Saida mak Maromak nia hakmatek?
Saida mak Maromak nia hakmatek?
“Hakmatek iha loron Sábadu hela nafatin ba Maromak nia povu.”—EBR 4:9.
1, 2. Saida mak ita aprende husi Gênesis 2:1-3? Ita presiza hatene resposta ba pergunta saida deʼit?
HUSI kapítulu primeiru iha livru Gênesis, ita aprende katak Maromak halo mundu neʼe durante loron neen nia laran ba ema atu bele moris. Loron sira-neʼe laʼós loron baibain neʼebé iha oras 24 deʼit, maibé tempu neʼebé kleur tebes. Bíblia koʼalia kona-ba loron ida-idak neʼe hodi hatete: “Nuneʼe iha kalan no iha dadeer.” (Gên 1:5, 8, 13, 19, 23, 31) Maibé, iha Gênesis 2:1-3, Bíblia la temi liafuan hanesan neʼe kona-ba loron hitu.
2 Ida-neʼe hatudu katak loron hitu neʼe, ka Maromak nia “loron” deskansa, sei halaʼo daudaun iha tempu neʼebé Moisés hakerek livru Gênesis iha tinan 1513 molok Kristu. Maibé, Maromak nia loron deskansa, ka loron hakmatek, kontinua toʼo ohin loron ka lae? Se nuneʼe, ita bele tama iha ninia loron hakmatek neʼe ka lae? Importante tebetebes mai ita atu hatene resposta ba pergunta sira-neʼe.
Maromak Jeová sei “deskansa” hela ka lae?
3. Oinsá mak Jesus nia liafuan iha Joao 5:16, 17 hatudu katak loron hitu sei kontinua hela iha Jesus nia tempu?
3 Iha buat rua neʼebé hatudu katak loron hitu neʼe kontinua nafatin iha Jesus nia tempu no mós iha apóstolu sira-nia tempu. Buat ida mak Jesus nia liafuan ba ema neʼebé kontra nia tanba nia kura ema moras iha loron Sábadu. Tuir sira-nia hanoin kura ema iha loron Sábadu mak hahalok neʼebé sala tanba hanesan halo serbisu. Jesus hatán ba sira hodi dehan: “Haʼu-nia Aman serbisu toʼo ohin, nuneʼe mós haʼu serbisu.” (Joao 5:16, 17) Jesus nia liafuan neʼe katak sá? Neʼe hanesan nia dehan: “Haʼu ho haʼu-nia Aman halaʼo serbisu neʼebé hanesan. Tanba haʼu-nia Aman kontinua halo serbisu durante ninia loron Sábadu neʼebé naruk tebetebes, hanesan tinan rihun ba rihun, nuneʼe mós haʼu serbisu iha loron Sábadu.” Tan neʼe, Jesus nia liafuan hatudu katak Maromak nia loron hitu, ka loron deskansa husi serbisu atu kria buat hotu iha rai, sei kontinua hela iha Jesus nia tempu. *
4. Saida mak Paulo hatete neʼebé hatudu katak loron hitu kontinua nafatin iha ninia tempu?
4 Iha buat ida tan neʼebé hatudu katak loron hitu neʼe kontinua nafatin iha Jesus nia tempu no mós iha apóstolu sira-nia tempu. Neʼe mak buat neʼebé apóstolu Paulo hatete ba ema ebreu kristaun. Hodi temi Gênesis 2:2 kona-ba Maromak nia hakmatek, nia hatete: “Ita neʼebé fiar ona tama iha hakmatek neʼe.” (Ebr 4:3, 4, 6, 9) Nuneʼe, loron hitu neʼe ka loron hakmatek neʼe kontinua nafatin iha Paulo nia tempu. Loron neʼe sei kontinua toʼo bainhira?
