Tansá ita presiza Maromak nia espíritu atu lori ita?
Tansá ita presiza Maromak nia espíritu atu lori ita?
“Ita mak haʼu-nia Maromak. Ita-nia espíritu mak diʼak; espíritu neʼe lori haʼu.”—SAL 143:10.
1. Esplika toʼok oinsá mak forsa ida neʼebé ita la bele haree bele ajuda ita atu hatene dalan.
ITA uza tiha ona búsola, ka kompas, ka lae? Kompas mak instrumentu ida neʼebé haree hanesan relójiu maibé iha daun ida deʼit. Daun neʼe halo husi besi-asu no sempre hatudu loloos ba parte norte hodi tuir forsa magnétiku neʼebé haleʼu mundu, no forsa neʼe ita la bele haree. Ema uza ona instrumentu neʼe durante tinan atus ba atus hodi ajuda sira kuandu halo viajen iha rai ka iha tasi atu hatene dalan.
2, 3. (a) Forsa saida mak Jeová uza tinan rihun ba rihun liubá? (b) Oinsá mak ita bele hatene katak Maromak nia forsa boot bele ajuda ita iha ita-nia moris?
2 Iha forsa ida seluk tan neʼebé ita la bele haree, maibé importante liu ba ita atu hatudu dalan mai ita. Saida mak forsa neʼe? Neʼe mak forsa neʼebé Bíblia fó sai iha livru Gênesis. Kona-ba buat neʼebé Maromak Jeová halo iha tinan rihun ba rihun liubá, versíkulu primeiru dehan: “Iha tempu uluk kedas Maromak kria lalehan no rai.” Ita hatene katak Maromak uza forsa ida neʼebé boot tebetebes atu halo nuneʼe tanba versíkulu tuirmai hatete: “Maromak nia forsa bá-mai iha bee leten.” (Gên 1:1, 2) Saida mak forsa boot neʼe? Neʼe mak espíritu santu. Sin, ita agradese ba Jeová tanba nia uza ninia espíritu santu atu kria buat hotu no fó moris mai ita.—Jó 33:4; Sal 104:30.
3 Maibé espíritu santu neʼebé Jeová uza atu kria ita, bele ajuda ita iha ita-nia moris ka lae? Bele, tanba Jesus rasik hatete ba ninia dixípulu sira katak espíritu neʼe sei ajuda sira hodi “hanorin lia-loos tomak” ba sira. (Joao 16:13) Entaun, tuir loloos, saida mak espíritu santu? Tansá mak ita presiza espíritu santu atu lori ita ka hatudu dalan ba ita?
Saida mak espíritu santu?
4, 5. (a) Ema neʼebé fiar doutrina Trindade hanoin saida kona-ba espíritu santu? (b) Esplika toʼok saida mak espíritu santu.
4 Dala ruma kuandu ita halo serbisu haklaken, ita hasoru ema neʼebé hanoin sala kona-ba saida mak espíritu santu. Porezemplu, sira neʼebé fiar doutrina Trindade hanoin katak espíritu santu mak Aman Maromak. (1 Kor 8:6) Maibé, Bíblia la hanorin hanesan neʼe.
5 Saida mak espíritu santu? Iha Gênesis 1:2, liafuan ebraiku neʼebé tradús nuʼudar “espíritu” mós iha arti “anin neʼebé huu”. Maski ita la haree anin, maibé ita haree buat neʼebé anin bele halo kuandu anin huu. Hanesan neʼe mós ho espíritu santu, maski ita la haree espíritu santu, maibé ita bele haree rezultadu husi buat neʼebé espíritu santu halo. Klaru katak espíritu santu mak forsa neʼebé Maromak uza atu kumpre ninia hakarak no atu ajuda ema. Nuneʼe, la susar ba ita atu fiar katak espíritu santu mak forsa boot neʼebé mai husi Maromak!—Lee Roma 1:20.
6. David husu ba Jeová atu halo saida?
6 Jeová kontinua uza ninia espíritu santu atu ajuda ita iha ita-nia moris hodi hatudu dalan mai ita ka lae? Nia promete ba David: “Haʼu sei halo ó sai matenek no hanorin ó kona-ba dalan neʼebé ó tenke tuir.” (Sal 32:8) David hakarak duni atu Maromak halo nuneʼe ba nia ka lae? Sin, tanba nia halo orasaun ba Jeová hodi husu: “Hanorin haʼu atu halo Ita-nia hakarak, tanba Ita mak haʼu-nia Maromak. Ita-nia espíritu mak diʼak; espíritu neʼe lori haʼu.” (Sal 143:10) Ita mós presiza iha hakarak hanesan David hodi husik Maromak nia espíritu atu lori ita. Tanbasá? Mai ita hanoin kona-ba razaun haat.
