Labele hateke “ba kotuk”
Labele hateke “ba kotuk”
“Ema neʼebé tau ona liman ba sarua, hafoin fila ba kotuk, nia la soʼi ba Maromak nia reinu.”—LC 9:62.
OINSÁ ITA HATÁN?
Tanbasá mak ita presiza “hanoin fali Lot nia feen”?
Ita presiza kuidadu atu labele hanoin beibeik kona-ba buat tolu saida?
Oinsá mak ita bele laʼo ba oin nafatin hamutuk ho Jeová nia organizasaun?
1. Jesus fó avizu saida? Ida-neʼe hamosu pergunta saida?
“HANOIN fali Lot nia feen.” (Lc 17:32) Maski Jesus Kristu fó avizu neʼe besik tinan rihun rua liubá, maibé ida-neʼe sai importante liután ba ita ohin loron. Jesus nia avizu neʼe katak sá? Jesus la presiza esplika ba ema judeu sira neʼebé rona ninia liafuan, tanba sira hatene duni saida mak akontese ba Lot nia feen. Kuandu Lot ho ninia família sai husi sidade Sodoma, Lot nia feen la halo tuir Jeová no hateke ba kotuk. Tanba ida-neʼe, nia sai masin fatuk.—Lee Gênesis 19:17, 26. *
2. Tanbasá mak Lot nia feen hateke ba kotuk? Tanba nia la halo tuir, saida mak akontese?
2 Maibé, tanbasá mak Lot nia feen hateke ba kotuk? Karik tanba nia hakarak haree buat neʼebé akontese iha ninia kotuk. Karik nia la fiar katak sidade Sodoma sei lakon. Karik nia hanoin kona-ba ninia uma no sasán sira neʼebé nia husik iha sidade neʼe. (Lc 17:31) Maski ita la hatene ho loloos tanbasá mak nia hatene ba kotuk, maibé tanba nia la halo tuir Maromak, nia lakon ninia moris. Hanoin toʼok! Lot nia feen mate iha loron hanesan ho ema aat sira iha sidade Sodoma no Gomorra. Tan neʼe mak Jesus hatete: “Imi hanoin fali Lot nia feen”!
3. Saida mak Jesus hatete atu hatudu katak ita labele hateke “ba kotuk”?
3 Ita mós moris iha tempu neʼebé importante ba ita atu labele hateke “ba kotuk” ka hanoin beibeik kona-ba buat neʼebé ita husik ona. Jesus koʼalia kona-ba neʼe kuandu nia hatán ba mane ida neʼebé husu atu fila fali ba uma atu fó adeus ba ninia família antes atu sai Jesus nia dixípulu. Jesus hatete: “Ema neʼebé tau ona liman ba sarua, hafoin fila ba kotuk, nia la soʼi ba Maromak nia reinu.” (Lc 9:62) Hodi hatán hanesan neʼe, Jesus hatudu laran-aat ba mane neʼe ka lae? Lae, tanba Jesus hatene katak mane neʼe buka deʼit razaun oioin atu la kaer ninia responsabilidade atu sai Jesus nia dixípulu. Nuneʼe, Jesus hatete katak ema neʼebé hadook an husi ninia responsabilidade ba Maromak, nia hanesan ema neʼebé hateke ba buat neʼebé nia husik “ba kotuk”. Maski ema neʼebé serbisu iha toʼos hateke ba kotuk ba tempu uitoan kuandu nia fila rai, ka hateke ba kotuk hodi husik ninia liman ba sarua, ida-neʼe hanetik nia atu halo ninia serbisu ho didiʼak.
4. Ita presiza tau ita-nia atensaun ba saida?
4 Duké hanoin beibeik kona-ba tempu uluk, ita presiza hateke ba oin, ka tau ita-nia atensaun ba futuru. Kona-ba ida-neʼe Provérbios 4:25 hatete: “Kona-ba ó-nia matan, tenke haree loos ba oin, sin, ó-nia matan neʼebé nabilan tenke hateke loos ba oin.”
