Ita simu Jeová nuʼudar ita-nia parte ka lae?
Ita simu Jeová nuʼudar ita-nia parte ka lae?
“Buka uluknanain Maromak nia reinu ho nia justisa; buat hirak-neʼe sei fó tan ba imi.”—MT 6:33.
1, 2. (a) Iha Galasia 6:16, “Israel Maromak nian” reprezenta sé? (b) Iha Mateus 19:28, “suku sanulu-resin-rua Israel nian” reprezenta sé?
KUANDU ita lee naran Israel iha Bíblia laran, Ita hanoin kona-ba saida? Ita hanoin kona-ba Isaac nia oan Jacob neʼebé simu naran Israel ka lae? Ka Ita hanoin kona-ba Jacob nia bei-oan sira neʼebé sai nasaun Israel? Bíblia mós koʼalia kona-ba Israel espirituál, ka “Israel Maromak nian”, neʼebé reprezenta ema naʼin-144.000, neʼebé Maromak kose mina ho espíritu santu atu sai liurai no amlulik iha lalehan. (Gal 6:16, MF; Apok 7:4; 21:12) Maibé, iha Mateus 19:28 koʼalia kona-ba Israel neʼebé reprezenta buat seluk tan.
2 Jesus hatete: “Iha mundu foun, wainhira Oan-Mane tuur iha nia kadunan glória nian, imi sei tuur mós iha kadunan sanulu-resin-rua hodi tesi lia ba suku sanulu-resin-rua Israel nian.” Iha eskritura neʼe, “suku sanulu-resin-rua Israel nian” reprezenta ema neʼebé sei moris ba nafatin iha mundu foun. Ema naʼin-144.000 mak sei halo serbisu nuʼudar tesi-lia naʼin no amlulik ba sira.
3, 4. Oinsá mak ema kose-mina sira hatudu ezemplu diʼak?
3 Hanesan ho amlulik no ema levita sira iha tempu uluk, ema kose-mina sira ohin loron mós hafolin tebes sira-nia serbisu ba Maromak Jeová. (Núm 18:20) Ema kose-mina sira la hein atu simu rai iha mundu neʼe nuʼudar liman-rohan, maibé sira hein atu sai liurai no amlulik iha lalehan hamutuk ho Jesus Kristu. Tuir Apokalipse 4:10, 11, sira sei kontinua atu serbí Jeová iha lalehan.—Eze 44:28.
4 Nuʼudar ema kose-mina sira neʼebé sei iha rai, sira nafatin halaʼo sira-nia moris iha dalan neʼebé hatudu ho klaru katak Jeová mak sira-nia parte. Sira hafolin sira-nia serbisu ba Maromak nuʼudar buat neʼebé importante liu iha sira-nia moris. Sira mós hatudu fiar ba Kristu nia sakrifísiu no halo tuir nia nafatin ‘atu hametin buat neʼebé sira simu tiha, katak Maromak bolu no fihir sira’. (2 Ped 1:10) Maski sira ida-idak nia situasaun no matenek la hanesan, maibé sira la buka razaun oioin atu la halo Maromak nia serbisu. Sira tau uluk Maromak nia serbisu iha sira-nia moris, no halo buat hotu neʼebé sira bele. Sin, sira fó ezemplu diʼak ba ema neʼebé iha esperansa atu moris iha mundu foun.
5. Oinsá mak ema kristaun hotu bele simu Jeová nuʼudar sira-nia parte? Tanbasá mak dala ruma susar atu halo nuneʼe?
5 Maski ita iha esperansa atu bá lalehan ka moris ba nafatin iha rai, ita tenke ‘hewai ita-nia an rasik no lori ita-nia [ai-riin terus nian] hodi tuir Kristu’. (Mt 16:24) Ema rihun ba rihun neʼebé iha esperansa atu moris ba nafatin iha mundu foun mós halo ida-neʼe hodi adora Maromak no tuir Kristu. Sira la hanoin katak serbisu uitoan deʼit ba Jeová toʼo ona maski sira bele halo buat barak liután. Sira barak halo sira-nia moris sai simples liu no foti pioneiru. Sira seluk foti serbisu pioneiru ba fulan balu tinan-tinan. Iha mós irmaun-irmán sira neʼebé la bele foti serbisu pioneiru, maibé sira hakaʼas an iha serbisu haklaken. Sira hotu hatudu hahalok hanesan Maria neʼebé fui mina-morin ba Jesus. Jesus hatete: “Nia halo buat diʼak ida mai haʼu. . . . Nia halo buat neʼebé nia bele.” (Mc 14:6-8) Tanba ita moris iha mundu neʼebé Satanás mak ukun, ita presiza hakaʼas an halo buat hotu neʼebé ita bele hodi tau fiar ba Jeová. Agora, mai ita koʼalia kona-ba dalan haat oinsá ita bele halo nuneʼe.
