Haklaken nafatin ho urjente

“Haklaken Maromak nia liafuan, halo ida-neʼe ho urjente.”—2 TIM 4:2, MF.

ITA BELE HATÁN?

Tanbasá mak ema kristaun iha apóstolu sira-nia tempu haklaken ho urjente?

Saida deʼit mak ita bele halo atu haklaken nafatin ho urjente?

Tanbasá mak serbisu haklaken urjente liu iha tempu agora?

1, 2. Iha lisaun neʼe, ita sei koʼalia kona-ba pergunta saida deʼit?

EMA neʼebé serbisu atu salva ema nia moris halo serbisu neʼe ho urjente. Porezemplu, bombeiru sira halai lalais ba situasaun ruma neʼebé emerjénsia tanba sira hatene katak ema nia moris iha perigu laran.

² Nuʼudar Testemuña ba Jeová, ita hakarak ajuda ema atu hetan salvasaun. Tan neʼe mak ita-nia serbisu haklaken importante tebes. Maibé, maski ita-nia serbisu neʼe urjente, neʼe laʼós katak ita halai bá-mai atu haklaken. Entaun, kuandu apóstolu Paulo hatete: “Haklaken Maromak nia liafuan, halo ida-neʼe ho urjente,” liafuan neʼe katak sá? (2 Tim 4:2, MF) Oinsá mak ita bele haklaken ho urjente? No tanbasá mak ita-nia serbisu haklaken urjente tebes?

TANSÁ PRESIZA HAKLAKEN HO URJENTE

3. Ita-nia serbisu haklaken sei lori rezultadu saida ba ema neʼebé simu no mós ba ema neʼebé la simu?

³ Kuandu ita hanoin kona-ba oinsá ita-nia serbisu haklaken bele salva ema nia moris, ida-neʼe ajuda ita atu hatene katak ita presiza duni haklaken lia-foun diʼak ho urjente. (Rom 10:13, 14) Maromak nia Liafuan hatete: “Kuandu haʼu hatete ba ema aat: ‘Ó sei mate’, no nia fila fali husi ninia sala no halo tuir justisa no buat neʼebé loos, . . . nia sei kontinua moris. Nia sei la mate. Sala neʼebé nia halo ona sei la hanoin-hetan hodi hasoru nia.” (Eze 33:14-16) Bíblia mós hatete ba ema kristaun sira neʼebé haklaken: “Ó sei soi ó-nia an no mós sira hotu neʼebé rona ó.”—1 Tim 4:16; Eze 3:17-21.

4. Tanbasá mak Timóteo presiza haklaken ho urjente?

⁴ Atu hatene tansá mak Paulo hatete ba Timóteo atu haklaken ho urjente, mai ita lee versíkulu sira antes no depois eskritura neʼebé tema ba lisaun neʼe. Nia dehan: “Haklaken lia-menon neʼe [“Maromak nia liafuan, halo ida-neʼe ho urjente”, MF]; iha tempu loos no iha tempu la loos, hatoʼo nia ba sira. Halakon hanorin bosok bá, korrije buat  neʼebé sala, bolu ema atu halo tuir; maibé halo hotu neʼe ho pasiénsia no hodi hanoin atu hanorin. Tempu sei mai duni wainhira ema sei la haksolok ho hanorin loloos; maibé sei buka tuir liafuan naranaran deʼit hodi halibur hamutuk ba sira an mestre sira tuir sira rasik nia hakarak.” (2 Tim 4:1-4) Jesus fó-hatene nanis katak ema kristaun barak sei husik lia-loos. (Mt 13:24, 25, 38) Tanba Paulo hatene katak ida-neʼe besik atu akontese, nia haruka Timóteo atu “haklaken Maromak nia liafuan” ho urjente iha kongregasaun laran atu ema kristaun sira labele simu hanorin bosok sira. Sin, ema nia moris iha perigu laran. Oinsá ho ohin loron?

5, 6. Iha serbisu haklaken, ita hasoru ema neʼebé gosta hanorin saida deʼit?

