Internét—Oinsá bele uza ho matenek?

TINAN atus ba atus liubá, ema komesa uza mákina atu halo livru sira, no ida-neʼe lori mudansa boot iha sira-nia moris. Iha tempu modernu, internét mak lori mudansa boot ba ita-nia moris! Hodi uza internét, ita bele hetan lalais informasaun barak tebes iha fatin naran deʼit no iha tempu neʼebé deʼit. Ita mós bele hatene buat neʼebé akontese daudauk no hetan ema seluk nia ideia kona-ba buat oioin liuhusi internét.

Kuandu Maromak kria ita ema, nia fó prezente kapás tebes, neʼe mak matenek atu koʼalia ba malu. Hodi uza matenek neʼe, ita bele troka ideia ba malu no fahe informasaun ba malu. Maromak Jeová mak ida neʼebé koʼalia uluk liu ho ema hodi fó informasaun neʼebé klaru kona-ba oinsá mak ema bele halaʼo sira-nia moris ho haksolok. (Gên 1:28-30) Maibé kuandu ita lee kona-ba buat neʼebé akontese iha tempu uluk liu, ita mós bele hatene katak dala ruma ema uza sala prezente kapás neʼe. Satanás fó informasaun neʼebé laloos ba Eva, no Eva fiar ida-neʼe no hatutan informasaun neʼe ba Adão, no Adão lori susar ba ema hotu iha mundu neʼe.—Gên 3:1-6; Rom 5:12.

Ita mós bele uza sala prezente kapás neʼe kuandu ita uza internét ka lae? Maski internét bele fó informasaun diʼak, no ajuda ita atu la lakon tempu, maibé internét mós bele fó informasaun neʼebé laloos, han ita-nia tempu no mós estraga ita-nia morál. Tan neʼe, mai ita hanoin kona-ba oinsá mak ita bele uza internét iha dalan neʼebé matenek.

Informasaun loos ka laloos?

Keta tau fiar katak informasaun hotu neʼebé ita hetan liuhusi internét mak diʼak. Porezemplu, kuandu ita hakerek liafuan ruma no buti “search”, programa iha internét buka informasaun hotu neʼebé iha liafuan neʼe. Programa neʼe bele kompara ho ema-lubun neʼebé hili kulat oioin iha ai-laran, karik balu diʼak atu han no balu venenu, no sira tau hotu iha fatin ida no fó fali ba Ita atu han. Ita han kedas kulat neʼe ka lae? Lae! Hanesan mós ho internét, komputadór barak neʼebé liga ho ita-nia komputadór buka informasaun rihun ba rihun neʼebé inklui liafuan neʼebé ita hakerek ona, sira la haketak informasaun neʼebé diʼak no aat. Ita presiza matenek atu hili didiʼak informasaun neʼebé mosu iha ita-nia komputadór, se lae, ita bele simu informasaun neʼebé laloos no ida-neʼe sei sai hanesan venenu ba ita-nia neon.

Iha tinan 1993, livru ida neʼebé ema barak lee fó sai dezeñu neʼebé komik, no dezeñu neʼe hatudu asu rua tuur iha komputadór nia oin. Asu ida hatete ba ida seluk: “Iha internét, ema ida la hatene ita mak asu.” Iha tempu uluk liu, Satanás subar nia an hodi uza samea atu koʼalia ho Eva, no hatete ba Eva katak nia bele sai hanesan  Maromak. Hanesan mós ho ohin loron, iha internét, ema bele subar nia an hodi troka nia naran no finje sai ema matenek-naʼin. No ita la iha lei neʼebé haruka kona-ba sé mak bele hatama ideia, informasaun, foto, no konsellu ba internét.

