Esperiénsia husi Lois Didur

Iha ita-nia moris, dala ruma ita hatete: ‘Haʼu triste tanba uluk haʼu halo desizaun neʼebé ladiʼak.’ Maibé, durante tinan 50 neʼebé haʼu halo serbisu tempu-tomak ba Jeová, haʼu nunka hetan rezultadu aat ida husi desizaun neʼebé haʼu halo atu serbí Jeová. Haʼu sei konta kona-ba neʼe.

HAʼU moris iha tinan 1939 iha rai-Kanadá, iha Saskatchewan, no haʼu boot hamutuk ho haʼu-nia biin naʼin-tolu, alin-feto ida no alin-mane ida. Haʼu kontente ho moris iha toʼos luan. Loron ida, Testemuña ba Jeová mai ami-nia uma, no haʼu husu sira se Maromak iha naran. Sira hatudu Jeová nia naran iha Salmo 83:18, no ida-neʼe halo haʼu hakarak hatene liután kona-ba Maromak no ninia Liafuan.

Iha tempu neʼebá, labarik sira neʼebé tuir eskola, husi klase ida toʼo ualu, estuda hamutuk iha sala ida deʼit. Sira saʼe kuda ka laʼo dook atu bá eskola. Alunu sira-nia família mak troka malu hodi fó hela-fatin ba mestre no tau matan ba ninia presiza. Tinan ida, ami-nia família mak hetan knaar atu fó hela-fatin ba mestre foun ida, naran John Didur.

Mestre joven neʼe mós hakarak hatene kona-ba Maromak nia Liafuan. Loron ida, haʼu gaba komunizmu no sosializmu neʼebé haʼu-nia aman apoia iha tempu neʼebá. Maibé John hatete ho lian neineik mai haʼu: “Ema ida la iha direitu atu ukun ema seluk. Só Maromak deʼit mak iha direitu.” Mestre nia liafuan neʼe halo ami koʼalia liután kona-ba neʼe.

Tanba John moris iha tinan 1931, nia rona ona kona-ba buat aat neʼebé akontese iha funu. Kuandu Funu iha Koreia komesa hahú iha tinan 1950, John husu ulun-naʼin husi igreja oioin kona-ba hola parte iha funu sala ka lae, no sira hotu hatete katak la sala ba ema kristaun atu kaer kilat. Liutiha tempu balu, nia mós husu pergunta hanesan neʼe ba Testemuña ba Jeová. Sira esplika husi Bíblia katak ema kristaun iha tempu uluk la hola parte iha funu. Ikusmai, John  hetan batizmu iha tinan 1955, no iha tinan tuirmai, haʼu mós hetan batizmu. Ami naʼin-rua hakarak duni atu uza ami-nia moris no forsa atu serbí Jeová. (Sal 37:3, 4) Depois, iha Jullu 1957, haʼu ho John kaben.

Dala ruma, ami-nia loron kazamentu nian monu iha tempu neʼebé iha reuniaun boot. Ami sente kontente hamutuk ho irmaun-irmán sira neʼebé hafolin arranju kaben nian. Reuniaun boot internasionál primeiru neʼebé ami tuir mak ida neʼebé halaʼo iha sidade Novaiorke iha tinan 1958. Hodi tuir reuniaun neʼe, ami naʼin-lima saʼe karreta husi Saskatchewan toʼo Novaiorke. Durante semana ida, loron tomak ami iha karreta laran, no iha kalan ami toba iha tenda. Maibé, kuandu ami toʼo iha bairru Bethlehem, Pennsylvania, ami hakfodak tanba irmaun ida neʼebé ami hasoru iha dalan konvida ami atu toba iha ninia uma! Tanba ninia laran-diʼak neʼe, ida-neʼe ajuda ami atu bele toʼo sidade Novaiorke ho isin no roupa moos. Reuniaun boot neʼe halo ami kontente tebes atu serbí Jeová, hanesan livru Salmo hatete: “Iha Ita-nia liman loos, haʼu haksolok ba nafatin.”—Sal 16:11.

SERBISU PIONEIRU

Iha tinan 1959, ami halo serbisu pioneiru iha rai-tetuk iha Saskatchewan no hela iha uma kiʼik ho roda neʼebé karreta dada. Husi ami-nia uma neʼe, neʼebé hatuur iha rai aas uitoan, ami bele haree ami-nia haklaken-fatin neʼebé luan no dook.