5. Tanbasá mak ita labele hateke ba kotuk?
5 Tanbasá mak ita labele hateke ba kotuk? Tanba ita moris iha “loron ikus sira”. (2 Tim 3:1) Lakleur tan, ita sei haree katak laʼós sidade rua deʼit mak lakon, maibé mundu aat tomak mak sei lakon. Saida mak ajuda ita atu la husik buat neʼebé akontese ba Lot nia feen mós akontese ba ita? Ulukliu, ita presiza hatene buat saida deʼit mak bele book ita atu hateke fali ba kotuk. (2 Kor 2:11) Nuneʼe, mai ita koʼalia kona-ba buat hirak-neʼe no hatene oinsá mak ita bele kuidadu hodi labele hanoin beibeik kona-ba buat hirak-neʼe.
BUAT DIʼAK HUSI TEMPU ULUK
6. Hanoin-hetan kona-ba tempu uluk bele halo ita hanoin sala kona-ba saida?
6 Dala ruma, ita hanoin sala katak uluk ita moris diʼak liu fali agora. Maibé, dala barak buat neʼebé ita hanoin-hetan kona-ba tempu uluk mak buat neʼebé diʼak deʼit no haluha kona-ba problema ka susar neʼebé ita hasoru iha tempu neʼebá. Hanoin hanesan neʼe bele halo ita hanoin sala katak ita-nia moris iha tempu uluk diʼak liu fali buat neʼebé realidade iha tempu neʼebá. Maibé Bíblia fó avizu mai ita: “Labele hatete: ‘Tanbasá mak tempu uluk diʼak liu fali tempu agora?’ basá laʼós tanba matenek mak ó husu kona-ba neʼe.” (Ecle 7:10) Tanbasá mak perigu tebes atu hanoin hanesan neʼe?
7-9. (a) Saida mak akontese ba ema Israel iha rai-Egiptu? (b) Saida deʼit mak halo ema Israel kontente? (c) Ema Israel komesa muramura kona-ba saida?
7 Hanoin toʼok kona-ba buat neʼebé akontese ba ema Israel iha Moisés nia tempu. Maski foufoun ema Egiptu simu ema Israel ho laran-diʼak, maibé depois José mate ona, sira “tau xefe sira atu obriga [ema Israel] atu halo serbisu hodi hanehan sira ho naha todan”. (Êx 1:11) Ikusmai, liurai Faraun haruka oho ema Israel nia oan-mane hotu neʼebé sei bebé atu ema Israel la bele aumenta ba beibeik. (Êx 1:15, 16, 22) Tan neʼe, Jeová hatete ba Moisés: “Haʼu haree loloos terus neʼebé haʼu-nia povu hasoru iha Egiptu, no haʼu rona tiha sira-nia lian halerik tanba ema hanehan sira atu halo serbisu; tanba haʼu hatene ho loloos terus neʼebé sira hasoru.”—Êx 3:7.
8 Hanoin toʼok, kuandu ema Israel sai husi rai-Egiptu hodi sai livre husi serbisu todan nuʼudar atan, sira sente kontente tebes! Sira haree ho sira rasik nia matan oinsá mak Jeová hatudu ninia forsa hodi lori Malisan Sanulu ba Faraun neʼebé foti-an no ninia povu. (Lee Êxodo 6:6. *) Ikusmai, ema Egiptu husik ema Israel sai husi sira-nia rai, no sira mós fó osan-mean no osan-mutin barak tebes ba ema Israel, tan neʼe Bíblia hatete katak Maromak nia povu “foti hotu ema Egiptu nia rikusoin”. (Êx 12:33-36) Liután neʼe, ema Israel kontente tebes kuandu sira haree Jeová halakon Faraun ho ninia tropa sira iha Tasi Mean. (Êx 14:30, 31) Akontesimentu hanesan neʼe hametin duni sira-nia fiar.
9 Maski nuneʼe, lakleur depois sira hetan salvasaun, sira komesa muramura. Kona-ba saida? Kona-ba hahán! Tanba la kontente ho buat neʼebé sira simu husi Jeová, sira hatete: “Oh, ami hanoin fali ikan neʼebé uluk ami han beibeik iha Egiptu hodi la selu, pepinu no pateka no liis-tahan no liis-mean no liis-mutin! Maibé agora ami sai fraku ona. Ami-nia matan la haree buat ida, só maná deʼit.” (Núm 11:5, 6) Sin, sira haluha ona susar neʼebé sira hasoru iha tempu uluk. Tanba sira komesa hanoin sala kona-ba tempu uluk, ida-neʼe halo sira hakarak fila fali ba rai neʼebé sira uluk moris nuʼudar atan! (Núm 14:2-4) Ema Israel hateke fali ba buat neʼebé sira husik ba kotuk no halo Jeová la kontente.—Núm 11:10.
