Sin, ida-neʼe mak Livru Haklaken atu estuda!

Agora iha mudansa balu iha ita-nia Livru Haklaken, ida-neʼe atu halo sai furak liu no mós atu ajuda ita hotu hodi estuda lia-loos husi Jeová nia Liafuan neʼebé folin-boot.—Sal 1:2; 119:97.

Tinan haat liubá, ami komesa halo Livru Haklaken oin rua, ida atu fahe ba públiku no ida ba ita Testemuña ba Jeová ho estudante Bíblia neʼebé laʼo ba oin iha lia-loos.

Kona-ba Livru Haklaken atu estuda, irmaun ida neʼebé serbí Jeová kleur ona hatete: “Kuandu haʼu foin primeiravés haree livru atu estuda nian, haʼu sente ida-neʼe kapás tebes. Informasaun neʼebé esplika didiʼak kona-ba lia-loos neʼebé kleʼan, ida-neʼe book duni haʼu-nia laran. Obrigadu barak ba arranju foun neʼe.” Irmaun ida seluk mós hatete: “Haʼu hein katak haʼu sei uza haʼu-nia tempu barak liu hodi estuda livru neʼe no loke haʼu-nia Bíblia.” Ami fiar katak imi hotu hanoin hanesan irmaun naʼin-rua neʼe.

Hanesan imi hatene ona, ita iha Livru Haklaken (The Watchtower iha lia-inglés) husi tinan 1879. Neʼe laʼós buat neʼebé ita halo ho ita rasik nia forsa, maibé tanba Jeová mak haraik ninia espíritu santu no fó bensaun ba ita. (Zac 4:6) Durante tinan 133 nia laran, Livru Haklaken iha mudansa balu kona-ba dezeñu iha oin. Iha tinan 2012, iha livru neʼe nia oin sei iha dezeñu neʼebé hatudu irmaun-irmán sira neʼebé halaʼo serbisu haklaken, hodi fó-hanoin ita kona-ba ita-nia knaar atu fó sasin ho didiʼak kona-ba Jeová nia Reinu, ka ukun. (Apos 28:23) Iha pájina 2, ita sei haree retratu neʼebé uza atu halo dezeñu iha livru nia oin, no mós liafuan neʼebé esplika kona-ba retratu no fatin neʼebé sira halaʼo serbisu haklaken. Ida-neʼe sei fó-hanoin ita hotu katak Jeová nia povu haklaken daudauk lia-foun diʼak “iha mundu tomak”.—Mt 24:14.

Livru neʼe mós iha mudansa saida tan? Uluk iha lisaun ida-idak nia parte ikus, iha kaixa neʼebé iha pergunta sira, maibé agora pergunta sira-neʼe tau fali iha parágrafu primeiru nia sorin. Ida-neʼe sei ajuda ita hotu atu buka-hatene pontu importante husi lisaun ida-idak kuandu ita lee no estuda informasaun neʼe. Maibé, klaru katak irmaun neʼebé halaʼo estudu Livru Haklaken bele uza nafatin pergunta sira-neʼe atu ramata estudu. Ita mós sei haree katak númeru pájina ho númeru parágrafu sai boot uitoan.

Hanesan livru ida-neʼe esplika, livru neʼe mós sei iha série regulár foun ho títulu “Husi ita-nia arkivu” hodi hatudu Testemuña ba Jeová nia istória modernu. Livru neʼe mós dala ruma sei fó sai esperiénsia sira ho títulu “Sira fó sira-nia an ho hakarak rasik”. Informasaun neʼe sei hatudu oinsá mak ita-nia irmaun-irmán sira halaʼo serbisu haklaken ho haksolok iha fatin neʼebé presiza haklaken-naʼin barak liután.

Ami hein katak imi sei haksolok atu estuda Maromak nia Liafuan hodi uza livru neʼe.

Editora sira

[Dezeñu iha pájina 3]

1879

[Dezeñu iha pájina 3]

1895

[Dezeñu iha pájina 3]

1931

[Dezeñu iha pájina 3]

1950

[Dezeñu iha pájina 3]

1974

[Dezeñu iha pájina 3]

2008