⁵ Ohin loron, ema barak neʼebé bolu an nuʼudar kristaun la halaʼo adorasaun neʼebé loos. (2 Tes 2:3, 8) Sira gosta fali hanorin bosok saida deʼit? Porezemplu, iha rai oioin ema barak fiar teoria evolusaun. Maski baibain ema hanoin katak teoria evolusaun mak hanorin siénsia nian, maibé teoria neʼe sai hanesan relijiaun ida tanba ida-neʼe troka ema nia haree ba Maromak no mós ba ema seluk. Hanorin ida seluk neʼebé habelar daudauk mak Maromak la hanoin ema, no ida-neʼe halo ema sente katak sira mós la presiza hanoin kona-ba Maromak. Tanbasá mak hanorin sira-neʼe dada ema toʼo halo sira toba-dukur iha dalan espirituál? Tanba hanorin hanesan neʼe tuir loloos fó ideia katak: ‘Ita bele halo buat naran deʼit hodi tuir ita-nia hakarak tanba ita la presiza hatán ba ita-nia hahalok.’ Sin, hanorin sira-neʼe mak ema barak hakarak rona no fiar.—Lee Salmo 10:4. *

⁶ Maibé iha mós hanorin seluk neʼebé ema gosta atu rona. Porezemplu, ema neʼebé sei badinas atu bá igreja, sira barak gosta rona liafuan hanesan: ‘Maski ita halo buat saida deʼit, Maromak sei hadomi ita.’ Ulun-naʼin relijiaun barak hatoʼo liafuan neʼebé ema gosta rona hodi hanorin katak serimónia, misa, no adora estátua no imajen sei lori Maromak nia bensaun. Ema neʼebé fiar hanesan neʼe la hatene katak sira-nia moris iha perigu laran. (Sal 115:4-8) Maibé, se ita bele fanu sira iha dalan espirituál hodi ajuda sira atu komprende lia-loos husi Bíblia, sira bele hetan bensaun husi Maromak nia Reinu.

HAKLAKEN HO URJENTE KATAK SÁ?

7. Oinsá mak ita bele hatudu katak ita haklaken ho urjente?

⁷ Kuandu doutór ida halo operasaun, nia fó ninia atensaun tomak ba operasaun tanba nia hanoin ema nia moris. Nuneʼe mós ho serbisu haklaken, ita hatudu katak ita haklaken ho urjente hodi tau ita-nia atensaun tomak ba serbisu neʼe. Ita bele halo ida-neʼe hodi hanoin kona-ba saida mak ita sei koʼalia, pergunta saida mak ita sei husu, no informasaun saida mak ita sei fahe ba ema neʼebé ita hasoru. Liután neʼe, tanba ita hanoin katak serbisu neʼe urjente tebes, ida-neʼe book ita atu hadiʼa ita-nia programa hodi buka tempu atu haklaken iha loron ka oras neʼebé diʼak ba ema atu simu ita-nia mensajen.—Rom 1:15, 16; 1 Tim 4:16.

8. Kuandu ita halo buat ruma ho urjente, neʼe katak ita hakaʼas an atu halo saida?

⁸ Kuandu ita halo buat ruma ho urjente, neʼe katak ita mós hakaʼas an atu halo uluk buat neʼebé importante liu. (Lee Gênesis 19:15. *) Porezemplu, hanoin toʼok kuandu ita bá konsulta doutór no nia hatete ba ita: “Haree lai rezultadu ba ezame saúde nian. Ita iha moras todan. Ita tenkesér halo buat ruma kona-ba ita-nia moras iha fulan ida nia laran.” Iha situasaun hanesan neʼe, ita la fila ba uma hodi halai ho ansi hanesan bombeiru, maibé ita rona didiʼak ba buat neʼebé doutór hatete, no kuandu fila ba uma, ita hanoin didiʼak kona-ba buat neʼebé ita presiza atu halo.