Loron ida, ami simu karta husi sukursál no haʼu lori lalais karta neʼe ba John neʼebé hadiʼa hela tratór. Iha karta neʼe, irmaun sira konvida ami atu sai pioneiru tempu-tomak iha Red Lake, iha Ontario. Tanba ami seidauk hatene fatin neʼe, ami loke mapa atu haree fatin neʼe iha neʼebé.

Moris iha Ontario la hanesan duni ho moris uluk iha rai neʼebé luan! Red Lake mak aldeia kiʼik iha ai-laran neʼebé besik fatin neʼebé ema keʼe fatuk atu buka osan-mean. Toʼo tiha iha aldeia neʼe, ami buka fatin atu hela. Labarik-feto kiʼik ida rona ami koʼalia ho ema seluk no nia halai ba ninia inan atu hatete kona-ba ami, no inan neʼe hatudu laran-diʼak hodi fó fatin mai ami atu deskansa iha kalan neʼe, no ami toba iha fatin neʼebé baibain sira rai sasán. Loron tuirmai, ami hetan uma ida neʼebé halo husi ai ho kuartu rua, maibé la iha torneira no la iha sasán ida, iha deʼit ahi-matan. Tan neʼe, ami hola sasán balu no sente kontente ona.

Kongregasaun neʼebé besik liu husi aldeia neʼe mak maizumenus dook kilómetru 200. Ema neʼebé serbisu keʼe fatuk atu buka osan-mean, sira barak liu mai husi rai-Europa, tan neʼe sira husu Bíblia iha sira-nia língua rasik. Lakleur, ami iha estudu Bíblia hamutuk 30. Iha fulan neen nia laran deʼit, ami iha kongregasaun kiʼik.

Feto ida neʼebé komesa estuda Bíblia, ninia laʼen bolu amlulik ida husi ninia igreja atu hapara ninia feen atu estuda. Amlulik neʼe hatete katak ami tenke hanorin doutrina Trindade no mós buat seluk tan. Feto neʼebé estuda ho ami, lori ninia Bíblia katólika no husu ba amlulik neʼe atu hatudu eskritura neʼebé apoia buat neʼebé nia hatete. Amlulik neʼe soe fali Bíblia ba meza no hatete katak nia la presiza hatudu buat ida. Kuandu nia husik uma, nia hatete ba feen-laʼen neʼe iha lia-ukranianu katak sira tenke duni sai ami husi sira-nia uma no labele simu tan ami. Maibé amlulik neʼe la hatene katak John komprende lia-ukranianu.

Lakleur depois neʼe, ami husik Red Lake tanba John simu treinu atu serbí nuʼudar katuas área nian. Maibé, maizumenus tinan ida liu tiha, kuandu John hatoʼo diskursu batizmu nian iha reuniaun boot, ami hakfodak haree laʼen neʼe tuur iha fatin ba ema neʼebé atu hetan batizmu! Tanba amlulik nia hahalok aat, ida-neʼe book nia atu buka-hatene rasik saida mak Bíblia hanorin.

 VIZITA KONGREGASAUN SIRA

Kuandu John halaʼo ninia knaar nuʼudar katuas área nian, ami haksolok atu hela ho irmaun-irmán sira husi fatin oioin. Ami sai besik ho sira neʼebé fó hela-fatin mai ami. Loron ida iha tempu malirin, ami toba iha kuartu ida iha andár-leten neʼebé la iha ahi-matan. Dadeer-saan, ami rona irmán ferik tama iha ami-nia kuartu hodi loke ahi iha fogaun kiʼikoan ida atu halo kuartu sai manas. Depois neʼe, nia lori basia ho bee manas atu ami bele haroʼus. Haʼu aprende buat barak husi irmán neʼe nia laran-diʼak no laran-maus.

Serbisu atu vizita kongregasaun sira ajuda haʼu atu hakbesik liután ba Jeová. Iha Alberta, iha aldeia kiʼik ida iha parte norte neʼebé irmán ida deʼit mak hela. Oinsá mak Jeová nia organizasaun ajuda irmán neʼe? Kada fulan neen, ami saʼe aviaun atu vizita nia ba semana ida atu haklaken hamutuk no halaʼo reuniaun hanesan ami halo baibain iha kongregasaun sira iha sidade boot. Ida-neʼe fó-hanoin ami oinsá Jeová tau matan ho domin ba ninia bibi ida-idak.

