Pergunta husi lee-naʼin

Ita bele sura loloos profesia sira neʼebé hakerek kona-ba Mesias iha Eskritura Lia-Ebraiku ka lae?

Kuandu ita estuda didiʼak Eskritura Lia-Ebraiku, ita bele hatene katak profesia barak sai loos tiha ona kona-ba Jesus Kristu. Profesia sira-neʼe fó-hatene nanis kona-ba Mesias nia moris, tempu neʼebé nia atu mai, ninia hahalok sira, dalan oioin neʼebé ema tarata aat nia, no kona-ba Maromak Jeová nia hakarak ba Mesias. Kuandu ita estuda didiʼak profesia sira-neʼe, ida-neʼe bele ajuda ita hatene loloos katak Jesus mak Mesias. Maibé, ladún diʼak atu hanoin demais kona-ba profesia hira mak hakerek nanis ona kona-ba Mesias iha Eskritura Lia-Ebraiku.

Ema barak iha hanoin neʼebé la hanesan kona-ba profesia neʼebé koʼalia kona-ba Mesias. Balu hanoin katak profesia ida karik kona-ba Mesias, balu lae. Alfred Edersheim, neʼebé hakerek livru The Life and Times of Jesus the Messiah, dehan katak, ulun-naʼin relijiaun judeu sira-nia livru temi profesia hamutuk 456 husi Eskritura Lia-Ebraiku nuʼudar profesia sira neʼebé koʼalia kona-ba Mesias, maski eskritura barak neʼe la temi ho klaru liafuan Mesias. Ema neʼebé estuda didiʼak eskritura 456 neʼe iha dúvida katak profesia balu la kona ba Jesus Kristu. Porezemplu, Edersheim dehan katak ema judeu hanoin katak Gênesis 8:11 mak profesia kona-ba Mesias. Sira fiar katak “ai-oliveira tahan neʼebé manu-pombu lori, neʼe husi Foho Mesias”. Edersheim mós temi Êxodo 12:42. Nia esplika katak ema judeu sira iha hanoin neʼebé sala kona-ba eskritura neʼe, hodi hatete: “Hanesan Moisés neʼebé mai husi rai-fuik maran, Mesias mós sei mai husi Roma.” Tan neʼe, matenek-naʼin barak duvida katak eskritura rua neʼe la koʼalia kona-ba Jesus Kristu.

Maski ita hatene ona profesia sira neʼebé sai loos duni kona-ba Jesus Kristu, maibé susar atu hatene loloos profesia sira-neʼe hamutuk hira. Porezemplu, Isaías kapítulu 53 iha profesia barak neʼebé koʼalia kona-ba Mesias. Isaías 53:2-7 hatete: “Nia laʼós ema-boot . . . Ema barak hakribi nia no hasees an husi nia . . . Ita-nia moras, nia rasik mak lori . . . Nia hetan sona ba ita-nia sala . . . Ema lori nia hanesan bibi neʼebé ema atu oho.” Oinsá mak ita bele sura informasaun hotu iha Isaías kapítulu 53 neʼebé hakerek kona-ba Mesias? Ita sura nuʼudar profesia ida deʼit, ka sura informasaun sira-neʼe nuʼudar profesia ketaketak?

Hanoin mós kona-ba Isaías 11:1, neʼebé dehan: “Sanak ida sei mosu husi Jessé, no husi nia abut, dikin ida sei mosu no sei fó fuan.” Versíkulu 10 temi fali profesia neʼe ho liafuan neʼebé atu hanesan. Entaun, se nuneʼe, versíkulu rua neʼe mak profesia rua neʼebé ketaketak ka profesia ida deʼit neʼebé temi dala rua? Entaun, dalan neʼebé ita hanoin kona-ba profesia sira iha Isaías kapítulu 53 no Isaías kapítulu 11 bele kona dalan neʼebé ita sura profesia sira hotu neʼebé koʼalia kona-ba Mesias.

Tan neʼe, diʼak atu la hanoin demais kona-ba profesia hira mak Eskritura Lia-Ebraiku temi kona-ba Mesias. Jeová nia organizasaun halo ona livru sira neʼebé inklui lista kona-ba profesia sira neʼebé sai loos ba Jesus. * Ita bele uza lista sira-neʼe kuandu ita estuda mesak no estuda hamutuk ho família no kuandu ita bá haklaken. Hodi halo nuneʼe, ita bele hametin ita-nia fiar katak Jesus mak Kristu, ka Mesias duni.

[Nota–rodapé]