Tansá presiza atu “matan-moris” nafatin?

JESUS nia dixípulu sira husu: “Sinál ida-neʼebé mak sei hatudu Ita-nia hiʼit an mai, no mundu neʼe atu hotu?” (Mt 24:3) Hodi hatán ba pergunta neʼe, Jesus fó-hatene akontesimentu sira neʼebé hatudu ho klaru katak mundu neʼe atu hotu, hanesan hakerek iha Mateus kapítulu 24, Marcos kapítulu 13, no Lucas kapítulu 21. Koʼalia tiha kona-ba akontesimentu sira-neʼe, Jesus hatutan tan: “Matan-moris bá.”—Mt 24:42.

Se Jesus fó-hatene ona sinál neʼebé klaru, tanbasá mak nia hatete atu ita “matan-moris”? Mai ita hanoin kona-ba razaun rua. Razaun primeiru mak buat barak neʼebé dada ita-nia atensaun bele halo ita-nia relasaun ho Jeová sai fraku no la matan-moris ba sinál neʼebé hatudu mundu nia rohan besik ona. Razaun segundu mak karik ema kristaun ida haree duni akontesimentu oioin neʼebé sai loos tuir sinál neʼebé Jesus fó-hatene nanis, maibé akontesimentu sira-neʼe la kona nia rasik nia moris. Tan neʼe, nia bele hanoin katak ‘terus boot’ sei kleur atu akontese, no katak seidauk toʼo tempu atu “matan-moris”.—Mt 24:21.

“Sira la hatene buat ida”

Jesus fó-hanoin ninia dixípulu sira kona-ba ema neʼebé moris iha Noé nia tempu. Ita fiar katak sira haree duni Noé haklaken, haree nia halo arka ka ró neʼebé hanesan kaixote boot, no haree mós violénsia neʼebé akontese beibeik iha tempu neʼebá. Maski nuneʼe, sira barak “la hatene buat ida”, ka lakohi rona ba Noé. (Mt 24:37-39) Ohin loron mós iha ema barak neʼebé hatudu hahalok hanesan neʼe. Porezemplu, ema barak neʼebé lori karreta haree duni ponteiru neʼebé hatudu katak sira halai makaʼas demais, maibé sira lakohi atu hatene. Tan neʼe, governu tenke halo dalan kabubu atu ema labele halai lalais. Hanesan mós ho ema kristaun, maski sira haree akontesimentu sira kona-ba loron ikus sira, maibé karik sira-nia hahalok la tuir avizu neʼebé sira rona. Irmán joven ida iha Áfrika Oeste, naran Arielle mós iha esperiénsia hanesan neʼe.

Uluk, irmán Arielle gosta haree joga bola feto nian iha televizaun. Maibé kuandu ninia eskola halo ekipa joga bola, ida-neʼe halo nia la matan-moris ba perigu sira neʼebé bele halo ninia relasaun ho Maromak sai fraku. Arielle tama ekipa neʼe nuʼudar baliza. Saida mak akontese ba nia? Nia hatete: “Haʼu-nia kolega ekipa balu iha namoradu neʼebé fuma no uza droga. Sira goza haʼu tanba haʼu la hanesan ho sira. Haʼu hanoin katak haʼu bele hamriik metin. Maibé, neineik-neineik haʼu-nia laran-manas atu joga bola halo haʼu-nia fiar sai fraku. Maski haʼu tuir reuniaun kristaun, maibé haʼu hanoin deʼit kona-ba joga bola. Haʼu-nia hahalok nuʼudar ema kristaun mós troka. Foufoun, haʼu gosta joga bola deʼit, maibé neineik-neineik haʼu hakarak tebes atu manán, tan neʼe haʼu komesa treinu makaʼas liu. Ikusmai, haʼu mós lakon kolega diʼak balu.

“Loron ida, kuandu haʼu joga bola, sira neʼebé hasoru ami hetan penalti. Tanba haʼu mak baliza, haʼu prepara an atu tahan bola. Derrepente deʼit, haʼu halo orasaun ba Jeová atu ajuda haʼu  tahan bola! Ida-neʼe halo haʼu hatene katak haʼu-nia fiar sai fraku ona. Maibé oinsá haʼu bele hametin fali haʼu-nia fiar?

“Maski haʼu haree ona DVD Kaum Muda Bertanya—Apa yang Akan Kukejar dalam Hidupku? *, maibé haʼu haree fali DVD neʼe atu hanoin didiʼak kona-ba haʼu-nia moris. Afinál, haʼu-nia hahalok hanesan ho André neʼebé envolve an iha desportu iha drama neʼe. Haʼu mós halo tuir konsellu husi katuas ida neʼebé fó laran-manas ba André. Neʼe mak lee Filipe 3:8 no hanoin didiʼak kona-ba eskritura neʼe. Ida-neʼe lori rezultadu diʼak. Ikusmai, haʼu husik ekipa joga bola.

“Ida-neʼe ajuda duni haʼu! Haʼu-nia hakarak atu manán la iha ona. Haʼu sente kontente liu, no besik liu ba maluk kristaun sira. Serbisu ba Maromak sai importante liu iha haʼu-nia moris. Haʼu komesa rona didiʼak diskursu sira iha reuniaun. Haʼu mós hadiʼa dalan neʼebé haʼu halo serbisu haklaken. Agora haʼu serbí beibeik nuʼudar pioneiru estra.”

