“Haʼu aleijadu, maibé neʼe laʼós ba nafatin!”

Esperiénsia husi Sara van der Monde

Ema barak hatete mai haʼu: “Sara, ó sempre oin-midar. Tansá ó sempre kontente hanesan neʼe?” Haʼu hatete ba sira katak haʼu iha esperansa kapás ba futuru. Haʼu-nia esperansa neʼe mak: “Maski agora haʼu aleijadu, maibé neʼe laʼós ba nafatin!”

HAʼU moris iha tinan 1974, iha rai-Fransa iha París. Haʼu-nia inan hetan susar bainhira nia partus haʼu, no liutiha tempu balu, doutór dehan katak haʼu iha moras ida iha kakutak neʼebé halo haʼu-nia liman ain book an ladiʼak no koʼalia la moos. Liután neʼe, moras bibi-maten mós kona haʼu, no fasil ba haʼu atu hetan moras no infesaun oioin.

Kuandu haʼu tinan rua, haʼu-nia família muda ba rai-Austrália, iha sidade Melburne. Liutiha tinan rua, haʼu-nia aman husik tiha haʼu no haʼu-nia inan. Haʼu hanoin-hetan katak iha tempu neʼebá haʼu sente besik ba Maromak. Tanba haʼu-nia inan Testemuña ba Jeová, nia lori haʼu beibeik ba reuniaun kristaun, no haʼu aprende katak Maromak hadomi haʼu no tau matan ba haʼu. Hatene kona-ba neʼe, no domin neʼebé haʼu-nia inan hatudu mai haʼu, ajuda haʼu atu sente seguru maski ami-nia situasaun troka no sai susar.

Haʼu-nia inan mós hanorin haʼu atu halo orasaun ba Aman Jeová. Tuir loloos, haʼu sente fasil liu atu halo orasaun duké koʼalia ho ema tanba haʼu la bele koʼalia moos. Kuandu haʼu halo orasaun, haʼu bele koʼalia iha haʼu-nia laran deʼit no haʼu la presiza hakaʼas an atu koʼalia ho lian. Haʼu kontente katak Jeová komprende buat hotu neʼebé haʼu hatete ba nia.—Sal 65:2.

Tahan hasoru problema oioin

Kuandu haʼu tinan lima, haʼu-nia moras sai todan liu no haʼu presiza uza besi neʼebé tau ba ain atu ajuda haʼu laʼo. Maibé haʼu laʼo nakdoko tanba sama rai la metin. Kuandu haʼu tinan 11, haʼu la bele laʼo tan ona. Lakleur, haʼu la bele book haʼu-nia an atu tun husi toba-fatin, no haʼu presiza uza mákina ida neʼebé bele hiʼit haʼu atu tuur iha kadeira-roda.

Haʼu-nia moras neʼe dala ruma halo haʼu laran-tun. Maibé haʼu hanoin-hetan haʼu-nia família nia liafuan neʼebé dehan: “Keta hanoin barak kona-ba buat neʼebé ó la bele halo. Halo bá buat neʼebé ó bele.” Liafuan neʼe ajuda haʼu atu halo buat oioin, inklui saʼe kuda, saʼe bero, no lori karreta iha fatin seguru! Haʼu mós iha matenek atu pinta dezeñu, suku no halo borda, no mós halo bikan ka vazu husi rai.

Tanba haʼu ema aleijadu, ema balu hanoin katak haʼu la iha matenek atu foti desizaun atu adora Maromak. Kuandu haʼu tinan 18, mestra ida iha eskola fó laran-manas mai haʼu atu halai sai husi uma hodi bele “sai livre” husi haʼu-nia inan nia relijiaun. Nia mós hatete katak nia sei ajuda haʼu atu hetan hela-fatin. Maibé, haʼu  hatete ba nia katak haʼu sei nunka husik haʼu-nia fiar no haʼu mós sei la sai husi uma toʼo tempu neʼebé haʼu bele ona tau matan ba haʼu-nia an rasik.

Lakleur depois neʼe, haʼu hetan batizmu nuʼudar Testemuña ba Jeová. Liutiha tinan rua, haʼu muda atu hela mesak iha uma kiʼik ida. Iha neʼebá, haʼu kontente atu moris mesak maski haʼu presiza nafatin ema seluk nia ajuda.

Tentasaun boot ida

Durante haʼu-nia moris, haʼu hasoru situasaun oioin neʼebé koko haʼu-nia fiar. Porezemplu, loron ida haʼu-nia kolega eskola ida neʼebé mós aleijadu husu haʼu atu kaben ho nia. Foufoun haʼu sente kontente no espesiál tebes. Hanesan ho feto-klosan sira seluk, haʼu mós loron ida hakarak kaben. Maibé haʼu hanoin fali katak haʼu labele kaben ho nia. Maski ami naʼin-rua aleijadu, ida-neʼe la dehan katak ami bele moris kontente nuʼudar kaben-naʼin. Liután neʼe, haʼu-nia fiar la hanesan ho nia, no haʼu-nia atividade no planu ba futuru mós la hanesan. Nuneʼe, oinsá haʼu bele moris hamutuk ho nia? Haʼu laran-metin atu halo tuir Maromak nia mandamentu atu kaben deʼit iha Naʼi. (1 Kor 7:39) Tan neʼe, ho laran-diʼak, haʼu hatete ba mane neʼe katak haʼu la kaben ho nia.

Toʼo ohin loron, haʼu la duvida katak desizaun neʼebé haʼu halo mak loos. Haʼu mós fiar metin katak iha futuru haʼu sei moris kontente iha mundu foun neʼebé Maromak promete. (Sal 145:16; 2 Ped 3:13) Nuʼudar haʼu hein toʼo tempu neʼebá, haʼu sei hakaʼas an atu laran-metin nafatin ba Jeová no kontente ho haʼu-nia situasaun.

Sin, haʼu hein katak lakleur tan haʼu sei husik kadeira-roda no halai bá-mai ho livre. Iha tempu neʼebá haʼu sei hatete: “Uluk haʼu aleijadu, maibé agora haʼu isin-diʼak ona ba nafatin!”