Hametin hahalok diʼak iha kongregasaun
Hametin hahalok diʼak iha kongregasaun
“Ita Naʼi, Kristu Jesus, nia grasa hela ho imi.”—FLP 4:23.
OINSÁ MAK ITA BELE HABURAS HAHALOK DIʼAK IHA KONGREGASAUN . . .
kuandu ita ransu ho ita-nia maluk kristaun sira?
hodi haklaken ho laran-manas?
hodi fó-hatene ba katuas sira kona-ba sala boot?
1. Ema kristaun iha Filipe no Tiatira hatudu hahalok saida deʼit?
IHA apóstolu sira-nia tempu, ema kristaun iha Filipe, maski sira ema neʼebé kiak, maibé sira hatudu laran-luak no domin ba sira-nia maluk kristaun. (Flp 1:3-5, 9; 4:15, 16) Tan neʼe, apóstolu Paulo hakerek ba sira, hodi dehan: “Ita Naʼi, Kristu Jesus, nia grasa hela ho imi [“tanba hahalok diʼak neʼebé imi hatudu”, MF]” (Flp 4:23) Ema kristaun sira iha Tiatira mós hatudu hahalok diʼak, tan neʼe Jesus Kristu hatete ba sira: “Haʼu hatene kona-ba ó-nia domin, ó-nia fiar, ó-nia serbisu no ó-nia terus ho pasiénsia, katak ó-nia hahalok ikus diʼak liu fali sira uluk nian.”—Apok 2:19.
2. Tanbasá mak importante tebes atu ita hatudu hahalok diʼak iha kongregasaun?
2 Ohin loron mós, kongregasaun sira husi Testemuña ba Jeová hakaʼas an atu haburas hahalok diʼak. Porezemplu, kongregasaun balu hatudu ezemplu neʼebé diʼak tebes kona-ba hahalok laran-diʼak no domin. Karik ita mós hatene kongregasaun balu neʼebé badinas atu haklaken no hafolin serbisu pioneiru. Maski kongregasaun ida-idak hatudu hahalok neʼebé la hanesan ba malu, maibé kuandu ita ida-idak hatudu hahalok diʼak, ita hametin unidade iha kongregasaun no ajuda kongregasaun tomak atu laʼo ba oin. (1 Kor 1:10) Maibé, se ita hatudu hahalok neʼebé ladún diʼak, ita bele halo kongregasaun dukur iha dalan espirituál, ka la laran-manas atu halo serbisu ba Jeová, no ikusmai husik deʼit hahalok sala boot iha kongregasaun laran. (1 Kor 5:1; Apok 3:15, 16) Entaun, ita-nia kongregasaun hatudu hahalok saida? Oinsá mak ita ida-idak bele haburas hahalok diʼak iha kongregasaun?
HABURAS HAHALOK DIʼAK
3, 4. Iha dalan saida deʼit mak ita bele hahiʼi Jeová iha kongregasaun?
3 David kanta ba Jeová, hodi dehan: “Haʼu sei hanaʼi Ita iha Ita-nia povu barak nia leet; iha ema barak nia leet haʼu sei hahiʼi Ita.” (Sal 35:18) David la dada an atu hahiʼi Jeová kuandu nia hamutuk ho Maromak nia atan sira seluk. Iha reuniaun sira, hanesan Estudu Livru Haklaken, ita iha oportunidade atu hatudu ita-nia fiar no laran-manas hodi fó komentáriu. Ita hotu bele husu ba ita-nia an: ‘Haʼu buka oportunidade atu hola parte iha reuniaun sira ka lae? Haʼu prepara didiʼak hodi bele fó komentáriu neʼebé ajuda irmaun-irmán sira ka lae? Nuʼudar família nia ulun, haʼu ajuda haʼu-nia oan sira atu prepara nanis komentáriu no hanorin sira atu fó resposta ho sira rasik nia liafuan ka lae?’
4 Hodi kanta knananuk ho laran iha reuniaun, ita mós bele hatudu katak ita-nia laran metin atu halo buat neʼebé loos. David dehan: “Haʼu-nia laran metin, oh, Maromak, haʼu-nia laran metin. Haʼu sei kanta no toka múzika.” (Sal 57:7) Knananuk sira neʼebé ita uza iha reuniaun fó oportunidade diʼak mai ita atu “kanta” ba Jeová ho laran metin. Se ita seidauk hatene kanta didiʼak knananuk balu, diʼak atu treinu iha Adorasaun Família nian. Mai ita kontinua ‘kanta ba Jeová durante ita-nia moris tomak no toka múzika ba nia iha tempu hotu neʼebé ita moris.’—Sal 104:33.
5, 6. Iha dalan saida deʼit mak ita bele hatudu laran-diʼak no laran-luak ba ita-nia maluk? Oinsá mak ida-neʼe bele ajuda kongregasaun?