5. Saida mak Maromak Jeová nia hakarak ba loron hitu neʼe? Bainhira mak ninia hakarak neʼe sei sai loos?
5 Atubele fó resposta ba pergunta neʼe, ita presiza hatene tansá mak Maromak Jeová hili loron hitu neʼe. Gênesis 2:3 esplika hodi hatete: “Maromak haraik bensaun ba loron hitu neʼe no halo loron neʼe sai sagradu.” Jeová halo loron neʼe “sai sagradu” tanba nia hili loron neʼe atu kumpre ninia hakarak ba rai. Ninia hakarak mak atu ema hotu neʼebé halo tuir nia moris iha rai no tau matan ba rai no buat hotu neʼebé iha rai. (Gên 1:28) Atu kumpre hakarak neʼe mak Maromak Jeová no Jesus Kristu, “Sábadu nia Naʼi”, kontinua “serbisu toʼo ohin”. (Mt 12:8) Maromak nia loron hakmatek sei kontinua toʼo tempu neʼebé nia kumpre ninia hakarak iha rai. Ida-neʼe sei sai loos iha Kristu nia ukun ba tinan rihun ida nia rohan.
Labele “monu hanesan sira neʼebé lakohi halo tuir”
6. Ezemplu saida deʼit mak sai hanesan avizu mai ita? Saida mak ita bele aprende husi ezemplu sira-neʼe?
6 Maromak esplika ho klaru ninia hakarak ba Adão no Eva, maibé sira la halo tuir. Ikusmai, ema rihun ba rihun mós la halo tuir. Maromak nia povu, ema Israel, dala barak mós la halo tuir nia. Paulo fó avizu ba ema kristaun iha ninia tempu katak se sira la kuidadu, sira balu bele monu ba lasu hanesan ema Israel antigu. Nia hatete: “Neʼe duni, ita sei hakaʼas an atu tama iha hakmatek neʼe, atu ita ida labele monu hanesan sira neʼebé lakohi halo tuir nia ezemplu.” (Ebr 4:11) Paulo nia liafuan hatudu katak ema neʼebé la halo tuir Maromak labele tama iha Ninia hakmatek. Ida-neʼe katak sá mai ita? Neʼe katak se ita halo buat ruma neʼebé kontra Maromak nia hakarak, ita labele tama ona iha Maromak nia hakmatek ka lae? Importante tebes atu ita hatene resposta ba pergunta neʼe. Maibé agora, mai ita haree saida mak ita bele aprende husi ema Israel nia ezemplu aat no tansá sira labele tama iha Maromak nia hakmatek.
“Sira-neʼe sei la tama iha haʼu-nia hakmatek”
7. Kuandu Jeová salva ema Israel husi Egiptu, ninia hakarak mak saida? Ema Israel tenke halo saida?
7 Iha tinan 1513 molok Kristu, Maromak Jeová fó sai ninia hakarak ba ninia atan Moisés kona-ba ema Israel. Maromak hatete: “Haʼu sei tun hodi halo sira livre husi ema Egiptu sira-nia liman no lori sira sai husi rai [Egiptu] neʼe ba fali rai ida neʼebé diʼak no luan tebes, ba rai ida neʼebé nakonu ho susubeen no bani-been.” (Êx 3:8) Kuandu Jeová salva ema Israel “husi ema Egiptu sira-nia liman”, Maromak nia hakarak mak atu halo sira sai ninia povu, hanesan nia promete ona ba sira-nia beiʼala, Abraão. (Gên 22:17) Maromak fó ba sira ukun-fuan atubele ajuda sira atu iha dame no relasaun diʼak ho nia. (Isa 48:17, 18) Nia hatete ba ema Israel: “Se imi halo tuir ho loloos haʼu-nia liafuan no kaer metin ba haʼu-nia aliansa [neʼebé ukun-fuan hatudu], imi sei sai duni povu neʼebé espesiál mai haʼu iha povu sira seluk nia leet, tanba mundu tomak haʼu-nian.” (Êx 19:5, 6) Nuneʼe, atu ema Israel bele haksolok ho relasaun neʼebé espesiál tebes ho Maromak, sira tenke halo tuir ninia liafuan.
