Espíritu santu ajuda iha tempu uluk no ohin loron
Espíritu santu ajuda iha tempu uluk no ohin loron
“Espíritu ida deʼit mak halo hotu-hotu neʼe.”—1 KOR 12:11.
1. Husi lisaun neʼe, ita sei estuda kona-ba saida deʼit?
IHA loron Pentekostes tinan 33, buat neʼebé akontese halo ema haksolok no kontente. Maromak fakar ninia espíritu santu ba ninia atan sira! (Apos 2:1-4) Husi tempu neʼebá, Maromak komesa uza ninia espíritu atu dirije ninia povu iha dalan seluk tan. Iha lisaun uluk, ita estuda kona-ba oinsá mak Maromak nia espíritu ajuda ninia atan sira iha tempu antigu atu halaʼo serbisu neʼebé la fasil. Maibé, dalan neʼebé Maromak uza ninia espíritu iha ema kristaun nia tempu la hanesan ho tempu uluk ka lae? Oinsá mak ema kristaun ohin loron bele simu ajuda husi Maromak nia espíritu santu? Mai ita estuda kona-ba neʼe.
Jeová nia atan-oan feto
2. Maria hatene saida kona-ba Maromak nia espíritu?
2 Kuandu Maromak Jeová haraik espíritu santu iha loron Pentekostes, Maria mós hamutuk ho apóstolu sira iha sala andár-leten iha Jerusalém. (Apos 1:13, 14) Maibé tinan 30 liu antes ida-neʼe akontese, Maria hatene ona oinsá mak Jeová halo buat neʼebé furak tebes hodi uza ninia espíritu santu. Jeová haruka ninia Oan-Mane husi lalehan tun ba rai, no “hodi espíritu santu nia kbiit”, Maria sai isin-rua maski nia seidauk kaben.—Mt 1:20.
3, 4. Maria hatudu hahalok diʼak saida? Oinsá mak ita bele halo tuir ninia ezemplu?
3 Tansá mak Jeová hili Maria atu sai Jesus nia inan? Kuandu anju hatete ba Maria katak nia sei koʼus Maromak nia Oan, Maria hatete kedas: “Naʼi nia atan-oan mak neʼe. Halo tuir Ita liafuan bá!” (Lc 1:38) Maria nia liafuan neʼe hatudu nia ema hanesan saida. Nia ema neʼebé prontu atu halo tuir Maromak Jeová nia hakarak. Nia la husu ba anju: ‘Oinsá mak ema seluk sei hanoin se sira hatene katak haʼu isin-rua?’ Nia mós la hatete: ‘Haʼu taʼuk tanba karik José sei lakohi ona atu kaben ho haʼu.’ Hodi hatete katak nia mak Naʼi nia atan-oan, Maria hatudu katak nia tau ninia fiar tomak ba Jeová.
4 Dala ruma ita sente susar ka lae, atu halo ita-nia serbisu ba Maromak? Ita bele husu ba ita-nia an: ‘Haʼu fiar metin ba Jeová katak nia sei tau matan ba buat hotu tuir ninia hakarak ka lae? Haʼu prontu atu halo serbisu saida deʼit neʼebé Jeová hakarak ka lae?’ Ita bele fiar katak Maromak sei fó ninia espíritu ba ema neʼebé tau fiar ba nia no halo tuir nia nuʼudar Ukun-Naʼin neʼebé boot liu hotu.—Apos 5:32.
Espíritu santu ajuda Pedro
5. Iha dalan saida deʼit mak espíritu santu ajuda Pedro antes Pentekostes tinan 33?
5 Hanesan ho Maria, apóstolu Pedro mós hatene ona espíritu santu nia kbiit antes loron Pentekostes tinan 33. Kuandu Jesus sei iha rai, nia fó kbiit ba Pedro no mós ba apóstolu sira seluk atu duni sai espíritu aat sira. (Mc 3:14-16) Maski Bíblia ladún fó-hatete, maibé karik Pedro uza duni kbiit neʼe. No mós, kuandu Jesus bolu Pedro atu laʼo iha tasi leten iha tasi Galileia, espíritu santu ajuda Pedro atu halo nuneʼe. (Lee Mateus 14:25-29.) Klaru katak Pedro tau fiar ba espíritu santu nia ajuda atu halo milagre oioin. Maibé liutiha loron Pentekostes, espíritu santu sei ajuda nia iha dalan seluk tan.