9. Oinsá mak ita bele hatene katak Paulo haklaken ho urjente iha sidade Éfeso?

 ⁹ Kuandu ita lee Paulo nia liafuan ba katuas kristaun sira iha Éfeso, ita bele hatene oinsá mak Paulo halaʼo serbisu haklaken ho urjente. (Lee Apostolu 20:18-21.) Paulo nia liafuan neʼe hatudu katak husi loron neʼebé nia foin toʼo iha rai-Ásia, nia komesa kedas haklaken husi uma ba uma. Liután neʼe, durante tinan rua nia laran, nia “hanorin loron-loron” iha sala eskola Tiranu nian. (Apos 19:1, 8-10) Tanba Paulo sente katak nia presiza haklaken ho urjente, nia tau uluk serbisu neʼe iha ninia moris. Konsellu atu ita ‘haklaken ho urjente’ laʼós atu halo ita sente katak serbisu neʼe todan demais ba ita, maibé atu ita tau serbisu haklaken nuʼudar buat ida neʼebé importante tebes iha ita-nia moris.

10. Tanbasá mak ita kontente katak antes tinan 1914 ema kristaun sira komesa haklaken ho urjente?

¹⁰ Antes tinan 1914, grupu estudante Bíblia ida komesa halaʼo serbisu haklaken ho urjente. Sira-nia ezemplu hatudu mai ita oinsá mak ita bele haklaken ho urjente. Maski sira ladún barak, sira hatene katak sira moris iha tempu neʼebé mundu aat neʼe nia rohan besik ona, tan neʼe sira haklaken ho laran-manas. Sira habelar mensajen Reinu nian liuhusi jornál atus ba atus no mós hodi hatudu filme kona-ba kriasaun (Photo-Drama of Creation). Hodi halo nuneʼe, sira haklaken lia-foun diʼak ba ema rihun ba rihun. Ida-neʼe halo ita kontente tanba ohin loron ita barak hatene lia-loos kona-ba Maromak nia Reinu, ka ukun.—Lee Salmo 119:60. *

HAKLAKEN NAFATIN HO URJENTE

11. Tanbasá mak ema balu haluha katak haklaken mak serbisu neʼebé urjente?

¹¹ Kuandu ita husik buat seluk atu dada ita-nia atensaun, ida-neʼe bele halo ita haluha katak haklaken mak serbisu neʼebé urjente tebes. Satanás nia mundu neʼe sempre book ita atu buka ita-nia hakarak deʼit ka buat neʼebé ladún importante. (1 Ped 5:8; 1 Joao 2:15-17) Ema kristaun balu neʼebé foufoun tau uluk Jeová nia serbisu iha sira-nia moris, ikusmai sira haluha katak serbisu neʼe mak urjente tebes. Porezemplu, ema kristaun ida naran Demas, maski uluk nia serbisu hamutuk ho apóstolu Paulo, maibé nia komesa hadomi liu mundu neʼe. Ikusmai, duké apoia Paulo iha susar laran, Demas hili atu husik nia.—Flm 23, 24; 2 Tim 4:10.

12. Ohin loron, ita iha oportunidade atu halo saida? Iha futuru, ita sei iha oportunidade atu halo saida?

¹² Atu haklaken nafatin ho urjente, ita presiza luta hasoru mundu neʼebé book ita atu buka ita rasik nia ksolok. Ita presiza hakaʼas an atu “hetan moris neʼebé mesak mak loloos”. (1 Tim 6:18, 19) Karik ita fiar metin katak kuandu ita moris ba nafatin iha mundu foun, ita sei iha oportunidade barak atu haksolok ho atividade oioin iha Maromak nia Ukun nia okos. Maibé kona-ba oportunidade atu ajuda ema seluk atu moris liu funu Armagedon, só ohin loron deʼit mak ita iha oportunidade neʼe.

