Ita hatudu hahalok hanesan Finéas ka lae?

SERBÍ nuʼudar katuas iha kongregasaun mak knaar espesiál tebes. Maibé, Maromak nia Liafuan hatudu katak dala ruma susar ba katuas sira atu halaʼo sira-nia knaar. Porezemplu, dala ruma sira tenke rezolve problema kona-ba sala boot ruma neʼebé irmaun ka irmán balu halo, no sira tenke tesi lia tuir Maromak Jeová nia haree. (2 Crôn 19:6) Dala ruma, katuas ida presiza halo serbisu ruma neʼebé karik halo nia sente katak nia la iha matenek atu halo knaar neʼe, hanesan Moisés neʼebé dehan: “Haʼu neʼe sé atu tenke bá Faraun?”—Êx 3:11.

Tanba Maromak uza ninia espíritu santu atu leno Bíblia no mós atu hili katuas sira, importante atu katuas sira halaʼo sira-nia knaar hodi tuir Bíblia nia matadalan. Bíblia fó ezemplu barak kona-ba ulun-naʼin sira iha tempu uluk neʼebé hasoru problema oioin ho susesu. Porezemplu, Bíblia koʼalia kona-ba Finéas. Nia mak Eleazar nia oan no Aarão nia bei-oan, neʼebé ikusmai serbí nuʼudar amlulik boot. Buat tolu neʼebé akontese iha Finéas nia moris hatudu katak importante ba katuas sira ohin loron atu rezolve problema sira iha kongregasaun ho aten-brani, matenek, no tau fiar ba Jeová.

“Nia hamriik kedas”

Kuandu ema Israel hela ba tempu balu iha rai-tetuk iha Moab, Finéas sei joven. Bíblia hatete: “Povu neʼe komesa halo sala-foʼer ho feto Moab sira. . . . No povu sira-neʼe komesa han no hakruʼuk ba sira-nia maromak sira.” (Núm 25:1, 2) Jeová fó malisan mate ba sira neʼebé halo hahalok aat sira-neʼe. Hanoin toʼok, Finéas sente oinsá kuandu nia rona kona-ba hahalok aat no mós kona-ba malisan husi Maromak?

Bíblia hatutan tan: “Haree! Mane ida husi Israel nia oan sira mai, no nia lori feto Midian ida besik ninia maun-alin sira iha Moisés nia oin no iha povu Israel tomak nia oin, nuʼudar sira tanis hela iha odamatan atu tama ba tenda reuniaun nian.” (Núm 25:6) Amlulik Finéas sei halo saida? Nia sei joven, no mane neʼebé lori feto Midian mak xefe ida neʼebé iha knaar atu tau matan ba povu atu halaʼo adorasaun ba Jeová.—Núm 25:14.

Maibé Finéas taʼuk ba Jeová, laʼós ba ema. Kuandu nia haree sira naʼin-rua neʼe, nia foti diman no duni tuir hodi tama iha tenda no sona borus sira naʼin-rua. Jeová hanoin oinsá kuandu nia haree Finéas foti desizaun neʼebé metin no hatudu aten-brani? Jeová para kedas atu fó malisan, no nia mós fó bensaun ba Finéas hodi promete katak ninia umakain sei kaer serbisu amlulik nian ba “tempu neʼebé la bele sura”.—Núm 25:7-13.

Klaru katak ohin loron katuas kristaun sira la uza violénsia atu rezolve problema ruma. Maibé, sira presiza halo tuir Finéas nia ezemplu hodi prontu atu foti desizaun neʼebé metin no hatudu aten-brani. Porezemplu, kuandu irmaun Guilherme serbí nuʼudar katuas ba fulan balu deʼit, nia hola parte iha grupu tesi-lia nian. Grupu neʼe presiza tesi lia kona-ba hahalok sala neʼebé envolve katuas ida neʼebé uluk ajuda Guilherme kuandu nia sei joven. Guilherme hatete: “Haʼu sente ladiʼak kona-ba situasaun  neʼe. Iha kalan haʼu toba la dukur. Haʼu hanoin nafatin kona-ba dalan oioin atu rezolve kazu neʼe hodi la husik haʼu-nia sentimentu hanetik haʼu atu tesi lia tuir Jeová nia matadalan. Ba loron barak, haʼu halo orasaun no buka informasaun husi ita-nia livru sira.” Ida-neʼe fó aten-brani ba Guilherme atubele hasoru situasaun neʼe no atu ajuda irmaun neʼebé halo sala atu hadiʼa ninia relasaun ho Jeová.—1 Tim 4:11, 12.