5 Kuandu ita hatudu laran-diʼak ba ita-nia irmaun-irmán sira, ida-neʼe haburas domin iha kongregasaun. Iha kapítulu ikus husi karta neʼebé Paulo hakerek ba ema ebreu kristaun, nia dehan: “Kontinua hadomi malu nafatin nuʼudar maun-alin, no hanoin atu simu ema laʼo-rai sira ho laran-diʼak.” (Ebr 13:1, 2) Dalan neʼebé diʼak atu hatudu laran-diʼak mak konvida katuas área nian ka katuas vizitante ho sira-nia feen, ka pioneiru sira iha kongregasaun hodi han hamutuk. Dala ruma, diʼak mós atu konvida irmaun-irmán sira neʼebé faluk ona, família neʼebé inan ka aman la iha, ka irmaun-irmán sira seluk atu han ka halo Adorasaun Família nian hamutuk.
6 Paulo haruka Timóteo atu fó laran-manas ba ema kristaun seluk atu “halo hahalok diʼak no sai riku ho hahalok diʼak, atu sai laran-luak . . . nuneʼe, sira bele hetan moris neʼebé mesak mak loloos”. (1 Tim 6:17-19) Paulo hakarak sira atu haburas hahalok laran-luak. Maski ita hasoru susar kona-ba ekonomia, ita bele hatudu nafatin laran-luak ba malu. Dalan ida mak ajuda irmaun-irmán sira neʼebé presiza transporte hodi tula sira bá haklaken ka bá reuniaun. No oinsá mak sira neʼebé hetan ajuda bele hatudu agradese? Karik sira bele fó osan uitoan atu hola mina. Dalan ida seluk atu hatudu katak ita hadomi no hafolin ita-nia irmaun-irmán sira mak uza ita-nia tempu atu hamutuk ho sira. Kuandu ita hatudu hahalok diʼak “liuliu ba sira neʼebé ita-nian iha fiar” no prontu atu fahe ita-nia tempu no buat neʼebé ita iha, ita bele hametin domin ba sira no haburas hahalok diʼak iha kongregasaun.—Gal 6:10.
7. Tanbasá mak importante atu la fó sai ita-nia maluk nia segredu ba ema seluk?
7 Ita mós bele hametin domin ba ita-nia maluk sira hodi sai belun neʼebé diʼak ho sira no hodi la fó sai sira-nia segredu ba ema seluk. (Lee Provérbios 18:24. *) Se ita-nia maluk fó-hatene ita kona-ba buat ruma neʼebé nia lakohi ema seluk atu hatene, ita labele fó sai segredu neʼe ba ema seluk, hodi nuneʼe ita bele hatudu katak ita mak belun neʼebé diʼak. Kuandu ita-nia irmaun ka irmán ida koʼalia kona-ba ninia hanoin ka sentimentu hodi fiar katak ita la konta fali ba ema seluk, ida-neʼe bele hametin liután ita-nia domin ba malu. Mai ita sai belun neʼebé diʼak hodi la fó sai ita-nia maluk nia segredu no ajuda kongregasaun atu sai hanesan família ida neʼebé besik ba malu.—Prov 20:19.
HAKLAKEN HO LARAN-MANAS
8. Jesus fó konsellu saida ba ema kristaun iha Laodiseia? Tanbasá?
8 Jesus hatete ba kongregasaun iha Laodiseia: “Haʼu hatene ó-nia hahalok sira: ó la manas no la malirin. Haʼu hakarak katak ó manas ka malirin, maibé tanba ó la manas ka la malirin maibé morna deʼit, haʼu sei muta ó husi haʼu-nia ibun.” (Apok 3:15, 16) Ema kristaun sira iha Laodiseia la laran-manas atu haklaken. Karik hahalok neʼe halo sira ladún besik ba malu iha kongregasaun. Tan neʼe, ho domin Jesus fó konsellu ba sira: “Ida neʼebé haʼu hadomi, haʼu siʼak no dixiplina. Neʼe duni, hakribi tebetebes ó-nia sala bá no laran badinas bá.”—Apok 3:19.
9. Oinsá mak halo serbisu haklaken ho laran-manas ajuda kongregasaun?
9 Atu haburas hahalok diʼak iha kongregasaun, ita presiza laran-manas no badinas atu haklaken. Tanba kongregasaun mak organiza serbisu haklaken atu buka ema neʼebé laran-diʼak iha ita-nia área no hanorin sira kona-ba lia-loos, ita presiza duni halo serbisu neʼe ho laran-manas hanesan Jesus halo. (Mt 28:19, 20; Lc 4:43) Hodi halo nuneʼe, ita hametin liután ita-nia unidade nuʼudar Maromak nia maluk serbisu-naʼin. (1 Kor 3:9) Kuandu ita haklaken hamutuk ho ita-nia maluk sira no haree oinsá sira defende sira-nia fiar no hatudu domin ba Jeová no ba lia-loos, ida-neʼe book ita atu hadomi no hatudu respeitu liután ba sira. Nuneʼe, hodi serbí Jeová “hamutuk ida deʼit”, ita haburas unidade iha kongregasaun laran.—Lee 1 Korinto 1:10.
