“Labele sadere ba ó-nia matenek rasik”
“Labele sadere ba ó-nia matenek rasik”
“Tau fiar ba Jeová ho ó-nia laran tomak no labele sadere ba ó-nia matenek rasik.”—PROV 3:5.
1, 2. (a) Ema kristaun dala ruma hasoru situasaun saida deʼit? (b) Kuandu ita hasoru susar ruma, atu halo desizaun importante, ka hasoru tentasaun, ita presiza sadere ba sé? Tanbasá?
IRMÁN ida naran Cynthia, * nia patraun hasai ona serbisu-naʼin barak husi ninia kompañia. Irmán Cynthia hanoin katak lakleur patraun mós sei hasai nia. Se nia lakon ninia serbisu, saida mak nia bele halo? Oinsá mak nia bele buka moris? Irmán ida seluk naran Pamela hanoin atu muda ba fatin seluk neʼebé presiza haklaken-naʼin. Maibé nia laran-rua kona-ba neʼe. Irmaun joven naran Samuel hasoru problema seluk. Uluk nia iha toman atu haree pornografia, no nia hasoru tentasaun makaʼas atu fila fali ba toman neʼe. Nia bele halo saida atu tahan tentasaun neʼe?
2 Kuandu ita hasoru susar ruma, atu halo desizaun importante, ka hasoru tentasaun, ita sadere ba sé? Ita sadere ba ita-nia an rasik, ka ita sadere ba Jeová hodi ‘saran ita-nia laran taridu ba nia’? (1 Ped 5:7) Bíblia hatete: “Jeová nia matan haree ba ema loos sira, no nia see tilun hodi rona ba sira-nia halerik atu husu ajuda.” (Sal 34:15) Tan neʼe, importante tebes atu ita tau fiar ba Maromak Jeová ho ita-nia laran tomak no labele sadere ba ita-nia matenek rasik!—Prov 3:5.
3. (a) Tau fiar ba Jeová envolve saida? (b) Tanbasá mak dala ruma ema sadere ba sira-nia matenek rasik?
3 Tau fiar ba Jeová ho ita-nia laran tomak envolve halo tuir ninia hakarak. Atu halo nuneʼe, ita presiza halo orasaun beibeik hodi husu Jeová nia matadalan. Maibé ba ema barak, tau fiar tomak ba Jeová laʼós buat neʼebé fasil. Porezemplu, irmán ida naran Lynn hatete: “Buat neʼebé susar ba haʼu mak atu tau fiar tomak ba Jeová.” Tanbasá? Nia hatete: “Haʼu ladún koñese haʼu-nia aman. Haʼu-nia inan mós ladún hadomi no la tau matan mai haʼu. Tan neʼe, husi kiʼik kedas haʼu aprende atu tau matan ba haʼu-nia an.” Buat neʼebé Lynn hasoru halo susar ba nia atu tau fiar ba ema seluk. Iha mós ema neʼebé tau fiar ba sira-nia an tanba sira iha matenek ka esperiénsia rasik. Porezemplu, katuas kristaun ida karik halaʼo ninia knaar iha kongregasaun hodi sadere ba ninia esperiénsia rasik duké sadere ba Maromak hodi halo orasaun uluk.
4. Iha lisaun neʼe, ita sei koʼalia kona-ba pergunta saida deʼit?
4 Maromak Jeová hakarak ita atu hakaʼas an atu moris tuir buat neʼebé ita husu iha orasaun no halo tuir ninia hakarak. Maibé, oinsá ita bele soe ita-nia todan ba Jeová no iha tempu neʼebé hanesan buka dalan atu rezolve ita-nia problema? Kuandu ita atu halo desizaun neʼebé importante, ita tenke kuidadu kona-ba saida? Kuandu ita hasoru tentasaun, tansá mak importante atu halo orasaun? Ita sei koʼalia kona-ba pergunta sira-neʼe hodi haree ezemplu balu husi Bíblia.
