Esperiénsia husi Leonard Smith

Kuandu haʼu sei joven, iha eskritura rua book haʼu-nia laran. Maski tinan 70 liu tiha, haʼu sei hanoin-hetan bainhira haʼu foin komprende liafuan iha Zacarias 8:23 kona-ba “mane naʼin-sanulu” neʼebé kaer metin “mane judeu ida nia roupa”. Mane sira-neʼe hatete ba ema judeu: “Ami sei bá hamutuk ho imi, tanba ami rona ona katak Maromak hamutuk ho imi.”

EMA judeu neʼe reprezenta ema kristaun kose-mina, no “mane naʼin-sanulu” reprezenta “bibi seluk”, neʼebé uluk mós bolu grupu “Jonadab”. * (Joao 10:16) Kuandu haʼu komprende lia-loos neʼe, haʼu hatene ho klaru katak haʼu presiza apoia ema kose-mina sira ho laran-metin hodi haʼu-nia esperansa atu moris ba nafatin iha mundu foun bele sai loos.

Eskritura ida seluk neʼebé book haʼu-nia laran mak Jesus nia liafuan iha Mateus 25:31-46 kona-ba “bibi-malae” no “bibi-timur”. “Bibi-malae” reprezenta ema neʼebé sei hetan bensaun iha loron tesi-lia nian tanba sira ajuda Kristu nia alin sira, ka ema kose-mina sira neʼebé sei iha mundu. Nuʼudar joven ida husi grupu “Jonadab”, haʼu hatete ba haʼu-nia an: ‘Len, se ó hakarak Kristu atu simu ó nuʼudar bibi-malae, ó tenke apoia ninia alin kose-mina sira hodi halo tuir sira, tanba Maromak hamutuk ho sira.’ Hodi komprende kona-ba neʼe ajuda haʼu durante tinan 70 ona.

‘OINSÁ MAK HAʼU BELE HOLA PARTE?’

Iha tinan 1925, haʼu-nia inan hetan batizmu iha reuniaun-fatin iha Betel. Uluk reuniaun-fatin neʼe bolu “London Tabernacle”. Haʼu moris iha 15 Outubru 1926 iha rai-Inglaterra. Iha Marsu 1940, haʼu hetan batizmu iha reuniaun boot ida neʼebé halaʼo iha sidade Dover. Nuneʼe, haʼu-nia domin ba lia-loos aumenta liután. Ema kose-mina primeiru neʼebé haʼu fó apoiu mak haʼu-nia inan. Iha tempu neʼebá, haʼu-nia aman no haʼu-nia biin seidauk serbí Jeová. Ami tuir Kongregasaun Gillingham iha parte súl iha rai-Inglaterra, no irmaun-irmán barak iha kongregasaun neʼe mak ema kose-mina sira. Haʼu-nia inan hatudu ezemplu diʼak kona-ba laran-manas iha serbisu haklaken.

Iha Setembru 1941, iha reuniaun boot ida iha sidade Leicester, ami rona diskursu ho tema “Laran-metin”, neʼebé esplika kona-ba sé mak iha direitu atu ukun. Diskursu neʼe ajuda haʼu atu komprende katak lia neʼebé Satanás hasaʼe kona-ba neʼe envolve ita hotu. Tan neʼe, ita presiza foti desizaun atu apoia Jeová nia ukun no laran-metin nafatin ba nia nuʼudar Ukun-Naʼin neʼebé Boot Liu Hotu.

Iha reuniaun-boot neʼe, irmaun sira fó laran-manas ba rona-naʼin sira atu serbí nuʼudar pioneiru, no sira fó laran-manas ba joven sira atu halo planu kona-ba ida-neʼe. Kuandu haʼu rona diskursu ho tema: “Oinsá mak pioneiru sira hola parte iha Maromak nia organizasaun?”, ida-neʼe halo haʼu hanoin: ‘Oinsá mak haʼu bele hola parte?’ Reuniaun boot neʼe halo haʼu fiar katak haʼu nuʼudar parte husi grupu Jonadab haʼu iha responsabilidade atu apoia ema kose-mina sira hodi  hakaʼas an iha serbisu haklaken. Tan neʼe, iha tempu neʼebá, haʼu prenxe kedas formuláriu atu foti pioneiru.