8. Se ema Israel halo tuir Maromak, sira-nia moris sei sai oinsá loos?
8 Hanoin toʼok kona-ba ema Israel nia moris sei sai oinsá loos se sira halo tuir Maromak nia liafuan! Maromak Jeová promete katak se sira halo tuir nia, nia sei haraik bensaun ba sira-nia toʼos no sira-nia animál sira. Nia mós promete atu proteje sira husi sira-nia inimigu. (Lee 1 Reis 10:23, 24. *) Sira iha oportunidade atu livre husi nasaun seluk nia ukun, la hanesan ho Jesus nia tempu kuandu nasaun Roma ukun sira. Jeová hakarak nasaun Israel atu sai ezemplu diʼak ba nasaun sira seluk. Nia hakarak ema hotu atu komprende momoos katak sira neʼebé halo tuir Maromak neʼebé loos, sira sei hetan bensaun barak.
9, 10. (a) Tanbasá mak sala ba ema Israel atu hakarak fila fali ba Egiptu? (b) Tanbasá mak hodi fila fali ba Egiptu bele hanetik ema Israel nia adorasaun?
9 Ema Israel iha oportunidade espesiál tebes atu husik Maromak Jeová uza sira atu nia bele kumpre ninia hakarak. No rezultadu mak sira bele hetan Jeová nia bensaun no ikusmai lori bensaun neʼe mós ba ema hotu iha rai! (Gên 22:18) Maibé, ema Israel barak la hafolin oportunidade atu sai nasaun neʼebé Maromak mak ukun no atu sai ezemplu ba nasaun sira seluk. Sira mós hakarak atu fila fali ba Egiptu! (Núm 14:2-4) Maibé, se sira fila fali ba Egiptu karik, sira la bele adora Jeová tuir ninia hakarak no sira la bele sai ona ezemplu ba nasaun sira seluk. Se sira sai atan fali iha rai neʼebá, sira mós sei la livre ona atu halo tuir Maromak nia Ukun-Fuan no hetan perdua ba sira-nia sala. Sira-nia hakarak neʼe hatudu katak sira hanoin deʼit sira-nia an, sira la hanoin kona-ba Maromak no ninia hakarak. Tan neʼe mak Jeová hatete ba sira: “Haʼu laran-nakali ho otas neʼe [ka jerasaun neʼe] hodi dehan: ‘Sira-nia fuan laʼo laloos nafatin; sira la hatene haʼu-nia dalan sira.’ Ho laran-nakali, haʼu jura: ‘Sira-neʼe sei la tama iha haʼu-nia hakmatek.’”—Ebr 3:10, 11; Sal 95:10, 11.
10 Ema Israel nia hakarak atu fila fali ba Egiptu hatudu katak sira la hafolin bensaun sira neʼebé sira hetan ona husi Jeová. Sira hatudu katak sira hafolin liu mak ai-han, hanesan liis-mean, liis-mutin no liis-tahan husi rai-Egiptu. (Núm 11:5) Sira hatudu hahalok hanesan Esaú neʼebé la hafolin ninia direitu nuʼudar oan primeiru hodi faʼan ninia direitu neʼe atu hetan ai-han.—Gên 25:30-32; Ebr 12:16.
11. Saida mak hatudu katak Maromak la troka ninia hakarak maski ema Israel neʼebé sai husi Egiptu la hatudu fiar?
11 Maski jerasaun husi ema Israel neʼebé sai husi Egiptu la hatudu fiar, maibé Maromak Jeová serbisu nafatin ho pasiénsia atu kumpre ninia hakarak ba ninia povu. Tan neʼe, Jeová uza jerasaun foun atu kumpre ninia hakarak tanba sira halo tuir nia liu fali sira-nia inan-aman. Hodi tuir Jeová nia mandamentu, sira tama iha Rai neʼebé Promete ona no sira manán rai neʼe hodi funu hasoru povu seluk. Iha Josué 24:31 Bíblia hatete: “Israel kontinua atu serbí Jeová durante Josué nia moris tomak no durante katuas sira-nia moris tomak neʼebé sei moris hela depois Josué mate no neʼebé hatene kona-ba serbisu hotu neʼebé Jeová halo ba Israel.”
