Jeová mak haʼu-nia parte
Jeová mak haʼu-nia parte
“Haʼu mak ó-nia parte no ó-nia liman-rohan iha Israel nia oan sira-nia leet.”—NÚM 18:20.
1, 2. (a) Esplika toʼok ema levita sira-nia situasaun kona-ba simu rai nuʼudar liman-rohan. (b) Saida mak Maromak Jeová promete ba ema levita sira?
DEPOIS ema Israel tama no manán parte barak iha rai neʼebé Maromak promete, Josué, Amlulik Boot Eleazar no suku sira-nia ulun-naʼin komesa fahe rai ba suku sira hotu. (Núm 34:13-29) Maibé, suku Levi la hetan rai nuʼudar liman-rohan hanesan suku sira seluk. (Jos 14:1-5) Tansá mak ema levita sira la hetan rai nuʼudar sira-nia parte iha rai neʼebé Maromak promete? Maromak haluha sira ka lae?
2 Ita bele hetan resposta husi buat neʼebé Maromak Jeová hatete ba ema levita sira. Hodi hatudu katak nia la haluha sira, Jeová promete ba sira: “Haʼu mak ó-nia parte no ó-nia liman-rohan iha Israel nia oan sira-nia leet.” (Núm 18:20) “Haʼu mak ó-nia parte.” Ida-neʼe liafuan kapás tebes! Hanoin toʼok, Ita sente oinsá se Jeová promete ida-neʼe ba Ita? Karik Ita hanoin: ‘Haʼu merese atu simu liafuan kapás hanesan neʼe husi Maromak Aas Liu Hotu ka lae?’ Ka Ita hanoin: ‘Jeová bele sai ema kristaun nia parte maski sira sala-naʼin?’ Pergunta sira-neʼe envolve ita hotu. Tan neʼe, mai ita buka-hatene Maromak nia liafuan neʼe katak sá. Hodi halo nuneʼe sei ajuda ita atu hatene oinsá mak Jeová bele sai ema kristaun nia parte ohin loron. Liután neʼe, Ita sei haree katak nia bele sai Ita-nia parte maski Ita iha esperansa atu bá lalehan ka Ita hein atu moris iha mundu foun.
Jeová tau matan ba ema levita
3. Tanbasá mak Maromak hili ema levita sira atu serbí nia?
3 Antes Jeová fó ninia Ukun-Fuan ba ema Israel, família ida-idak nia ulun mak halo serbisu nuʼudar amlulik. Maibé, kuandu Maromak fó ninia Ukun-Fuan, nia halo arranju atu hili ema husi suku Levi atu serbí tempu-tomak nuʼudar amlulik ka atu ajuda amlulik sira. Tansá mak Jeová halo arranju neʼe? Kuandu Maromak halakon ema Egiptu sira-nia oan primeiru, nia halo ema Israel nia oan-mane primeiru sai ninian atu halo serbisu ba nia. Maibé depois, Maromak deside atu “foti ema levita sira . . . iha ema Israel sira-nia oan primeiru hotu nia fatin”. Neʼe katak Maromak hili ema levita sira atu halo serbisu ba nia. Maibé, tanba sensus hatudu katak ema Israel nia oan primeiru mak barak liu fali mane levita sira, ema Israel tenke selu osan nuʼudar folin atu taka fali ema levita sira neʼebé menus. (Núm 3:11-13, 41, 46, 47) Hodi halo nuneʼe ema levita sira bele halo serbisu ba Israel nia Maromak.
4, 5. (a) Oinsá mak Maromak sai ema levita sira-nia parte? (b) Oinsá mak Maromak tau matan ba ema levita sira?