Tan neʼe, keta sai hanesan Eva neʼebé fiar deʼit informasaun neʼebé nia rona. Kuidadu tebes kona-ba buat neʼebé ema hatete iha internét. Antes atu fiar, husu ba Ita-nia an: (1) Sé mak fó sai informasaun neʼe? Ema neʼebé hatama informasaun neʼe mak ema neʼebé haʼu bele tau fiar ka lae? (2) Oinsá mak nia tau informasaun neʼe? Saida mak book nia atu hatama informasaun neʼe? Nia todan ba sorin ba buat ruma ka lae? (3) Nia foti informasaun neʼe husi neʼebé? Nia hakerek mós kona-ba informasaun nia hun atu haʼu bele hatene ho loloos ka lae? (4) Informasaun neʼe foun ka tuan ona? Sin, konsellu neʼebé apóstolu Paulo fó ba Timóteo iha tempu uluk, neʼe diʼak mós ba ita atu halo tuir. Paulo hatete: “Haree didiʼak buat hotu neʼebé ami tau iha ó-nia liman. Keta lakon tempu hodi haksesuk malu kona-ba hanorin neʼebé folin-laek no doutrina kona-ba ‘matenek’ neʼebé laʼós matenek loloos.”—1 Tim 6:20.

Hamenus serbisu ka han tempu?

Se ita uza internét iha dalan neʼebé matenek, ida-neʼe ajuda ita atu la lakon ita-nia tempu, forsa no osan. Porezemplu, ita bele sosa sasán liuhusi internét maski ita la bá loja. Ita bele kompara sasán nia folin atu la gasta osan barak. Iha rai balu, ema uza internét atu halo buat neʼebé uluk sira halo iha banku, no sira bele halo nuneʼe iha oras neʼebé deʼit. No mós, kuandu ita halo planu kona-ba viajen, ita bele uza internét atu hetan informasaun kona-ba oinsá ita bele bá toʼo fatin neʼebé ita hakarak bá, sosa tiket neʼebé baratu liu, no mós hetan informasaun neʼebé ita presiza, hanesan númeru telefone no diresaun. Iha mundu tomak, sukursál sira husi Testemuña ba Jeová mós uza internét atubele hamenus sira-nia serbisu no la presiza gasta tempu no osan barak.

Maibé, ita mós labele haluha kona-ba buat ladiʼak kona-ba uza internét, neʼe mak han ita-nia tempu. Duké uza internét nuʼudar buat neʼebé ajuda sira-nia moris, ema balu uza internét hanesan labarik halimar ho boneka. Sira gasta tempu barak demais atu uza internét hodi halimar, sosa sasán, troka mensajen, no buka informasaun oioin. Neineik-neineik, sira karik komesa husik buat neʼebé importante liu iha sira-nia moris, hanesan atividade ho família, kolega, no kongregasaun. Ikusmai, sira la bele ona atu husik toman aat neʼe. Porezemplu, tuir relatóriu husi rai-Koreia neʼebé fó sai iha tinan 2010, porsentu 18,4 husi joven sira iha problema kona-ba toman aat ho internét, katak sira la bele kontrola an kona-ba uza internét. Relatóriu husi rai-Alemaña hatete katak “agora iha feto barak liután neʼebé hatete katak sira la gosta sira-nia laʼen nia toman aat neʼe”. Feto ida hatete katak tanba ninia laʼen uza tempu barak demais ho internét, ninia laʼen nia hahalok troka no ida-neʼe estraga sira-nia moris kaben nian.

Sukursál ida husi Testemuña ba Jeová simu karta husi irmaun ida neʼebé iha problema kona-ba toman aat ho internét. Dala ruma irmaun neʼe gasta oras sanulu iha loron ida nia laran hodi uza internét. Nia hatete: “Foufoun, haʼu sente katak haʼu la iha problema.” Maibé nia hatutan tan: “Lakleur, haʼu sente baruk atu tuir reuniaun no haʼu la halo ona orasaun.” Kuandu nia tuir reuniaun, nia la prepara nanis no nia hanoin deʼit atu fila ba uma no uza fali internét. Maibé, diʼak tanba ikusmai nia hanoin fali  katak nia iha problema boot no nia buka dalan atu hadiʼa problema neʼe. Entaun, ita mós hakarak kuidadu ita-nia an atu labele iha toman aat kona-ba uza internét.