Buka uluknanain Maromak nia Ukun
6. (a) Oinsá ema baibain hatudu katak sira-nia parte mak iha moris neʼe deʼit? (b) Tanbasá mak diʼak liu atu halo tuir David nia ezemplu?
6 Jesus hanorin ninia dixípulu sira atu buka uluknanain Maromak nia Reinu, ka ukun, no ninia justisa. Ema barak baibain buka uluk sira rasik nia diʼak, tanba sira “ema mundu neʼe nian, neʼebé sira-nia parte mak iha moris neʼe”. (Lee Salmo 17:1, 13-15. *) Ema sira-neʼe la hanoin kona-ba Jeová, sira-nia Kriadór. Sira barak hanoin deʼit kona-ba moris diʼak, harii umakain, no halibur rikusoin ba oan sira nuʼudar sira-nia liman-rohan. Sira-nia parte mak iha moris neʼe deʼit. Maibé David la hanoin hanesan neʼe. Nia hakarak liu atu buka ‘naran diʼak’ iha Jeová nia oin, no ninia oan Salomão hatete katak ita hotu presiza halo nuneʼe. (Ecle 7:1) Hanesan Asaf, David mós hanoin katak sai Jeová nia belun mak buat neʼebé importante liu iha ninia moris. Nia kontente atu laʼo ho Maromak. Ohin loron, ema kristaun barak tau uluk serbisu ba Maromak iha sira-nia moris duké serbisu atu manán osan.
7. Bensaun saida mak irmaun ida hetan tanba tau uluk Maromak nia Ukun?
7 Hanoin toʼok kona-ba irmaun Jean-Claude iha rai-Repúblika Sentru-Afrikana. Nia katuas kristaun ida neʼebé kaben no iha oan naʼin-tolu. Iha ninia rai, susar tebes atu hetan serbisu, no ema barak neʼebé iha ona serbisu halo buat saida deʼit atu labele lakon serbisu. Loron ida, xefe haruka Jean-Claude atu halo serbisu iha kalan. Nia tenke tama tuku 6.30 lokraik semana ida loron hitu. Irmaun neʼe esplika ba xefe katak nia presiza tau matan ba ninia família laʼós kona-ba osan deʼit, maibé mós atu ajuda sira atu iha relasaun diʼak ho Maromak. Nia mós hatete katak nia presiza ajuda ninia maluk kristaun sira iha kongregasaun. Xefe hatete ba nia: “Ó sorte ona iha serbisu neʼe, tan neʼe, ó tenke haluha buat seluk hotu, inklui mós ó-nia feen, oan no ó-nia problema. Ó tenke fó ó-nia moris ba serbisu deʼit. Ó hili bá: ó-nia relijiaun ka ó-nia serbisu.” Se Ita iha Jean-Claude nia fatin, Ita halo saida? Jean-Claude hatene katak maski nia lakon ninia serbisu, Maromak sei nafatin tau matan ba nia. Nia sei iha serbisu barak ba Jeová, no Jeová sei ajuda nia atu tau matan ba ninia família nia presiza loroloron nian. Tan neʼe, nia hili atu tuir reuniaun kalan nian. Depois reuniaun neʼe, nia prepara atu bá serbisu maski nia la hatene se nia sei iha serbisu ka lae. Derrepente deʼit, ema telefone nia atu hatete katak xefe lakon serbisu. Maibé irmaun neʼe la lakon ninia serbisu.
8, 9. Oinsá mak ita bele halo tuir amlulik no ema levita nia ezemplu?
8 Irmaun balu neʼebé mós hasoru situasaun susar hanesan neʼe, sira hanoin: ‘Oinsá mak haʼu bele tau matan ba haʼu-nia família se haʼu lakon haʼu-nia serbisu?’ (1 Tim 5:8) Maski ita hasoru situasaun hanesan neʼe ka seidauk, ita hatene husi ita rasik nia esperiénsia katak Maromak nunka husik ninia atan sira neʼebé simu nia nuʼudar sira-nia parte no tau uluk ninia serbisu iha sira-nia moris. Kuandu Jesus hatete ba ninia dixípulu sira atu kontinua “buka uluknanain Maromak nia reinu”, nia mós promete katak Maromak “sei fó tan” buat seluk neʼebé sira presiza, hanesan ai-han, hemu, ka hatais.—Mt 6:33.
