Kuandu irmán Charlotte White neʼebé haklaken-naʼin tempu-tomak foin toʼo iha Louisville, Kentucky, Estadus Unidus, ema hotu hakfodak haree nia dada mala neʼebé iha roda.

IDA-NEʼE akontese iha tinan 1908 kuandu irmán White dada ema barak nia atensaun ho buat foun ida neʼebé ema foin inventa. Neʼe mak Dawn-Mobile, mala neʼebé iha roda. Irmán White hatete: “Ema barak koʼalia kona-ba ida-neʼe, no haʼu dada ema nia atensaun.”

Estudante Bíblia sira * haree katak sira presiza fahe lia-loos neʼebé sira aprende hodi estuda Bíblia ho badinas. Sira barak aprende kona-ba Bíblia hodi uza livru 6 neʼebé hamutuk iha naran Millennial Dawn (ikusmai bolu Studies in the Scriptures). Ema kristaun sira neʼebé prontu atu laʼo dook, sira haklaken iha fatin oioin hanesan iha knua sira no iha foho. Sira fahe livru sira-neʼe ba ema hotu neʼebé hakarak atu lee.

Iha tinan 1908, irmán White ho haklaken-naʼin seluk fahe livru sira-neʼe, no sira husu deʼit dolar 1,65 atu selu buat neʼebé sira gasta atu halo livru sira-neʼe. Ema ida neʼebé la gosta haklaken-naʼin sira hatete katak osan neʼebé ema sira fó ba livru sira-neʼe uitoan deʼit. Kuandu sira haklaken duké fahe kedas livru Dawn, sira hakerek iha lista ema neʼebé hakarak hameno livru sira-neʼe. No iha loron neʼebé ema simu saláriu, haklaken-naʼin sira bá fali atu fó livru sira-neʼe ba sira neʼebé hameno.

Irmán Malinda Keefer hanoin-hetan katak iha tempu neʼebá semana-semana ema hameno livru 200 toʼo 300. Maibé, tanba ema barak hakarak lee livru sira Millennial Dawn, ida-neʼe lori problema. Problema  mak livru sira-neʼe todan tebes. Porezemplu, livru númeru 6 deʼit iha pájina 740! Livru The Watch Tower hatete katak livru limanulu nia todan mak kilograma 18, ida-neʼe halo susar atu lori livru sira-neʼe, liuliu ba irmán sira.

Atu ajuda irmaun-irmán sira atu lori livru sira Millenial Dawn, irmaun James Cole inventa buat foun ida neʼebé sira hanaran Dawn-Mobile. Neʼe mak besi neʼebé solda hamutuk no iha roda rua hodi uza atu dada mala. Iha tinan 1908, irmaun Cole fó sai kona-ba Dawn-Mobile neʼe iha reuniaun boot iha sidade Cincinnati, iha Ohio, no rona-naʼin sira kontente tebes atu haree buat foun neʼe. Iha Dawn-Mobile neʼe nia besi sorin-sorin iha botaun neʼebé hakerek Dawn-Mobile tanba ida-neʼe uza liuliu atu lori livru sira Millenial Dawn. Dawn-Mobile neʼe bele halo aas ka bele halo badak no bele dada mós iha estrada neʼebé la iha alkatraun. Kuandu ema sai toman ona atu uza Dawn-Mobile, sira bele uza ho liman ida deʼit atu dada mala neʼebé nakonu ho livru sira. Depois haklaken, sira bele lulun saʼe roda hodi nuneʼe fasil atu lori mala kuandu sira fila ba uma. Tanba la presiza ona atu lori kaixa todan neʼebé nakonu ho livru, irmaun Cole hatete: “Haʼu-nia kabaas sei la tohar ona.”

Irmán sira neʼebé halo serbisu haklaken tempu-tomak bele hetan Dawn-Mobile ida no sira la presiza selu. Ema seluk selu dolar 2,50. Irmán Keefer, neʼebé ita bele haree iha foto neʼe, sai toman atu uza Dawn-Mobile toʼo nia bele uza liman ida deʼit atu lori Dawn-Mobile no uza liman seluk atu lori pasta ida tan neʼebé iha livru sira. Tanba ema barak hatudu interese iha fatin ida iha Pennsylvania, Estadus Unidus, irmán Keefer baibain laʼo bá-mai iha ponte ba dala tolu ka haat iha loron neʼebé nia lori livru sira Millenial Dawn ba ema nia uma.

Iha tinan 1987, pilotu-aviaun ida inventa mala ho roda neʼebé agora ema barak uza kuandu halo viajen. Maibé maizumenus tinan atus ida liubá, Estudante Bíblia sira uza ona Dawn-Mobile atu laʼo bá-mai hodi fahe fini lia-loos nian husi Bíblia. Ita bele fiar katak sira la moe kuandu ema hotu hateke ba sira nuʼudar sira laʼo bá-mai hodi dada Dawn-Mobile, tanba ida-neʼe bele dada ema nia atensaun ba sira-nia serbisu importante hodi fahe mensajen husi Bíblia.

[Nota–rodapé]

[Liafuan neʼebé foti husi pájina 32]

Irmán Keefer laʼo bá-mai iha ponte ba dala barak iha loron neʼebé nia lori livru sira ba ema

[Dezeñu iha pájina 32]

Dawn-Mobile ajuda lori livru sira