4 Kuandu Jeová hili ema levita atu halo ninia serbisu, oinsá mak nia sai sira-nia parte? Jeová sai sira-nia parte hodi fó ba sira serbisu neʼebé espesiál liu duké rai nuʼudar liman-rohan. Neʼe mak “serbisu nuʼudar amlulik ba Jeová”. (Jos 18:7) Versíkulu sira neʼebé haleʼu eskritura iha Números 18:20 hatudu katak arranju neʼe la halo ema levita sira sai kiak. (Lee Números 18:24. *) Tuir arranju neʼe, sira simu “porsentu sanulu hotu iha Israel nuʼudar liman-rohan ka kolen ba serbisu neʼebé sira halo”. Neʼe katak sira simu porsentu 10 husi buat hotu neʼebé povu Israel hetan husi sira-nia toʼos no mós husi sira-nia animál. Maibé, ema levita sira mós presiza fó porsentu 10 “neʼebé diʼak liu” husi buat neʼebé sira simu hodi apoia amlulik sira-nia serbisu. * (Núm 18:25-29) Amlulik sira mós simu “kontribuisaun sagradu hotu” neʼebé ema Israel fó ba Maromak iha adorasaun fatin. Tan neʼe, sira neʼebé serbí nuʼudar amlulik bele fiar duni katak Jeová sei tau matan ba sira-nia presiza.
5 Tuir Moisés nia Ukun-Fuan, karik povu Israel mós presiza haketak porsentu 10 tan husi buat neʼebé sira hetan husi toʼos no animál sira. Ida-neʼe atu umakain ida-idak bele uza durante reuniaun boot santu sira neʼebé halaʼo tinan-tinan. (Deut 14:22-27) Maibé, depois kada tinan tolu no neen husi tinan hitu, ema Israel sira lori porsentu 10 neʼe husi sira-nia sasán atu ajuda ema kiak no mós ema levita sira. Tansá mak ema levita sira mós simu ajuda neʼe? Tanba sira “la iha parte ka liman-rohan” iha Israel.—Deut 14:28, 29.
6. Tanba ema levita la hetan rai iha Israel, sira hela iha neʼebé?
6 Karik ita hanoin: ‘Se ema levita la hetan rai, sira hela iha neʼebé?’ Maromak mós tau matan ba sira kona-ba neʼe hodi fó ba sira sidade 48 hamutuk ho rai-luan neʼebé haleʼu sidade sira-neʼe. Neʼe inklui mós sidade protesaun nian neen. (Núm 35:6-8) Nuneʼe, ema levita iha fatin atu hela kuandu sira la serbí iha Maromak nia santuáriu, ka tabernákulu. Jeová tau matan didiʼak hodi fó buat barak ba sira neʼebé fó sira-nia an atu halo serbisu ba nia. Klaru katak ema levita sira bele tau fiar ba Jeová no ninia forsa atu tau matan ba sira. Hodi halo nuneʼe, sira hatudu katak Jeová mak sira-nia parte.
7. Saida mak ema levita presiza halo atu Jeová bele sai sira-nia parte?
7 Tuir Ukun-Fuan, la iha kastigu ba ema Israel neʼebé la fó porsentu 10 husi buat neʼebé sira hetan husi toʼos no animál sira. Maibé, kuandu sira la fó porsentu 10, ida-neʼe halo susar ba amlulik no ema levita sira, hanesan akontese iha Neemias nia tempu. Tanba povu la fó porsentu 10, ema levita presiza serbisu iha toʼos, no ida-neʼe halo sira husik sira-nia serbisu ba Maromak. (Lee Neemias 13:10. *) Klaru katak atu suku Levi bele hetan buat neʼebé sira presiza, ida-neʼe depende ba ema Israel nia relasaun diʼak ho Jeová. Maibé, amlulik no ema levita sira mós presiza fiar ba Jeová no ba dalan neʼebé nia uza atu tau matan ba sira.
