Haʼu haksolok tebes atu serbí Jeová

Esperiénsia husI Fred Rusk

Ho haʼu-nia espériensia rasik, haʼu bele hatete katak David nia liafuan iha Salmo 27:10 mak loos. Nia hatete: “Se haʼu-nia aman rasik no inan rasik husik haʼu, Jeová rasik sei simu haʼu.” Haʼu sei konta kona-ba ida-neʼe.

HAʼU boot iha rai-Estadus Unidus, iha Georgia. Haʼu-nia avó-mane mak hakiak haʼu, nia iha toʼos boot atu kuda kabas. Iha tempu neʼebá, ami-nia rai iha krize ekonomia neʼebé aat tebes. Haʼu-nia inan mate no haʼu-nia alin-mane neʼebé foin moris mós mate, ida-neʼe halo haʼu-nia aman triste tebes. Tan neʼe, haʼu-nia aman husik haʼu iha haʼu-nia avó nia uma atu serbisu iha fatin dook. Dala barak nia koko atu hela hamutuk ho haʼu, maibé ida-neʼe nunka akontese.

Iha haʼu-nia avó nia uma, ninia oan-feto sira mak tau matan ba buat hotu. Maski haʼu-nia avó ladún interese kona-ba relijiaun, maibé haʼu-nia tia sira badinas tebes bá misa no moris tuir igreja nia hanorin. Sira mós obriga haʼu atu bá igreja domingu-domingu no ameasa atu baku haʼu se haʼu la bá. Tan neʼe, haʼu ladún gosta kona-ba relijiaun. Maibé haʼu gosta eskola no desportu.

Vizita neʼebé troka haʼu-nia moris

Loron ida iha tinan 1941, kuandu haʼu tinan 15, katuas ida ho nia feen mai ami-nia uma. Nia hatete katak nia mak haʼu-nia “tiu Talmadge Rusk”. Haʼu ladún koñese sira, maibé sira hetete katak sira mak Testemuña ba Jeová. Tiu neʼe esplika katak Maromak hakarak ema atu moris ba nafatin iha mundu, no ida-neʼe la hanesan ho buat neʼebé haʼu rona iha igreja. Haʼu-nia família barak la simu. Sira sai hirus kona-ba buat neʼebé tiu hatete, no sira lakohi tiu ho nia feen atu mai tan iha ami-nia uma. Maibé haʼu-nia tia ida neʼebé tinan tolu boot liu haʼu, naran Mary, nia simu Bíblia husi sira no livru sira neʼebé esplika kona-ba Bíblia.

Tia Mary fiar kedas katak nia hetan ona lia-loos husi Bíblia, no iha tinan 1942, nia hetan batizmu nuʼudar Testemuña ba Jeová. Iha tempu hanesan, família sira sai kontra makaʼas liután ba lia-loos. Ida-neʼe hanesan ho Jesus nia liafuan neʼebé dehan “ema nia parente sira rasik [sei] sai ninia funu-balun”. (Mt 10:34-36) Porezemplu, tia Mary nia biin ida neʼebé naran-boot iha ami-nia área, nia halo planu hamutuk ho administradór atu polísia bele kaer tiu Talmadge. Sira duun katak tiu faʼan livru maski la iha lisensa. Nuneʼe, sira lori kazu neʼe ba tribunál.

Tuir jornál ida iha ami-nia área, administradór neʼebé serbisu mós nuʼudar juis hatete ba sira neʼebé iha tribunál: “Livru sira neʼebé ema  neʼe fahe . . . mak perigu hanesan venenu.” Haʼu-nia tiu lori fali kazu neʼe ba tribunál. Maski ikusmai haʼu-nia tiu mak manán, maibé durante tempu neʼe, nia iha hela kadeia laran ba loron sanulu.

