (1 Tim 2:9) Kuandu ita hatais iha dalan neʼebé hatudu respeitu, ita hatudu katak ita la hanoin an deʼit maibé ita hanoin ema seluk, no katak ita buka uluk ema seluk nia diʼak liu fali ita rasik nian. (Rom 15:1, 2) Iha kongregasaun kristaun iha mundu tomak iha joven rihun ba rihun neʼebé hatudu ezemplu diʼak kona-ba dalan neʼebé sira hatais. Ita kontente tebes atu haree katak sira la ‘tuir sira-nia laran no sira-nia matan’. Sira hili atu halo Maromak Jeová kontente iha buat hotu neʼebé sira halo!
Labele tuir “buat sira neʼebé laʼós realidade”
14. Samuel fó avizu saida kona-ba tau fiar ba “buat sira neʼebé laʼós realidade”?
14 Hanoin toʼok katak nuʼudar ita halo viajen, ita laʼo liu rai-maran fuik. Lakleur, ita hamrook no ita hanoin katak ita haree bee. Maibé tuir loloos, buat neʼebé ita haree laʼós bee. Saida mak bele akontese se ita laʼo sees dalan hodi buka buat neʼebé ita hanoin mak bee? Se ita halo ida-neʼe, ita bele laʼo-lakon no bele mate! Maromak Jeová hatene katak perigu tebes atu buka buat neʼebé laʼós realidade. Hanoin toʼok ezemplu ida. Ema Israel antigu hakarak sai hanesan nasaun seluk neʼebé iha liurai. Tuir loloos, sira-nia hakarak neʼe mak sala boot tanba hatudu katak sira lakohi simu Jeová nuʼudar sira-nia Liurai. Maski Jeová husik sira atu iha ema ida nuʼudar liurai, maibé nia hatete ba profeta Samuel atu fó avizu ba sira katak perigu atu tau fiar ba “buat sira neʼebé laʼós realidade”.—Lee 1 Samuel 12:21. *
15. Iha dalan saida deʼit mak ema Israel tuir buat sira neʼebé laʼós realidade?
15 Karik ema Israel hanoin katak diʼak liu atu tau fiar ba liurai duké ba Maromak Jeová. Tuir loloos, se sira iha hanoin hanesan neʼe, sira tuir buat neʼebé laʼós realidade! No ida-neʼe perigu ba sira tanba fasil deʼit atu sira mós tau fiar ba buat seluk tan neʼebé laʼós realidade neʼebé mai husi Satanás. Porezemplu, liurai sira-neʼe bele halo sira adora maromak falsu. Ema neʼebé adora maromak falsu neʼebé halo husi ai ka fatuk, sira hanoin katak sira bele fiar maromak sira-neʼe tanba sira bele haree no kaer sira. Sira la tau fiar ba Jeová neʼebé matan la haree, no neʼebé kria buat hotu-hotu. Maibé, apóstolu Paulo hatete katak maromak falsu sira-neʼe “la iha folin”. (1 Kor 8:4, MF) Maromak falsu sira-neʼe la bele haree, rona, koʼalia no halo buat ida. Karik ema bele haree sira no kona sira, maibé se ema adora maromak falsu sira-neʼe ida, ida-neʼe hanesan ema tuir buat neʼebé laʼós realidade no bele lori sira ba perigu.—Sal 115:4-8.
16. (a) Iha dalan saida deʼit mak Satanás lohi ema barak atu buka buat sira neʼebé laʼós realidade? (b) Tanbasá ita dehan katak sasán sira mak buat neʼebé laʼós realidade kuandu ita kompara sira ho Maromak Jeová?
16 Satanás ho matenek nafatin book ema atu buka buat sira neʼebé laʼós realidade. Porezemplu, nia lohi ema barak atu hanoin katak iha rikusoin mak bele halo sira sente seguru. Maski osan, sasán barak, no serbisu boot bele lori buat diʼak ba sira, maibé oinsá mak buat sira-neʼe bele ajuda sira kuandu sira moras, ka hasoru problema ekonomia, ka dezastre naturál? Oinsá mak buat sira-neʼe bele ajuda sira kuandu sira sente katak sira-nia moris la iha folin? Oinsá mak buat sira-neʼe bele ajuda sira atu hetan resposta ba pergunta sira neʼebé importante kona-ba moris? Oinsá mak buat sira-neʼe bele ajuda sira kuandu sira besik atu mate? Tau fiar ba osan ka sasán, la bele proteje ita husi moras ka mate. Tanba “buat sira-neʼe laʼós realidade”, sira la bele halo ita sente kontente no seguru. (Prov 23:4, 5) Maibé, ita-nia Maromak Jeová deʼit mak realidade! Tan neʼe, hodi iha relasaun neʼebé metin ho nia mak ita bele sente kontente no seguru. Neʼe mak bensaun neʼebé furak tebes! Nuneʼe, mai ita nunka husik Jeová hodi la buka buat sira neʼebé laʼós realidade.
17. Ita sei halo saida kona-ba perigu tolu neʼebé temi iha lisaun neʼe?
17 Ita kontente tebes tanba ita-nia Belun, Jeová, hatudu dalan mai ita iha ita-nia moris. Se ita kontinua rona ba ninia avizu kona-ba perigu tolu neʼe, ita sei bele laʼo nafatin iha dalan neʼebé lori ita ba moris rohan-laek iha mundu foun. Perigu tolu neʼebé ita foin temi mak tuir deʼit ema-lubun, ita-nia laran rasik, no mós buat sira neʼebé laʼós realidade. Iha lisaun tuirmai, ita sei koʼalia kona-ba perigu tolu tan neʼebé Jeová fó nuʼudar avizu hodi bele ajuda ita atu odi no sees an husi dalan falsu neʼebé lori ema barak laʼo sala dalan.—Sal 119:128.
[Nota–rodapé]
^ par. 3 Êxodo 23:2: “Ó labele tuir ema-lubun neʼebé atu halo buat aat; no ó labele fó sasin kona-ba buat neʼebé halo ema istori malu atu ó labele hamutuk ho ema-lubun hodi hanetik justisa.”
^ par. 5 Josué 23:14: “Imi hatene ho imi-nia laran tomak no ho imi-nia moris tomak katak husi liafuan diʼak hotu neʼebé Jeová, imi-nia Maromak, hatete ba imi, la iha ida mak la sai loos. Sira hotu sai loos ba imi. La iha liafuan ida neʼebé la sai loos.”
^ par. 9 Números 15:38: “Sira tenke halo ba sira-nia an saren iha sira-nia faru ninin . . . , no sira tenke tau kabas kór-azúl haleʼu saren leten iha sira-nia faru ninin: 39 ‘. . . no imi tenke haree ida-neʼe no hanoin-hetan mandamentu hotu husi Jeová no halo tuir sira, no imi labele tuir imi-nia laran no imi-nia matan.’”
^ par. 14 1 Samuel 12:21: “No imi labele sees ba sorin atu tuir buat sira neʼebé laʼós realidade no neʼebé la fó buat diʼak no la bele salva, tanba sira laʼós realidade.”
Oinsá Ita hatán?
Oinsá mak ita bele halo tuir matadalan iha eskritura sira tuirmai neʼe?
[Pergunta estudu nian]
[Dezeñu iha pájina 11]
Matenek atu tuir deʼit ema-lubun ka lae?
[Dezeñu iha pájina 13]
Tanbasá mak perigu atu tuir ita-nia laran no matan?
[Dezeñu iha pájina 14]
Ita buka buat sira neʼebé laʼós realidade ka lae?