Informasaun diʼak ka la diʼak?

Iha 1 Tesalonika 5:21, 22 hatete: “Koko buat hotu uluklai, hafoin mak rai hela buat neʼebé diʼak; laran-metin ba buat neʼebé diʼak, no hadook an husi buat hotu neʼebé aat.” Kuandu ita hetan informasaun ruma husi internét, ita presiza haree didiʼak se informasaun neʼe mak buat neʼebé tuir Maromak nia kritériu. Informasaun neʼe tenkesér buat neʼebé tuir morál neʼebé moos ba ita ema kristaun. Tanba pornografia sai barak iha internét laran, se ita la kuidadu, ita bele husik ida-neʼe atu dada ita atu monu ba lasu.

Diʼak atu husu ba ita-nia an: ‘Kuandu haʼu uza internét no se haʼu-nia família ka maluk kristaun ruma mak tama, haʼu presiza taka lalais atu sira labele hatene buat neʼebé haʼu haree beibeik ka lae?’ Se ita-nia resposta mak ‘Sin’, diʼak atu uza internét iha fatin neʼebé ema hotu haree. Maski internét loke dalan foun ba ita atu kontaktu ho ema seluk no mós atu sosa sasán, maibé ida-neʼe mós loke dalan foun ba ita atu ‘halo sala-foʼer iha ita-nia laran’.—Mt 5:27, 28.

Diʼak atu hatutan ka lae?

Kuandu ita uza internét, neʼe laʼós katak ita simu informasaun deʼit, maibé ita mós fahe informasaun ba ema seluk. Maski ita iha liberdade atu simu informasaun ruma no hatutan ba ema seluk, ita mós iha responsabilidade atu buka-hatene katak informasaun neʼe mak loos no diʼak. Kona-ba informasaun neʼebé ita simu, ita iha direitu atu hatutan informasaun neʼe ba ema seluk ka lae? * Informasaun neʼe mak buat neʼebé iha folin ba ema seluk ka lae? Tansá mak ita hakarak atu hatutan informasaun ba ema seluk? Ita halo nuneʼe tan deʼit ita hakarak halo ema gaba ita ka lae?

Se uza ho didiʼak, haruka mensajen liuhusi internét bele ajuda ita. Maibé ida-neʼe mós bele halo susar ba ita tanba ita bele simu informasaun barak demais. Ita hatutan beibeik informasaun neʼebé ladún iha folin ka informasaun foun ba ema hotu neʼebé iha lista kontaktu nian ka lae? Se halo nuneʼe, karik ita sei han sira-nia tempu neʼebé importante. Antes atu buti “send”, diʼak atu hanoin didiʼak kona-ba tansá mak ita hakarak haruka informasaun neʼe. Uluk ema iha toman atu hakerek karta ho sira rasik nia liman hodi konta sira-nia esperiénsia ba família no kolega sira atu fó-hatene ba malu kona-ba buat neʼebé akontese iha sira-nia moris. Ohin loron, diʼak se ita uza internét atu halo ida-neʼe, duké haruka informasaun neʼebé la iha folin, loos ka lae? Diʼak mós atu la hatutan informasaun neʼebé ita la bele hatene ninia hun, loos ka lae?

Entaun, ita tenke halo saida kona-ba internét? Ita tenke para ona atu la uza internét ka lae? Dala ruma ema balu presiza duni atu halo nuneʼe. Irmaun neʼebé temi ona, neʼebé la bele kontrola an kona-ba uza internét ba tinan barak, nia halo nuneʼe atu husik toman aat neʼe. Iha parte seluk, internét bele ajuda ita-nia moris, se ita husik ita-nia ‘matenek atu proteje ita’.—Prov 2:10, 11.

[Nota–rodapé]

[Dezeñu iha pájina 4]

Ita bele halo saida deʼit atu proteje Ita-nia an husi informasaun neʼebé laloos?

[Dezeñu iha pájina 5]

Kona-ba saida deʼit mak Ita presiza hanoin antes atu buti “send”?