Tau fiar ba Jeová, “Maromak ksolok hotu nian”
Tau fiar ba Jeová, “Maromak ksolok hotu nian”
“Rahun-diʼak ba Maromak no ita Naʼi Jesus Kristu nia Aman, Aman laran-diʼak nian no Maromak ksolok hotu nian.”—2 KOR 1:3.
1. Saida mak ita hotu presiza?
HUSI tempu neʼebé ita foin moris, ita hotu presiza ema atu fó kmaan no ksolok mai ita. Kuandu bebé ida tanis, neʼe katak nia presiza ajuda husi ema seluk atu hetan fali kmaan no ksolok, karik tanba nia hamlaha ka hakarak atu koʼus. Ita neʼebé boot ona mós presiza ema atu fó ksolok mai ita, liuliu kuandu ita hasoru situasaun neʼebé susar.
2. Maromak Jeová promete saida ba ema neʼebé tau fiar ba nia?
2 Dala barak, ita-nia família no kolega sira bele fó ksolok ba ita. Maibé, dala ruma ita hasoru situasaun susar neʼebé ema ida la bele fó ksolok mai ita. Só Maromak deʼit mak bele fó ksolok mai ita iha situasaun susar naran deʼit. Ninia Liafuan promete: “Jeová besik ba ema neʼebé bolu nia, . . . nia sei rona ba sira-nia halerik atu husu ajuda.” (Sal 145:18, 19) Sin, “Jeová nia matan haree ba ema loos sira, no nia see tilun hodi rona ba sira-nia halerik atu husu ajuda”. (Sal 34:15) Maibé, atu ita bele simu Maromak nia ajuda no ksolok, ita tenke tau fiar ba nia. David hatete: “Jeová sei sai fatin aas neʼebé seguru ba sé deʼit neʼebé ema hanehan, fatin aas neʼebé seguru iha tempu susar. No sira neʼebé hatene Ita-nia naran sei tau fiar ba Ita, tanba Ita sei la husik hela ema neʼebé buka Ita, oh, Jeová.”—Sal 9:9, 10.
3. Jesus hatete saida atu hatudu katak Jeová hadomi tebes ita?
3 Maromak Jeová hafolin tebes ema neʼebé adora nia. Jesus hatudu ida-neʼe hodi dehan: “Ema la faʼan manu-liin lima ho osan rua? Maibé Maromak la haluha sira-neʼe ida. Fuuk-lahan husi imi-nia ulun sura tiha hotu; neʼe duni, keta taʼuk, basá imi folin liu manu-liin barak.” (Lc 12:6, 7) Liuhusi profeta Jeremias, Jeová mós hatete ba Ninia povu: “Haʼu hadomi ó ho domin ba tempu neʼebé la bele sura. Tan neʼe mak haʼu dada ó ho laran-diʼak neʼebé nakonu ho domin.”—Jer 31:3.
4. Tanbasá mak ita bele tau fiar ba Jeová nia promete?
4 Kuandu ita tau fiar ba Jeová no mós ba buat neʼebé nia promete, ita bele haksolok maski iha tempu susar nia laran. Nuneʼe, ita presiza tau fiar ba Maromak hanesan Josué, neʼebé hatete: “Husi liafuan diʼak hotu neʼebé Jeová, imi-nia Maromak, hatete ba imi, la iha ida mak la sai loos. Sira hotu sai loos ba imi. La iha liafuan ida neʼebé la sai loos.” (Jos 23:14) Liután neʼe, ita bele fiar katak maski ita hasoru daudaun situasaun ruma neʼebé hanehan ita, Maromak Jeová sei nunka husik ninia atan sira neʼebé laran-metin ba nia.—Lee 1 Korinto 10:13.