10. Saida mak ita bele aprende husi istória kona-ba ema Israel?
10 Saida mak ita bele aprende husi istória neʼe? Kuandu ita hasoru problema ka susar ruma, ita labele hanoin kona-ba buat diʼak deʼit iha ita-nia moris iha tempu uluk, karik iha tempu neʼebé ita seidauk hetan lia-loos. Maski la sala atu hanoin fali kona-ba tempu uluk no aprende buat ruma husi ita-nia esperiénsia ka hanoin fali kona-ba buat neʼebé uluk halo ita sente kontente iha ita-nia moris, maibé ita presiza iha hanoin neʼebé loos kona-ba tempu uluk. Se lae, ida-neʼe bele halo ita sente la kontente ho ita-nia situasaun ohin loron nian no bele halo ita hakarak fila fali ba moris uluk nian.—Lee 2 Pedro 2:20-22.
BUAT NEʼEBÉ ITA HUSIK ONA
11. Oinsá mak ema balu sente kona-ba buat neʼebé sira husik ona ba kotuk?
11 Triste katak ema balu hanoin fali ba buat neʼebé sira husik ona ba kotuk no sente katak sira lakon oportunidade atu moris diʼak no kontente. Porezemplu, karik uluk ita iha oportunidade atu hetan eskola boot, naran-boot, osan barak, maibé ita deside atu la buka buat hirak-neʼe. Ita-nia irmaun-irmán barak neʼebé uluk manán osan boot tanba iha pozisaun neʼebé aas iha edukasaun, negósiu, desportu, ka nuʼudar artista, sira husik buat hirak-neʼe ba kotuk. Maibé, tanba tempu liu daudaun ona no mundu aat neʼe nia rohan seidauk mai, ida-neʼe bele halo ita hanoin: ‘Haʼu-nia moris sei sai oinsá loos se haʼu la husik buat hirak-neʼe iha tempu uluk?’
12. Oinsá Paulo sente kona-ba buat neʼebé nia husik ba kotuk?
12 Apóstolu Paulo mós husik buat barak ba kotuk atu sai Kristu nia dixípulu. (Flp 3:4-6) Oinsá nia sente kona-ba buat neʼebé nia husik ba kotuk? Nia hatete: “Wainhira haʼu hetan ona Kristu, buat hotu neʼebé, uluk haʼu haree nuʼudar folin-boot, haʼu haree ona nuʼudar la folin liu.” Tanbasá? Paulo hatete: “Wainhira haʼu hatene ona Kristu, haʼu-nia Naʼi, haʼu hahú haree buat hotu nuʼudar folin-laek. Tan nia, haʼu husik lakon deʼit buat hotu, hodi haree buat seluk hotu hanesan buat mesak foʼer, wainhira haʼu bele manán Kristu.” * (Flp 3:7, 8) Hanesan ema neʼebé soe foʼer la hanoin fali kona-ba foʼer neʼe, Paulo la arrepende an kona-ba buat oioin neʼebé nia husik ba kotuk. Nia hanoin katak buat sira-neʼe la iha folin.
13, 14. Oinsá mak ita bele halo tuir Paulo nia ezemplu?
13 Se ita komesa hanoin fali kona-ba oportunidade oioin neʼebé uluk ita husik ba kotuk, ita bele halo saida? Ita bele halo tuir Paulo nia ezemplu. Oinsá? Hodi hanoin kona-ba buat diʼak neʼebé ita iha agora, hanesan ita-nia relasaun diʼak ho Jeová, no hanoin katak Jeová la haluha buat neʼebé ita halo ona ba nia toʼo agora ho laran-metin. (Ebr 6:10) Iha mundu aat neʼe, la iha buat ida neʼebé folin boot liu fali bensaun neʼebé Jeová haraik mai ita daudaun no sei haraik iha futuru!—Lee Marcos 10:28-30.