Kuandu iha susar laran
5, 6. Saida mak Ezequias halo kuandu nia hetan ameasa husi rai-Asíria nia liurai?
5 Bíblia koʼalia kona-ba Liurai Ezequias husi Judá, hodi dehan: “Nia nafatin laran-metin ba Jeová. Nia la sees an hodi tuir nia, maibé nia nafatin halo tuir mandamentu sira neʼebé Jeová fó ba Moisés.” Sin, “nia tau fiar ba Jeová, Israel nia Maromak”. (2 Reis 18:5, 6) Porezemplu, loron ida, Liurai husi rai-Asíria naran Senaquerib haruka Rabsaqué ho soldadu barak ba Jerusalém. Sira manán ona sidade barak, no agora Liurai Senaquerib hakarak tan atu manán Jerusalém. Liurai Ezequias halo saida? Nia bá Jeová nia templu no halo orasaun hodi hatete: “Oh, Jeová, ami-nia Maromak, favór ida, salva ami husi ninia liman, hodi nuneʼe reinu hotu iha mundu bele hatene katak Ita, oh, Jeová, mak Maromak mesak deʼit.”—2 Reis 19:14-19.
6 Maski Liurai Ezequias husu Jeová nia ajuda iha orasaun, maibé nia mós halo buat ruma atu rezolve problema neʼe. Porezemplu, antes atu bá templu, nia haruka povu atu labele hatán fali ba Rabsaqué neʼebé goza beibeik. Ezequias mós haruka ninia atan sira atu bá husu konsellu husi profeta Isaías. (2 Reis 18:36; 19:1, 2) Tanba Ezequias hakarak rezolve problema neʼe tuir Maromak nia hakarak, nia la husu ajuda husi rai-Egiptu ka nasaun sira seluk. Sin, duké sadere ba ninia matenek rasik, nia tau fiar ba Jeová. Ikusmai, Jeová nia anju ida oho soldadu naʼin-185.000, no Senaquerib fila fali ba sidade Nínive.—2 Reis 19:35, 36.
7. Ita bele aprende saida husi Ana no Jonas nia orasaun?
7 Ana, Elcana nia feen, mós sadere ba Jeová no halo orasaun kuandu nia triste tebes tanba la bele iha oan. (1 Sam 1:9-11, 18) Profeta Jonas mós halo orasaun atu husu Jeová atu hasai nia husi ikan boot nia kabun. Nia hatete: “Iha haʼu-nia susar haʼu bolu Jeová, no nia hatán haʼu. Iha mate nia laran, haʼu husu ajuda. Ita rona haʼu.” (Jonas 2:1, 2, 10) Maski ita hasoru susar saida deʼit, ita bele husu Jeová nia ajuda, ida-neʼe halo ita sente kmaan tebes!—Lee Salmo 55:1, 16. *
8, 9. Saida mak importante liu ba Ezequias, Ana, no Jonas kuandu sira halo orasaun? Saida mak ita aprende husi sira-nia ezemplu?
8 Husi Ezequias, Ana, no Jonas nia ezemplu, ita bele aprende kona-ba buat neʼebé importante tebes kuandu ita halo orasaun. Maski sira naʼin-tolu sente laran-susar tebes, maibé sira-nia orasaun hatudu katak sira la hanoin deʼit kona-ba sira-nia an rasik. Buat neʼebé importante tebes ba sira mak Maromak nia naran, adorasaun ba Maromak, no halo tuir ninia hakarak. Porezemplu, Ezequias sente triste tebes kuandu ema hafoʼer Jeová nia naran. Ana promete katak se nia iha oan, nia sei fó oan neʼe ba Jeová atu serbí iha tabernákulu iha Siló. Jonas mós hatete: “Buat neʼebé haʼu promete ona, haʼu sei kumpre.”—Jonas 2:9.