Jeová sai ema levita ida-idak nia parte
8. Asaf hanoin barak kona-ba saida?
8 Ema levita nuʼudar suku presiza simu Jeová nuʼudar sira-nia parte. Maibé, sira ida-idak mós dehan “Jeová mak haʼu-nia parte” atu hatudu sai sira-nia domin no fiar ba Maromak. (Lam 3:24) Porezemplu, ema levita ida neʼebé sente hanesan neʼe mak ida neʼebé kantór no halo múzika. Ita sei koʼalia kona-ba nia nuʼudar Asaf tanba karik nia mai husi umakain Asaf neʼebé serbí nuʼudar ulun ba grupu kantór sira iha Liurai David nia tempu. (1 Crôn 6:31-43) Iha Salmo 73, ita lee katak Asaf komesa hanoin barak no sai laran-moras tanba nia haree ema aat moris diʼak, toʼo nia dehan: “Saugati deʼit haʼu hamoos haʼu-nia laran no haʼu fase liman hodi hatudu katak haʼu la iha sala.” Liafuan neʼe hatudu katak nia la hafolin tan ninia serbisu espesiál no nia mós la hafolin Jeová nuʼudar ninia parte. Nia sente laran-tun toʼo tempu neʼebé nia “tama iha Maromak nia santuáriu boot”.—Sal 73:2, 3, 12, 13, 17.
9, 10. Tanbasá mak Asaf bele dehan katak Maromak mak ninia “parte toʼo tempu neʼebé la bele sura”?
9 Iha santuáriu, Asaf komesa troka ninia hanoin hodi tuir Maromak nia hanoin. Karik Ita mós iha esperiénsia neʼebé hanesan. Dala ruma, Ita haluha katak Ita-nia serbisu ba Jeová importante no komesa hanoin kona-ba sasán ka rikusoi neʼebé Ita seidauk iha. Maibé hodi estuda Maromak nia Liafuan no tuir reuniaun kristaun, Ita troka fali Ita-nia hanoin hodi tuir Jeová nia hanoin. Asaf hanoin kona-ba saida mak sei akontese ba ema aat sira. Nia mós hanoin kona-ba ninia futuru, no nia hanoin-hetan katak Jeová sei kaer ninia liman loos no ajuda nia. Nuneʼe, Asaf hatete ba Jeová: “La iha tan ida seluk neʼebé haʼu gosta iha rai, só Ita deʼit.” (Sal 73:23, 25) Nia mós hatete katak Maromak mak ninia parte. (Lee Salmo 73:26. *) Maski Asaf hatene katak ikusmai ninia ‘isin no fuan la laʼo onaʼ, maibé nia hatene katak Maromak sei sai ninia “parte toʼo tempu neʼebé la bele sura”. Nia sente hanesan neʼe tanba nia fiar katak Jeová sei la haluha nia nuʼudar belun no serbisu neʼebé nia halo ho laran-metin. (Ecle 7:1) Ida-neʼe halo Asaf sente kmaan tebes! Nia kanta: “Ba haʼu, hakbesik ba Maromak mak diʼak mai haʼu. Haʼu halo Naʼi Jeová, Ukun-Naʼin Boot Liu, sai haʼu-nia fatin protesaun.”—Sal 73:28.
10 Nuneʼe, kuandu Asaf hatete katak Maromak mak ninia parte, nia la koʼalia deʼit kona-ba ai-han ka buat seluk neʼebé nia simu nuʼudar ema levita. Buat neʼebé nia koʼalia mak kona-ba ninia serbisu espesiál no ninia relasaun ho Jeová, Ida neʼebé Aas Liu Hotu. (Tgo 2:21-23) Atu hametin ninia relasaun neʼe, Asaf presiza nafatin tau fiar ba Jeová. Asaf tenke fiar katak ninia moris sei sai diʼak bainhira nia moris tuir Maromak nia hakarak. Ita mós bele tau fiar hanesan neʼe ba Maromak neʼebé Forsa Boot Liu Hotu.
11. Jeremias hanoin kona-ba pergunta saida? Oinsá mak nia hetan resposta ba pergunta neʼe?
11 Profeta Jeremias mós ema levita ida neʼebé hatete katak ‘Jeová mak ninia parte’. Mai ita haree ninia liafuan neʼe katak sá. Jeremias hela iha Anatot, ema levita nia sidade ida neʼebé besik Jerusalém. (Jer 1:1) Loron ida, Jeremias komesa hanoin: ‘Tansá mak ema aat moris diʼak no ema diʼak moris susar?ʼ (Jer 12:1) Tanba Jeremias haree buat aat neʼebé akontese iha Jerusalém no Judá, nia sente atu “halerik” ba Jeová. Maibé, Jeremias hatene katak Jeová sempre halo buat neʼebé loos. Jeová fó resposta ba Jeremias nia pergunta hodi haruka nia atu haklaken kona-ba buat neʼebé sei akontese iha futuru, no depois Jeová kumpre ninia profesia neʼe. Hodi tuir profesia, ema neʼebé halo tuir Jeová nia matadalan ‘simu moris’, maibé ema aat sira neʼebé la rona ba Maromak nia avizu ikusmai mate.—Jer 21:9.