10. Oinsá mak hadiʼa dalan neʼebé ita haklaken bele ajuda ita-nia maluk sira iha kongregasaun?
10 Kuandu ita hakaʼas an atu hadiʼa dalan neʼebé ita haklaken, ida-neʼe bele ajuda ema seluk. Porezemplu, se ita hanoin ema neʼebé ita hasoru iha haklaken-fatin no hakaʼas an atu koʼalia ba sira iha dalan neʼebé book sira-nia laran, ita bele sai laran-manas liután. (Mt 9:36, 37) Se ita laran-manas, ida-neʼe mós sei ajuda ita-nia maluk sira atu haklaken ho laran-manas. Kuandu Jesus haruka ninia dixípulu sira atu bá haklaken, nia “haruka sira rua-rua” duké laʼo ketaketak. (Lc 10:1) Jesus halo ida-neʼe laʼós deʼit hodi fó treinu ba sira maibé atu ajuda sira haklaken ho laran-manas. Ita kontente atu serbisu hamutuk ho maluk sira neʼebé laran-manas, loos ka lae? Sira-nia hahalok badinas iha haklaken fó laran-manas ba ita atu kontinua halo serbisu neʼe.—Rom 1:12.
KETA MURAMURA KA SUBAR SALA BOOT
11. Ema Israel balu hatudu hahalok saida? Ikusmai, hahalok neʼe book sira atu halo saida?
11 Liutiha semana balu deʼit depois ema Israel sai nasaun foun, sira balu komesa muramura. Ikusmai, hahalok neʼe book sira atu kontra hasoru Jeová no ema neʼebé reprezenta nia, Moisés no Aarão. (Êx 16:1, 2) Tan neʼe, ema neʼebé sai husi rai-Egiptu, uitoan deʼit mak tama iha rai neʼebé Maromak promete. Jeová mós la husik Moisés tama iha rai neʼe tanba kuandu ema Israel sira hatudu hahalok ladiʼak, Moisés la hasoru situasaun neʼe iha dalan neʼebé diʼak. (Deut 32:48-52) Ohin loron, ita bele halo saida atu sees husi hahalok ladiʼak?
12. Atu la haburas hahalok muramura, ita presiza halo saida deʼit?
12 Ita tenke kuidadu atu la haburas hahalok muramura. Atu ita la hatudu hahalok hanesan neʼe, ita presiza haburas haraik-an no respeitu ba sira neʼebé mak ita-nia ulun. Ita mós presiza hili didiʼak kolega neʼebé ita atu ransu. Se ita ransu beibeik ho kolega eskola ka maluk serbisu neʼebé la halo tuir Jeová, ka se ita hili atividade halimar nian neʼebé ladiʼak, ida-neʼe sei lori rezultadu aat ba ita. Nuneʼe, diʼak atu ita la ransu ho ema neʼebé muramura ka ema neʼebé lakohi hakruʼuk an ba sira neʼebé mak nuʼudar ulun.—Prov 13:20.
13. Hahalok muramura bele hamosu hahalok aat seluk saida deʼit iha kongregasaun laran?
13 Kuandu ema iha kongregasaun muramura beibeik, neineik-neineik ida-neʼe bele hamosu hahalok aat liután neʼebé estraga sira-nia relasaun diʼak ho Jeová. Porezemplu, hahalok muramura bele hanetik dame no unidade iha kongregasaun. Liután neʼe, lori lia kona-ba ita-nia maluk kristaun bele halo sira sente triste ka laran-tun no bele mós halo ita monu ba sala aat liután, hanesan bosok kona-ba ita-nia maluk no tarata aat sira. (Lev 19:16; 1 Kor 5:1) Iha kongregasaun iha apóstolu sira-nia tempu, iha ema balu neʼebé muramura kona-ba irmaun sira neʼebé tau matan ba kongregasaun. (Jud 8, 16) Tanba sira muramura hasoru katuas sira iha kongregasaun laran, Maromak la simu sira.
14, 15. (a) Se ita husik ita-nia maluk ida halo sala boot, saida mak bele akontese ba kongregasaun? (b) Se ita hatene katak ita-nia maluk subar hela sala boot ruma, ita tenke halo saida?
