Iha dalan saida mak ita fó konsellu?

Ema ruma husu ona Ita atu fó konsellu ba nia ka lae? Karik ema husu ba Ita: ‘Haʼu tenke halo saida? Haʼu bele bá ransu ho ema sira-neʼe ka lae? Haʼu bele hili serbisu neʼe ka lae? Diʼak ba haʼu atu namora ho ema neʼe ka lae?’

Dala ruma, ema ida husu ita-nia ajuda atu halo desizaun importante neʼebé kona ninia relasaun ho kolega sira, família, ka Jeová. Ita sei fó konsellu tuir Ita-nia hanoin ka tuir Bíblia? Saida mak Ita-nia toman kuandu ita fó konsellu ba ema seluk? Maski ema husu Ita konsellu kona-ba buat neʼebé kiʼik ka boot, maibé ita hakarak sai hanesan ema neʼebé temi iha Provérbios 15:28, neʼebé dehan: “Ema loos hanoin kleʼan iha nia laran atu bele hatán.” Entaun, mai ita hanoin oinsá mak Bíblia nia matadalan lima bele ajuda ita atu fó konsellu iha dalan neʼebé loos.

1 Hatene didiʼak ninia situasaun.

“Kuandu ema ruma fó resposta ba kazu ruma antes rona, ema neʼe beik-teen no hamoe ninia an.”​—PROV 18:13.

Atu bele fó konsellu diʼak ba ema neʼebé husu ita-nia ajuda, ita presiza hatene uluk ninia situasaun no ninia hanoin. Porezemplu, kuandu ema ruma telefone ita no husu oinsá atu toʼo iha ita-nia uma, saida mak ita presiza hatene uluk hodi bele ajuda nia? Se ita la hatene ema neʼe agora iha neʼebé loos, ita la bele esplika dalan atu nia toʼo iha ita-nia uma, loos ka lae? Hanesan neʼe mós, kuandu ema ruma husu ita atu fó konsellu ba nia, uluk ita presiza hatene didiʼak ninia situasaun no ninia hanoin. Karik iha buat ruma kona-ba ninia situasaun neʼebé ita seidauk hatene no ida-neʼe bele kona konsellu neʼebé ita atu fó. Se ita fó konsellu hodi la hatene didiʼak ninia situasaun, ida-neʼe bele halo nia sai bilán.—Lc 6:39.

Buka-hatene informasaun saida deʼit mak nia hetan ona. Karik diʼak atu husu pergunta hanesan tuirmai neʼe: “Tuir Ita-nia hanoin, Bíblia nia matadalan saida deʼit mak bele ajuda Ita atu halo desizaun neʼe?” “Se Ita foti desizaun neʼe, ida-neʼe bele lori rezultadu diʼak no ladiʼak saida?” “Informasaun saida deʼit mak Ita hetan ona kona-ba neʼe?” “Ajuda saida mak ema seluk fó ona ba Ita, hanesan katuas sira iha kongregasaun, inan-aman, ka irmaun-irmán neʼebé estuda Bíblia ho Ita?”

Resposta ba pergunta sira hanesan neʼe ajuda ita atu hatene toʼo iha neʼebé mak nia hakaʼas an atu halo ninia desizaun no se nia husu tiha ona konsellu husi ema seluk. Ida-neʼe ajuda mós ita atu hatene se ema neʼe buka deʼit konsellu neʼebé nia hakarak atu rona.—2 Tim 4:3.

2 Keta ansi atu fó resposta.

“Ema ida-ida lalais atu see tilun bá; neineik atu koʼalia.” —TGO 1:19.

 Dala ruma, kuandu ema husu konsellu ba ita, ita sente katak ita presiza fó resposta kedas ba nia. Maibé, baibain ladiʼak atu halo nuneʼe, liuliu kuandu ita seidauk buka didiʼak informasaun kona-ba ema nia pergunta. Provérbios 29:20 hatete: “Ó haree tiha ona ema neʼebé ansi ho ninia liafuan ka lae? Iha esperansa barak liu ba ema beik-teen duké ba ema neʼe.”