Tia Mary ajuda haʼu

Tia Mary koʼalia kona-ba buat neʼebé nia aprende husi Bíblia mai haʼu, no nia mós komesa haklaken ba viziñu sira. Loron ida, haʼu tuir haʼu-nia tia kuandu nia estuda ho señór ida neʼebé simu livru The New World. * Ninia feen hatete katak nia laʼen lee livru neʼe ba kalan tomak. Haʼu mós kontente ho buat neʼebé haʼu aprende husi Bíblia maski haʼu la gosta atu envolve an ho relijiaun. Maibé, buat neʼebé halo haʼu fiar duni katak Testemuña sira mak Maromak nia povu mak la’ós deʼit tanba sira hanorin ho loos, maibé liuliu tanba haʼu haree oinsá ema trata aat sira.

Porezemplu, loron ida, kuandu haʼu ho tia Mary fila ba uma husi toʼos, ami haree ahi-suar husi foʼer-fatin. Kuandu ami toʼo, ami haree tia nia livru sira, ninia mákina neʼebé uza atu rona gravasaun no mós gravasaun kona-ba mensajen husi Bíblia, sasán sira-neʼe mutuk hotu. Haʼu sai hirus tebetebes ba tia Mary nia biin sira neʼebé sunu sasán sira-neʼe, maibé sira ida hatete: “Aban-bainrua ó sei agradese ba buat neʼebé ami halo.”

Iha tinan 1943, tia Mary sai husi uma tanba nia lakohi husik ninia fiar no lakohi para atu haklaken ba viziñu sira. Toʼo tempu neʼebá, haʼu aprende ona katak Maromak iha naran Jeová, Maromak mak domin no hanoin ema, no katak nia la haterus ema iha ahi infernu, no haʼu kontente tebes ho buat neʼebé haʼu aprende ona. Haʼu mós aprende katak Jeová iha organizasaun neʼebé tau matan didiʼak ba nia povu, maski haʼu seidauk tuir reuniaun dala ida.

Loron ida, haʼu tesi hela duʼut, karreta ida ho ema naʼin-rua iha laran para besik haʼu. Sira ida husu haʼu se haʼu mak Fred. Kuandu sira hatete katak sira Testemuña ba Jeová, haʼu hatete ba sira: “Haʼu saʼe karreta neʼe no ita bá fatin seguru atu koʼalia.” Sira dehan katak tia Mary mak husu sira atu vizita haʼu. Sira ida mak irmaun Shield Toutjian, katuas neʼebé iha knaar atu vizita kongregasaun sira. Nia fó laran-manas mai haʼu no fó matadalan neʼebé haʼu presiza duni iha tempu neʼebá. Tanba haʼu defende Testemuña ba Jeová nia hanorin, família komesa kontra hasoru haʼu makaʼas liu.

Lakleur, haʼu simu surat husi tia Mary. Nia hatete katak se haʼu hakarak duni atu serbí Jeová, haʼu bele bá hela hamutuk ho nia iha  Virginia. Haʼu deside kedas atu bá. Iha sesta kalan, fulan-Outubru 1943, haʼu haloot sasán neʼebé haʼu presiza iha kaixa ida no lori ba tau iha ai-hun ida neʼebé ladook husi uma. Loron tuirmai, haʼu foti kaixa neʼe no sai subasubar. Toʼo tiha sidade Roanoke iha Virginia, haʼu hasoru fali ho tia Mary iha irmán Edna Fowlkes nia uma.

Laʼo ba oin iha lia-loos

Irmán Edna mak ema kose-mina ida neʼebé laran-diʼak, hanesan Lídia iha apóstolu sira-nia tempu. Nia aluga uma boot no fó hela-fatin ba tia Mary, no mós ba ninia kuñada ho oan-feto naʼin-rua. Oan-feto sira-neʼe, naran Gladys no Grace Gregory, ikusmai sai misionáriu. Irmán Gladys, neʼebé agora tinan 90 liu, nia serbisu nafatin iha sukursál iha Japaun toʼo ohin loron.