5. Oinsá mak ita bele fó ksolok ba ema seluk?
5 Apóstolu Paulo bolu Jeová nuʼudar “Maromak ksolok hotu nian”. Liafuan gregu neʼebé tradús nuʼudar “fó ksolok” iha arti katak fó kmaan, konsola, ka fó aten-brani ba ema neʼebé iha susar laran ka triste. Maromak Jeová halo ida-neʼe duni. (Lee 2 Korinto 1:3, 4.) La iha buat ida neʼebé bele hanetik ita-nia Aman iha lalehan atu halo buat naran deʼit hodi fó ksolok ba sira neʼebé hadomi nia. Tanba “ksolok neʼebé ita rasik simu husi Maromak”, ita mós bele fó ksolok fali ba maluk sira neʼebé “iha susar laran”. Sin, Jeová hatene duni oinsá atu fó ksolok ba ema neʼebé iha susar no terus laran!
Susar oioin neʼebé ita hasoru
6. Buat saida deʼit mak bele halo susar ba ita?
6 Ita hasoru susar oioin neʼebé halo ita presiza simu kmaan no ksolok. Porezemplu, kuandu ita-nia kaben ka oan mate, ida-neʼe halo ita triste tebes. Ema balu hetan susar boot tanba ema seluk odi sira tan deʼit sira-nia kór ka rasa. Ema balu tan hetan moras, sai kiak, ka ferik-katuas, no ida-neʼe halo susar ba sira. Iha mós ema neʼebé hetan problema kona-ba moris kaben nian, ka sente triste tebes hodi haree buat aat neʼebé akontese daudauk iha mundu neʼe.
7. (a) Iha tempu susar nia laran, ita presiza saida? (b) Jeová sei halo saida kuandu ita-nia laran “tohar no rahun”?
7 Iha tempu susar nia laran, karik ita presiza ajuda atu hetan ksolok no kmaan iha ita-nia laran no neon, no mós ita presiza ajuda atu kontrola ita-nia sentimentu. Karik ita mós presiza ajuda atu la husik ita-nia susar kona ita-nia saúde no ita-nia fiar. Porezemplu, hanoin toʼok kona-ba ita-nia laran. Maromak nia Liafuan hatete katak ita-nia fuan ka laran bele “tohar no rahun”. (Sal 51:17) Jeová hatene duni oinsá atu fó ksolok ba ema neʼebé hasoru susar hanesan neʼe tanba “nia kura ema neʼebé laran-kanek, no nia falun sira-nia kanek sira”. (Sal 147:3) Maski ita hasoru situasaun susar tebes, maibé Maromak bele fó kmaan ba ita-nia laran se ita halo orasaun, tau fiar ba nia, no halo tuir ninia ukun-fuan sira.—Lee 1 Joao 3:19-22; 5:14, 15.
8. Kuandu ita hasoru susar ruma neʼebé halo ita hanoin barak, oinsá mak Jeová ajuda ita?
8 Dala ruma, ita hasoru susar oioin neʼebé halo ita hanoin barak no estrese, tan neʼe ita presiza sente kmaan iha ita-nia neon. Karik ho ita-nia forsa ka matenek rasik, ita la bele tahan susar sira-neʼe. Maibé, ema neʼebé hakerek salmu ida hatete ba Jeová: “Bainhira hanoin neʼebé halo haʼu la hakmatek sai barak iha haʼu-nia fuan, Ita-nia konsola komesa hamaus haʼu.” (Sal 94:19) Paulo mós hatete: “Imi keta laran-taridu kona-ba buat ruma. Iha buat hotu, harohan no hamulak bá hodi fó-agradese; hatoʼo imi-nia harohan ba Maromak. Nuneʼe, Maromak dame nian sei rai hela imi-nia fuan no laran iha Kristu Jesus.” (Flp 4:6, 7) Hodi lee no hanoin didiʼak Eskritura sira, ida-neʼe sei ajuda ita atu tahan hasoru situasaun ruma neʼebé halo ita neon-susar.—2 Tim 3:15-17.
