Sira haklaken Maromak nia liafuan ho aten-brani!

Ema kristaun loos hatudu aten-brani maski ema kontra ka fó-terus sira. Ita bele hetan ezemplu barak kona-ba neʼe iha livru “Memberikan Kesaksian yang Saksama” tentang Kerajaan Allah no Saksi-Saksi Yehuwa—Pemberita Kerajaan Allah. Hanesan fiar-naʼin sira iha apóstolu sira-nia tempu, ita sadere ba Maromak Jeová iha orasaun no husu ninia espíritu santu atu ajuda ita hodi bele haklaken ninia liafuan ho aten-brani.—Apos 4:23-31.

Irmaun ida hakerek kona-ba ita-nia serbisu haklaken durante funu mundiál primeiru, nia hatete: “Maromak nia atan sira ho badinas fahe livru Studies in the Scriptures, volume 7 ho títulu, The Finished Mystery. Sira fahe livru ida-neʼe barak liu fali livru sira seluk neʼebé ema halo iha tempu neʼebá. Kingdom News númeru 1 hasai iha tinan 1918. Tuirmai, hasai Kingdom News númeru 2, neʼebé esplika tansá ema boot sira bandu ema seluk atu lee livru The Finished Mystery. Depois neʼe, hasai mós Kingdom News númeru 3. Ema kose-mina sira fahe livru sira-neʼe ba ema barak. Sira presiza duni hatudu fiar no aten-brani atu fahe Kingdom News.”

Ohin loron, haklaken-naʼin foun sira baibain hetan treinu oinsá atu halaʼo serbisu haklaken, maibé iha tempu uluk la hanesan neʼe. Irmaun ida husi rai-Polónia neʼebé hela iha Estadus Unidus hanoin-hetan dala primeiru neʼebé nia bá haklaken iha tinan 1922, nia hatete: “Haʼu nunka haluha haʼu-nia esperiénsia iha tempu neʼebá. Haʼu sente taʼuk tanba haʼu la hatene atu koʼalia saida kuandu fahe livru no ladún hatene koʼalia lia-inglés, maski nuneʼe haʼu hamriik iha doutór nia eskritóriu nia odamatan no dere. Enfermeira ida mak loke odamatan. Kuandu haʼu loke haʼu-nia pasta, haʼu-nia livru hotu monu ba enfermeira neʼe nia ain. Maski haʼu la hatene loos saida mak haʼu hatete ba enfermeira neʼe, maibé ikusmai nia simu livru ida. Kuandu haʼu sai husi eskritóriu neʼe, haʼu sente aten-brani no sente katak Jeová fó bensaun mai haʼu. Haʼu fahe livru barak iha loron neʼe nuʼudar haʼu haklaken iha ema nia serbisu-fatin.”

Irmán ida hatete: “Maizumenus iha tinan 1933, irmaun no irmán sira uza karreta ho koluna neʼebé hasai lian boot atu habelar mensajen kona-ba Maromak nia Ukun.” Iha situasaun ida, irmán neʼe hamutuk ho kaben-naʼin ida haklaken iha fatin neʼebé iha foho barak iha Kalifórnia iha Estadus Unidus Amérika. Nia hanoin-hetan: “Irmaun lori karreta iha foho leten, no haʼu no ninia feen hela iha kraik. Kuandu irmaun neʼe komesa loke diskursu neʼebé grava tiha ona, neʼe rona hanesan lian mai husi lalehan. Ema sira iha komunidade koko atu buka irmaun neʼe, maibé sira la hetan. Kuandu diskursu hotu ona, ami haklaken ba ema iha fatin neʼe. Iha tempu neʼebá, haʼu mós halo serbisu haklaken hamutuk ho irmaun seluk neʼebé uza karreta rua ho koluna, no ema barak lakohi duni rona mensajen. Maski nuneʼe, sira la bele hapara lian boot neʼebé  mai husi karreta sira, no husi sira-nia uma rasik, sira mós rona diskursu. Ami bele haree katak Jeová uza dalan neʼebé loos atu hatoʼo ninia mensajen iha tempu neʼebé loos. Sin, ami presiza duni hatudu aten-brani hodi uza dalan neʼe atu haklaken, maibé ida-neʼe sempre lori rezultadu diʼak no hahiʼi Jeová nia naran.”