12. Saida mak hatudu katak ita bele tama iha Maromak nia hakmatek ohin loron?
12 Maibé, jerasaun husi ema Israel neʼebé halo tuir Maromak Jeová ikusmai mate no mosu fali jerasaun ida neʼebé “la hatene Jeová ka serbisu neʼebé nia halo ba Israel”. Nuneʼe, “Israel nia oan sira komesa halo buat neʼebé aat iha Jeová nia oin no serbí Baal sira”. (Juíz 2:10, 11) Tanba ema Israel sira-neʼe la halo tuir Jeová, sira la iha ona dame ho nia, no mós Rai neʼebé Promete la sai ona fatin neʼebé “hakmatek ba sira”. Hodi koʼalia kona-ba sira, Paulo hatete: “Josué fó tiha hakmatek ba [ema Israel] sira karik, Maromak sei la koʼalia tan kona-ba loron seluk. Neʼe duni, hakmatek iha loron Sábadu hela nafatin ba Maromak nia povu.” (Ebr 4:8, 9) Kuandu Paulo koʼalia kona-ba “Maromak nia povu”, tuir loloos nia koʼalia kona-ba ema kristaun, sira neʼebé judeu no sira neʼebé laʼós judeu. Ida-neʼe hatudu katak ema kristaun ohin loron bele duni tama iha Maromak nia hakmatek!
Balu la tama ba Maromak nia hakmatek
13, 14. (a) Iha Moisés nia tempu, saida mak ema Israel presiza halo atubele tama iha Maromak nia hakmatek? (b) Iha Paulo nia tempu, saida mak ema kristaun presiza halo atu tama iha Maromak nia hakmatek?
13 Apóstolu Paulo hakerek ba ema ebreu kristaun tanba sira balu nia hahalok la tuir Maromak nia hakarak. (Lee Ebreu 4:1.) Saida mak sira halo? Sira nafatin halo tuir lei barak husi Moisés nia Ukun-Fuan. Maski ema Israel tenke halo tuir Ukun-Fuan neʼe ba tinan 1.500 liu atu Maromak bele simu sira, maibé kuandu Jesus mate, sira la presiza ona halo tuir Ukun-Fuan neʼe. Maibé, ema kristaun balu la komprende ida-neʼe, tan neʼe sira fiar katak sira presiza nafatin halo tuir parte balu husi Ukun-Fuan neʼe. *
14 Paulo esplika ba ema ebreu kristaun sira-neʼe katak Jesus mak amlulik boot diʼak liu fali amlulik boot seluk neʼebé sala-naʼin. Nia mós esplika katak aliansa foun diʼak liu fali aliansa neʼebé halo ho Israel, no katak templu espirituál “diʼak liu fali ida neʼebé liman mak halo”. (Ebr 7:26-28; 8:7-10; 9:11, 12) Tan neʼe, hodi uza ezemplu kona-ba loron Sábadu iha Moisés nia Ukun-Fuan, Paulo esplika oinsá mak ema kristaun bele tama iha Maromak Jeová nia loron hakmatek, hodi dehan: “Neʼe duni, hakmatek iha loron Sábadu hela nafatin ba Maromak nia povu. No ema neʼebé tama iha Maromak nia hakmatek, hakmatek mós husi nia serbisu sira nuʼudar Maromak halo.” (Ebr 4:8-10) Nuneʼe, ema ebreu kristaun labele hanoin katak Jeová simu sira tanba sira halo tuir Moisés nia Ukun-Fuan. Husi Pentekostes 33, Maromak haraik ninia grasa nuʼudar prezente ba deʼit sira neʼebé tau fiar ba Jesus Kristu.
15. Tanbasá mak importante atu halo tuir Maromak hodi bele tama iha ninia hakmatek?
15 Tanbasá mak ema Israel iha Moisés nia tempu labele tama iha Rai neʼebé Promete ona? Tanba sira la halo tuir Jeová. Tanbasá mak ema kristaun balu iha Paulo nia tempu labele tama iha Maromak nia hakmatek? Tanba sira mós la halo tuir Jeová. Sira la fiar katak agora Jeová hakarak ninia povu atu adora nia iha dalan seluk no para atu halo tuir Moisés nia Ukun-Fuan.
