Reuniaun espesiál neʼebé ita sei la haluha

STEPHEN LETT husi Grupu Administradór husi Testemuña ba Jeová hatete: “Kuandu reuniaun ramata, Ita sei hatete: ‘Haʼu sei la haluha kona-ba reuniaun espesiál neʼe!’” Ho liafuan neʼe, rona-naʼin sira neʼebé nakonu iha reuniaun-fatin sente laran-manas atu hein buat neʼebé sei hatoʼo iha reuniaun boot neʼe. Reuniaun neʼe mak reuniaun tinan nian ba dala 126, husi Watch Tower Bible and Tract Society of Pennsylvania. Reuniaun neʼe halaʼo iha loron 2 Outubru 2010, iha Reuniaun-Fatin ba Reuniaun Boot iha Sidade Jersey, Nova Jersey, iha Estadus Unidus Amérika. Informasaun saida deʼit mak hatoʼo iha reuniaun espesiál neʼe?

Iha diskursu primeiru, irmaun Lett esplika kona-ba Maromak Jeová nia kuda-karreta iha lalehan, neʼebé hakerek iha livru Ezequiel. Kuda-karreta neʼe, neʼebé boot no kapás, reprezenta Maromak Jeová nia organizasaun neʼebé nia tau matan ho diʼak. Irmaun Lett hatete katak Jeová nia organizasaun neʼebé parte iha lalehan ho anju rihun ba rihun bele book an lalais tebes hanesan naroman, hodi halo tuir kedas ninia hakarak. Hanesan neʼe mós, Maromak nia organizasaun neʼebé parte iha rai laʼo ba oin daudaun hodi tuir ninia hakarak. Irmaun Lett temi kona-ba mudansa balu neʼebé Maromak nia organizasaun iha mundu halaʼo ona durante tinan balu nia laran.

Porezemplu, númeru sukursál sai menus tanba sukursál balu komesa serbisu hamutuk ho sukursál seluk. Ida-neʼe ajuda irmaun-irmán sira balu neʼebé uluk serbisu iha sukursál atu uza sira-nia tempu atu halo serbisu haklaken. Irmaun Lett fó laran-manas ba rona-naʼin atu kontinua halo orasaun kona-ba Grupu Administradór, neʼebé reprezenta grupu atan laran-metin no matenek, atu sira bele kontinua serbisu ho laran-metin no matenek.—Mt 24:45-47.

Relatóriu no entrevista neʼebé fó laran-manas

Irmaun ida neʼebé hola parte iha grupu koordenadór iha sukursál iha rai-Haití, naran Tab Honsberger, nia hatoʼo relatóriu diʼak kona-ba buat neʼebé akontese depois rai-nakdoko iha 12 Janeiru 2010, neʼebé halo maizumenus ema naʼin-300.000 mate. Iha rai neʼe, igreja ulun-naʼin sira dehan katak Maromak fó kastigu ba ema fiar-laek no proteje ema diʼak. Maibé, ema kriminozu rihun ba rihun halai sai husi komarka tanba dezastre halo moru komarka nian monu. Nuneʼe, ema barak neʼebé iha laran-moos hetan kmaan hodi aprende lia-loos kona-ba tansá mak ita hetan terus barak ohin loron. Irmaun Honsberger mós temi fali liafuan husi irmaun Haití ida neʼebé ninia feen mate iha dezastre neʼe. Irmaun neʼe dehan: “Haʼu-nia matabeen suli beibeik toʼo ohin. Haʼu la hatene bainhira mak haʼu para atu sente triste hanesan neʼe, maibé haʼu sente kontente tanba haʼu simu domin husi Jeová nia organizasaun.  Haʼu iha esperansa, no haʼu laran-manas atu ajuda ema seluk atu sira mós hetan esperansa neʼe.”