SERBISU PIONEIRU IHA TEMPU FUNU

Iha 1 Dezembru 1941, kuandu haʼu tinan 15, haʼu simu knaar atu serbí nuʼudar pioneiru tempu-tomak. Haʼu komesa serbí nuʼudar pioneiru hamutuk ho haʼu-nia inan. Maibé liutiha tinan ida, nia tenke para serbisu nuʼudar pioneiru tanba ninia saúde ladiʼak. Tan neʼe, sukursál iha London haruka haʼu atu serbisu hamutuk ho irmaun Ron Parkin, neʼebé ohin loron serbí iha Grupu Koordenadór iha Sukursál Porturriku.

Sukursál haruka ami atu haklaken iha sidade Broadstairs no Ramsgate iha área Kent, no iha neʼebá ami aluga kuartu ida. Iha tempu neʼebá, fulan-fulan sukursál ajuda ami hodi fó osan maizumenus dolar 8 atu halo serbisu pioneiru tempu-tomak. Tanba ami presiza selu osan atu aluga kuartu, ami iha osan uitoan deʼit, no dala ruma ami la hatene atu han saida loos. Maski nuneʼe, Jeová sempre tau matan ba ami-nia presiza.

Ami uza bisikleta atu bá haklaken iha fatin oioin, dala barak ami tenke halai hasoru anin malirin neʼebé huu husi Tasi Norte. Ami mós presiza kuidadu ba aviaun sira husi rai-Alemaña neʼebé mai atu ataka sidade London hodi soe bomba. Loron ida, haʼu haree bomba monu tun besik haʼu, tan neʼe haʼu presiza soe haʼu-nia an iha baleta laran. Maski nuneʼe, durante tinan balu neʼebé ami halo serbisu pioneiru iha área Kent, ami sempre kontente.

SERBÍ IHA BETEL

Haʼu-nia inan sempre koʼalia buat neʼebé diʼak kona-ba Betel. Dala barak, nia hatete mai haʼu: “Se ó serbí iha Betel, ida-neʼe halo haʼu kontente liu.” Tan neʼe, iha Janeiru 1946, kuandu haʼu simu konvite atu serbí iha Betel iha London ba semana tolu, ida-neʼe halo haʼu hakfodak no kontente loos. Depois serbisu tiha ba semana tolu, irmaun Pryce Hughes neʼebé koordenadór ba sukursál, husu haʼu atu hela iha Betel. Treinu neʼebé haʼu hetan iha Betel ajuda haʼu toʼo agora.

Iha tempu neʼebá, maizumenus ema naʼin-30 mak serbí iha Betel London, no sira barak mak irmaun joven sira neʼebé seidauk kaben, maibé iha mós irmaun kose-mina sira hanesan Pryce Hughes, Edgar Clay, no Jack Barr, neʼebé ikusmai sai membru husi Grupu Administradór. Haʼu hetan oportunidade espesiál tebes atu apoia Kristu nia alin sira hodi serbisu hamutuk ho sira neʼebé metin iha lia-loos hanesan “ai-riin”!—Gal 2:9, MF.

Loron ida, irmaun ida hatete mai haʼu katak irmán ida hakarak atu hasoru haʼu no nia hein hela iha odamatan oin. Kuandu haʼu bá haree, haʼu hakfodak tanba irmán neʼe mak haʼu-nia inan. Nia kaer hela kaixa ida. Nia hatete katak nia la tama ba laran tanba nia lakohi atu hanetik haʼu-nia serbisu, depois fó tiha kaixa neʼe mai haʼu, nia fila kedas. Iha kaixa neʼe nia laran iha kazaku ida. Haʼu-nia inan nia hahalok neʼe fó-hanoin mai haʼu kona-ba Ana neʼebé lori roupa ba ninia oan Samuel kuandu nia serbí iha tabernákulu.—1 Sam 2:18, 19.