9 Kuandu ita halo orasaun hodi husu Jeová nia ajuda atu hasoru susar ruma, diʼak atu hanoin didiʼak tansá mak ita hakarak simu Jeová nia ajuda. Ita hakarak deʼit atu sai livre husi ita-nia problema, ka ita hanoin nafatin kona-ba Jeová no ninia hakarak? Kuandu ita hasoru problema boot, fasil ba ita atu hanoin deʼit kona-ba ita-nia susar no ladún hanoin kona-ba ita-nia relasaun ho Jeová. Tan neʼe, kuandu ita husu Maromak nia ajuda, mai ita hanoin nafatin kona-ba Jeová nia naran no ninia direitu atu ukun. Hodi halo nuneʼe sei ajuda ita atu la hanoin barak kona-ba ita rasik nia problema no ajuda mós ita atu sente kontente maski ita-nia problema la lakon. Karik Jeová hatán ita-nia orasaun hodi ajuda ita atu tahan susar neʼebé ita hasoru.—Lee Isaías 40:29; * Filipe 4:13.
Kuandu atu halo desizaun
10, 11. Kuandu Josafat hasoru situasaun neʼebé susar, saida mak nia halo?
10 Kuandu ita presiza halo desizaun ruma neʼebé importante iha ita-nia moris, ita halo saida? Dala ruma ita halo desizaun uluk no depois mak husu Jeová atu haraik nia bensaun ba ita-nia desizaun neʼe ka lae? Hanoin toʼok kona-ba Liurai Josafat nia ezemplu. Kuandu ema Moab no Amon bá funu hasoru nasaun Judá, nasaun neʼe la iha forsa atu tahan inimigu sira-neʼe. Entaun, Josafat halo saida?
11 Bíblia hatete katak Josafat sai taʼuk no nia buka Jeová nia ajuda. Nia haruka povu Judá tomak atu halo jejún no halibur an atu husu matadalan husi Jeová. Depois, nia hamriik iha povu Judá no Jerusalém nia oin no halo orasaun, hodi dehan: “Oh, ami-nia Maromak, Ita sei tesi lia hodi fó kastigu ba sira ka lae? Tanba ami la iha kbiit iha ema-lubun boot neʼe nia oin, neʼebé mai kontra hasoru ami; no ami la hatene atu halo saida, maibé ami hein deʼit ba Ita.” Maromak rona Josafat nia orasaun no fó salvasaun ba sira hodi halo milagre boot ida. (2 Crôn 20:3-12, 17) Ida-neʼe hatudu ho klaru katak kuandu ita atu halo desizaun ruma, liuliu desizaun neʼebé kona ita-nia relasaun ho Jeová, ita presiza duni atu sadere ba Jeová duké sadere ba ita-nia matenek rasik, loos ka lae?
12, 13. Liurai David fó ezemplu saida kona-ba halo desizaun?
12 Maibé oinsá se ita hasoru situasaun neʼebé ladún susar atu rezolve? Karik tanba ita iha ona esperiénsia, ita sente katak ita bele rezolve lalais situasaun neʼe. Se nuneʼe, hanoin toʼok kona-ba buat neʼebé akontese ba Liurai David. Kuandu ema Amalec ataka sidade Siclag no hadau David nia feen no oan sira no mós ninia soldadu sira-nia feen no oan sira, David husu Jeová nia matadalan hodi dehan: “Haʼu sei duni tuir ema-lubun neʼe ka lae?” Jeová hatán: “Duni tuir sira bá, tanba ó sei toman sira, no ó sei salva hotu.” David halo tuir, no nia “salva buat hotu neʼebé ema Amalec hadau”.—1 Sam 30:7-9, 18-20.