Ita la iha kbiit atu hili dalan rasik
7, 8. (a) Tanbasá mak ita la iha kbiit atu fó matadalan ba ita-nia an rasik? (b) Esplika toʼok tansá mak ita presiza Maromak nia ajuda atu moris iha mundu aat neʼe.
7 Tansá ita presiza Maromak nia espíritu santu atu hatudu dalan mai ita? Razaun primeiru mak ita la iha kbiit ka matenek atu fó matadalan ba ita-nia an rasik. Kuandu Jeová kria ema, nia la fó kbiit neʼe ba ema. Liután neʼe, nuʼudar ema sala-naʼin, dala barak ita hili sala dalan. Profeta Jeremias hatete: “Oh, Jeová, haʼu hatene duni katak ema la iha kbiit atu hili nia dalan rasik. Ema neʼebé laʼo, mós la iha kbiit atu hili ninia hakat.” (Jer 10:23) Tanbasá? Liuhusi Jeremias, Jeová hatete: “Laran mak makerek liu buat hotu-hotu no la bele kontrola. Sé mak bele hatene kona-ba nia?”—Jer 17:9; Mt 15:19.
8 Hanoin toʼok, se ema laʼo iha fatin neʼebé sira seidauk hatene, hanesan laʼo iha ai-laran ka rai-fuik maran neʼebé iha perigu barak, maibé sira la uza kompas ka la bá hamutuk ho ema neʼebé hatene didiʼak dalan, neʼe la matenek, loos ka lae? Se sira la hatene dalan no oinsá atu tau matan ba sira-nia an ka proteje sira-nia an, sira bele lakon sira-nia moris. Hanesan neʼe mós ho ita neʼebé moris iha mundu aat neʼe, ita la bele laʼo mesak, ita presiza Maromak atu hatudu dalan loos ba ita, hodi nuneʼe ita la tau ita-nia moris iha perigu laran. Tan neʼe, ita presiza duni husu Jeová nia ajuda hanesan David halo. Nia hatete: “Husik haʼu-nia hakat laʼo tuir Ita-nia dalan, iha neʼebá haʼu-nia hakat sei la nakdoko.” (Sal 17:5; 23:3) Maibé, oinsá mak ita bele simu Maromak nia ajuda?
9. Hanesan hatudu iha pájina 17, oinsá mak espíritu santu bele ajuda ita?
9 Kuandu ita haraik an no prontu atu simu Jeová nia ajuda, nia sei fó ninia espíritu santu atu hatudu dalan mai ita. Oinsá mak forsa neʼe bele ajuda ita? Jesus hatete ba ninia dixípulu sira: “Espíritu santu, neʼebé Aman sei haruka hodi haʼu-nia naran, sei hanorin imi buat hotu-hotu, hodi halo imi hanoin fali buat tomak neʼebé haʼu hateten ona ba imi.” (Joao 14:26) Kuandu ita halo orasaun no estuda Maromak nia Liafuan, inklui mós Jesus nia hanorin, espíritu santu sei ajuda ita atu komprende Maromak nia matenek hodi ita bele halo tuir nia. (1 Kor 2:10) Liután neʼe, bainhira ita hasoru susar ruma iha ita-nia moris, Maromak nia espíritu santu sei ajuda ita atu hatene saida mak ita presiza halo. Forsa neʼe bele ajuda ita atu hanoin-hetan matadalan husi Bíblia neʼebé ita aprende tiha ona hodi bele halo desizaun neʼebé diʼak.
Jesus husik espíritu santu lori nia
10, 11. Kuandu Jesus iha lalehan, nia hatene katak espíritu santu sei halo saida? Jesus hetan ajuda saida?
10 Razaun segundu atu ita husik espíritu santu lori ita mak tanba Maromak nia Oan rasik halo nuneʼe. Antes Jesus mai iha rai, nia hatene ona katak espíritu santu sei ajuda nia tanba Bíblia fó-hatene nanis kona-ba nia, hodi dehan: “Jeová nia espíritu sei hela ho nia, espíritu matenek nian no espíritu atu hatene, espíritu atu fó konsellu no espíritu kbiit nian, espíritu koñesimentu nian no espíritu atu taʼuk ba Jeová.” (Isa 11:2) Tanba Jesus hatene katak nia sei hasoru susar barak iha ninia moris iha rai, nia hakarak duni atu Maromak nia espíritu santu ajuda nia!