Ami kontaktu nafatin ho irmaun-irmán barak neʼebé fó hela-fatin mai ami. Kuandu haʼu hakerek karta ba sira, haʼu uza prezente neʼebé ulukliu haʼu simu husi John, neʼe mak kaixa furak neʼebé nakonu ho surat-tahan atu hakerek karta. Ami haksolok atu hakerek karta ba ami-nia belun sira hodi uza surat-tahan sira-neʼe. Toʼo ohin loron, haʼu sei rai hela kaixa neʼe.

Loron ida, kuandu ami vizita hela kongregasaun sira iha sidade Toronto, ami simu telefone husi irmaun ida iha Betel Kanadá, no nia husu se ami hakarak serbí iha Betel. Bainhira mak ami bele fó resposta? Nia dehan: “Se bele, aban!” No aban, nia simu duni ami-nia resposta.

SERBISU IHA BETEL

Maski ami hetan knaar oioin, maibé ami sempre haksolok ho Jeová nia laran-diʼak. Nuneʼe mós ho tempu neʼebé ami tama iha Betel iha tinan 1977. Hodi ransu hamutuk ho irmaun-irmán kose-mina balu, ami aprende buat barak, laʼós husi sira ida-idak nia hahalok deʼit maibé hodi haree mós oinsá sira hafolin Maromak nia Liafuan.

Moris iha Betel halo ami kontente. Porezemplu, ami la presiza ona atu tau ami-nia roupa iha mala, maibé ami iha armáriu. Ami mós kontente agora sai parte husi kongregasaun ida. Haʼu mós gosta haʼu-nia serbisu, liuliu kuandu haʼu hatudu Betel ba irmaun-irmán sira neʼebé mai vizita Betel. Haʼu esplika ba sira kona-ba serbisu neʼebé halaʼo iha departamentu oioin iha Betel, rona ba sira-nia komentáriu, no hatán ba buat neʼebé sira husu.

Tempu liu lalais, no iha tinan 1997, John tuir Eskola ba Grupu Koordenadór ba Sukursál, neʼebé halaʼo iha Patterson, iha Novaiorke. Depois neʼe, irmaun sira husu ami se ami hakarak bá serbí iha rai-Ukránia. Sira hatete mai ami atu hanoin didiʼak no halo orasaun atu foti desizaun. Iha kalan neʼe kedas, ami deside ona atu simu knaar neʼe.

IHA RAI-UKRÁNIA

Antes ami muda ba Ukránia, ami tuir ona reuniaun boot internasionál iha rai-Rúsia, iha St. Petersburg, tinan 1992, depois neʼe ami tuir ida tan iha rai-Ukránia, iha sidade Kiev, iha tinan 1993. Esperiénsia neʼe halo ami hadomi irmaun-irmán sira iha parte leste iha Europa. Kuandu ami muda ba sidade Lviv iha rai-Ukránia, ami hela iha uma neʼebé tuan. Husi ami-nia kuartu iha andár-leten, ami bele haree jardín kiʼik ida, manu-aman boot no manu-inan barak. Haʼu sente haʼu hanesan iha haʼu-nia rai, iha Saskatchewan. Iha uma neʼe, ami hamutuk ema naʼin-12. Loron-loron, ami hadeer sedu no saʼe karreta atu bá serbisu iha Betel, neʼebé dook husi ami-nia uma.

Iha rai-Ukránia, ami ransu hamutuk ho irmaun-irmán sira neʼebé fiar metin nafatin maski sira hasoru  susar barak tanba governu bandu sira, ka hatama sira iha komarka laran, no ida-neʼe halo ami sente haraik-an. Maibé, kuandu ami gaba sira, sira sempre dehan: “Ami halo ida-neʼe ba Jeová.” Sira nunka hanoin katak Jeová husik sira mesak. Toʼo ohin loron mós, kuandu haʼu fó obrigadu ba irmaun-irmán sira, sira hatán: “Agradese deʼit ba Jeová.” Hodi halo nuneʼe, sira fó glória ba Jeová nuʼudar buat diʼak hotu nia hun.