12, 13. (a) Saida mak book Jeremias atu hatete “Jeová mak haʼu-nia parte”? Nia hatudu hahalok saida? (b) Tanbasá mak Israel nia suku hotu presiza hatudu hahalok hanesan Jeremias?
12 Kuandu Jeremias haree katak buat hotu iha ninia rai naksobu, nia sente katak nia laʼo iha nakukun laran. Ida-neʼe hanesan Jeová halo nia “tuur hanesan ema neʼebé mate kleur ona”. (Lam 1:1, 16; 3:6) Jeremias hatete ba ema Israel atu fila fali ba sira-nia Aman Jeová, maibé tanba sira-nia hahalok sai aat tebetebes Maromak husik Jerusalém no Judá naksobu. Ida-neʼe halo Jeremias sente triste tebes maski neʼe laʼós ninia sala. Maibé, nia la haluha kona-ba Maromak nia laran-sadiʼa, hodi dehan: “Ita la toʼo ba ita-nia rohan.” Tuir loloos, loron-loron Jeová hatudu ninia laran-sadiʼa! Iha tempu neʼebá mak Jeremias hatete: “Jeová mak haʼu-nia parte.” Jeremias kontinua atu halo serbisu espesiál nuʼudar Jeová nia profeta.—Lee Lamentações 3:24. *
13 Durante tinan 70, ema Israel nia rai sai mamuk no fuik. (Jer 25:11) Maibé, hodi hatete katak “Jeová mak haʼu-nia parte”, Jeremias hatudu katak nia tau fiar ba Jeová. No fiar neʼe ajuda nia atu “hein” Jeová ho pasiénsia. Tanba Israel nia suku hotu lakon ona sira-nia liman-rohan, sira mós presiza tau fiar ba Jeová no hein nia hanesan Jeremias. Jeová deʼit mak sira-nia esperansa. Liutiha tinan 70, Maromak nia povu fila fali ba rai-Israel no hetan fali oportunidade atu serbí Jeová iha neʼebá.—2 Crôn 36:20-23.
Ema seluk mós bele simu Jeová nuʼudar sira-nia parte
14, 15. Maski ema levita simu Jeová nuʼudar sira-nia parte, maibé sé mós mak halo ida-neʼe? Tanbasá?
14 Maski Asaf no Jeremias husi suku Levi simu Jeová nuʼudar sira-nia parte, maibé ema seluk neʼebé laʼós ema levita mós bele serbí Jeová nuʼudar sira-nia parte. Porezemplu, kuandu David sei joven no seidauk sai liurai ba Israel, nia hatete katak Maromak mak ninia “parte iha rai ema moris nian”. (Sal 142:1, 5) Kuandu David hakerek salmu neʼe, nia la hela iha uma. Nia halai husi ninia inimigu sira hodi subar iha fatuk-kuak. Dala rua ka liu, David tenke subar an iha fatuk-kuak, dala ida besik Adulam no dala ida seluk iha rai-fuik maran iha Engedi. Karik nia hakerek Salmo 142 iha fatuk-kuak sira-neʼe ida.
15 Se karik David hakerek salmu neʼe iha fatuk-kuak, neʼe tanba nia subar an husi Liurai Saul neʼebé hakarak oho nia. (1 Sam 22:1, 4) Iha rai dook neʼe, karik David sente katak nia la iha kolega atu ajuda nia. (Sal 142:4) Iha tempu neʼebá mak David husu Maromak nia ajuda.
16, 17. (a) Tanbasá mak David sente la iha ema atu ajuda nia? (b) David bele husu sé atu ajuda nia?