6. Iha dalan saida deʼit mak Maromak nia espíritu ajuda Pedro depois Pentekostes tinan 33?
6 Iha loron Pentekostes tinan 33, espíritu santu fó kbiit ba Pedro no ninia maluk sira atu koʼalia língua oioin hodi bele koʼalia ho ema sira neʼebé mai tuir festa Pentekostes iha Jerusalém. Tuirmai, Pedro hamriik hamutuk ho apóstolu sira seluk hodi fó sasin ba ema-lubun boot. (Apos 2:14-36) Kuandu Jesus sei iha rai, dala ruma, Pedro sente taʼuk ba ema seluk no nia mós la hanoin uluk antes atu koʼalia. Maibé, simu tiha espíritu santu, nia sai aten-brani atu haklaken maski ema fó-terus ba nia no ameasa nia atu labele haklaken tan. (Apos 4:18-20, 31) Maromak nia espíritu santu mós ajuda Pedro atu hatene kona-ba hahalok aat neʼebé ema seluk subar hela. (Apos 5:8, 9) Liután neʼe, Pedro mós simu kbiit atu halo ema mate moris fali.—Apos 9:40.
7. Jesus nia hanorin saida deʼit mak Pedro foin komprende depois nia simu espíritu santu?
7 Antes loron Pentekostes, Pedro hatene ona buat barak neʼebé Jesus hanorin. (Mt 16:16, 17; Joao 6:68) Maibé nia mós iha buat balu neʼebé nia ladún komprende. Porezemplu, uluk Pedro la hatene katak liutiha loron tolu depois Jesus mate nia sei moris filafali nuʼudar kriatura espíritu ida. Nia mós la komprende katak Kristu nia Ukun sei harii iha lalehan. (Joao 20:6-10; Apos 1:6) Pedro mós seidauk komprende katak Jesus nia dixípulu sira mós sei bá lalehan hodi ukun hamutuk ho nia. Maibé hodi simu espíritu santu iha loron Pentekostes no simu esperansa atu moris iha lalehan, ida-neʼe halo nia foin komprende kona-ba buat sira-neʼe, neʼebé Jesus hanorin ona ba ninia dixípulu sira.
8. Ema kristaun kose-mina no mós bibi seluk hatene kona-ba saida?
8 Depois Jesus nia dixípulu sira simu espíritu santu, sira komprende kona-ba buat neʼebé sira uluk la komprende. Espíritu santu mós leno sira balu atu hakerek Eskritura Lia-Gregu hodi esplika lia-loos neʼebé furak tebes kona-ba Jeová nia hakarak. (Ef 3:8-11, 18) Ohin loron, ema kristaun kose-mina no mós sira neʼebé parte husi bibi seluk, sira estuda no komprende lia-loos sira-neʼe. (Joao 10:16) Ita kontente katak liuhusi espíritu santu ita komprende Maromak nia Liafuan, loos ka lae?
Paulo sai “nakonu ho espíritu santu”
9. Espíritu santu fó kbiit ba Paulo atu halo saida deʼit?
9 Maizumenus tinan ida depois loron Pentekostes tinan 33, Maromak fó espíritu santu ba ema ida tan, naran Saul, neʼebé ita koñese nuʼudar Paulo. Maromak nia espíritu fó kbiit ba Paulo atu halo buat neʼebé lori mós diʼak ba ita neʼebé moris ohin loron. Porezemplu, espíritu santu leno nia atu hakerek livru husi Bíblia hamutuk 14. Hanesan ho Pedro, espíritu santu ajuda Paulo atu komprende kona-ba esperansa atu bá lalehan hodi simu moris neʼebé la bele dodok, ka la bele mate, no nia hakerek ho klaru kona-ba neʼe. Espíritu santu mós ajuda Paulo atu fó isin-diʼak ba ema moras, duni sai espíritu aat, no halo ema mate moris fali! Maibé, espíritu santu ajuda Paulo atu halaʼo knaar ida neʼebé importante liu, no espíritu neʼe mós ajuda Maromak nia atan sira ohin loron atu halaʼo knaar neʼe maski laʼós liuhusi milagre ruma.
10. Oinsá mak espíritu santu ajuda Paulo atu koʼalia kona-ba lia-loos?
10 Loron ida, hodi “nakonu ho espíritu santu”, Paulo koʼalia ho aten-brani atu hasoru ema matan-dook ida. Prokonsul iha rai-Chipre haree ida-neʼe no rona Paulo nia liafuan, no ida-neʼe book nia atu simu lia-loos tanba “nia hakfodak ho lia hanorin kona-ba Naʼi” Jeová. (Apos 13:8-12) Klaru katak Paulo hatene Maromak nia espíritu deʼit mak bele fó kbiit ba nia atu koʼalia kona-ba lia-loos ho aten-brani. (Mt 10:20) Tan neʼe, liutiha tempu balu, Paulo husu maluk kristaun sira iha sidade Éfeso atu kontinua halo orasaun ba nia hodi nia “bele koʼalia ho aten-brani”.—Ef 6:18-20.