14 Paulo mós hatete katak iha buat seluk tan neʼebé bele ajuda ita atu serbí nafatin Jeová ho laran-metin. Paulo hatete katak nia “haluha buat neʼebé liu tiha ona, no . . . halai makaʼas ba oin atu toʼo ba rohan”. (Flp 3:13) Iha eskritura neʼe, Paulo hatete katak iha buat rua neʼebé ita presiza halo. Primeiru, ita presiza haluha buat neʼebé ita husik ona ba kotuk atu ita labele soe ita-nia tempu hodi hanoin beibeik kona-ba buat sira-neʼe. Segundu, hanesan ho ema neʼebé halai taru besik atu toʼo rohan, ita mós presiza hakaʼas an atu laʼo ba oin hodi hanoin kona-ba buat neʼebé iha futuru.
15. Tanbasá mak diʼak atu hanoin didiʼak kona-ba ezemplu husi Maromak nia atan sira neʼebé laran-metin?
15 Kuandu ita hanoin didiʼak kona-ba ezemplu husi Maromak nia atan sira neʼebé hatudu laran-metin iha tempu uluk no mós ohin loron, ida-neʼe fó laran-manas ba ita atu kontinua laʼo ba oin ho laran-metin duké hateke ba buat neʼebé ita husik ba kotuk. Porezemplu, se Abraão no Sara hanoin beibeik kona-ba moris diʼak iha sidade Ur, “sira bele fila fali” ba rai neʼe. (Ebr 11:13-15) Maibé sira la fila fali ba neʼebá. Hanesan neʼe mós kuandu Moisés husik rai-Egiptu, buat neʼebé nia husik ba kotuk barak liu fali buat neʼebé ema Israel sira seluk husik ba kotuk, maibé Bíblia la hatete katak Moisés hanoin fali buat neʼebé nia husik. Tuir Bíblia, duké hanoin hanesan neʼe, Moisés “hanoin katak lia-hasara neʼebé ema dehan ba ida neʼebé Maromak kose ho mina folin liu fali rikusoi tomak Egiptu ninian, basá nia matan hateke ba kolen loloos”.—Ebr 11:26.
PROBLEMA IHA TEMPU ULUK
16. Dala ruma, problema neʼebé ita hasoru iha tempu uluk bele halo ita sente oinsá?
16 Dala ruma, ita hasoru problema balu iha tempu uluk neʼebé ladún diʼak. Porezemplu, karik ita hanoin demais kona-ba sala ruma neʼebé ita halo iha tempu uluk. (Sal 51:3) Karik ita sente laran-kanek nafatin tanba konsellu makaʼas neʼebé ita simu iha tempu uluk. (Ebr 12:11) Karik ita sei hanoin hela kona-ba tempu neʼebé ita hasoru situasaun ruma neʼebé halo ita sente katak ida-neʼe la tuir justisa ka buat neʼebé laloos. (Sal 55:2) Saida mak bele ajuda ita atu la hanoin beibeik kona-ba problema sira neʼebé akontese iha tempu uluk? Mai ita koʼalia kona-ba ezemplu tolu.
17. (a) Tanbasá mak Paulo hatete katak nia “kiʼik liu santu sira hotu”? (b) Saida mak ajuda Paulo atu la hanoin demais kona-ba sala neʼebé nia halo iha tempu uluk?
17 Sala neʼebé ita halo iha tempu uluk. Apóstolu Paulo hatete katak nia “kiʼik liu santu sira hotu”. (Ef 3:8) Tanbasá mak nia sente hanesan neʼe? Nia hatete: “Basá haʼu fó-terus ba Maromak nia kreda.” (1 Kor 15:9) Hanoin toʼok oinsá Paulo sente kuandu nia hasoru fali ho ema neʼebé uluk nia fó-terus. Maski nuneʼe, duké husik hanoin hanesan neʼe domina Paulo, nia hanoin nafatin ba laran-diʼak neʼebé Jeová hatudu ona ba nia. (1 Tim 1:12-16) Hanoin hanesan neʼe halo Paulo sente agradese, no fó forsa ba nia atu kontinua halo ninia serbisu haklaken. Buat neʼebé Paulo husik ba kotuk no hakaʼas atu haluha inklui hahalok sala neʼebé nia halo iha tempu uluk. Loos duni, se ita hanoin kona-ba laran-diʼak neʼebé Jeová hatudu ona ba ita, ida-neʼe sei ajuda ita atu la sai fraku hodi hanoin demais kona-ba sala ruma iha tempu uluk neʼebé ita la bele troka. Hodi nuneʼe, ita bele uza ita-nia forsa atu halo serbisu ba Jeová.