16 Antes David hakerek Salmo 142, karik nia rona ona kona-ba buat neʼebé akontese ba Amlulik Boot Aimeléc, neʼebé ajuda nia atu halai husi Saul. Tanba Liurai Saul laran-moras ba David, nia haruka nia ema atu oho Aimeléc ho ninia família. (1 Sam 22:11, 18, 19) David sente katak tanba nia mak Aimeléc no ninia família mate. Nia sente katak nia rasik mak oho amlulik neʼebé ajuda nia. Se Ita iha David nia fatin, Ita mós sente hanesan neʼe ka lae? Buat neʼebé halo David susar liután mak nia la bele deskansa tanba Saul duni tuir nia nafatin.
17 Lakleur depois Aimeléc mate, profeta Samuel neʼebé kose mina ba David atu sai liurai mós mate. (1 Sam 25:1) Ida-neʼe karik halo David sente mesak tebes no sente la iha ema ida atu ajuda nia. Maibé, David hatene katak Jeová mak bele ajuda nia. Maski David la halo serbisu espesiál hanesan ema levita halo, maibé Maromak hili ona nia atu halo serbisu espesiál seluk, neʼe mak atu sai liurai ba Maromak nia povu. (1 Sam 16:1, 13) Nuneʼe, David hatete sai ba Jeová buat hotu neʼebé iha ninia laran no nia nafatin tau fiar ba Jeová. Ita mós bele simu Jeová nuʼudar ita-nia parte hodi tau fiar ba nia no hakaʼas an nafatin atu halo ninia serbisu.
18. Oinsá mak Jeová nia atan sira hatudu katak sira simu nia nuʼudar sira-nia parte?
18 Iha lisaun neʼe, ita koʼalia kona-ba Jeová nia atan sira neʼebé simu nia nuʼudar sira-nia parte. Neʼe katak sá? Neʼe katak sira simu atu halo serbisu ba Jeová no fiar katak nia sei tau matan ba sira. Ema levita no ema Israel husi suku sira seluk, hanesan David, bele simu Maromak nuʼudar sira-nia parte. Oinsá mak ita mós bele simu Jeová nuʼudar ita-nia parte? Ita sei koʼalia kona-ba neʼe iha lisaun tuirmai.
[Nota–rodapé]
^ par. 4 Números 18:24: “Tanba porsentu sanulu husi Israel nia oan sira, neʼebé sira fó ba Jeová nuʼudar kontribuisaun, haʼu fó tiha ba ema levita nuʼudar liman-rohan. Tan neʼe mak haʼu hatete ba sira: ‘Iha Israel nia oan sira-nia leet sira sei la simu liman-rohan.’”
^ par. 4 Atu hetan informasaun liután kona-ba oinsá mak Maromak tau matan ba sira neʼebé serbisu nuʼudar amlulik, haree livru Pemahaman Alkitab, Jilid 1, pájina 1027.
^ par. 7 Neemias 13:10: “No haʼu hatene katak ema la fó ema levita sira-nia parte, tan neʼe ema levita sira no kantór sira neʼebé serbisu halai ba sira ida-idak nia toʼos.”
^ par. 9 Salmo 73:26: “Haʼu-nia isin no haʼu-nia fuan la laʼo ona. Maromak mak fatuk ba haʼu-nia fuan no haʼu-nia parte toʼo tempu neʼebé la bele sura.”
^ par. 12 Lamentações 3:24: “Haʼu hatete: ‘Jeová mak haʼu-nia parte, tan neʼe mak haʼu sei hein ba nia.’”
Oinsá Ita hatán?
• Oinsá mak Jeová sai ema levita sira-nia parte?
• Saida mak Asaf, Jeremias no David halo atu hatudu katak Jeová mak sira-nia parte?
• Hahalok saida mak ita presiza hatudu atu Maromak sai ita-nia parte?
[Pergunta estudu nian]
[Liafuan ne’ebé foti husi pájina 8]
Ema levita la simu rai nuʼudar liman-rohan. Maibé, sira simu Jeová nuʼudar sira-nia parte tanba sira halo serbisu espesiál ba nia
[Dezeñu iha pájina 7]
Oinsá mak Jeová sai amlulik no ema levita sira-nia parte?
[Dezeñu iha pájina 9]
Saida mak ajuda Asaf atu nafatin simu Jeová nuʼudar ninia parte?