Irmaun-irmán barak iha rai-Ukránia laʼo ain atu tuir reuniaun, tan neʼe sira iha tempu barak atu koʼalia no fó laran-manas ba malu iha dalan. Sira balu laʼo oras ida liu. Iha sidade Lviv iha kongregasaun 50 liu, maibé kongregasaun 21 uza reuniaun-fatin ida deʼit neʼebé iha sala barak. Iha loron-domingu, ami kontente atu haree irmaun-irmán sira barak mai tuir reuniaun.

Ami toman lalais ho irmaun-irmán sira, neʼebé hatudu laran-maus no prontu atu tau matan ba malu. Maski haʼu seidauk koʼalia momoos lia-ukranianu toʼo ohin loron, maibé sira sempre hatudu pasiénsia boot. Dala barak, sira-nia matan koʼalia barak liu fali liafuan.

Iha reuniaun boot internasionál iha sidade Kiev neʼebé halaʼo iha tinan 2003, ami sente katak ita bele duni tau fiar ba ita-nia maluk irmaun-irmán sira. Kuandu ami foin sai husi komboiu fatin neʼebé nakonu ho ema, labarik-feto ida hakbesik ami hodi hatete ho lian neineik ba ami: “Haʼu lakon haʼu-nia avó-feto. Haʼu la hatene nia bá neʼebé.” Labarik neʼe haree ami-nia kartaun naran nian, tan neʼe nia hatene katak ami mós Testemuña. Nia brani no la tanis. Tanba ami laʼo hamutuk ho irmán neʼebé ninia laʼen serbí nuʼudar katuas área nian, irmán neʼe lori nia ba fatin Sasán Lakon iha reuniaun-fatin. Lakleur, labarik neʼe hasoru fali ho ninia avó. Labarik neʼe nia hahalok book duni haʼu-nia laran, tanba nia tau fiar ba irmaun-irmán sira maski nia lakon iha ema barak nia leet.

Iha Maiu 2001, irmaun-irmán barak husi rai oioin mai atu asiste inaugurasaun ba ami-nia Betel foun. Iha loron-domingu dadeer, ami rona diskursu espesiál iha estádiu ida, no depois, ami haree irmaun-irmán sira atus ba atus laʼo atu bá vizita Betel foun neʼe. Haʼu la haluha buat neʼebé haʼu haree! Haʼu-nia laran haksolok tebes atu haree sira laʼo ho kalma. Ida-neʼe halo haʼu hafolin liután haʼu-nia serbisu ba Jeová.

MUDANSA BOOT

Iha tinan 2004, moras kankru kona John. Tan neʼe, ami tenke bá rai-Kanadá atu John bele hetan tratamentu. Maibé, tanba ai-moruk neʼebé John simu makaʼas tebes ba nia, nia presiza hetan tratamentu iha ICU ba semana balu. Ikusmai, nia sai diʼak uitoan. Maski susar ba John atu koʼalia, maibé liuhusi ninia matan, nia hatudu agradese ba ema hotu neʼebé mai vizita nia.

Maibé John nia saúde la sai diʼak no lakleur nia mate. Haʼu sente katak haʼu lakon haʼu-nia isin sorin. Haʼu ho John haksolok tebes atu serbí Jeová hamutuk. Saida mak haʼu sei halo? Haʼu deside atu fila fali ba Ukránia. Haʼu agradese tebes ba família Betel no irmaun-irmán sira iha kongregasaun tanba domin neʼebé sira hatudu mai haʼu.

Iha ami-nia moris tomak, ami nunka arrepende kona-ba desizaun sira neʼebé ami halo. Haʼu haksolok ho haʼu-nia moris, no kontente ransu ho haʼu-nia maluk sira. Maibé haʼu sei iha buat barak liután atu aprende kona-ba Jeová nia laran-diʼak, no haʼu hein katak haʼu sei kontinua serbí Jeová ba nafatin tanba haʼu ‘haksolok iha Jeová nia liman loos’.

[Liafuan neʼebé foti husi pájina 6]

“Iha ami-nia moris tomak, ami nunka arrepende kona-ba desizaun sira neʼebé ami halo”

[Dezeñu iha pájina 3]

Kuandu haʼu ho John kaben

[Dezeñu iha pájina 4]

Kuandu haʼu pioneiru tempu-tomak iha Red Lake

[Dezeñu iha pájina 5]

Iha 2002, haʼu ho John iha Ukránia