9. Oinsá mak ita bele kontrola ita-nia sentimentu?
9 Ita mós bele hasoru situasaun balu neʼebé halo ita laran-tun, no ida-neʼe halo susar ba ita atu kontrola ita-nia sentimentu. Karik ita sente katak ita la bele kumpre ita-nia responsabilidade nuʼudar ema kristaun, ka ita la bele halaʼo knaar ruma iha kongregasaun. Maibé iha situasaun neʼe mós Jeová bele fó ksolok mai ita no ajuda ita. Porezemplu, kuandu Josué simu knaar nuʼudar ulun atu lori ema Israel funu hasoru inimigu sira, Moisés hatete ba povu Israel: “Sai aten-brani no forsa bá. Keta taʼuk ka nakdedar iha sira-nia oin, tanba Jeová ó-nia Maromak mak laʼo ho ó. Nia sei la husik ó no mós soe hela ó.” (Deut 31:6) Ho Jeová nia ajuda, Josué bele lori Maromak nia povu ba rai neʼebé Maromak promete ona, no bele manán hasoru inimigu sira hotu. Moisés mós hetan ajuda hanesan neʼe husi Jeová kuandu nia lori povu Israel sai husi rai-Egiptu hodi hakur Tasi Mean.—Êx 14:13, 14, 29-31.
10. Se ita hasoru susar ruma neʼebé kona ita-nia saúde, saida mak bele ajuda ita?
10 Susar neʼebé ita hasoru bele mós kona ita-nia saúde. Klaru katak han diʼak, deskansa, halo desportu ruma, no halo ita-nia isin moos, ajuda ita atu iha saúde diʼak. Maibé, hodi hanoin kona-ba buat neʼebé Bíblia hatete kona-ba futuru, ida-neʼe mós ajuda ita atu iha saúde diʼak. Nuneʼe, kuandu ita hasoru susar ka problema ruma, diʼak atu hanoin-hetan susar oioin neʼebé Paulo hasoru no mós ninia liafuan neʼebé fó laran-manas mai ita, hodi dehan: “Ami terus oioin, maibé ami bele book an; ami hanoin la toʼo, maibé la lakon aten-barani; ema fó-terus ami, maibé Naʼi la husik ami; ema baku ami toʼo monu ba rai, ami la rahun-aat.”—2 Kor 4:8, 9.
11. Se ita sente katak ita-nia fiar sai fraku, ita bele halo saida?
11 Dala ruma, susar balu bele kona ita-nia fiar. Iha situasaun sira-neʼe mós Jeová bele nafatin ajuda ita. Maromak nia Liafuan promete: “Jeová fó apoiu ba sira hotu neʼebé monu, no nia sei foti saʼe sira hotu neʼebé laran-kraik.” (Sal 145:14) Se ita sente katak ita-nia fiar komesa sai fraku, ita presiza husu katuas kristaun sira-nia ajuda. (Tgo 5:14, 15) Liután neʼe, hodi hanoin beibeik kona-ba ita-nia esperansa atu moris ba nafatin, ida-neʼe sei hametin ita-nia fiar iha susar laran.—Joao 17:3.
Maromak fó ksolok ba ninia atan sira
12. Oinsá mak Jeová fó kmaan ba Abraão?
12 Ema neʼebé hakerek salmu ida hatete ba Jeová: “Hanoin-hetan Ita-nia liafuan ba Ita atan, tan neʼe mak Ita halo haʼu hein. Neʼe mak haʼu-nia konsola iha haʼu-nia terus, tanba Ita-nia liafuan tau matan haʼu atu moris nafatin.” (Sal 119:49, 50) Ohin loron, ita iha Maromak Jeová nia Liafuan, Bíblia, neʼebé iha ezemplu barak kona-ba oinsá Maromak fó ksolok ba ninia atan sira. Porezemplu, kuandu Abraão sente laran-susar tebes hodi rona katak Jeová atu halakon sidade Sodoma no Gomorra, nia husu ba Maromak: “Ita sei halakon duni ema loos sira hamutuk ho ema aat?” Jeová fó kmaan ba Abraão hodi promete katak Nia sei la halakon sidade Sodoma se iha ema naʼin-50 neʼebé laran loos. Maibé ba dala lima Abraão husu Jeová: ‘Oinsá se iha ema naʼin-45 neʼebé laran loos? Oinsá se iha 40? 30? 20? 10?’ Dala ida-idak, Jeová hatudu pasiénsia no laran-diʼak ba Abraão hodi promete katak Nia sei la halakon Sodoma. No maski ema neʼebé laran loos la toʼo naʼin-10 iha neʼebá, maibé Jeová salva Lot ho ninia oan-feto sira.—Gên 18:22-32; 19:15, 16, 26.