13 Liutiha tempu balu, ema Filístia mak mai atu ataka Israel. Dala ida tan, David husu matadalan husi Jeová. Maromak hatán ho klaru ba nia hodi dehan: “Bá, tanba haʼu sei entrega duni ema Filístia ba ó-nia liman.” (2 Sam 5:18, 19) Lakleur tan, ema Filístia mai fali atu funu hasoru David. Agora, David sei halo saida? Karik nia hanoin: ‘Haʼu hasoru situasaun hanesan neʼe ba dala rua ona. Haʼu sei bá hasoru Maromak nia inimigu sira, hanesan haʼu halo uluk.’ Maibé duké sadere ba ninia esperiénsia uluk nian, dala ida tan, nia buka matadalan husi Jeová liuhusi orasaun. Diʼak tebes katak nia halo ida-neʼe, tanba matadalan neʼebé Jeová fó ba nia la hanesan uluk. (2 Sam 5:22, 23) Sin, kuandu ita hasoru fali situasaun ka problema neʼebé hanesan uluk, ita presiza kuidadu atu labele sadere ba ita-nia esperiénsia rasik.—Lee Jeremias 10:23. *
14. Ita aprende saida husi buat neʼebé Josué no katuas sira husi Israel halo?
14 Tanba ita hotu sala-naʼin, inklui mós katuas kristaun sira neʼebé iha ona esperiénsia barak, ita presiza kuidadu atu la sadere ba ita-nia matenek rasik maibé buka matadalan husi Jeová kuandu ita halo desizaun ruma. Hanoin toʼok saida mak Josué no katuas sira husi Israel halo kuandu ema Gibeon hakbesik ba ema Israel hodi finje katak sira husi rai dook. Duké husu uluk Jeová nia matadalan, Josué ho katuas sira deside rasik atu halo dame ho ema Gibeon hodi promete atu la funu hasoru sira. Maski Jeová apoia desizaun neʼe, maibé nia haruka atu hakerek kona-ba neʼe iha Bíblia laran atu sai nuʼudar avizu mai ita.—Jos 9:3-6, 14, 15.
Kuandu hasoru tentasaun
15. Tanbasá mak importante atu halo orasaun atu tahan hasoru tentasaun? Esplika toʼok.
15 Tanba “ukun-fuan sala nian” mak ukun ita, ita presiza hakaʼas an atu luta hasoru ita-nia hakarak atu halo sala. (Rom 7:21-25) Maibé ita bele manán luta neʼe. Oinsá? Jesus hatete ba ninia dixípulu sira katak orasaun mak importante atu tahan hasoru tentasaun. (Lee Lucas 22:40.) Maibé, oinsá se ita-nia hakarak aat ka hanoin sala mosu nafatin maski ita halo tiha orasaun? Se nuneʼe, ita presiza kontinua “husu Maromak” atu fó matenek mai ita atu tahan hasoru ita-nia susar neʼe. Bíblia promete katak Maromak “sei fó ba ema hotu-hotu ho laran-luak hodi la siʼak”. (Tgo 1:5) Tiago mós hakerek: “Iha imi-nia leet iha ema ruma neʼebé moras [iha dalan espirituál]? Nia sei bolu katuas sira iha kongregasaun, no sira sei halo orasaun ba nia no kose nia ho mina iha Jeová nia naran. No orasaun neʼebé ho fiar sei kura ema neʼebé moras.”—Tgo 5:14, 15, MF.
16, 17. Bainhira loos mak ita presiza halo orasaun kuandu hasoru tentasaun?
16 Maski halo orasaun importante tebes atu tahan hasoru tentasaun, maibé ita mós tenke hatene tempu neʼebé loos atu halo orasaun. Hanoin toʼok kona-ba mane joven neʼebé temi iha Provérbios 7:6-23. Iha oras besik kalan, nia laʼo iha dalan neʼebé besik feto-aat nia uma. Kuandu feto neʼe lohi nia ho liafuan midar, nia tuir deʼit feto neʼe hanesan karau neʼebé ema lori atu oho. Tanbasá mak mane joven neʼe laʼo iha dalan neʼe? Tanba nia “la iha laran neʼebé diʼak”, katak nia la iha esperiénsia, karik hakarak aat mosu beibeik iha nia laran. (Prov 7:7) Iha situasaun hanesan neʼe, bainhira loos mak nia presiza halo orasaun? Klaru katak nia bele halo orasaun iha tempu naran deʼit, maibé tempu diʼak liu atu halo orasaun mak kuandu nia foin komesa atu hanoin atu laʼo iha dalan neʼebá.