9 Hanoin toʼok kona-ba ema levita sira neʼebé la hetan rai nuʼudar liman-rohan. Tanba sira-nia serbisu mak atu lori nasaun Israel atu adora Maromak iha dalan neʼebé loos, sira presiza duni tau fiar ba Jeová katak nia mak sira-nia parte no nia sei tau matan ba sira-nia presiza. (Núm 18:20) Maski ita la halo serbisu iha templu hanesan amlulik no ema levita sira, maibé ita bele halo tuir sira-nia ezemplu hodi fiar katak Jeová sei tau matan ba ita-nia presiza. Nuʼudar mundu nia rohan besik ona, ita presiza hametin liután ita-nia fiar ba Maromak nia kbiit atu tau matan ba ita.—Apok 13:17.
Buka uluknanain Maromak nia justisa
10, 11. Oinsá mak ema balu tau fiar ba Jeová kona-ba serbisu? Fó toʼok ezemplu.
10 Jesus mós hatete ba ninia dixípulu sira atu kontinua ‘buka uluk Maromak nia justisa’. (Mt 6:33) Neʼe katak ita halo tuir Jeová nia hanoin kona-ba buat neʼebé loos no sala duké halo tuir ema nia hanoin. (Lee Isaías 55:8, 9. *) Ema balu, antes sira sai ema kristaun loos, sira kuda tabaku ka faʼan sigarru, treinu ema atu funu, ka halo no faʼan kilat. Maibé depois sira aprende lia-loos, sira barak foti desizaun atu troka sira-nia serbisu hodi bele hetan batizmu.—Isa 2:4; 2 Kor 7:1; Gal 5:14.
11 Ema ida neʼebé halo nuneʼe mak irmaun Andrew. Kuandu nia ho ninia feen aprende kona-ba Jeová, sira deside atu serbí nia. Maski Andrew gosta tebes ninia serbisu, maibé nia husik serbisu neʼe. Tanbasá? Tanba nia serbisu ba organizasaun ida neʼebé envolve iha funu, no tanba nia hakarak halo buat neʼebé loos iha Jeová nia haree. Iha tempu neʼebé Andrew husik ninia serbisu, nia iha oan naʼin-rua no iha osan ba fulan balu deʼit. Maibé, nia tau fiar ba Maromak no buka serbisu seluk. Agora, kuandu nia ho ninia família hanoin fali kona-ba tempu neʼebá, sira bele dehan katak Jeová nia liman la badak. (Isa 59:1) Hodi halaʼo moris simples, Andrew ho ninia feen mós hetan oportunidade atu halo serbisu pioneiru. Andrew hatete: “Dala ruma ami laran-susar kona-ba osan, fatin atu hela, saúde, no tanba ami-nia idade komesa aumenta. Maibé, Jeová sempre ajuda ami. . . . Ami ho laran-metin bele hatete katak serbisu ba Jeová mak serbisu espesiál liu neʼebé ema bele halo, serbisu neʼebé lori bensaun barak.” *—Ecle 12:13.
12. Ita presiza hatudu hahalok saida atu tau uluk Maromak nia matadalan iha ita-nia moris? Fó toʼok ezemplu iha ita-nia área.
12 Jesus hatete ba ninia dixípulu sira: “Imi-nia fiar hanesan mostarda musan ida karik, imi sei dehan ba foho neʼe, ‘Book ó an husi neʼe bá neʼebá’, no nia sei book an duni; buat ida sei la susar ba imi.” (Mt 17:20) Ita sei tau uluk Maromak nia matadalan nafatin iha ita-nia moris maski ida-neʼe lori susar ba ita ka lae? Se ita laran-rua kona-ba neʼe, diʼak atu koʼalia ho ita-nia maluk sira iha kongregasaun. Sira-nia esperiénsia kona-ba oinsá Jeová ajuda sira sei hametin liután ita-nia fiar.