ESPERIÉNSIA KAPÁS IHA ESKOLA GILEAD

Iha tinan 1947, ami naʼin-lima neʼebé serbí iha Betel simu konvite atu tuir Eskola Gilead ba klase 11 neʼebé sei halaʼo iha tinan tuirmai. Eskola neʼe halaʼo iha parte norte iha Novaiorke, Estadus Unidus, no ami toʼo iha neʼebá tempu malirin tebes. Haʼu kontente katak haʼu iha kazaku neʼebé uluk haʼu-nia inan fó mai haʼu!

 Durante fulan neen neʼebé haʼu tuir Eskola Gilead, haʼu iha tempu diʼak tebes neʼebé haʼu la bele haluha. Hodi ransu hamutuk ho maluk estudante sira husi rai hamutuk 16, ida-neʼe ajuda haʼu atu haluan haʼu-nia hanoin. Haʼu mós aprende buat barak husi eskola no mós hodi ransu ho irmaun-irmán sira neʼebé iha esperiénsia barak. Porezemplu, irmaun Lloyd Barry nuʼudar haʼu-nia maluk estudante, irmaun Albert Schroeder nuʼudar mestre, no irmaun John Booth neʼebé nuʼudar koordenadór ba Kingdom Farm, ikusmai sira sai membru husi Grupu Administradór. Haʼu hafolin tebes konsellu husi irmaun sira-neʼe no mós ezemplu neʼebé sira hatudu kona-ba laran-metin ba Jeová no ninia organizasaun.

SERBÍ NUʼUDAR KATUAS ÁREA NIAN NO FILA FALI BA BETEL

Kuandu Eskola Gilead ramata tiha, haʼu hetan knaar atu serbí nuʼudar katuas área nian iha Ohio, iha Estadus Unidus. Maski haʼu tinan 21 deʼit, maibé irmaun-irmán sira simu haʼu ho laran-diʼak. Iha área neʼe, haʼu aprende buat barak husi irmaun sira neʼebé iha esperiénsia ona.

Liutiha fulan balu, haʼu simu konvite atu fila fali ba Betel Brooklyn hodi simu treinu barak liután. Durante tempu neʼebá, haʼu koñese didiʼak irmaun kose-mina sira neʼebé hamriik metin iha lia-loos, hanesan irmaun Milton Henschel, Karl Klein, Nathan Knorr, “Bud” Sullivan, no Lyman Swingle. Sira hotu uluk sai membru husi Grupu Administradór. Haʼu aprende buat barak husi serbisu neʼebé sira halo no mós husi sira-nia hahalok diʼak nuʼudar ema kristaun, no ida-neʼe hametin liután haʼu-nia fiar ba Jeová nia organizasaun. Depois neʼe, haʼu simu knaar atu fila fali ba rai-Europa no kontinua haklaken iha neʼebá.

Iha Fevereiru 1950, haʼu-nia inan mate. Iha tempu neʼebá, haʼu koʼalia nakloke ho haʼu-nia aman no haʼu-nia biin Dora. Tanba haʼu-nia inan mate tiha ona no haʼu mós la hela tan iha uma, haʼu husu ba sira se sira hakarak aprende kona-ba lia-loos ka lae. Sira hatán atu koʼalia kona-ba lia-loos ho irmaun kose-mina ida neʼebé idade ona, naran Harry Browning, neʼebé sira koñese no respeitu. Latoʼo tinan ida, haʼu-nia aman no biin Dora hetan batizmu. Ikusmai, haʼu-nia aman serbí nuʼudar atan iha Kongregasaun Gillingham. Liutiha tempu balu, haʼu-nia aman mós mate, depois haʼu-nia biin Dora kaben ho katuas kristaun ida naran Roy Moreton, no nia kontinua serbí Jeová ho laran-metin toʼo nia mate iha tinan 2010.