17 Ohin loron mós, karik irmaun ida hakaʼas an atu luta hasoru ninia hakarak atu haree pornografia. Maibé, oinsá se nia loke sítiu iha internét neʼebé nia hatene katak iha sítiu neʼe hatudu foto ka vídeo neʼebé foʼer? Se nia halo nuneʼe, ninia situasaun hanesan ho mane joven iha Provérbios kapítulu 7, tanba ida-neʼe hanesan nia laʼo iha dalan neʼebé iha perigu barak. Nuneʼe, atu hasoru tentasaun atu haree pornografia, irmaun neʼe tenke buka Jeová nia ajuda liuhusi orasaun antes nia komesa loke sítiu sira-neʼe iha internét.
18, 19. (a) Tanbasá mak la fasil atu tahan hasoru tentasaun? Oinsá mak ita bele hasoru tentasaun? (b) Ita hakarak hakaʼas an atu halo saida?
18 Apóstolu Paulo hatete: “Isin nia hakarak mak kontra espíritu, no espíritu kontra isin; tanba buat sira-neʼe kontra malu, nuneʼe buat sira neʼebé [ita] hakarak atu halo, [ita] la halo.” (Gal 5:17, MF) Ida-neʼe hatudu katak la fasil atu tahan hasoru tentasaun ka atu husik ita-nia toman neʼebé aat. Tan neʼe, kuandu hanoin neʼebé sala mosu iha ita-nia neon ka kuandu ita hasoru tentasaun, ita presiza halo kedas orasaun ho laran, no mós ita presiza halo buat ruma tuir buat neʼebé ita husu iha orasaun. Hanoin-hetan katak ‘ita hetan tentasaun neʼebé ema seluk mós hetan ona’, maibé ho Jeová nia ajuda, ita bele kontinua laran-metin ba nia.—1 Kor 10:13, MF.
19 Maromak Jeová fó mai ita prezente kapás, neʼe mak orasaun. Tan neʼe, kuandu ita iha susar laran, kuandu ita atu halo desizaun importante, ka kuandu ita hasoru tentasaun ruma, mai ita halo orasaun ba Jeová hodi hatudu katak ita sadere ba nia. Ita mós presiza kontinua husu Maromak nia espíritu santu neʼebé fó matadalan no forsa mai ita. (Lc 11:9-13) Sin, mai ita nafatin tau fiar ba Jeová hodi la sadere ba ita-nia matenek rasik.
[Nota–rodapé]
^ par. 1 Naran balun laʼós naran neʼebé loos.
^ par. 7 Salmo 55:1, 16: “1 See tilun mai haʼu-nia orasaun, oh, Maromak; no labele subar Ita-nia an kuandu haʼu husu ajuda husi Ita.” “16 Kona-ba haʼu, ba Maromak mak haʼu sei bolu; no Jeová rasik sei salva haʼu.”
^ par. 9 Isaías 40:29: “Nia fó kbiit ba sira neʼebé kole no ba sira neʼebé fraku nia fó kbiit makaʼas liután.”
^ par. 13 Jeremias 10:23: “Oh, Jeová, haʼu hatene duni katak ema la iha kbiit atu hili nia dalan rasik. Ema neʼebé laʼo, mós la iha kbiit atu hili ninia hakat.”
Ita hanoin-hetan?
• Ita aprende saida husi Ezequias, Ana, no Jonas nia ezemplu kona-ba tau fiar ba Jeová?
• Oinsá mak buat neʼebé akontese ba David no Josué hatudu katak ita presiza kuidadu kuandu atu halo desizaun?
• Bainhira loos mak ita presiza halo orasaun kuandu hasoru tentasaun?
[Pergunta estudu nian]
[Dezeñu iha pájina 9]
Bainhira loos mak ita presiza halo orasaun kuandu hasoru tentasaun?