Hafolin buat neʼebé Jeová fó mai ita
13. Kuandu ita hakaʼas an iha Jeová nia serbisu, ita bele fiar saida?
13 Se ita hafolin ita-nia serbisu ba Jeová, ita bele fiar katak nia sei fó buat hotu neʼebé ita presiza, hanesan nia halo ba ema levita sira. Hanoin toʼok kona-ba David. Maski nia subar iha fatuk-kuak, nia tau fiar ba Maromak nia ajuda. Ita mós bele fiar katak Jeová sei ajuda ita maski ita sente la iha ema ida mak ajuda ita. Hanoin-hetan mós Asaf komesa komprende saida mak halo nia laran-susar kuandu nia “tama iha Maromak nia santuáriu boot”. (Sal 73:17) Ita mós presiza fiar katak Jeová sei fó buat hotu neʼebé ita presiza atu hametin ita-nia relasaun ho nia. Nuneʼe, ita hatudu katak ita hafolin ita-nia serbisu ba Maromak maski ita hasoru situasaun susar naran deʼit. Hodi halo nuneʼe, ita simu Jeová nuʼudar ita-nia parte.
14, 15. Ita presiza halo saida kuandu iha mudansa balu kona-ba dalan neʼebé ita komprende eskritura ruma? Tanbasá?
14 Kuandu Jeová ajuda ita atu “hatene momoos” lia-loos neʼebé kleʼan liu iha Bíblia, ita nafatin tau fiar ba nia ka lae? (1 Kor 2:10-13) Apóstolu Pedro fó ezemplu diʼak kona-ba neʼe. Loron ida, Jesus hatete ba ema: “Imi la han karik Oan-Mane nia isin, imi la hemu karik nia raan, imi sei la hetan moris iha imi.” Dixípulu barak hanoin katak Jesus koʼalia kona-ba nia rasik nia isin no raan, no hatete: “Liafuan hirak-neʼe todan tebetebes: sé loos mak sei rona nia?” Nuneʼe, sira “fila kotuk hodi la laʼo tan ona ho nia”. Maibé Pedro hatete: “Naʼi, ami atu bá loos ho sé? Ita mak iha liafuan moris rohan-laek nian.”—Joao 6:53, 60, 66, 68.
15 Maski Pedro ladún komprende Jesus nia liafuan, maibé nia fiar katak Maromak sei ajuda nia atu komprende lia-loos. Ohin loron, kuandu iha mudansa balu kona-ba dalan neʼebé ita komprende lia-loos ruma husi Bíblia, ita buka atu komprende razaun sira husi Bíblia tansá halo mudansa neʼe ka lae? (Prov 4:18) Iha apóstolu sira-nia tempu, ema Bereia “simu liafuan ho laran-haksolok no buka-hatene didiʼak eskritura loron-loron”. (Apos 17:11) Hodi halo tuir sira-nia ezemplu, ida-neʼe sei ajuda ita atu hafolin liután ita-nia serbisu ba Jeová no simu nia nuʼudar ita-nia parte.
Kaben deʼit iha Naʼi
16. Tuir 1 Korinto 7:39, oinsá mak ema klosan bele simu Maromak nuʼudar sira-nia parte?
16 Dalan ida seluk neʼebé ita hatudu katak ita hanoin kona-ba Maromak nia hakarak mak hodi halo tuir Bíblia nia mandamentu kona-ba kaben deʼit “iha Naʼi”. (1 Kor 7:39) Hodi halo tuir konsellu neʼe, irmaun-irmán barak hili atu nafatin klosan. No Maromak mós tau matan ba sira. Saida mak David halo kuandu nia sente mesak no sente katak la iha ema ida neʼebé ajuda nia? Nia hatete: “Iha [Maromak] nia oin haʼu fakar haʼu-nia laran-susar; iha ninia oin haʼu kontinua fó-hatene haʼu-nia terus, bainhira haʼu-nia laran-manas dook husi haʼu.” (Sal 142:1-3) Profeta Jeremias neʼebé serbí Maromak ho laran-metin ba tinan barak nuʼudar ema klosan, nia mós dala ruma sente mesak. Ita bele estuda kona-ba ninia ezemplu iha kapítulu 8 husi livru Firman Allah untuk Kita melalui Yeremia.