Irmaun ida neʼebé agora serbí nuʼudar família Betel Brooklyn, naran Mark Sanderson, nia hatoʼo relatóriu husi rai-Filipinas. Tanba nia uluk serbisu nuʼudar membru iha grupu koordenadór iha sukursál iha rai neʼebá, ninia matan nabilan kuandu nia hatete katak haklaken-naʼin iha rai-Filipinas aumenta ba beibeik durante fulan 32, no estudu Bíblia mós barak liu duké haklaken-naʼin. Nia konta esperiénsia kona-ba irmaun ida naran Miguel, neʼebé ema oho ninia bei-oan. Irmaun neʼe hakaʼas an atu hatama ema neʼebé oho nia bei-oan ba kadeia. Liutiha tempu balu, kuandu Miguel halo serbisu haklaken iha komarka, nia hasoru ema neʼe. Maski Miguel sente ladiʼak, maibé nia koʼalia ho mane neʼe ho laran-diʼak no kalma. Miguel komesa estuda Bíblia ho nia, no ikusmai nia simu lia-loos no komesa hadomi Maromak Jeová. Mane neʼe hetan batizmu ona. Agora Miguel ho irmaun foun neʼe sai kolega diʼak, no Miguel buka dalan atu ajuda nia atubele sai husi kadeia. *

Programa tuirmai mak entrevista neʼebé halaʼo husi mestre ba Grupu neʼebé Organiza Eskola Bíblia nian, naran Mark Noumair. Nia halo entrevista ho kaben-naʼin tolu, Alex ho Sarah Reinmueller, David ho Krista Schafer, no Robert ho Ketra Ciranko. Alex Reinmueller, neʼebé agora serbí nuʼudar ajudante ba Komisaun Editora nian, nia konta ninia esperiénsia kona-ba tempu neʼebé nia halo serbisu pioneiru iha rai-Kanadá kuandu nia tinan 15 deʼit. Nia esplika katak iha tempu neʼebá dala barak nia haklaken mesak, no esperiénsia neʼe ajuda nia atu hametin ninia relasaun ho Maromak. Kuandu Mark Noumair husu nia kona-ba irmaun sira neʼebé fó laran-manas ba nia, irmaun Reinmueller temi irmaun naʼin-tolu no esplika oinsá mak sira ida-idak ajuda nia atu laʼo ba oin iha lia-loos. Ninia feen Sarah koʼalia kona-ba irmán ida neʼebé tahan hasoru susar oioin ba tinan barak iha komarka iha rai-Xina tanba ninia fiar. Sarah hatete katak, hodi ransu malu ho irmán neʼe, nia aprende atu sadere ba Jeová liuhusi orasaun.

David Schafer, neʼebé serbisu nuʼudar ajudante ba Komisaun Hanorin nian, nia gaba ninia inan neʼebé iha fiar metin no koʼalia mós kona-ba irmaun sira neʼebé serbisu kadoo ai boot no oinsá sira ajuda nia atu halo pioneiru estra kuandu nia sei joven. Ninia feen, Krista, koʼalia kona-ba família Betel sira neʼebé idade ona, neʼebé hatudu “laran loos kona-ba buat kiʼik” hodi halo tuir Jesus nia konsellu.—Lc 16:10.

Robert Ciranko, neʼebé serbisu nuʼudar ajudante ba Komisaun Hakerek nian, nia koʼalia kona-ba ezemplu husi ninia avó-mane no avó-feto naʼin-haat, sira hotu mai husi rai-Ungria, no sira ema kose-mina. Nia mós konta katak, iha maizumenus tinan 1950, bainhira nia sei  labarik, nia kontente no hakfodak hodi tuir reuniaun boot neʼebé nakonu ho ema barak tebes, no nia aprende katak Jeová nia organizasaun mak boot liu fali kongregasaun neʼebé nia tuir. Ninia feen, Ketra, konta ninia esperiénsia kona-ba tempu neʼebé nia serbí nuʼudar pioneiru iha kongregasaun neʼebé iha problema barak, inklui mós susar husi ema neʼebé uluk iha lia-loos maibé kontra fali lia-loos. Nia konta oinsá mak esperiénsia neʼe ajuda nia aprende atu hatudu laran-metin ba Maromak. Nia tahan no ikusmai nia simu knaar nuʼudar pioneiru tempu-tomak iha kongregasaun seluk neʼebé iha unidade, no ida-neʼe kona loos ninia laran.