11 Kuandu Jesus iha rai, Jeová nia liafuan kona-ba Jesus sai loos duni. Livru Lucas koʼalia kona-ba buat neʼebé akontese kuandu Jesus foin hetan batizmu, hodi dehan: “Nakonu ho espíritu santu, Jesus husik [Jordaun]. Espíritu lori nia ba rai-fuik maran.” (Lc 4:1) Iha neʼebá, kuandu Jesus halo orasaun no hanoin kleʼan, karik Jeová fó matadalan ba nia atu bele hasoru buat neʼebé sei akontese ba nia. Maromak nia espíritu santu book ninia neon no laran atu bele foti desizaun neʼebé diʼak. Ida-neʼe ajuda Jesus atu hatene ninia Aman nia hakarak no halo tuir.
12. Tanbasá mak ita presiza husu Maromak nia espíritu atu lori ita?
12 Jesus hatene katak Maromak nia espíritu santu importante duni iha ninia moris, tan neʼe nia fó laran-manas ba ninia dixípulu sira atu husu Maromak nia espíritu santu no atu husik espíritu lori sira. (Lee Lucas 11:9-13.) Tansá mak ita presiza husu Maromak nia espíritu atu lori ita? Tanba espíritu neʼe bele ajuda ita atu troka ita-nia hanoin hodi iha “Kristu nia hanoin”. (Rom 12:2; 1 Kor 2:16) Sin, hodi husik Maromak nia espíritu hatudu dalan mai ita, ita bele iha hanoin hanesan Kristu no halo tuir ninia ezemplu.—1 Ped 2:21.
Mundu nia espíritu lori ema ba dalan sala
13. Saida mak mundu nia espíritu? Mundu nia espíritu book ema atu halo saida?
13 Razaun terseiru atu ita husik Maromak nia espíritu santu lori ita mak tanba se ita la iha espíritu neʼe atu hatudu dalan mai ita, mundu nia espíritu bele lori ita ba dalan sala. Mundu nia espíritu neʼe mak forsa neʼebé domina ema barak. Espíritu neʼe book sira atu hatudu hahalok neʼebé la hanesan ho hahalok neʼebé Maromak nia espíritu lori mai. Duké ajuda ema atu iha Kristu nia hanoin, mundu nia espíritu book ema atu iha hanoin no atu hatudu hahalok hanesan Satanás, ukun-naʼin mundu neʼe nian. (Lee Efeso 2:1-3; Tito 3:3.) Kuandu ema husik mundu nia espíritu kontrola sira no hatudu hahalok aat isin nian, ida-neʼe lori rezultadu neʼebé ladiʼak, no ikusmai sira “sei la simu Maromak nia reinu nuʼudar liman-rohan”.—Gal 5:19-21.
14, 15. Oinsá mak ita bele manán hasoru mundu aat neʼe nia espíritu?
14 Atu ita bele tahan hasoru mundu aat neʼe nia espíritu, Jeová fó mai ita buat neʼebé ita presiza. Tan neʼe, apóstolu Paulo hatete: “Harii imi-nia kbiit iha . . . Naʼi, husi nia kbiit nia tulun.” Tanbasá? Tanba ‘wainhira loron aat sei mosu mai, ita sei manán’. (Ef 6:10, 13) Liuhusi ninia espíritu santu, Jeová fó forsa mai ita atu tahan hasoru Satanás neʼebé koko makaʼas atu lori ita ba dalan sala. (Apok 12:9) Mundu nia espíritu neʼe makaʼas no kona ita hotu, maibé Maromak nia espíritu santu makaʼas liu no sei ajuda ita!
15 Iha apóstolu sira-nia tempu, Pedro koʼalia kona-ba ema neʼebé husik tiha lia-loos, hodi dehan: “Sira husik ona dalan loos; sira laʼo dalan sala.” (2 Ped 2:15) Maibé, ita kontente tanba ita “la simu mundu nia espíritu maibé [simu] espíritu neʼebé mai husi Maromak”! (1 Kor 2:12) Hodi husik Maromak nia espíritu lori ita no hodi uza buat hotu neʼebé Jeová fó mai ita atu hametin ita-nia relasaun ho nia, ita bele manán hasoru Satanás nia mundu aat neʼe nia espíritu.—Gal 5:16.