Se ita husik buat ruma atu dada ita-nia atensaun no ida-neʼe halo ita la hanoin kona-ba sinál sira neʼebé Jesus fó ona mai ita, ita presiza halo buat ruma hanesan Arielle. Karik ita bele halo buat tuirmai neʼe. Buka informasaun husi livru Indeks Publikasi Menara Pengawal, neʼe hanesan mapa atu hetan rikusoin neʼebé subar hela. Ita bele hetan informasaun barak kona-ba konsellu diʼak no esperiénsia husi irmaun-irmán sira kona-ba oinsá mak sira tahan hasoru tentasaun oioin. Hakaʼas an atu simu bensaun husi reuniaun hodi prepara didiʼak no hakerek nota iha reuniaun. Balu sente katak tuur iha oin ajuda sira atu rona didiʼak. Kuandu ita iha oportunidade atu fó komentáriu, keta husik toʼo parte ikus atu fó komentáriu. Liután neʼe, kuandu ita rona notísia ruma husi rádiu ka televizaun, kompara ida-neʼe ho sinál neʼebé hatudu katak ita moris iha “loron ikus sira” atu nuneʼe ita bele matan-moris nafatin.—2 Tim 3:1-5; 2 Ped 3:3, 4; Apok 6:1-8.

“Matan-moris bá”

Akontesimentu sira neʼebé hatudu katak mundu nia rohan besik ona, neʼe sei mosu iha “mundu tomak”. (Mt 24:7, 14) No ema rihun ba rihun iha fatin oioin hetan susar tebes tanba moras-peste, rai hamlaha, rai nakdoko, no mós buat seluk neʼebé Jesus fó-hatene nanis ona. Maski nuneʼe, iha mós ema barak neʼebé moris iha dame no hakmatek. Se Ita rasik seidauk kona susar husi akontesimentu sira-neʼe, Ita bele hanoin katak terus boot sei kleur atu akontese ka lae? Lae.

Porezemplu, hanoin toʼok kona-ba buat neʼebé Jesus fó-hatene nanis kona-ba ‘hamlaha no moras-peste’. (Lc 21:11) Primeiru, Jesus la hatete katak akontesimentu sira-neʼe sei mosu iha fatin hotu-hotu, ka sei mosu dala ida deʼit. Maibé nia hatete katak buat sira-neʼe sei mosu “iha fatin oioin”. Tan neʼe, ita labele hein atu akontesimentu neʼebé hanesan sei mosu dala ida deʼit iha fatin hotu. Segundu, foin depois Jesus koʼalia kona-ba rai hamlaha, nia mós hatete katak ema kristaun sira presiza kuidadu atu labele han barak demais, hodi dehan: “Matan-moris ba imi-nia an atu imi-nia laran labele sai todan hodi han demais.” (Lc 21:34, MF) Tan neʼe, ema kristaun hotu labele hein katak akontesimentu hotu sei kona sira rasik nia moris. Jesus hatete: “Wainhira imi haree buat hirak-neʼe mosu, imi sei hatene  katak Maromak nia reinu besik ona.” (Lc 21:31) Maski ita-nia área karik ladún hetan susar oioin hanesan Jesus hatete nanis, maibé ita bele haree akontesimentu sira-neʼe hotu liuhusi televizaun no internét.

Hanoin-hetan mós katak Jeová deside ona “loron no oras” neʼebé terus boot sei komesa. (Mt 24:36) Buat neʼebé akontese iha mundu neʼe sei la troka loron neʼe.

Jesus fó konsellu ba ema kristaun sira iha fatin hotu, hodi dehan: “Imi mós matan-moris bá.” (Mt 24:44) Ita presiza matan-moris nafatin no prontu atu hasoru terus boot. Klaru katak ita la bele uza ita-nia tempu hotu atu halo atividade kristaun nian deʼit. Ita mós la hatene kuandu terus boot foin hahú, ita halo hela saida. Porezemplu, karik ita balu sei serbisu hela iha liʼur ka iha uma laran. (Mt 24:40, 41) Se nuneʼe, saida mak ita bele halo atu hatudu katak ita matan-moris nafatin?

Irmaun Emmanuel ho nia feen Victorine no sira-nia oan-feto naʼin-neen hela iha Áfrika. Sira sente katak akontesimentu sira neʼebé Jesus fó sai ona ladún kona sira rasik nia moris iha sira-nia área. Tan neʼe, sira deside atu koʼalia kona-ba Bíblia loron-loron atu ajuda sira matan-moris nafatin. Emmanuel hatete: “Foufoun, susar ba ami atu buka tempu neʼebé diʼak ba ami hotu. Ikusmai, ami deside atu uza tempu dadeer-saan, husi tuku neen toʼo tuku neen ho balun. Ami koʼalia kona-ba eskritura loron-loron nian, depois ami prepara hamutuk parágrafu balu husi livru sira neʼebé atu estuda iha reuniaun iha semana neʼe.” Ida-neʼe ajuda sira atu matan-moris nafatin ka lae? Sin, ida-neʼe ajuda duni! Irmaun Emmanuel serbí nuʼudar koordenadór ba grupu katuas nian iha kongregasaun. Irmán Victorine serbí nuʼudar pioneiru estra ba fulan barak iha tinan ida nia laran no nia ajuda ema barak atu simu lia-loos, no sira-nia oan hotu laʼo ba oin iha lia-loos.

Jesus hatete: “Loke matan bá! Matan-moris bá.” (Mc 13:33) Tan neʼe, ita labele husik buat ida dada ita-nia atensaun hodi halo ita la matan-moris. Duké halo nuneʼe, mai ita halo tuir konsellu sira neʼebé ita simu liuhusi ita-nia livru sira no reuniaun sira hanesan irmán Arielle. Hanesan irmaun Emmanuel nia família, mai ita hakaʼas an atu halo buat ruma loron-loron atu “matan-moris” nafatin.

[Nota–rodapé]

[Dezeñu iha pájina 4]

Koʼalia kona-ba Bíblia loron-loron ajuda Emmanuel no ninia família atu matan-moris nafatin