Ita hanoin-hetan ka lae?

Ita gosta lee Livru Haklaken husi fulan balu liubá ka lae? Se nuneʼe, haree toʼok se Ita bele hatán pergunta sira tuirmai neʼe:

• Saida mak ita bele aprende husi “nehek” kona-ba moris ho simples?

Rai osan antes atu hola. Ida-neʼe ajuda ema barak atu la monu ba lasu kona-ba debe osan, no selu osan-funan neʼebé boot tanba tuir loloos ida-neʼe aumenta deʼit folin ba sasán neʼebé sira sosa. Bíblia esplika katak nehek mak animál neʼebé “matenek” tanba iha “tempu koʼa nian nia mós rai didiʼak hahán” atu uza ba futuru. (Prov 6:6-8; 30:24, 25)—1/7, pájina 20.

• Saida mak ita bele aprende husi Mefiboset?

Maski ita halo buat neʼebé loos, karik ema balu sei koʼalia bosok kona-ba ita. Jesus hatete: “Mundu odi imi karik, imi hatene bá katak nia odi haʼu uluk liu imi.” Ema mós oho Jesus! Ita bele fiar katak se ita halo buat neʼebé loos, Maromak neʼebé loos, Jeová, no ninia Oan-Mane, Jesus, sei hadomi ita.—1/7, pájina 23.

• Oinsá mak Maromak Jeová sente kona-ba sira neʼebé “sente susar iha laran” no “laran-kraik”?

Hanesan aman ida neʼebé hadomi nia oan hodi besik no fó kmaan ba nia oan neʼebé sente triste, Maromak Jeová mós besik ba nia atan sira-neʼebé halerik hodi husu nia ajuda. Nia hakarak duni atu fó kmaan no hamenus sira-nia laran-triste no laran-kraik. Nia bele fó ba sira matenek no forsa atu tahan hasoru susar naran deʼit neʼebé sira hetan. (2 Kor 4:7; Tgo 1:5)—1/7, pájina 27.

• Kuandu Maromak hatete ba ema levita sira: “Haʼu mak ó-nia parte,” liafuan neʼe katak sá?

Suku Israel ida-idak hetan rai nuʼudar sira-nia parte, maibé ema levita simu Jeová nuʼudar ‘sira-nia parte’. (Núm 18:20) Maski sira la hetan rai nuʼudar liman-rohan, maibé Maromak fó ba sira serbisu neʼebé espesiál no tau matan ba sira-nia presiza loroloron nian. Ohin loron, sira neʼebé tau uluk Maromak nia serbisu iha sira-nia moris bele fiar katak Maromak sei fó buat neʼebé sira presiza.—15/9, pájina 7-8, 13.

• Jesus nia liafuan “Ita rasik hateten nia” katak sá? (Mt 26:63, 64)

Liafuan “Ita rasik hateten nia” mak liafuan neʼebé ema judeu baibain uza atu hatudu katak buat neʼebé sira koʼalia mak loos. Amlulik boot ida naran Caifás, husu Jesus atu fó sai iha ema nia oin se nia mak Kristu, Maromak nia Oan. Jesus hatán “Ita rasik hateten nia”, neʼe hanesan nia hatudu katak buat neʼebé amlulik boot koʼalia mak loos.—1/10, pájina 32.

• Saida mak bele ajuda ita atu hili atividade halimar nian neʼebé lori diʼak ba ita?

Atu ajuda ita hili atividade halimar nian neʼebé lori diʼak ba ita no halo kontente Maromak, diʼak atu husu ita-nia an pergunta hanesan: Atividade neʼe envolve saida? Bainhira mak haʼu halo ida-neʼe? Haʼu sei halimar ho sé iha atividade neʼe?—15/10, pájina 9-10.

• Oinsá mak Provérbios 7:6-23 bele ajuda ita atu hadook an husi pornografia?

Istória neʼe koʼalia kona-ba mane joven neʼebé laʼo iha dalan neʼebé besik feto-aat nia uma. Feto neʼe lohi nia ho liafuan midar. Ohin loron, importante atu ita la haree sítiu husi internét neʼebé hatudu foto ka vídeo neʼebé foʼer. Importante mós atu buka Maromak nia ajuda liuhusi orasaun antes atu komesa loke sítiu sira-neʼe iha internét.—15/11, pájina 9-10.