Espíritu santu lori hahalok diʼak
16. Espíritu santu ajuda ita atu hatudu hahalok saida deʼit?
16 Razaun ikus atu ita husik Maromak nia espíritu lori ita mak tanba espíritu santu bele ajuda ita atu hatudu hahalok diʼak. (Lee Galasia 5:22, 23.) Ita hotu hakarak haburas liután domin, haksolok, no dame, loos ka lae? No ita hotu hakarak hatudu pasiénsia, laran-diʼak no laran-luak liután. Diʼak mós atu ita hametin liután ita-nia fiar, hatudu laran-maus nafatin, no hatene kontrola an diʼak liután. Hahalok hirak-neʼe lori diʼak ba ita rasik, ba família, no mós ba ita-nia maluk sira iha kongregasaun. Tan neʼe, ita hotu presiza kontinua hakaʼas an atu hatudu hahalok sira-neʼe, tanba la iha rohan kona-ba hatudu hahalok sira-neʼe.
17. Oinsá mak ita bele haburas liután hahalok sira neʼebé espíritu santu lori mai?
17 Diʼak atu ita husu ba ita-nia an: ‘Haʼu-nia liafuan no hahalok hatudu katak haʼu husik espíritu santu lori haʼu, no haʼu hatudu hahalok sira neʼebé espíritu santu lori mai ka lae?’ (2 Kor 13:5a; Gal 5:25) Se ita haree katak ita presiza haburas liután hahalok balu neʼebé espíritu lori mai, ita bele halo saida? Ita presiza hakaʼas an liután atu buka espíritu santu nia ajuda. Ita halo nuneʼe hodi estuda didiʼak kona-ba hahalok ida-idak neʼebé espíritu lori mai hodi uza Bíblia no ita-nia livru sira. Hodi halo nuneʼe, ita bele hatene oinsá mak ita bele hatudu hahalok sira-neʼe iha ita-nia moris loroloron nian, no hakaʼas an liután atu hatudu hahalok sira-neʼe. * Kuandu ita haree dalan oioin neʼebé espíritu santu ajuda ita iha ita-nia moris no mós iha ita-nia maluk kristaun sira-nia moris, ida-neʼe ajuda ita komprende tansá importante tebes atu husik espíritu santu lori ita.
Husik Maromak nia espíritu lori ita
18. Saida mak ita bele aprende husi Jesus nia ezemplu?
18 Jesus, nuʼudar Maromak nia “badain”, hola parte atu kria lalehan no rai. Tan neʼe, nia hatene ho didiʼak kona-ba forsa magnétiku neʼebé haleʼu rai, forsa neʼebé ajuda ema atu bele hatene dalan kuandu sira uza búsola, ka kompas. (Prov 8:30; Joao 1:3) Maski Bíblia la fó-hatene se Jesus uza forsa magnétiku neʼe atu laʼo rai, maibé Bíblia hatete katak Maromak nia espíritu santu mak forsa neʼebé hatudu dalan ba nia iha ninia moris. Jesus simu no hakarak atu espíritu santu lori nia, no nia prontu atu halo tuir. (Mc 1:12, 13; Lc 4:14) Entaun, ita mós husik Maromak nia espíritu lori ita hanesan Jesus ka lae?
19. Ita presiza halo saida deʼit atu husik espíritu santu lori ita?
19 Maromak nia espíritu lori sira hotu neʼebé hakarak no prontu atu halo tuir. Oinsá mak ita bele husik espíritu neʼe lori ita atu laʼo iha dalan neʼebé loos? Ita presiza halo orasaun beibeik ba Jeová hodi husu nia atu haraik ninia espíritu santu no ajuda ita atu simu espíritu neʼe lori ita. (Lee Efeso 3:14-16.) Ita mós presiza estuda Bíblia neʼebé Maromak leno liuhusi ninia espíritu santu. (2 Tim 3:16, 17) No mós, ita presiza halo tuir konsellu no matadalan sira husi Bíblia. Hodi halo buat hirak-neʼe, ita hatudu katak ita tau fiar ba Jeová nia kbiit atu lori ita iha dalan neʼebé diʼak liu hotu iha mundu aat neʼe.
[Nota–rodapé]
^ par. 17 Atu hetan informasaun liután kona-ba hahalok ida-idak neʼebé espíritu santu lori mai, haree iha Indeks Publikasi Menara Pengawal iha “Buah Roh Allah”, no mós iha “Berdasarkan Nama”.
Ita hanoin-hetan?
• Oinsá mak espíritu santu bele ajuda ita iha ita-nia moris?
• Razaun haat saida mak ita hakarak husik espíritu santu lori ita?
• Ita presiza halo saida deʼit atu husik espíritu santu lori ita iha dalan neʼebé loos?
[Pergunta estudu nian]
[Dezeñu iha pájina 15]
Maromak nia espíritu santu mak forsa neʼebé ajuda Jesus iha ninia moris
[Dezeñu iha pájina 17]
Maromak nia espíritu lori sira hotu neʼebé hakarak no prontu atu halo tuir