11. Oinsá mak Paulo husik espíritu santu hatudu dalan ba nia?
11 Espíritu santu ajuda duni Paulo atu koʼalia, maibé dala ruma espíritu santu mós hanetik nia atu haklaken iha área balu. Kuandu Paulo halo viajen atu bá haklaken iha fatin oioin, nia husik espíritu santu hatudu dalan ba nia. (Apos 13:2; lee Apostolu 16:6-10.) Ohin loron, Jeová mós uza nafatin ninia espíritu atu dirije serbisu haklaken. Hanesan mós ho Paulo, Jeová nia atan sira ohin loron hakaʼas an atu haklaken lia-loos ho aten-brani no laran-manas. Maski dalan neʼebé Maromak nia espíritu dirije ita la hanesan ho dalan neʼebé espíritu ajuda Paulo iha tempu uluk, maibé ita bele fiar katak Jeová uza ninia espíritu santu atu book ema neʼebé laran-diʼak hodi rona no simu lia-loos.—Joao 6:44.
Espíritu santu ajuda ita iha dalan oioin
12-14. Espíritu santu book Maromak nia atan sira hotu iha dalan ida deʼit ka lae? Esplika toʼok.
12 Kuandu ita aprende kona-ba dalan oioin neʼebé Jeová haraik ninia bensaun ba ema kristaun kose-mina sira iha apóstolu sira-nia tempu, ida-neʼe fó laran-manas no haksolok mai ita, loos ka lae? Espíritu santu ajuda sira iha tempu neʼebá hodi fó “kmanek” oioin, ka matenek espesiál oioin. Iha apóstolu Paulo nia karta ba kongregasaun iha sidade Korinto, nia hatete: “Iha kmanek espíritu nian oioin maibé espíritu ida deʼit; iha knaar oioin, maibé Naʼi ida deʼit, iha hahalok oioin, maibé Maromak ida deʼit neʼebé halo buat hotu iha ema hotu-hotu.” (1 Kor 12:4-6, 11) Sin, Maromak nia espíritu ajuda ninia atan sira iha dalan oioin atu kumpre Maromak nia hakarak ba sira ida-idak. Maromak haraik ninia espíritu santu ba sira neʼebé hola parte iha “bibi luhan kiʼik” no mós “bibi seluk” hotu. (Lc 12:32; Joao 10:16) Maibé, neʼe laʼós katak espíritu santu book ema kristaun hotu iha dalan ida deʼit.
13 Porezemplu, liuhusi espíritu santu, irmaun balu simu knaar nuʼudar katuas kristaun. (Apos 20:28) Maibé, laʼós katak ema hotu neʼebé hetan kose-mina ho espíritu santu mak serbisu nuʼudar katuas hodi tau matan ba kongregasaun. Ida-neʼe hatudu ho klaru katak Maromak haraik ninia espíritu santu ba ema kristaun sira iha dalan oioin.
14 Espíritu neʼebé ema kose-mina sira simu hodi fiar katak sira sai ona Maromak nia oan-hakiak, espíritu neʼe hanesan ho espíritu neʼebé Jeová uza atu halo Jesus moris hiʼas fali hodi fó moris neʼebé la bele mate tan. (Lee Roma 8:11, 15.) Iha tempu uluk liu, Jeová mós uza espíritu neʼe atu kria lalehan no rai. (Gên 1:1-3) Maromak nia espíritu mós ajuda Bezalel atu aumenta ninia matenek atu halo sasán oioin iha tabernákulu. Espíritu neʼe mós fó forsa boot ba Sansão atu halo buat neʼebé ema seluk la bele halo, no ajuda Pedro atu laʼo iha tasi leten. Tan neʼe, hodi simu espíritu santu, neʼe laʼós deʼit kona-ba simu kose-mina. Maromak uza ninia espíritu santu hodi ajuda ninia atan sira iha dalan oioin, no dalan espesiál ida mak hodi kose mina ba sira balu ho espíritu santu. Sé mak hetan kose-mina, ida-neʼe depende ba Maromak.
15. Maromak sei kose mina ba ema kristaun sira ba nafatin ka lae? Esplika toʼok.
15 Durante tinan rihun ba rihun, Maromak sempre haraik espíritu santu ba ninia atan sira iha dalan oioin. Maibé iha loron Pentekostes tinan 33, Maromak komesa uza ninia espíritu santu iha dalan seluk tan hodi kose mina ba ema kristaun sira. Maski iha futuru Maromak sei para atu kose mina ho espíritu santu ba ema, maibé nia sei kontinua haraik espíritu santu ba ninia povu hodi ajuda sira atu halo tuir ninia hakarak ba nafatin.
