Ita kontente atu fó ho laran-luak ka lae?

IHA apóstolu sira-nia tempu, ema kristaun iha Filipe apoia adorasaun neʼebé loos ho laran-luak. Iha apóstolu Paulo nia karta ba sira, nia hakerek: “Haʼu fó-agradese ba haʼu-nia Maromak wainhira haʼu hanoin imi; no wainhira haʼu reza tanba imi, haʼu reza ho ksolok; haʼu la bele haluha buat hotu neʼebé imi halo no fahe hamutuk ho haʼu wainhira ita serbisu atu haklaken evanjellu; hori loron uluk toʼo ohin.” (Flp 1:3-5) Karik Paulo hanoin-hetan kuandu Lídia no ninia família hetan batizmu no hatudu laran-diʼak hodi husu makaʼas ba Paulo ho ninia maluk sira atu hela iha ninia uma.—Apos 16:14, 15.

Lakleur depois neʼe, kongregasaun foun iha sidade Filipe haruka sasán ba Paulo dala rua kuandu nia bá vizita maluk kristaun sira durante semana balu iha sidade Tesalónika, neʼebé dook maizumenus kilómetru 160 husi sidade Filipe. (Flp 4:15, 16) Tinan balu  liu tiha, maski ema kristaun sira iha Filipe no Masedónia iha susar no “kiak”, maibé kuandu sira rona katak ema fó-terus ba sira-nia maluk kristaun iha Jerusalém, sira prontu atu fó ajuda. Paulo hatete katak sira hatudu laran-luak “liu fali sira-nia kbiit”. Nia mós hatete katak ‘sira husu makaʼas’ atubele ajuda sira-nia maluk kristaun.—2 Kor 8:1-4; Rom 15:26.

Maizumenus tinan sanulu depois ema kristaun iha Filipe simu tiha lia-loos, sira kontinua nafatin atu hatudu laran-luak. Porezemplu, kuandu sira rona katak Paulo sai dadur iha sidade Roma, sira haruka Epafrodito atu lori sasán ba Paulo hodi halo viajen dook maizumenus kilómetru 1.300. Ida-neʼe hatudu ho klaru katak ema kristaun iha Filipe hakarak ajuda Paulo atubele kontinua haklaken no hametin nafatin maluk kristaun sira maski nia iha dadur laran.—Flp 1:12-14; 2:25-30; 4:18.

Ohin loron, ema kristaun loos ho laran-haksolok apoia serbisu haklaken no hanorin ema atu sai Jesus nia dixípulu. (Mt 28:19, 20) Sira halo nuneʼe hodi fó sira-nia tempu, forsa, no mós sira-nia osan. Informasaun tuirmai hatudu dalan balu kona-ba oinsá mak ita bele apoia serbisu neʼebé Maromak fó mai ita.

[Kaixa iha pájina 22, 23]

DALAN BALU ATU FÓ KONTRIBUISAUN

KONTRIBUISAUN BA SERBISU IHA MUNDU TOMAK

Ema barak rai osan uitoan atu bele tau iha kaixa kontribuisaun ho marka “Serbisu iha Mundu Tomak”.

Fulan-fulan, kongregasaun sira haruka osan sira-neʼe ba sukursál husi Testemuña ba Jeová nian neʼebé tau matan ba serbisu iha sira ida-idak nia rai. Ita mós bele haruka osan nuʼudar kontribuisaun ba Associação Watchtower, Caixa Postal 248, Dili, Timor-Leste, ka ba sukursál husi Testemuña ba Jeová nian neʼebé tau matan ba Ita-nia rai. (Buat seluk neʼebé temi iha kraik neʼebé Ita bele fó nuʼudar kontribuisaun mós bele haruka ba sukursál husi Testemuña ba Jeová nian neʼebé tau matan ba Ita-nia rai.) Xeke ruma neʼebé Ita haruka ba diresaun iha leten tenke hakerek ho klaru katak selu ba “Watchtower”. Ita mós bele fó kadeli, korrente, ka buat seluk tan neʼebé iha folin nuʼudar kontribuisaun. Bainhira haruka sasán sira-neʼe, Ita presiza haruka mós karta ida atu esplika katak sasán sira-neʼe mak prezente neʼebé Ita fó ho Ita-nia hakarak rasik.

ARRANJU KONA-BA HUSIK ORGANIZASAUN UZA ITA-NIA OSAN

Ita bele halo arranju ho Associação Watchtower hodi sira bele uza Ita-nia osan ba serbisu iha mundu tomak. Maibé, kuandu Ita husu fali osan neʼe, Associação Watchtower sei fó fali ba Ita. Atu hetan informasaun liután, bele hakerek karta ba diresaun iha leten ka bele telefone ba númeru (670) 331-3047.

PLANU KONA-BA FÓ KONTRIBUISAUN

Maski Ita bele fó osan nuʼudar kontribuisaun, maibé iha mós dalan seluk tan atu Ita bele fó kontribuisaun ba serbisu iha mundu tomak. Dalan sira-neʼe mak:

Konta banku nian: Kona-ba konta banku nian, ka konta banku nian ba pensaun, Ita bele entrega kbiit ba Associação Watchtower atu uza, ka bele hakerek ho klaru katak Ita sei fó buat sira-neʼe ba Associação Watchtower bainhira Ita mate, hodi tuir kritériu banku nian.

Uma ka rai: Ita mós bele fó uma ka rai neʼebé bele faʼan nuʼudar prezente ba Associação Watchtower. Se Ita hakarak hela iha uma neʼe, Ita bele halo arranju atubele kontinua hela nafatin toʼo Ita mate. Kontaktu uluklai sukursál neʼebé tau matan ba Ita-nia rai antes atu halo dokumentu ruma kona-ba neʼe.

Osan tinan-tinan: Arranju neʼe mak atu fó osan ba organizasaun ida neʼebé Testemuña ba Jeová uza. Tuirmai, tinan-tinan Ita ka ema neʼebé Ita hili sei simu fali osan ho valór neʼebé Ita konkorda ona toʼo Ita ka ema neʼe mate.

Testamentu: Liuhusi surat legál neʼebé Ita asina, Ita bele fó sai Ita-nia hakarak atu fó rai, uma ka osan ba Associação Watchtower bainhira Ita mate. No mós se Ita fó lisensa ba Associação Watchtower atu uza Ita-nia osan ka sasán ba serbisu iha mundu tomak, Ita bele halo testamentu atu fó sai katak bainhira Ita mate buat sira-neʼe mak Associação Watchtower nian ona.

Osan fulan-fulan: Bíblia hatete: “Hahiʼi Maromak Jeová ho ó-nia sasán neʼebé folin no ho fuan primeiru husi ó-nia toʼos.” (Prov 3:9) Ema neʼebé serbisu ka fila liman, mós bele halo planu atu rai osan uitoan fulan-fulan hodi bele tau iha kaixa kontribuisaun ba “Serbisu iha Mundu Tomak”.

Atu hetan informasaun liután, Ita bele kontaktu Testemuña ba Jeová iha Timor-Leste, liuhusi telefone ka bele hakerek karta ba diresaun iha kraik:

Testemuña ba Jeová iha Timor-Leste

Associação Watchtower

Caixa Postal 248

Dili, Timor-Leste

Númeru telefone: (670) 331-3047