Tuirmai, Manfred Tonak koʼalia kona-ba rai-Etiópia. Rai neʼe iha Maromak nia atan husi uluk liu kedas iha tempu Bíblia, no agora iha ema naʼin-9.000 liu neʼebé haklaken lia-foun diʼak. Haklaken-naʼin sira barak hela iha sidade kapitál, Addis Ababa, ka besik sidade neʼe, maibé ladún iha haklaken-naʼin iha distritu. Tan neʼe, Testemuña Etiópia-oan sira neʼebé hela iha rai seluk simu konvite atu vizita rai neʼe hodi bele haklaken iha área balu neʼebé dook husi sidade kapitál. Irmaun-irmán barak bá, no fó laran-manas ba Testemuña sira iha rai neʼe, no hetan mós ema barak neʼebé kontente atu aprende lia-loos iha neʼebá.

Relatóriu tuirmai mak kona-ba Testemuña sira iha rai-Rúsia, no relatóriu neʼe hatoʼo hodi fahe ba parte balu. Aulis Bergdahl husi grupu koordenadór iha sukursál iha rai-Rúsia, nia konta istória husi tempu uluk toʼo agora kona-ba ema fó susar ba Testemuña sira iha rai-Rúsia, liuliu iha sidade Moskovu. Philip Brumley husi sukursál Estadus Unidus, neʼebé serbisu iha Grupu neʼebé Tau Matan ba Lei, nia hatete kona-ba oinsá mak ita-nia hakaʼas an atu buka justisa laʼo ba oin iha fulan hirak-neʼe nia laran, bainhira Tribunál Europeu ba Direitus Umanus (ECHR) halo prosesu kona-ba pontu sia neʼebé ema hasaʼe lia hodi duun Testemuña sira iha rai-Rúsia. Juis sira hotu neʼebé hola parte iha tribunál ECHR hatete katak pontu sia neʼe hotu laloos no la iha justisa, no esplika ho klaru kona-ba tansá mak lia neʼe laloos. Maski ita seidauk hatene loloos saida mak sei akontese husi tribunál nia desizaun neʼe, irmaun Brumley hatete katak ida-neʼe karik sei book tribunál sira iha rai seluseluk atu tesi lia tuir justisa.

Rona tiha informasaun diʼak neʼe, tuirmai irmaun Lett fó avizu ba rona-naʼin katak tribunál ECHR deside ona atu halo prosesu ba kazu kona-ba problema impostu nian. Kazu neʼe mak entre governu Fransa no Testemuña ba Jeová, neʼebé kleur ona la rezolve. Tribunál naran-boot neʼe la simu kazu naranaran deʼit. Toʼo agora, tribunál ECHR halo ona prosesu kona-ba kazu 39 neʼebé envolve Testemuña ba Jeová, no foti desizaun neʼebé apoia Testemuña sira ba kazu 37. Irmaun Lett fó laran-manas ba Maromak nia povu  hotu atu halo orasaun ba Maromak Jeová kona-ba situasaun sira-neʼe.

Relatóriu ikus mak hatoʼo husi Richard Morlan, mestre ba Eskola ba Katuas Kongregasaun nian. Nia koʼalia ho laran-manas kona-ba eskola neʼe no oinsá mak katuas sira neʼebé tuir ona eskola neʼe sente agradese ba arranju neʼe.

Diskursu sira seluk neʼebé hatoʼo husi irmaun sira iha Grupu Administradór

Guy Pierce husi Grupu Administradór hatoʼo diskursu neʼebé esplika kona-ba eskritura tinan nian ba 2011, neʼebé dehan: “Hetan protesaun iha Jeová nia naran.” (Sof 3:12) Nia hatete katak, maski agora mak tempu haksolok ba Maromak Jeová nia povu, maibé ita mós moris iha tempu susar no sériu. Maromak nia loron boot besik ona atu mai. Maski nuneʼe, ema barak kontinua buka mahon iha relijiaun falsu, polítiku no rikusoin sira, ka koko atu haluha deʼit kona-ba realidade neʼebé sira hasoru. Atu hetan protesaun neʼebé loos, ita presiza bolu Jeová nia naran, katak hatene Maromak Jeová, hatudu respeitu neʼebé kleʼan, tau fiar ba nia, no hadomi nia ho buat hotu neʼebé ita iha.