Iha irmán Edna nia uma, haʼu livre atu estuda Maromak nia Liafuan, tuir reuniaun beibeik, no simu treinu iha serbisu haklaken. Ida-neʼe ajuda haʼu atu laʼo ba oin iha lia-loos. Ikusmai, iha loron 14 Juñu 1944, haʼu hetan batizmu. Tia Mary, Gladys no Grace Gregory komesa halo serbisu pioneiru, no lakleur sira hetan knaar atu serbí iha parte norte iha Virginia. Iha neʼebá, sira ajuda atu harii kongregasaun foun iha Leesburg. Iha tinan 1946, haʼu mós komesa halo serbisu pioneiru iha área neʼebé besik sira. No iha tinan neʼe, haʼu hamutuk ho sira bá tuir reuniaun boot internasionál iha Cleveland, Ohio, neʼebé halaʼo iha 4-11 Agostu.

Iha reuniaun boot neʼe, irmaun Nathan Knorr, neʼebé tau matan ba ita-nia organizasaun iha tempu neʼebá, esplika kona-ba planu atu haboot Betel. Planu sira-neʼe inklui atu harii uma foun nuʼudar hela-fatin no atu haluan fatin neʼebé halo livru sira. Nia hatete katak sira presiza irmaun joven barak atu serbisu iha neʼebá. Iha haʼu-nia laran, haʼu hakarak tebes atu serbí Jeová iha neʼebá. Tan neʼe, haʼu hatama aplikasaun, no fulan balu liu tiha, iha 1 Dezembru 1946, haʼu tama Betel.

Maizumenus tinan ida liu tiha, kuandu haʼu serbisu iha departamentu neʼebé lori karta, irmaun Max Larson, neʼebé tau matan ba departamentu balu iha Betel, mai koʼalia ho haʼu. Nia hatete katak haʼu sei muda ba Departamentu Serbisu nian. Iha departamentu neʼe, haʼu aprende oinsá atu hatene didiʼak no halo tuir Bíblia nia matadalan, no mós kona-ba oinsá Maromak nia organizasaun halaʼo, liuliu hodi serbisu hamutuk ho irmaun T. J. (Bud) Sullivan neʼebé tau matan ba departamentu neʼe.

Haʼu-nia aman sempre mai vizita haʼu iha Betel. Maibé ikusmai, nia sai metin ba ninia relijiaun kuandu nia sai katuas ona. Tan neʼe, dala ikus neʼebé nia vizita haʼu iha Betel iha tinan 1965, nia dehan: “Haʼu sei la mai tan vizita  ó. Ó mak mai haʼu-nia uma.” Nuneʼe, haʼu bá vizita nia dala balu, lakleur nia mate. Haʼu-nia aman fiar metin katak nia sei bá lalehan, maibé haʼu hein katak Jeová sei hanoin nia no fó moris-hiʼas ba nia atu moris ba nafatin iha mundu foun.

Buat seluk neʼebé espesiál

Buat importante ida neʼebé ajuda haʼu atu laʼo ba oin iha lia-loos mak reuniaun boot sira. Porezemplu, reuniaun boot internasionál ida neʼebé halaʼo iha tinan 1958, iha Yankee Stadium no Polo Grounds iha Novaiorke, ema naʼin-253.922 husi rai 123 halibur hamutuk. Haʼu sei nunka haluha buat ida neʼebé akontese iha reuniaun boot neʼe. Irmaun Knorr hakbesik haʼu ho ansi hodi hehan: “Fred, haʼu haluha atu organiza irmaun neʼebé sei hatoʼo diskursu ba pioneiru sira! Sira halibur ona iha salaun ida ladook husi neʼe. Favór ida, ó bá lalais no hatoʼo diskursu kona-ba buat naran deʼit neʼebé ó sente diʼak ba sira.” Iha laran, haʼu halo orasaun makaʼas nuʼudar haʼu laʼo ba neʼebá.