Kuandu katuas sira rezolve problema ruma iha kongregasaun ho aten-brani no foti desizaun neʼebé metin, sira hatudu ezemplu diʼak kona-ba fiar no laran-metin. Klaru katak ita hotu mós presiza aten-brani hodi fó-hatene katuas sira se ita-nia maluk ida halo sala boot. Ita mós presiza aten-brani hodi la ransu tan ho kolega ka família neʼebé kongregasaun hasai ona.—1 Kor 5:11-13.

Hatudu matenek atu problema la mosu

Kuandu Finéas hatudu aten-brani, ida-neʼe laʼós tanba nia joven deʼit no la hanoin didiʼak uluk. Hanoin toʼok oinsá nia hatudu matenek hodi hanoin didiʼak antes atu foti desizaun iha situasaun seluk. Loron ida, Finéas rona katak suku Rubem, Gad, no balu husi suku Manassés halo altár besik Mota Jordaun. Ema Israel seluk hanoin katak sira halaʼo adorasaun falsu, no hanoin atu bá funu hasoru sira.—Jos 22:11, 12.

Saida mak Finéas sei halo? Ho matenek, Finéas, hamutuk ho Israel nia xefe sira, bá koʼalia ho sira neʼebé harii altár neʼe. Suku sira-neʼe fó-hatene katak tuir loloos altár neʼe mak sinál neʼebé hatudu sira-nia laran-metin ba Jeová. Ikusmai, problema la mosu.—Jos 22:13-34.

Se ema kristaun ida rona katak ninia maluk iha kongregasaun halo sala ruma, matenek tebes atu nia halo tuir Finéas nia ezemplu! Hahalok matenek ajuda ita atu la sente hirus lalais ka hatete sai liafuan neʼebé la hatudu laran-diʼak kona-ba ita-nia irmaun ka irmán sira.—Prov 19:11.

Oinsá mak matenek bele ajuda katuas sira atu halo tuir Finéas nia ezemplu? Irmaun Jaime, neʼebé serbí nuʼudar katuas ba tinan 10 liu, hatete: “Kuandu haklaken-naʼin ida hakbesik haʼu atu koʼalia kona-ba problema ruma neʼebé nia iha ho ema seluk, haʼu husu kedas Jeová nia ajuda atu haʼu labele todan ba sorin no atubele fó konsellu husi Bíblia. Loron ida, irmán ida hakbesik haʼu atu konta kona-ba ninia problema ho katuas ida husi kongregasaun seluk. Tanba irmaun neʼe haʼu-nia kolega, fasil deʼit ba haʼu atu koʼalia ba nia. Maibé, duké halo ida-neʼe, haʼu ajuda irmán neʼe atu hanoin kona-ba matadalan balu husi Bíblia. Irmán neʼe simu atu nia rasik bá koʼalia uluk ho irmaun neʼe. (Mt 5:23, 24) Maibé, tanba susar nafatin atu hadame malu ho irmaun neʼe, haʼu fó laran-manas ba irmán neʼe atu hanoin kona-ba matadalan seluk husi Bíblia. Entaun, irmán neʼe deside atu halo orasaun fali kona-ba ninia problema, no hakaʼas an atu fó perdua ba irmaun neʼe.”

Ida-neʼe lori rezultadu saida? Irmaun Jaime hatete: “Fulan balu liu tiha, irmán neʼe hakbesik haʼu. Nia hatete katak irmaun neʼe  arrepende kona-ba buat neʼebé nia hatete, no hatete sai oinsá nia hafolin irmán neʼe. Haʼu kontente sira rezolve problema neʼe. Se haʼu mete demais iha irmán neʼe nia problema, ka hatudu katak haʼu todan ba sorin, rezultadu sei la sai diʼak hanesan neʼe.” Bíblia fó konsellu hodi dehan: “Keta ansi atu bá hodi halo kazu hasoru ó-nia maluk.” (Prov 25:8) Katuas sira hatudu matenek kuandu sira fó laran-manas ba ema kristaun sira neʼebé iha problema ruma ho sira-nia maluk atu halo tuir Bíblia nia matadalan hodi buka dame.