13. Oinsá mak Ana hatudu katak nia tau fiar ba Jeová?
13 Elcana nia feen Ana hakarak tebes atu iha oan, maibé tanba nia la bele iha oan, nia triste tebes. Tan neʼe, nia halo orasaun ba Jeová kona-ba neʼe, no Amlulik Boot Eli hatete ba nia: “Haʼu hein katak Maromak Israel nian fó ba ó buat neʼebé ó husu ona ba nia.” Liafuan neʼe halo Ana sente kmaan no nia “la hatudu tan oin triste”. (1 Sam 1:8, 17, 18) Ana entrega ninia problema ba Jeová nia liman hodi fiar katak Jeová sei ajuda nia. Ida-neʼe halo Ana sente kmaan maski nia la hatene rezultadu sei sai oinsá. Ikusmai, Jeová hatán duni ninia orasaun. Ana sai isin-rua, depois nia tuur ahi oan-mane ida no hanaran nia Samuel.—1 Sam 1:20.
14. Tansá mak David presiza hetan kmaan? Ba sé mak David husu atu hetan kmaan?
14 Ezemplu ida tan kona-ba ema neʼebé hetan kmaan husi Maromak mak Liurai David. Tanba Jeová “haree ema nia laran”, kuandu nia hili David atu sai liurai ba nasaun Israel, Jeová hatene katak David laran-metin ba adorasaun loos no hakarak halo buat neʼebé loos. (1 Sam 16:7; 2 Sam 5:10) Maibé tinan barak liu tiha, David halo sala-foʼer ho Batseba no koko atu subar sala neʼe. Ikusmai, kuandu David haree katak nia halo sala boot, nia halo orasaun ba Jeová hodi dehan: “Hamoos haʼu-nia sala bá, tuir Ita-nia laran-sadiʼa neʼebé boot. Fase haʼu-nia sala didiʼak husi haʼu, no hamoos haʼu husi haʼu-nia sala. Tanba haʼu rasik hatene haʼu-nia sala, no haʼu-nia sala sempre iha haʼu-nia oin.” (Sal 51:1-3) David hakribi duni ninia sala, no Jeová fó perdua ba nia. Maski nuneʼe, David tenke simu rezultadu aat husi buat neʼebé nia halo. (2 Sam 12:9-12) Maibé tanba Jeová hatudu laran-sadiʼa, ida-neʼe halo David sente kmaan.
15. Antes Jesus atu mate, oinsá mak Jeová ajuda nia?
15 Kuandu Jesus iha rai, Maromak husik nia atu hasoru susar oioin neʼebé koko ninia fiar. Maibé Jesus laran-metin nafatin. Nia sempre tau fiar ba Jeová no apoia Jeová nia direitu atu ukun. Iha kalan antes ema atu saran Jesus no oho nia, nia hatete ba Jeová: “Halo tuir la’ós haʼu-nia hakarak, maibé Ita-nian bá.” Depois, Maromak nia anju ida mosu ba Jesus hodi haksolok netik nia. (Lc 22:42, 43) Sin, Maromak fó kmaan no forsa ba Jesus iha tempu neʼebé nia iha susar laran.
16. Oinsá mak Jeová ajuda ita kuandu ita hasoru situasaun neʼebé bele halo ita mate tanba ita-nia fiar?
16 Maski ita hasoru situasaun ruma neʼebé bele halo ita mate tanba ita-nia fiar, maibé Jeová bele no sei ajuda ita atu laran-metin nafatin ba nia. Liután neʼe, esperansa kona-ba moris-hiʼas halo ita sente kmaan. Ita hein duni tempu neʼebé Maromak sei halakon mate nuʼudar ita-nia funu-balun ikus! (1 Kor 15:26) Maromak sei la haluha ninia atan sira no ema seluk neʼebé mate ona, no nia sei halo sira moris hiʼas fali iha futuru. (Joao 5:28, 29; Apos 24:15) Hodi tau fiar ba buat neʼebé Jeová promete kona-ba moris-hiʼas, ida-neʼe halo ita sente kmaan no ajuda ita atu haksolok nafatin ho esperansa maski ema fó-terus ba ita tanba ita-nia fiar.