Tuirmai, David Splane husi Grupu Administradór hatoʼo diskursu neʼebé halo ema hanoin kleʼan, ho tema: “Ita tama ona iha Maromak nia hakmatek ka lae?” Nia hatete katak Maromak nia hakmatek laʼós katak nia la halo buat ida. Maski agora mak Maromak nia loron deskansa, Jeová no ninia Oan “serbisu nafatin” atu kumpre ninia hakarak ba ema no mós ba rai. (Joao 5:17) Se nuneʼe, oinsá mak ita bele tama iha Maromak nia hakmatek? Importante atu hasees an husi hahalok sala no la buka atu halo tuir ita rasik nia hakarak. Ita mós presiza hametin ita-nia fiar no moris tuir Maromak nia hakarak, hodi halo buat saida deʼit neʼebé ita bele atu apoia ninia hakarak neʼe. Irmaun Splane fó laran-manas ba rona-naʼin atu hakaʼas an atu tama Maromak nia hakmatek.

Diskursu ikus mak hatoʼo husi Anthony Morris husi Grupu Administradór, ho tema: “Ita hein saida?” Ho laran-manas no laran-diʼak, irmaun Morris fó-hanoin ba rona-naʼin kona-ba profesia sira neʼebé ita hein manamanas atu akontese iha futuru. Neʼe inklui mós tempu neʼebé ema hatete ‘Hakmatek no dame!’ no relijiaun falsu sira sei lakon. (1 Tes 5:2, 3; Apok 17:15-17) Irmaun Morris mós dehan katak ita tenke kuidadu atu la hatete “Ida-neʼe mak Armajedón karik” kuandu ita haree notísias ruma neʼebé la kumpre profesia sira-neʼe. Nia fó laran-manas ba rona-naʼin atu halo tuir konsellu iha Miquéias 7:7, hodi kontinua hein Maromak Jeová ho pasiénsia no haksolok. Nuʼudar ita halo nuneʼe, ita mós presiza habesik ba malu hodi serbisu hamutuk ho Grupu Administradór, hanesan soldadu sira neʼebé hamutuk atu halo funu. Nia hatete: “Halo imi-nia laran metin bá, imi hotu neʼebé hein ba Jeová.”—Sal 31:24.

Ikusliu, iha avizu espesiál neʼebé halo rona-naʼin sira haksolok. Geoffrey Jackson husi Grupu Administradór fó avizu kona-ba planu atu halo Livru Haklaken ho edisaun foun ba lia-inglés, katak edisaun lia-inglés neʼebé fasil. Sira sei koko ida-neʼe ba tempu uitoan, atu ajuda irmaun-irmán sira neʼebé uza lia-inglés neʼebé simples liu. Depois, nia mós hatete katak Grupu Administradór sei halo arranju kona-ba vizita bibi-atan nian ba katuas vizitante no sira-nia feen iha Estadus Unidus. Tuirmai, nia fó sai katak Eskola Treinu Atan Kristaun sei sai fali Eskola Bíblia nian ba Irmaun sira-neʼebé Laiha Kaben. No nia mós fó sai kona-ba eskola foun, Eskola Bíblia ba Kaben-Naʼin Kristaun. Eskola ida-neʼe sei fó treinu ba kaben-naʼin sira atu halo serbisu ho diʼak iha Jeová nia organizasaun. Irmaun Lett mós fó avizu kona-ba Eskola ba Katuas sira neʼebé iha knaar atu vizita kongregasaun no sira-nia feen no Eskola ba membru sira neʼebé hola parte iha grupu koordenadór iha sukursál no sira-nia feen, katak iha Patterson, eskola sira-neʼe, neʼebé uluk halaʼo tinan ida dala ida, agora sei halaʼo tinan ida dala rua, no iha arranju atu konvida fali irmaun sira neʼebé uluk tuir atu tuir fali.

Ikusliu, John E. Barr ho tinan 97, neʼebé kleur ona nuʼudar membru husi Grupu Administradór, nia hatoʼo orasaun ho ninia laran tomak no haraik-an. * Ema hotu neʼebé sai husi reuniaun-fatin sente katak sira sei la haluha duni reuniaun espesiál neʼe.

[Nota–rodapé]

[Liafuan ne’ebé foti husi pájina 19]

Rona-naʼin hotu haksolok ho entrevista

[Liafuan ne’ebé foti husi pájina 20]

Maromak Jeová haraik bensaun ba serbisu haklaken iha rai-Etiópia