“Ita bele hasai foto ba ami ka lae?”

Irmaun Josué, neʼebé serbí iha Betel iha rai-Méxiku, nia bá tuir reuniaun boot ba loron tolu iha sidade Querétaro. Iha loron-sábadu depois reuniaun, nia laʼo halimar iha sidade neʼe hamutuk ho ninia maluk Testemuña sira. Feen-laʼen ida husi rai-Kolómbia, naran Javier no Maru, sira mós laʼo halimar nuʼudar ema turista, no husu ba Josué atu hasai foto ba sira. Tanba Josué ho ninia kolega sira hatais diʼak no tau kartaun naran nian, feen-laʼen neʼe husu sira se sira foin tuir formatura eskola nian ka reuniaun espesiál ruma. Josué esplika katak sira foin tuir reuniaun boot husi Testemuña ba Jeová, no konvida feen-laʼen neʼe atu asiste iha loron-domingu.

Feen-laʼen neʼe hatete katak sira sei sente moe atu tuir reuniaun boot tanba sira la iha roupa neʼebé diʼak. Maski nuneʼe, irmaun Josué fó ba sira ninia naran no númeru telefone Betel nian.

Fulan haat liu tiha, irmaun Josué hakfodak tanba Javier kontaktu nia. Javier hatete katak nia ho ninia feen asiste duni reuniaun boot iha Querétaro, no agora sira hakarak Testemuña ba Jeová atu vizita sira iha Mexico City neʼebé sira hela daudaun. Lakleur, Javier no Maru komesa estuda Bíblia, no sira mós komesa kedas atu tuir reuniaun. Liutiha fulan sanulu, sira naʼin-rua sai haklaken-naʼin. Depois neʼe, maski sira tenke muda ba sidade Toronto, iha rai-Kanadá, maibé sira kontinua laʼo ba oin toʼo hetan batizmu.

Liutiha tempu balu, irmaun Josué simu karta husi Javier, neʼebé hatete kona-ba saida mak book Javier nia laran atu simu lia-loos, hodi dehan: “Antes atu asiste reuniaun boot, haʼu ho haʼu-nia feen koʼalia ba malu kona-ba ami-nia presiza atu hetan matadalan husi Maromak. Kuandu ami haree Ita ho Ita-nia kolega sira neʼebé hatais diʼak tebes, ami hanoin karik imi tuir reuniaun ruma neʼebé espesiál. Iha reuniaun boot, ami hakfodak tanba ema ajuda ami atu buka tuur-fatin no hatudu eskritura ba ami hodi tuir diskursu, no sira neʼebé tuir reuniaun hatudu hahalok diʼak. Maski ami hatais hanesan turista deʼit, sira simu ami ho laran-diʼak.”

Liurai Salomão nia liafuan sai loos duni ba irmaun Josué! Salomão dehan: “Iha dadeer kari ó-nia fini bá, no keta husik ó-nia liman atu deskansa toʼo kalan, tanba ó la hatene ida neʼebé mak sei moris, iha neʼe ka iha neʼebá, ka rua rua sei fó rezultadu diʼak.” (Ecle 11:6) Ita mós bele ka lae, kari fini hodi uza oportunidade hotu atu fó-hatene ba ema seluk kona-ba reuniaun boot ka diskursu públiku ruma? Jeová bele uza ita atu dada ema neʼebé hamrook ba lia-loos hanesan Javier no Maru.—Isa 55:1.

[Dezeñu iha pájina 32]

Husi sorin karuk: Alejandro Voeguelin, Maru Pineda, Alejandro Pineda, Javier Pineda, no Josué Ramírez iha sukursál Méxiku.