Hetan rezultadu diʼak no haksolok hodi estuda Bíblia

Oinsá mak ita bele haksolok liután hodi estuda Bíblia? Oinsá mak ita bele estuda Bíblia iha dalan neʼebé lori rezultadu diʼak liután ba ita? Mai ita hanoin kona-ba buat tolu neʼebé importante kuandu ita estuda Bíblia mesak.

1 ORASAUN: Hakat primeiru mak halo orasaun. (Sal 42:8) Tanbasá? Tanba estuda Maromak nia Liafuan mak parte husi ita-nia adorasaun. Tan neʼe, ita presiza husu Jeová nia ajuda atu ita iha hanoin neʼebé loos no atu hetan espíritu santu. (Lc 11:13) Irmán Barbara, neʼebé kleur ona serbí nuʼudar misionáriu, nia hatete: “Haʼu sempre halo orasaun antes atu lee ka estuda Bíblia. Kuandu haʼu halo nuneʼe, haʼu sente Jeová besik ho haʼu no nia kontente kona-ba buat neʼebé haʼu halo.” Kuandu ita halo orasaun antes estuda, ida-neʼe loke ita-nia neon no laran atu bele simu ai-han espirituál neʼebé iha ita-nia oin.

2 HANOIN KLEʼAN: Tanba ladún iha tempu, ema balu karik lee liu deʼit Maromak nia Liafuan. Maibé ida-neʼe ladún lori rezultadu diʼak ba sira. Irmaun Carlos, neʼebé serbí Jeová durante tinan 50 ona, nia hatene katak importante tebes atu fó tempu atu hanoin kleʼan kona-ba buat neʼebé nia estuda. Nia dehan: “Agora, haʼu lee Bíblia uitoan liu duké uluk, hanesan loron ida pájina rua deʼit. Hodi halo nuneʼe, haʼu bele uza haʼu-nia tempu barak liu atu hanoin kleʼan kona-ba buat neʼebé haʼu lee atu bele aprende lisaun importante ruma.” (Sal 77:12) Kuandu ita uza tempu atu hanoin kleʼan, ida-neʼe ajuda ita atu aumenta ita-nia koñesimentu no komprende diʼak liután kona-ba Maromak nia hakarak.—Kol 1:9-11.

3 HALO TUIR: Kuandu ita haree katak atividade ruma bele ajuda ita iha ita-nia moris, ita sei hetan rezultadu diʼak husi atividade neʼe. Nuneʼe mós ho estuda Bíblia. Irmaun joven naran Gabriel, neʼebé iha toman atu estuda Bíblia, nia hatete: “Hodi estuda Bíblia ajuda haʼu atu hasoru problema oioin neʼebé mosu loroloron, no ajuda haʼu atu ajuda fali ema seluk.” Nia mós hatete: “Iha haʼu-nia moris, haʼu hakaʼas an atu halo tuir buat hotu neʼebé haʼu aprende.” (Deut 11:18; Jos 1:8) Sin, hodi estuda Bíblia, ita sei hetan koñesimentu neʼebé ita bele halo tuir iha ita-nia moris.—Prov 2:1-5.

HANOIN-HETAN: Ita iha oportunidade furak atu buka matenek husi Jeová, matenek hotu nia Hun! (Rom 11:33) Tan neʼe, kuandu ita estuda, ita presiza halo orasaun uluk hodi husu Jeová nia espíritu santu atu ajuda ita iha hanoin neʼebé loos. Depois, uza tempu atu hanoin kleʼan kona-ba buat neʼebé ita lee. No mós, halo tuir iha ita-nia moris buat neʼebé ita aprende. Kuandu ita halo buat hirak-neʼe, ita sei hetan rezultadu diʼak no haksolok hodi estuda Bíblia.