13. Saida mak ita presiza halo atu haklaken nafatin ho urjente?

¹³ Tanba ema barak iha mundu neʼe toba-dukur iha dalan espirituál, saida mak ita presiza halo atu haklaken nafatin ho urjente? Ita presiza hanoin-hetan katak uluk ita mós toba-dukur tanba seidauk hatene didiʼak Maromak no la iha esperansa kona-ba futuru. Maibé ita hadeer hodi aprende lia-loos kona-ba Jeová no Jesus, no agora ita iha knaar espesiál atu hanorin fali ema seluk. (Lee Efeso 5:14.) Paulo hatete: “Haree oinsá imi moris. Keta moris hanesan ema beik, maibé hanesan ema matenek. Uza buat hotu neʼebé diʼak, basá loron sira-neʼe aat.” (Ef 5:15, 16) Loos duni, iha tempu aat neʼe, mai ita “uza buat hotu neʼebé diʼak”, inklui mós uza ita-nia tempu atu halo atividade sira neʼebé ajuda ita atu hakbesik nafatin ba Jeová.

MUNDU AAT NEʼE NIA ROHAN BESIK ONA

14-16. Tanbasá mak serbisu haklaken urjente liu iha tempu agora?

¹⁴ Husi tempu uluk kedas ema kristaun  sempre haklaken ho urjente, maibé agora mak tempu neʼebé ita presiza duni atu haklaken ho urjente. Husi tinan 1914, ita haree akontesimentu sira neʼebé hakerek nanis iha Maromak nia Liafuan sai loos daudaun. (Mt 24:3-51) Neʼe katak ema nia moris iha perigu laran. Maski nasaun boot sira buka dame hodi halo aliansa oioin, sira sei iha bomba nukleár maizumenus 2.000 neʼebé sira prontu atu uza. Liután neʼe, nasaun balu fó sai katak materiál barak neʼebé uza atu halo bomba nukleár lakon. Terrorista sira mak subar buat sira-neʼe ka lae? Ema balu dehan katak fasil ba ema hotu iha mundu neʼe mate iha funu neʼebé komesa tanba terrorista sira ida nia hahalok. Maibé, laʼós katak funu deʼit mak ameasa ema nia moris.

¹⁵ Iha tinan 2009, jornál ida (The Lancet) no universidade ida iha rai-Inglaterra (University College London) halo relatóriu ida kona-ba ita-nia tempu agora, hodi dehan: “Klima neʼebé troka daudauk mak ameasa neʼebé boot liu ba ita-nia saúde.” Relatóriu neʼe mós dehan katak mudansa kona-ba klima sei kona ema barak nia saúde no lori perigu ba ema rihun ba rihun nia moris. Mudansa kona-ba klima bele halo tasi saʼe, rai sai maran, anin fuik, no lori moras oioin, no ida-neʼe mós bele halo nasaun sira hadau malu rikusoin iha rai neʼebé sai menus ba beibeik. Sin, funu no dezastre sira ameasa duni ema nia moris.

¹⁶ Karik ema balu hanoin katak perigu kona-ba funu nukleár mak bele hamosu akontesimentu sira neʼebé Jesus fó-hatene nanis nuʼudar sinál kona-ba loron ikus sira. Maski ema barak la hatene sinál neʼe katak sá, maibé durante tinan barak ona ita haree akontesimentu sira neʼebé hatudu katak Kristu komesa ona ninia ukun no katak lakleur tan, nia sei halakon mundu aat neʼe. (Mt 24:3) Sin, tanba ita haree akontesimentu barak husi Jesus nia sinál neʼebé sai loos daudaun, agora mak tempu neʼebé ema presiza hadeer iha dalan espirituál. Ita bele ajuda sira atu hadeer liuhusi ita-nia serbisu haklaken.

17, 18. (a) Tanba ita moris iha loron ikus sira, ita presiza halo saida? (b) Saida deʼit mak bele book ema atu simu mensajen Reinu nian?

¹⁷ Tanba ita moris iha loron ikus sira, ita iha tempu badak deʼit atu hatudu ita-nia domin ba Jeová no atu halo hotu serbisu neʼebé nia fó mai ita. Tan neʼe, importante liután atu ita ohin loron halo tuir buat neʼebé Paulo hatete ba ema kristaun iha Roma iha tempu uluk. Nia dehan: “Imi hatene ona tempu; oras neʼe tempu ona ba imi atu hadeer, basá ita-nia maksoin besik ona liu fali wainhira ita foin fiar.”—Rom 13:11.