Nuʼudar Testemuña sira iha sidade Novaiorke aumenta ba beibeik durante tinan 1950 toʼo 1970, Reuniaun-Fatin neʼebé sira aluga latoʼo ona. Tan neʼe durante tinan 1970 toʼo 1990, kongregasaun sira sosa uma boot tolu iha Manhattan no hadiʼa uma sira-neʼe atu uza nuʼudar reuniaun-fatin. Haʼu hetan knaar nuʼudar koordenadór ba grupu neʼebé atu harii reuniaun-fatin sira. Haʼu hanoin fali buat diʼak barak kona-ba oinsá mak Jeová fó bensaun ba kongregasaun sira neʼebé halibur osan no serbisu hamutuk atu harii reuniaun-fatin.

Mudansa iha haʼu-nia moris

Loron ida iha tinan 1957, kuandu haʼu laʼo atu bá serbisu, udan komesa tau. Haʼu haree irmán klosan bonita ida laʼo iha haʼu-nia oin. Nia foin komesa serbisu iha Betel. Tanba nia la iha sombriña, haʼu laʼo hamutuk ho nia. Iha dalan neʼe mak haʼu ho Marjorie hasoru malu. Iha tinan 1960 ami kaben, no husi tempu neʼebá ami moris hamutuk iha tempu diʼak no iha tempu susar nia laran. Iha fulan-Setembru 2010, ami halo aniversáriu kaben nian ba tinan 50.

Kuandu ami foin fila husi viajen kaben nian, irmaun Knorr fó knaar espesiál mai haʼu. Neʼe mak atu sai mestre ba Eskola Gilead. Maski kursu iha eskola neʼe baibain ba fulan lima deʼit, maibé husi tinan 1961 toʼo 1965, ami halaʼo kursu neʼebé naruk liu hodi fó treinu liuliu ba irmaun sira neʼebé tau matan ba departamentu oioin iha Betel. Iha tinan 1965, kursu neʼe sai badak fali, hodi fó treinu liuliu ba irmaun-irmán sira neʼebé atu serbí nuʼudar misionáriu.

Iha tinan 1972, irmaun sira muda haʼu atu  tau matan ba departamentu neʼebé hatán ba karta sira neʼebé Betel simu. Hodi buka informasaun barak atu fó resposta ba pergunta oioin, ida-neʼe ajuda haʼu atu komprende diʼak liután hanorin husi Maromak nia Liafuan no atu ajuda ema seluk atu halo tuir ninia matadalan sira.

Iha tinan 1987, haʼu simu knaar atu serbisu iha departamentu neʼebé Betel foin loke. Neʼe mak departamentu neʼebé fó informasaun kona-ba ospitál. Ami organiza enkontru sira ho irmaun katuas sira neʼebé serbisu iha Grupu neʼebé Komunika ho Ospitál sira, hodi hanorin sira oinsá atu esplika ita-nia fiar husi Bíblia kona-ba raan ba juis no doutór sira. Iha tempu neʼebá, problema boot ida mak doutór sira fó transfuzaun raan arbiru deʼit ba Testemuña sira-nia oan, no dala barak atu halo ida-neʼe sira lori kazu ba tribunál.

Baibain kuandu ami koʼalia ho doutór sira kona-ba tratamentu seluk neʼebé la uza raan, sira hatete katak tratamentu sira-neʼe la iha, ka karun liu. Dala barak kuandu doutór ida koʼalia hanesan neʼe, haʼu hatete: “Favór ida, lolo Ita-boot nia liman.” Depois haʼu hatete: “Ho Ita-nia liman neʼe, Ita bele halo tratamentu neʼebé diʼak liu fali duké uza raan.” Hodi gaba nia hanesan neʼe, haʼu fó-hanoin nia katak nia iha matenek atu halo operasaun ho kuidadu hodi bele hamenus raan neʼebé suli sai durante operasaun.

Durante tinan 20 nia laran, Jeová fó bensaun barak ba ami-nia hakaʼas-an atu koʼalia ho doutór no juis sira. Sira barak troka sira-nia hanoin no komprende diʼak liután ita-nia fiar kona-ba raan. No mós liuhusi riset neʼebé doutór sira halo, sira komprende katak iha tratamentu seluk neʼebé la uza raan, neʼebé lori rezultadu diʼak. Agora, doutór no ospitál barak fó tratamentu ba Testemuña sira hodi la uza raan.