Ita presiza haree didiʼak katak konsellu neʼebé ita fó ba ema tenke mai husi Maromak nia Liafuan. Husu ba ita-nia an: ‘Haʼu husik “mundu nia espíritu” ka mundu nia hanoin atu kona haʼu-nia hanoin ka lae?’ (1 Kor 2:12, 13) Hanoin-hetan katak maski ita fó konsellu ba ema tanba ita hakarak ajuda nia, ida-neʼe la toʼo. Kuandu apóstolu Pedro rona katak Jesus sei terus no mate, nia hatete ba Jesus: “Maromak hadook neʼe husi Ita; buat aat neʼe labele kona Ita, Naʼi!” Saida mak ita bele aprende husi Pedro nia liafuan? Se ita la kuidadu, hanesan Pedro, ita mós bele fó konsellu neʼebé la tuir “Maromak nia hanoin, maibé ema nian”. (Mt 16:21-23) Tan neʼe, importante tebes atu hanoin uluk antes atu koʼalia buat ruma! Tuir loloos, se kompara Maromak nia matenek ho ita-nia matenek, ita-nian uitoan deʼit, loos ka lae?—Jó 38:1-4; Prov 11:2.

3 Hatudu haraik-an hodi uza Bíblia.

“Haʼu la halo buat ida hodi haʼu rasik, maibé haʼu koʼalia buat hirak-neʼe nuʼudar Aman hanorin haʼu.”—JOAO 8:28.

Ema balu hatán: “Sé haʼu mak iha Ita-nia situasaun, haʼu sei halo . . .” Ita mós hatán hanesan neʼe ka lae? Maski fasil ba ita atu fó resposta, diʼak atu halo tuir Jesus nia ezemplu neʼebé hatudu haraik-an. Jesus iha matenek no esperiénsia barak liu fali ema seluk, maibé nia dehan: “Haʼu la koʼalia hodi haʼu-nia an rasik; maibé Aman neʼebé haruka haʼu mai, Nia mak haruka haʼu atu hateten sá loos, no atu dehan sá.” (Joao 12:49, 50) Jesus sempre hanorin ema no fó konsellu ba ema tuir ninia Aman nia hakarak.

Porezemplu, iha Lucas 22:49, Jesus nia dixípulu sira husu ba nia se sira bele luta hasoru ema neʼebé kaer Jesus. Dixípulu ida foti ona surik hodi hakanek ema. Maibé, tuir Mateus 26:52-54, Jesus uza tempu atu ajuda ninia dixípulu atu komprende Jeová nia hakarak. Tanba Jesus hatene matadalan neʼebé hakerek iha Gênesis 9:6 no profesia iha Salmo 22 no Isaías 53, Jesus fó konsellu neʼebé diʼak ba sira iha situasaun neʼebá, no ida-neʼe ajuda sira atu salva sira-nia moris no mós ema seluk nia moris, no halo Jeová kontente.

4 Buka informasaun husi ita-nia livru sira

“Sé loos mak emar laran-metin no matenek neʼebé naʼi haruka atu tau matan ba nia atan sira hodi fó han sira iha tempu loloos?” —MT 24:45.

 Jesus fó knaar ba atan laran-metin no matenek atu fó ai-han espirituál mai ita. Sira halo ida-neʼe hodi halo livru sira neʼebé esplika kona-ba Bíblia. Antes ita atu fó konsellu kona-ba buat ruma neʼebé importante, ita uza tempu uluklai atu buka didiʼak informasaun husi ita-nia livru sira-neʼe ka lae?

Ita bele hetan informasaun barak hodi haree iha livru Indeks Publikasi Menara Pengawal ka hodi uza Watchtower Library iha CD-ROM * iha komputadór. Ita labele haluha atu uza buat sira-neʼe tanba ita bele hetan informasaun barak neʼebé diʼak atu ajuda ema neʼebé presiza konsellu. Ita bele ka lae ajuda ema seluk atu uza buat sira-neʼe hodi sira bele buka-hatene Bíblia nia matadalan atu sira bele halo desizaun neʼebé diʼak? Hanesan mapa neʼebé ajuda ita atu laʼo iha dalan neʼebé loos hodi bele toʼo fatin neʼebé ita hakarak, buat sira-neʼe mós ajuda ita atu halo desizaun sira neʼebé lori ita ba moris rohan-laek.