14 Se ita hatene katak ita-nia maluk ruma subar hela sala boot, porezemplu hemu tua demais, haree pornografia, ka halo hahalok imorál, ita sei halo saida? (Ef 5:11, 12) Se ita taka matan deʼit ba ita-nia maluk nia sala boot, ida-neʼe bele hanetik kongregasaun atu la simu Jeová nia espíritu santu no bele estraga dame iha kongregasaun. (Gal 5:19-23) Nuneʼe, atu hametin hahalok diʼak iha kongregasaun, ita tenke halo tuir Paulo nia konsellu atu ‘soe fermentu tuan’, hodi la simu hahalok aat ruma. Ita bele halo saida deʼit atu haburas dame iha kongregasaun?
15 Hanesan ita koʼalia ona, importante tebes atu ita la fó sai ita-nia maluk nia segredu, liuliu se sira koʼalia kona-ba sira-nia hanoin ka sentimentu tanba sira tau fiar ba ita. Se ita konta fali ita-nia maluk nia segredu ba ema seluk, ida-neʼe hahalok sala no hakanek sira-nia laran! Maibé, se ita-nia maluk ruma halo sala neʼebé boot, katuas sira iha kongregasaun presiza hatene kona-ba sala neʼe, tanba sira mak iha responsabilidade atu tau matan ba situasaun hanesan neʼe. (Lee Levítico 5:1. *) Tan neʼe, se ita hatene katak irmaun ka irmán ida halo sala boot ruma, ita tenke hatete ba nia atu bá koʼalia ho katuas sira hodi husu sira-nia ajuda. (Tgo 5:13-15) Maibé, se liutiha tempu balu, ema neʼe la koʼalia ho katuas sira, ita mak presiza bá fó-hatene katuas.
16. Tanbasá mak importante atu fó-hatene ba katuas sira kona-ba sala boot?
16 Atu ita hotu bele sente seguru iha kongregasaun laran, ita tenke ajuda atu proteje kongregasaun husi sala boot hodi fó-hatene ba katuas sira. Se katuas sira ajuda ita-nia maluk neʼebé halo sala boot no nia arrepende an no simu konsellu ka dixiplina, nia la lori susar ba kongregasaun. Maibé, oinsá se nia lakohi arrepende an no la simu ajuda husi katuas sira? Se nuneʼe, ema neʼe tenke hasai husi kongregasaun. Hodi halo nuneʼe, katuas sira hasai hahalok aat husi kongregasaun no proteje kongregasaun atu bele hametin hahalok diʼak. (Lee 1 Korinto 5:5.) Tan neʼe, ita ida-idak iha responsabilidade atu proteje kongregasaun husi hahalok aat hodi serbisu hamutuk ho katuas sira no halo buat neʼebé diʼak ba ita-nia irmaun-irmán sira iha kongregasaun.
HAMETIN UNIDADE IHA KONGREGASAUN
17, 18. Oinsá mak ita bele hametin unidade iha kongregasaun?
17 Iha tempu uluk, tanba ema kristaun sira “laran-metin ba apóstolu sira-nia hanorin”, ida-neʼe ajuda kongregasaun atu iha unidade. (Apos 2:42) Sira hafolin matadalan neʼebé apóstolu sira fó liuhusi Maromak nia Liafuan. Ohin loron mós, ita hotu iha kongregasaun hetan ajuda atu nafatin iha unidade liuhusi katuas sira neʼebé serbisu hamutuk ho atan laran-metin no matenek. (1 Kor 1:10) Tan neʼe, hodi halo tuir hanorin husi Bíblia neʼebé Jeová nia organizasaun fó mai ita no hodi halo tuir matadalan husi katuas sira, ita hatudu katak ita ‘halo buat hotu-hotu atu ita bele sai laran ida deʼit iha espíritu, husi dame neʼebé halibur ita hamutuk’.—Ef 4:3.
18 Entaun, mai ita hakaʼas an nafatin atu hametin hahalok diʼak iha kongregasaun laran. Se ita halo nuneʼe, ita bele fiar katak “ita-nia Naʼi, Kristu Jesus, nia grasa” sei hela ho ita tanba hahalok diʼak neʼebé ita hatudu.—Flp 4:23.
[Nota–rodapé]
^ par. 7 Provérbios 18:24: “Iha kolega sira neʼebé halo aat ba malu, maibé iha belun ida neʼebé besik liu fali maun-alin.”
^ par. 15 Levítico 5:1: “Ema ruma halo sala bainhira nia rona ema seluk hotar iha ema barak nia oin, no nia mak testemuña ida, ka haree, ka hatene kona-ba hahalok sala, maibé nia la kesar sala neʼe, nia sei simu todan ba nia sala rasik.”
[Pergunta estudu nian]
[Dezeñu iha pájina 19]
Ita haburas hahalok diʼak iha kongregasaun hodi prepara didiʼak komentáriu ka lae?
[Dezeñu iha pájina 20]
Hodi aprende didiʼak kanta knananuk, ita haburas hahalok diʼak iha kongregasaun