¹⁸ Akontesimentu sira neʼebé Bíblia fó-hatene nanis kona-ba loron ikus sira neʼebé sai loos daudaun bele book ema atu rekoñese katak sira presiza Maromak nia ajuda. Buat neʼebé halo ema seluk atu simu mensajen Reinu nian mak kuandu sira haree oinsá governu sira labele rezolve problema kona-ba ekonomia, perigu husi bomba nukleár, violénsia no krime, ka kona-ba estraga ambiente. Iha mós ema neʼebé hasoru susar iha família laran, hanesan moras, soe-malu, ka família ida mate, no ida-neʼe bele book sira atu simu ita-nia mensajen. Tan neʼe, kuandu ita halaʼo serbisu haklaken, ita bele ajuda ema hanesan neʼe.

AUMENTA ITA-NIA SERBISU HAKLAKEN

19, 20. Hodi hatene katak mundu aat nia rohan besik ona, oinsá mak ida-neʼe book ona ema kristaun barak atu troka sira-nia moris?

¹⁹ Hodi hatene katak mundu aat nia rohan besik ona, ida-neʼe book ema kristaun barak atu aumenta sira-nia serbisu haklaken. Porezemplu, feen-laʼen ida husi rai-Ekuadór neʼebé tuir reuniaun boot ba loron ida iha tinan 2006 ho tema “Mantein Ita-nia Matan Simples”, sira deside atu halo sira-nia moris sai simples liu. Sira halo lista kona-ba buat neʼebé sira ladún presiza, no iha fulan tolu nia laran deʼit, sira muda husi uma ho kuartu tolu ba uma kiʼik ho kuartu ida, faʼan sasán balu, no selu fali sira-nia debe hotu. Lakleur, sira komesa atu serbí nuʼudar pioneiru estra, no sira muda ba kongregasaun seluk neʼebé  katuas área hatete katak presiza haklaken-naʼin.

²⁰ Irmaun ida husi Estadus Unidus Amérika mós hatete: “Kuandu haʼu ho haʼu-nia feen tuir reuniaun boot iha tinan 2006, ami batizmu ba tinan 30 ona. Depois reuniaun, kuandu ami atu fila ba uma, ami koʼalia iha karreta laran kona-ba oinsá mak ami bele halo tuir konsellu atu halo ami-nia moris simples. (Mt 6:19-22) Iha tempu neʼebá, ami iha uma tolu, rai, karreta balu neʼebé karun, ró, no mós uma-karreta ida. Tanba ami sente katak ami hanesan ema kristaun neʼebé la matenek, ami deside atu halo planu atu halo serbisu haklaken ba tempu-tomak. Depois iha tinan 2008, ami komesa pioneiru regulár hodi serbisu hamutuk ho ami-nia oan-feto neʼebé serbí ona nuʼudar pioneiru. Ami haksolok tebes hodi serbisu hamutuk ho irmaun-irmán sira! Ami mós hetan oportunidade atu serbí iha área neʼebé presiza haklaken-naʼin barak liután. Hodi aumenta ami-nia serbisu ba Jeová, ida-neʼe ajuda ami atu hakbesik liután ba nia. Ami mós haksolok atu haree ema nia matan nabilan kuandu sira rona no komprende lia-loos husi Maromak nia Liafuan.”

21. Saida mak book ita atu haklaken ho urjente?

²¹ Ita hatene katak lakleur tan, mundu aat neʼe sei lakon iha “loron justisa nian no tempu neʼebé Naʼi sei halo lakon ema aat sira”. (2 Ped 3:7) Buat neʼebé ita hatene ona husi Maromak nia Liafuan, ida-neʼe book ita atu haklaken ho laran-manas kona-ba terus boot neʼebé besik atu mosu, no mós kona-ba mundu foun neʼebé atu mai hodi lori esperansa neʼebé loos ba ema seluk. Sin, hodi hakaʼas an atu halo serbisu neʼe ho urjente, ita hatudu ita-nia domin ba Maromak no mós ba ema seluk.

[Nota–rodapé]

[Pergunta estudu nian]