Katuas sira iha kongregasaun ajuda ona haklaken-naʼin barak kona-ba oinsá atu buka informasaun oioin hodi uza Indeks Publikasi ka Watchtower Library. Ida-neʼe ajuda irmaun-irmán sira atu buka-hatene Bíblia nia matadalan hodi sira bele rezolve problema neʼebé sira hasoru iha sira-nia moris loroloron nian, no mós atu ajuda sira sadere ba buat neʼebé Jeová fó mai ita. Hodi halo nuneʼe, sira hetan treinu “atu hatene buat neʼebé diʼak husi buat neʼebé aat”.—Ebr 5:14.

5 Keta halo desizaun ba ema seluk

“Ida-ida sei lori nia todan rasik.” —GAL 6:5.

Ikusmai, ema ida-idak mak presiza hili konsellu ida neʼebé mak nia hakarak atu halo tuir. Jeová fó liberdade ba ita ida-idak atu deside rasik kona-ba halo tuir ninia matadalan sira ka la halo tuir. (Deut 30:19, 20) Iha situasaun balu neʼebé envolve Bíblia nia matadalan barak, nuneʼe ema neʼebé buka konsellu mak tenke halo desizaun rasik. Kuandu ema ruma husu konsellu ba ita, ita presiza haree didiʼak ninia situasaun ka ninia idade, hodi husu ba ita-nia an: ‘Haʼu iha esperiénsia no direitu atu fó konsellu kona-ba problema neʼe ka lae?’ Iha situasaun balu, diʼak liu atu katuas sira iha kongregasaun mak ajuda ema neʼe, ka se ema neʼe joven ida, diʼak liu ninia inan-aman mak ajuda nia.

[Nota–rodapé]

[Kaixa/Dezeñu iha pájina 8]

Kuandu halo Adorasaun Família nian

Dala ruma, diʼak atu buka informasaun oioin hodi hatán ba pergunta sira neʼebé ema ruma foin daudauk husu ba Ita. Hodi bele ajuda ema neʼe, informasaun saida no Bíblia nia matadalan saida mak ita bele hetan? Porezemplu, hanoin toʼok katak irmaun ka irmán ida husu ita se nia bele namora ho ema ida tanba nia hanoin atu kaben. Kuandu ita uza Indeks Publikasi ka Watchtower Library, ulukliu, buka informasaun kona-ba “Namora” ka “Kaben” hodi buka liafuan “Kencan” ka “Kawin”. Tuirmai, buka informasaun neʼebé esplika kona-ba pergunta neʼebé nia husu. Hodi buka mós informasaun iha “Lihat juga”, ida-neʼe bele ajuda ita atu hetan informasaun liután.

[Kaixa iha pájina 9]

Ita agradese tebes ba Jeová tanba liuhusi ninia organizasaun ita hetan ajuda atu bele fó no simu konsellu neʼebé diʼak liu hotu. Eclesiastes 12:11 hatete: “Ema matenek nia liafuan mak hanesan ai-tonka neʼebé meik neʼebé karau-atan sira uza atu dirije sira-nia animál, no hanesan pregu neʼebé tuu metin mak ema neʼebé haksolok hodi halibur liafuan sira; buat sira-neʼe mai husi bibi-atan ida deʼit.” Hanesan “ai-tonka neʼebé meik” neʼebé karau-atan uza atu hatudu dalan ba animál sira, konsellu diʼak neʼebé fó ho domin ajuda ita atu laʼo iha dalan neʼebé loos. No mós, hanesan “pregu” neʼebé ema uza atu halo sasán ka uma sai metin, konsellu diʼak bele ajuda ema atu halo desizaun neʼebé diʼak no metin. Ema neʼebé matenek kontente atu “halibur liafuan sira” ka konsellu husi sira-nia “bibi-atan ida deʼit”, Jeová.

Kuandu ita fó konsellu ba ema neʼebé husu ajuda ba ita, ita presiza halo tuir ita-nia Bibi-Atan, Jeová. Ida-neʼe oportunidade espesiál tebes! Sin, kuandu ita fó konsellu tuir Bíblia nia matadalan, ita bele ajuda ema neʼebé rona ba ita-nia konsellu atu hetan moris haksolok ba nafatin.