Pergunta husi lee-naʼin

Númeru sira neʼebé hasai iha relatóriu kona-ba serbisu tinan nian katak sá?

Tinan-tinan, ita kontente atu haree relatóriu kona-ba ita-nia serbisu haklaken neʼebé hasai iha Buku Tahunan no mós iha Ita-nia Serbisu Kristaun fulan-Fevereiru nian. Kuandu ita haree katak ita nuʼudar Jeová nia povu iha mundu tomak hetan rezultadu diʼak husi ita-nia serbisu haklaken no hanorin ema, ida-neʼe halo ita kontente tebes. Maibé, atu komprende relatóriu neʼe, ita presiza atu hatene ho loloos liafuan sira neʼebé hakerek antes númeru sira-neʼe. Mai ita koʼalia kona-ba liafuan sira-neʼe.

Tinan serbisu nian. Ida-neʼe komesa iha fulan-Setembru no ramata iha fulan-Agostu iha tinan tuirmai. No ita simu relatóriu kona-ba tinan kotuk. Tan neʼe, Ita-nia Serbisu Kristaun Fevereiru 2011 hatudu relatóriu kona-ba tinan serbisu nian 2010, neʼebé komesa iha 1 Setembru 2009 no ramata iha 31 Agostu 2010.

Haklaken-naʼin másimu no média haklaken-naʼin. “Haklaken-naʼin” katak Testemuña ba Jeová sira neʼebé hetan batizmu ona no mós haklaken-naʼin sira seluk neʼebé simu lisensa atu bá haklaken. “Haklaken-naʼin másimu” mak númeru relatóriu husi haklaken-naʼin sira iha fulan ida neʼebé barak liu fali fulan seluk iha tinan neʼe nia laran. No dala ruma númeru neʼe mós inklui relatóriu husi fulan kotuk neʼebé haklaken-naʼin balu hatama tarde. “Média haklaken-naʼin” hatudu haklaken-naʼin hira mak baibain hatama relatóriu fulan-fulan.

Totál oras haklaken. Durante tinan serbisu nian 2010, Testemuña ba Jeová sira uza oras biliaun 1,6 (1.600.000.000) liu iha serbisu haklaken. Oras neʼe la inklui oras hotu neʼebé ita uza ba ita-nia adorasaun ba Maromak, hanesan oras neʼebé katuas sira uza atu tau matan ba kongregasaun. Oras neʼe mós la inklui tempu neʼebé ita uza atu tuir reuniaun, estuda Bíblia mesak no hanoin kleʼan kona-ba buat neʼebé ita estuda.

Osan. Durante tinan serbisu nian 2010, Testemuña ba Jeová sira selu osan hamutuk dolar millaun 155 (155.000.000) atu tau matan ba irmaun-irmán sira neʼebé halaʼo serbisu haklaken nuʼudar pioneiru tempu-tomak, misionáriu, no katuas sira neʼebé iha knaar atu vizita kongregasaun sira. Maibé osan neʼe la inklui osan neʼebé ita uza atu halo Bíblia no mós ita-nia livru sira, no la inklui mós osan neʼebé ita uza atu tau matan ba irmaun-irmán naʼin-20.000 liu neʼebé halo serbisu voluntáriu iha Betel oioin iha mundu tomak.

Ema neʼebé han paun no hemu tua iha Memoriál. Númeru neʼe mak kona-ba irmaun-irmán sira neʼebé hetan batizmu ona neʼebé han paun no hemu tua iha Memoriál iha mundu tomak. Entaun, sira hotu neʼe mak ema kose-mina sira ka lae? Karik lae. Dala ruma ema balu hanoin sala katak sira ema kose-mina. Ida-neʼe bele akontese tanba sira balu uluk fiar katak sira sei bá lalehan, ka karik sira iha moras mentál. Tan neʼe, ita la bele hatene ho loloos ema naʼin-hira mak ema kose-mina duni, no ita mós la presiza atu hatene kona-ba neʼe. Grupu Administradór la iha lista neʼebé hatudu ema sé mak han paun no hemu tua iha Memoriál iha mundu tomak, tanba la hatene ema sé mak ema kose-mina duni. *

Maibé buat neʼebé ita hatene mak kuandu terus boot sei hahú iha futuru, “Maromak nia atan” balu neʼebé hetan kose-mina sei iha rai. (Apok 7:1-3) Antes ida-neʼe akontese, ema kose-mina sira kontinua serbisu badinas hodi halaʼo serbisu haklaken no hanorin iha mundu tomak. Ita-nia relatóriu tinan-tinan nian hatudu ho klaru kona-ba serbisu importante neʼebé Maromak Jeová nia povu halaʼo daudauk iha mundu tomak.

[Nota–rodapé]