17. Oinsá mak Jeová fó ksolok mai ita kuandu ita-nia família ka kolega mate?
17 Hodi hatene katak ita-nia família no kolega sira neʼebé mate ona sei moris hiʼas fali iha mundu foun, ida-neʼe fó ksolok tebes ba ita! Iha mundu foun sei la iha tan buat ida neʼebé halo ita susar. “Ema-lubun boot” nuʼudar Jeová nia atan sira neʼebé moris liu mundu aat neʼe, sira iha oportunidade espesiál tebes atu simu no hanorin sira neʼebé sei moris hiʼas fali!—Apok 7:9, 10.
Maromak mak fatin seguru
18, 19. Oinsá mak Maromak ajuda ninia atan sira neʼebé hasoru terus tanba sira-nia fiar?
18 Liafuan neʼebé Moisés hakerek iha knananuk ida, fó aten-brani no fó ksolok ba povu Israel. Nia dehan: “Maromak tempu uluk nian mak fatin seguru, no iha okos, nia iha liman neʼebé iha nafatin toʼo tempu neʼebé la bele sura.” (Deut 33:27) Profeta Samuel mós hatete ba ema Israel: “Labele sees an kona-ba tuir Jeová, no imi tenke serbí Jeová ho imi-nia laran tomak. . . . Jeová sei la husik ninia povu tan ninia naran boot.” (1 Sam 12:20-22) Sin, se ita kontinua serbí Jeová ho laran-metin, nia sei nunka husik ita. Nia sei sempre fó ajuda neʼebé ita presiza.
19 Iha loron ikus sira-neʼe, Maromak ajuda duni ninia povu no fó ksolok ba sira. Durante tinan barak ona, ita-nia irmaun-irmán rihun ba rihun iha mundu tomak hasoru terus ka sai dadur tan deʼit sira serbí Jeová. Sira-nia esperiénsia hatudu duni katak Jeová fó ksolok ba ninia atan sira neʼebé iha susar laran. Porezemplu, irmaun ida iha Uniaun Soviétika hetan kastigu atu tama komarka toʼo tinan 23 tanba ninia fiar. Maski nuneʼe, nia konsege nafatin hetan livru kona-ba Bíblia no ida-neʼe fó forsa no fó ksolok ba nia. Irmaun neʼe hatete: “Durante tempu neʼe, haʼu aprende atu tau fiar ba Jeová no haʼu hetan forsa husi nia.”—Lee 1 Pedro 5:6, 7.
20. Tanbasá mak ita bele fiar katak Jeová sei la husik ita?
20 Tan neʼe, kuandu ita hasoru susar ruma, diʼak atu hanoin-hetan Bíblia nia liafuan neʼebé dehan: “Jeová sei la husik ninia povu.” (Sal 94:14) No maski ita rasik presiza hetan kmaan no ksolok, maibé ita mós iha oportunidade atu fó kmaan ba ema seluk. Iha lisaun tuirmai, ita sei aprende oinsá atu fó kmaan no ksolok ba sira neʼebé hasoru susar no terus oioin iha mundu aat neʼe.
Oinsá Ita hatán?
• Buat saida deʼit mak bele halo susar ba ita?
• Oinsá mak Jeová fó kmaan no ksolok ba ninia atan sira?
• Se ita hasoru situasaun ruma neʼebé bele halo ita mate, oinsá mak ita bele hetan kmaan?
[Pergunta estudu nian]
[Kaixa/Dezeñu iha pájina 25]
HETAN KSOLOK MASKI HASORU SUSAR RUMA NEʼEBÉ KONA ITA-NIA . . .
▪ laran Sal 147:3; 1 Joao 3:19-22; 5:14, 15
▪ neon Sal 94:19; Flp 4:6, 7
▪ sentimentu Êx 14:13, 14; Deut 31:6
▪ saúde 2 Kor 4:8, 9
▪ fiar Sal 145:14; Tgo 5:14, 15