Tama iha Maromak nia hakmatek ohin loron
16, 17. (a) Oinsá mak ema kristaun bele tama iha Maromak nia hakmatek ohin loron? (b) Iha lisaun tuirmai, ita sei koʼalia kona-ba saida?
16 Ema kristaun ohin loron hatene katak laʼós hodi halo tuir Moisés nia Ukun-Fuan mak sira bele hetan salvasaun. Paulo koʼalia ho klaru ba ema kristaun iha Éfeso, hodi dehan: “Basá husi grasa mak ita hetan maksoin, husi fiar, laʼós husi buat ruma neʼebé mai husi imi, maibé husi prezente ida husi Maromak; laʼós husi imi-nia hahalok ruma, atu nuneʼe ema ida la bele gaba an.” (Ef 2:8, 9) Nuneʼe, oinsá mak ema kristaun bele tama iha Maromak nia hakmatek? Hanoin-hetan katak Maromak Jeová hili ninia loron hitu, ka ninia loron hakmatek, atubele kumpre ninia hakarak ba rai no ba ema neʼebé halo tuir nia. Liuhusi Jeová nia organizasaun, nia fó sai ninia hakarak no saida mak nia hakarak ita atu halo. Nuneʼe, ita bele tama iha Maromak nia hakmatek hodi halo tuir nia no ninia organizasaun.
17 Maibé, se ita la halo tuir konsellu husi Bíblia neʼebé atan laran-metin no matenek fó mai ita no halo tuir deʼit buat neʼebé ita hakarak, ita sei kontra Jeová nia hakarak. Halo ida-neʼe bele halakon ita-nia dame no relasaun diʼak ho Jeová. Iha lisaun tuirmai, ita sei koʼalia kona-ba situasaun balu neʼebé fó oportunidade mai ita atu halo tuir Maromak no oinsá desizaun neʼebé ita halo hatudu se ita tama ona iha Maromak nia hakmatek.
[Nota–rodapé]
^ par. 3 Amlulik no levita sira halaʼo serbisu iha templu iha loron Sábadu, maibé “sira la halo sala” hasoru Moisés nia Ukun-Fuan. Maromak hili Jesus nuʼudar amlulik boot, nuneʼe la sala ba Jesus atu halo serbisu neʼebé Jeová fó ba nia iha loron Sábadu.—Mt 12:5, 6.
^ par. 8 1 Reis 10:23: “Nuneʼe, Liurai Salomão nia rikusoin no matenek boot liu fali liurai sira seluk hotu iha mundu. 24 No ema hotu iha mundu hakarak tebes atu haree Salomão tanba atu rona matenek neʼebé Maromak tau iha ninia laran.”
^ par. 13 Ita la hatene se ema ebreu kristaun hasaʼe nafatin sakrifísiu ka lae iha Loron Halo Dame nian ka Loron Perdua Sala nian depois Pentekostes 33. Se sira halo ida-neʼe karik, sira la hatudu respeitu ba Jesus nia sakrifísiu. Maibé, buat neʼebé ita hatene mak iha ema ebreu kristaun balu neʼebé nafatin halo tuir parte balu husi Moisés nia Ukun-Fuan.—Gal 4:9-11.
Pergunta atu ita hanoin kleʼan
• Saida mak Jeová hakarak halo iha ninia loron hitu?
• Saida mak hatudu katak loron hitu kontinua nafatin ohin loron?
• Tanbasá mak ema Israel iha Moisés nia tempu no mós ema kristaun balu iha tempu uluk labele tama iha Maromak nia hakmatek?
• Oinsá mak ita bele tama iha Maromak nia hakmatek ohin loron?
[Pergunta estudu nian]
[Liafuan neʼebé foti husi pájina 27]
Ita bele tama iha Maromak Jeová nia hakmatek ohin loron hodi halo tuir nia no ninia organizasaun
[Dezeñu iha pájina 26, 27]
Saida mak Maromak nia povu presiza halo nafatin atubele tama iha ninia hakmatek?