16. Ohin loron, saida deʼit mak Jeová nia atan sira halo hodi simu espíritu santu nia ajuda?
16 Ohin loron, Jeová nia atan sira halo saida deʼit hodi hetan ajuda husi espíritu santu? Apokalipse 22:17 hatán: “Espíritu no noiva dehan, ‘Mai.’ Ema hotu neʼebé rona hatán bá: ‘Mai.’ Tuirmai, ema hotu neʼebé hamrook, mai: ema hotu neʼebé hakarak bele kuru bee moris nian; simu deʼit lalika selu.” Ho espíritu santu nia ajuda, ema kristaun ohin loron konvida “ema hotu neʼebé hakarak” atu hetan bee moris nian. Ema kose-mina sira halo nuneʼe hodi fó ezemplu diʼak ba bibi seluk no bibi seluk mós serbisu hamutuk ho sira. Grupu rua neʼe hotu halo tuir matadalan husi espíritu santu ida deʼit. Sira hotu dedika sira-nia an ba Jeová hodi hetan batizmu iha “Aman, Oan no espíritu santu nia naran”. (Mt 28:19) Liután neʼe, sira hotu hatudu hahalok furak neʼebé espíritu lori mai iha sira-nia moris. (Gal 5:22, 23) Hodi simu Maromak nia espíritu nia ajuda, sira mós hakaʼas an atu moris tuir Maromak nia matadalan kona-ba hahalok moos.—2 Kor 7:1; Apok 7:9, 14.
Husu nafatin espíritu santu
17. Oinsá mak ita bele hatudu katak ita iha Maromak nia espíritu?
17 Loos duni, maski ita iha esperansa atu bá lalehan ka atu moris ba nafatin iha rai, Maromak bele fó ninia “kbiit makaʼas” ba ita hotu atu bele laran-metin ba nia toʼo rohan. (2 Kor 4:7) Kuandu ita haklaken, karik ita hasoru ema neʼebé hatudu hahalok ladiʼak ba ita ka goza ita. Maibé, se ita la husik buat sira-neʼe atu hapara ita-nia serbisu haklaken, ita bele hatudu katak ita iha Maromak nia espíritu. Hanoin-hetan katak ‘wainhira ema hasara ita tanba Kristu nia naran’, ita bele haksolok tanba ‘iha oras neʼebá Maromak nia espíritu horik ona iha ita’.—1 Ped 4:14.
18, 19. Oinsá mak Jeová uza ninia espíritu santu atu ajuda ita? Ita presiza kontinua atu halo saida?
18 Ho laran-luak, Maromak haraik ninia espíritu santu ba ema neʼebé husu ho laran. Espíritu santu bele ajuda ita laʼós deʼit atu aumenta ita-nia matenek, maibé ajuda mós ita atu haburas ita-nia hakarak atu hakaʼas an liután iha serbisu ba Jeová. Bíblia hatete: “Maromak mak halo imi, laʼós deʼit atu hakarak, maibé mós atu halo duni buat neʼebé monu loos ba nia laran.” Sin, hodi hetan espíritu santu nia ajuda no hakaʼas an atu “laran-metin ba liafuan moris nian”, ita bele ‘buka ita-nia maksoin ho laran-taʼuk no laran nakdedar’.—Flp 2:12, 13, 16.
19 Tan neʼe, hodi tau fiar ba Maromak nia espíritu, mai ita hakaʼas an atu kumpre knaar sira neʼebé Jeová fó mai ita, sai matenek liután atu halo ita-nia knaar ho didiʼak, no husu Jeová nia ajuda. (Tgo 1:5) Se ita halo nuneʼe, Jeová sei ajuda ita tuir ita ida-idak nia situasaun atu komprende ninia Liafuan, atu tahan hasoru problema oioin iha ita-nia moris, no atu kontinua haklaken lia-foun diʼak. Jesus hatete: “Husu bá, imi sei simu; buka bá, imi sei hetan; tuku odamatan bá, odamatan sei nakloke ba imi.” (Lc 11:9, 13) Buat neʼebé ita bele husu, neʼe inklui mós espíritu santu. Tan neʼe, mai ita husu nafatin ba Jeová atu ita mós bele sai hanesan Maromak nia atan sira neʼebé simu ninia espíritu santu nia ajuda.
Ita bele hatán?
• Oinsá mak ita bele halo tuir Maria nia ezemplu?
• Iha dalan saida deʼit mak espíritu santu ajuda Paulo?
• Ohin loron, iha dalan saida deʼit mak espíritu santu ajuda ita?
[Pergunta estudu nian]
[Dezeñu iha pájina 24]
Espíritu santu ajuda Paulo atu koʼalia ho aten-brani ba matan-dook ida
[Dezeñu iha pájina 26]
Ohin loron, ema kristaun hotu bele hetan espíritu santu nia ajuda