Maizumenus husi tinan 1930 toʼo 1944, irmaun-irmán sira uza fonógrafu iha serbisu haklaken atu ema bele rona diskursu neʼebé grava tiha ona. Fonógrafu mak mákina neʼebé uza CD tempu antigu nian. Irmán ida hatete: “Irmán klosan ida haklaken husi uma ba uma no nia lori fonógrafu. Kuandu nia toʼo uma ida no loke diskursu hodi uma-naʼin bele rona, uma-naʼin sai hirus tebes no tebe sai fonógrafu husi varanda. Maski nuneʼe CD ida mós la rahun. Maibé, mane naʼin-tolu neʼebé han hela iha sira-nia karreta, haree buat neʼebé akontese no husu irmán neʼe atu loke diskursu hodi sira bele rona. Sira mós simu livru balu husi irmán neʼe. Ida-neʼe fó kmaan fali ba nia husi hahalok ladiʼak neʼebé nia foin hetan.” Loos duni, presiza aten-brani atu tahan hasoru situasaun susar sira hanesan neʼe.

Irmán neʼe hatutan tan: “Haʼu hanoin-hetan iha tinan 1940 kuandu ami foin komesa atu fahe livru sira iha dalan. Antes neʼe, irmaun-irmán sira laʼo forma tuituir malu hodi tara kartaun iha sira-nia kakorok, kartaun neʼe hakerek ho liafuan ‘Relijiaun lohi no lasu ema’ no ‘Serbí Maromak no Liurai Kristu’. Iha tempu hanesan, ami mós fahe tratu ba ema. Atu ajuda ema hatene kona-ba Jeová nia naran no kona-ba ninia povu, presiza duni hatudu aten-brani.”

Irmán seluk hatete: “Susar tebes atu fahe ita-nia livru sira iha sidade sira neʼebé kiʼik tanba iha neʼebá ema fó-terus makaʼas ba Testemuña sira. . . . Presiza hatudu aten-brani duni atu hamriik iha dalan hodi kaer hela livru no repete beibeik liafuan neʼebé hanesan. Maski nuneʼe, ami sempre hola parte iha serbisu neʼe iha loron sábadu-sábadu. Dala ruma ema simu, dala ruma ema hirus, no halibur atu haleʼu ami. Dala barak ami tenke halai sees husi fatin neʼe atu ema-lubun labele halo aat ba ami.”

Maski Testemuña ba Jeová hetan terus durante Funu Mundiál Segundu, maibé sira ho aten-brani halaʼo nafatin sira-nia serbisu haklaken. Durante loron 43, neʼebé komesa husi 1 Dezembru 1940 toʼo 12 Janeiru 1941, irmaun-irmán sira halaʼo kampaña ida. Iha Estadus Unidus, haklaken-naʼin hamutuk maizumenus naʼin-50.000 hola parte iha kampaña neʼe, no sira fahe livru besik 8.000.000. Sira bolu tempu neʼe nuʼudar Tempu Haklaken ho “Aten-brani”.

Irmaun-irmán sira iha Maromak nia organizasaun neʼebé idade ona sei hanoin-hetan nafatin oinsá sira hatudu aten-brani iha situasaun susar oioin. Sira sei hanoin-hetan oinsá ba tinan barak, sira kaer metin nafatin ba liafuan neʼebé sira temi beibeik: “Kontinua nafatin atu haklaken ho aten-brani toʼo rohan.” Antes mundu aat neʼe nia rohan, ita la hatene se Maromak sei haruka ita atu uza dalan seluk tan atu haklaken ninia mensajen. Maibé ita hatene katak ho Maromak Jeová nia ajuda ita sei kontinua atu haklaken ninia liafuan ho fiar no aten-brani.

Liafuan neʼebé foti husi pájina 9]

Presiza aten-brani atu hola parte iha serbisu haklaken