18. (a) Saida mak bele akontese se ita hanoin beibeik kona-ba konsellu ruma neʼebé ita simu iha tempu uluk? (b) Oinsá mak ita bele halo tuir Salomão nia konsellu?
18 Konsellu makaʼas. Saida mak bele akontese se ita hanoin beibeik kona-ba konsellu ruma neʼebé ita simu iha tempu uluk? Se nuneʼe, ida-neʼe bele halo ita sente laran-kanek no “lakon aten-brani”. (Ebr 12:5) Se ita “rona ho laran malirin deʼit” ba konsellu hodi la simu konsellu neʼe ka se ita simu konsellu maibé la halo tuir, ida-neʼe hatudu katak ita seidauk husik konsellu neʼe ajuda ita atu hadiʼa ita-nia hahalok. Nuneʼe, diʼak liu ita halo tuir Salomão nia liafuan: “Kaer metin ba dixiplina; keta husik bá. Rai didiʼak dixiplina, tanba nia mak ó-nia moris.” (Prov 4:13) Hanesan xofér ida neʼebé halo tuir sinál iha dalan, nuneʼe mós ita presiza simu konsellu no halo tuir hodi laʼo ba oin.—Prov 4:26, 27; lee Ebreu 12:12, 13.
19. Oinsá mak ita bele halo tuir Habacuc no Jeremias nia fiar?
19 Situasaun ruma neʼebé halo ita sente katak ida-neʼe la tuir justisa. Dala ruma, ita sente hanesan profeta Habacuc neʼebé husu Jeová atu halo justisa tanba nia la komprende tansá Jeová husik buat neʼebé la loos akontese. (Hab 1:2, 3) Nuneʼe, importante tebes atu ita halo tuir profeta Habacuc nia fiar, neʼebé hatete: “Maibé ba haʼu, haʼu sei haksolok iha Jeová; haʼu sei haksolok iha Maromak haʼu-nia salvasaun nian.” (Hab 3:18) No mós, hanesan profeta Jeremias, se ita ‘hein ba Jeová’ ho fiar tomak, ita bele fiar katak Jeová, Maromak justisa nian, sei hadiʼa buat hotu iha tempu neʼebé loos.—Lam 3:19-24.
20. Oinsá mak ita bele hatudu katak ita “hanoin fali Lot nia feen”?
20 Ita moris iha tempu neʼebé halo ita haksolok tebes. Agora daudaun, ita haree akontesimentu furak tebes, maibé lakleur tan, akontesimentu hanesan neʼe sei sai barak liután. Tanba Jeová nia organizasaun kontinua atu laʼo ba oin, ita presiza atu laʼo nafatin hamutuk ho ninia organizasaun. Nuneʼe, mai ita halo tuir Bíblia nia konsellu kona-ba haree ba oin, no labele hateke ba buat sira neʼebé ita husik ona ba kotuk. Hodi halo nuneʼe, ita sei hatudu katak ita “hanoin fali Lot nia feen”!
[Nota–rodapé]
^ par. 1 Gênesis 19:17, 26: “17 No kuandu mane sira-neʼe lori sira sai husi sidade, sira ida hatete: ‘Halai bá atu salva ó-nia moris! Keta hateke ba kotuk no keta para iha Distritu tomak neʼe! Halai ba foho atu ó labele mate!’” “26 No ninia feen, neʼebé iha Lot nia kotuk, komesa hateke ba kotuk, no sai masin fatuk.”
^ par. 8 Êxodo 6:6: “Tan neʼe, hatete ba Israel nia oan sira: ‘Haʼu mak Jeová, no haʼu sei halo imi sai livre husi ema Egiptu nia todan no salva imi husi serbisu atan nian, no haʼu sei salva imi ho haʼu-nia liman neʼebé forsa no ho tesi-lia todan.’”
^ par. 12 Iha lia-gregu, liafuan neʼebé tradús nuʼudar “foʼer” iha eskritura neʼe mós iha arti buat neʼebé “soe ba asu sira”, ka buat neʼebé foʼer loos hanesan “tee”. Matenek-naʼin ida kona-ba Bíblia hatete katak Paulo uza liafuan neʼe hodi hatudu katak nia “laran metin atu hadook an husi buat neʼebé la iha folin no hakribi buat neʼebé nia lakohi ona”.
[Pergunta estudu nian]