17. Saida deʼit mak irmán klosan ida halo kuandu nia sente mesak?
17 Irmán ida iha rai-Estadus Unidus hatete katak nia nunka foti desizaun atu nafatin klosan. Nia hakarak kaben bainhira nia hetan ema ida neʼebé loos ba nia. Maibé ninia inan neʼebé laʼós Testemuña hakarak nia atu kaben ho ema naran deʼit. Irmán neʼe husu se ninia inan prontu atu simu responsabilidade se ninia moris kaben nian sai aat. Kuandu irmán neʼe nia inan haree katak nia iha serbisu diʼak, hatene tau matan ba ninia an no kontente, entaun nia para atu koʼalia beibeik kona-ba kaben. Maski dala ruma irmán neʼe sente mesak, nia hatete: “Haʼu buka atu tau haʼu-nia fiar ba Jeová. Nia nunka husik haʼu.” Saida mak ajuda irmán neʼe atu tau fiar ba Jeová? Nia hatete: “Halo orasaun ajuda haʼu atu sente katak Maromak iha duni no katak haʼu nunka mesak. Se Ida neʼebé Aas Liu Hotu iha rai no lalehan rona haʼu, nuʼusá mak haʼu la bele sente katak haʼu iha folin no kontente?” Tanba nia fiar Bíblia nia liafuan neʼebé dehan “diʼak liu fó liu fali simu”, nia hakaʼas an atu ajuda ema seluk hodi la hein atu simu fali buat ruma. Irmán neʼe hatete: “Kuandu haʼu hanoin: ‘Oinsá haʼu bele ajuda ema neʼe?’, ida-neʼe halo haʼu sente kontente iha laran.” (Apos 20:35) Sin, nia simu Jeová nuʼudar ninia parte no nia kontente atu halaʼo ninia serbisu.
18. Oinsá mak ita bele sai Jeová nia parte?
18 Se ita simu Maromak nuʼudar ita-nia parte iha situasaun naran deʼit, Maromak mós sei simu ita nuʼudar parte husi ninia povu. (2 Kor 6:16, 17) Nuneʼe, ita sei sai Jeová nia parte hanesan Maromak nia atan sira iha tempu uluk. (Lee Deuteronômio 32:9, 10. *) Sin, hanesan povu Israel sai Maromak nia parte iha nasaun sira-nia leet, Maromak mós bele simu ita nuʼudar ninia parte hodi tau matan ba ita ho domin.—Sal 17:8.
[Nota–rodapé]
^ par. 6 Salmo 17:1, 13-15: “1 Rona ba buat neʼebé loos, oh, Jeová; rona didiʼak haʼu-nia halerik; see tilun mai haʼu-nia orasaun husi ibun neʼebé la bosok.” “13 Hamriik bá, oh, Jeová; hasoru nia; halo nia hakruʼuk; salva haʼu-nia moris husi ema aat ho Ita-nia surik, 14 husi ema sira, ho Ita-nia liman, oh, Jeová, husi ema mundu neʼe nian, neʼebé sira-nia parte mak iha moris neʼe, no neʼebé Ita halo nakonu sira-nia kabun ho Ita-nia rikusoin neʼebé subar, neʼebé kontente ho oan no neʼebé rai-hela ba sira-nia oan restu husi buat neʼebé sira husik. 15 Kona-ba haʼu, iha justisa haʼu sei haree Ita-nia oin; kuandu haʼu hadeer, haʼu sei sai kontente tanba haree ita.”
^ par. 10 Isaías 55:8, 9: “8 ‘Tanba imi-nia hanoin la hanesan ho haʼu-nia hanoin, no haʼu-nia dalan sira la hanesan ho imi-nia dalan sira,ʼ neʼe mak Naʼi Jeová hatete. 9 ‘Hanesan lalehan aas liu fali rai, nuneʼe mós haʼu-nia dalan sira aas liu fali imi-nia dalan sira, no haʼu-nia hanoin aas liu fali imi-nia hanoin.’”
^ par. 11 Haree Sedarlah! November 2009, pájina 12-14.
^ par. 18 Deuteronômio 32:9, 10: “9 Tanba Jeová nia parte mak ninia povu; Jacob mak liman-rohan neʼebé nia hetan. 10 Nia hetan nia iha rai-fuik, no iha rai-maran neʼebé mamuk ho animál fuik nia lian. Nia haleʼu nia no tau matan nia, atu proteje nia hanesan ninia matan-fuan.”
Oinsá Ita hatán?
Oinsá mak ita bele simu Jeová nuʼudar ita-nia parte
• hodi tau uluk Maromak nia Ukun no ninia justisa?
• hodi hafolin buat neʼebé Jeová fó mai ita?
• hodi halo tuir Maromak nia mandamentu kona-ba kaben deʼit iha Naʼi?
[Pergunta estudu nian]
[Liafuan ne’ebé foti husi pájina 13]
Jeová sai ita-nia parte kuandu ita tau uluk ninia serbisu iha ita-nia moris
[Dezeñu iha pájina 15]
Jeremias nia ezemplu fó laran-manas ba ita