Nia husu Jeová

Finéas iha knaar espesiál atu serbí nuʼudar amlulik ba Maromak nia povu. Hanesan temi tiha ona, nia hatudu aten-brani no matenek maski nia sei joven. Maibé, atu nia bele hasoru problema oioin ho susesu, ida-neʼe depende ba ninia fiar ba Jeová.

Kuandu ema Gibea husi suku Benjamim estraga ema levita ida nia feen-kiʼik toʼo nia mate, suku sira seluk bá halo funu hasoru ema husi suku Benjamim. (Juíz 20:1-11) Maski sira husu Jeová nia ajuda antes sira bá funu, maibé sira lakon dala rua, no ema barak mate. (Juíz 20:14-25) Ida-neʼe halo sira hanoin katak Jeová la hatán ba sira-nia orasaun ka lae? Jeová hakarak sira atu rezolve problema neʼe ka lae?

Ho fiar neʼebé metin, Finéas neʼebé sai ona Israel nia amlulik boot halo orasaun ba Jeová, hodi dehan: “Haʼu tenke bá fali halo funu hasoru haʼu-nia maun Benjamim nia oan-mane sira ka haʼu tenke husik deʼit?” Jeová hatán ba ninia orasaun hodi entrega ema Benjamim iha sira-nia liman, no sira sunu mohu sidade Gibea.—Juíz 20:27-48.

Ita bele aprende saida husi istória neʼe? Maski katuas sira halo orasaun atu husu Maromak nia ajuda no hakaʼas an atu rezolve problema ruma neʼebé mosu iha kongregasaun, maibé dala ruma problema kontinua nafatin. Se nuneʼe, katuas sira presiza hanoin-hetan Jesus nia liafuan tuirmai neʼe: “Husu bá [ka halo orasaun], imi sei simu; buka bá, imi sei hetan; tuku odamatan bá, odamatan sei nakloke ba imi.” (Lc 11:9) Sin, maski dala ruma katuas sira sente katak Jeová la hatán kedas ba sira-nia orasaun, maibé sira bele fiar duni katak Jeová sei hatán iha tempu neʼebé loos.

Porezemplu, kongregasaun ida iha rai-Irlanda presiza tebes atu harii reuniaun-fatin, maibé kuandu irmaun sira hatudu dezeñu kona-ba oinsá atu harii reuniaun-fatin ba funsionáriu neʼebé tau matan kona-ba harii uma iha área neʼebá, nia la simu dezeñu ba projetu neʼe. Maski irmaun sira hadiʼa dezeñu dala barak no lori fali ba nia, nia la simu nafatin. Tan neʼe, irmaun sira sente katak diʼak liu atu hasoru xefe neʼebé tau matan kona-ba harii uma iha rai-Irlanda tomak. Jeová sei hatán sira-nia orasaun hanesan iha Finéas nia tempu ka lae?

Katuas ida iha kongregasaun neʼe hatete: “Ami husu beibeik Jeová iha orasaun, depois ami bá hasoru xefe iha ninia serbisu-fatin neʼebé dook tebes husi ami-nia área. Iha neʼebá, ema hatete katak ami presiza hein semana balu atubele hasoru xefe. Maibé, ami konsege hasoru nia maski ba minutu lima deʼit. Kuandu xefe neʼe haree dezeñu sira neʼebé ami hadiʼa, nia fó lisensa kedas atu harii. Husi tempu neʼebá, funsionáriu neʼebé uluk la simu mós komesa atu ajuda ami ho diʼak. Esperiénsia neʼe hatudu mai ami katak orasaun iha forsa duni.” Sin, Jeová sei hatán ba katuas sira-nia orasaun bainhira sira tau fiar ba nia.

Iha tempu Israel antigu, Finéas kaer responsabilidade neʼebé todan, maibé ho aten-brani, matenek, no hodi tau fiar ba Maromak, nia bele hasoru problema oioin ho susesu. Tanba Finéas mós hakaʼas an atu tau matan didiʼak ba Maromak nia povu, nia monu loos ba Jeová nia laran. Liutiha maizumenus tinan 1.000, Jeová leno Esdras atu hakerek: “Finéas, Eleazar nia oan-mane, mak sai sira-nia ulun-naʼin iha tempu uluk. Jeová hamutuk ho nia.” (1 Crôn 9:20) Sin, ita fiar katak Jeová mós hamutuk ho katuas sira neʼebé tau matan ba ninia povu ohin loron, no mós hamutuk ho ema kristaun hotu neʼebé serbí nia ho laran-metin.