Iha tinan 1996, haʼu ho Marjorie muda ba “Watchtower Educational Center” iha Patterson, iha Novaiorke, maizumenus dook kilómetru 110 husi Brooklyn. Ba tinan balu, haʼu serbisu iha Departamentu Serbisu nian no haʼu mós hola parte iha serbisu atu hanorin irmaun sira neʼebé iha knaar atu tau matan ba sukursál sira no ba sira neʼebé iha knaar atu vizita kongregasaun sira. Depois, husi tinan 12 liubá toʼo agora, haʼu serbisu fali atu tau matan ba departamentu neʼebé hatán ba karta sira neʼebé Betel simu.

Susar tanba idade

Haʼu tinan 85 ona, no haʼu sente susar ba haʼu atu halaʼo haʼu-nia knaar iha Betel. Haʼu mós luta hasoru moras kankru ba tinan sanulu ona, maibé haʼu sente hanesan Ezequias neʼebé Jeová hanaruk ninia moris. (Isa 38:5) Haʼu-nia feen Marjorie mós hetan moras ida neʼebé halo nia hanoin komesa lakon, no ami tahan moras neʼe hamutuk. Marjorie serbí Jeová kleur ona, nia ajuda joven sira, no nia mós laran-metin ba haʼu, ajuda haʼu, no mós sai belun neʼebé diʼak mai haʼu. Uluk, nia ema neʼebé badinas estuda Bíblia no hanorin ho diʼak, no ami iha oan espirituál barak neʼebé kontinua kontaktu ho ami.

Tia Mary mate iha fulan-Marsu 2010, ho tinan 87, no hakoi iha ninia laʼen nia sorin. Ninia laʼen uluk serbí nuʼudar misionáriu iha rai-Izraél. Tia Mary matenek tebes atu hanorin Maromak nia Liafuan no nia ajuda ema barak atu simu adorasaun neʼebé loos. Durante tinan barak nia halo serbisu haklaken tempu tomak. Haʼu agradese tebes nia ajuda haʼu atu aprende kona-ba lia-loos husi Maromak nia Liafuan no hatudu ezemplu diʼak mai haʼu nuʼudar Maromak Jeová nia atan. Haʼu fiar katak Jeová sei hanoin tia Mary ho nia laʼen no halo sira moris hiʼas iha mundu foun.

Kuandu haʼu hanoin fali ba tinan 67 neʼebé haʼu serbí Jeová, haʼu agradese ba bensaun barak neʼebé haʼu hetan. Haʼu haksolok tebes hodi halo tuir Jeová nia hakarak! Haʼu tau fiar ba ninia laran-diʼak no hein atu hetan buat neʼebé Jesus promete, hodi dehan: “Ema hotu neʼebé husik uma, maun-alin, feton, aman, inan, oan sira ka rai, tan haʼu-nia naran, sei simu dala atus ida liután hodi simu mós nuʼudar liman-rohan moris rohan-laek.”—Mt 19:29.

[Nota–rodapé]

[Dezeñu iha pájina 19]

Iha 1928, kuandu haʼu hela ho haʼu-nia avó-mane

[Dezeñu iha pájina 19]

Tia Mary ho tiu Talmadge

[Dezeñu iha pájina 20]

Tia Mary, Gladys no Grace

[Dezeñu iha pájina 20]

Loron batizmu iha 14 Juñu 1944

[Dezeñu iha pájina 20]

Iha Departamentu Serbisu nian iha Betel

[Dezeñu iha pájina 21]

Haʼu ho tia Mary iha reuniaun boot internasionál iha 1958

[Dezeñu iha pájina 21]

Ami-nia loron-kaben

[Dezeñu iha pájina 21]

Ho Marjorie iha 2008