MUDA BA RAI-FRANSA

Kuandu haʼu sei kiʼik, haʼu aprende língua balu iha eskola, hanesan língua fransés, alemaun, no latín, no haʼu sente katak língua fransés mak língua neʼebé susar liu ba haʼu. Tan neʼe, kuandu irmaun sira husu ba haʼu atu ajuda Betel Paris iha rai-Fransa, haʼu sente kontente maibé laran-susar uitoan. Iha neʼebá, haʼu iha oportunidade espesiál atu serbisu hamutuk ho irmaun kose-mina ida neʼebé idade ona, naran Henri Geiger, neʼebé serbí nuʼudar koordenadór. Dala ruma haʼu simu knaar neʼebé la fasil ba haʼu, tan neʼe halo sala barak, maibé haʼu aprende buat barak kona-ba oinsá atu haburas relasaun diʼak ho irmaun-irmán sira seluk.

Kuandu Funu Mundiál Segundu hotu tiha, irmaun sira komesa halo planu atu halaʼo fali reuniaun boot internasionál iha sidade Paris iha tinan 1951, no haʼu hetan knaar atu organiza reuniaun boot neʼe. Iha tempu neʼebá, irmaun klosan ida neʼebé serbí nuʼudar katuas área nian, naran Léopold Jontès, nia mai atu ajuda haʼu. Liutiha tempu balu, irmaun Léopold hetan knaar atu serbí nuʼudar koordenadór ba sukursál. Ami halaʼo reuniaun boot neʼe iha “Palais des sports”, neʼebé besik Eiffel Tower, no konvida irmaun-irmán sira husi rai hamutuk 28. Iha loron ikus ba reuniaun boot neʼe, irmaun-irmán sira iha rai-Fransa hamutuk  6.000 haksolok tebes hodi haree ema naʼin-10.456 neʼebé tuir reuniaun boot neʼe.

Kuandu haʼu foin muda ba rai-Fransa, haʼu la hatene koʼalia língua fransés ho moos. Tanba haʼu seidauk hatene se liafuan neʼebé haʼu atu koʼalia mak loos, entaun dala barak haʼu nonook deʼit. Maibé se haʼu la koʼalia, irmaun-irmán sira la bele ajuda haʼu no haʼu la bele aprende atu koʼalia ho moos.

Tan neʼe, haʼu deside atu troka haʼu-nia situasaun hodi tuir kursu iha eskola neʼebé hanorin língua fransés ba ema estranjeiru sira. Haʼu bá tuir kursu neʼe kalan-kalan kuandu la iha reuniaun, no neineik-neineik haʼu komesa gosta língua fransés. Ida-neʼe ajuda duni haʼu atu haʼu bele hola parte iha serbisu tradusaun iha sukursál Fransa. Lakleur, haʼu rasik mós halo serbisu atu tradús livru sira husi língua inglés ba língua fransés. Haʼu kontente ho knaar neʼe tanba ajuda atan laran-metin no matenek atu fó ai-han espirituál ba irmaun-irmán sira iha mundu tomak neʼebé koʼalia língua fransés.—Mt 24:45-47.

KABEN NO HETAN KNAAR LIUTÁN

Iha tinan 1956, haʼu kaben ho irmán pioneiru ida husi rai-Suisa, naran Esther, neʼebé haʼu koñese tinan balu liubá. Ami kaben iha Reuniaun-Fatin iha Betel London nia sorin (fatin neʼe mak uluk “London Tabernacle”, neʼebé haʼu-nia inan hetan batizmu), no irmaun Hughes mak hatoʼo diskursu ba ami-nia kazamentu. Esther nia inan mós asiste kazamentu neʼe, no nia mós iha esperansa atu bá lalehan. Hodi kaben ho Esther, haʼu hetan belun diʼak ida neʼebé laran-metin mai haʼu, no liután neʼe haʼu mós hetan haksolok hodi ransu ho haʼu-nia banin-feto neʼebé hatudu ezemplu diʼak. Haʼu-nia banin-feto ramata ninia moris iha rai iha tinan 2000.

Depois haʼu ho Esther kaben tiha, ami la hela tan iha Betel. Maski nuneʼe, haʼu kontinua serbisu tradusaun iha Betel no Esther serbí nuʼudar pioneiru tempu-tomak iha sidade Paris, no nia ajuda ema barak atu sai Jeová nia atan. Iha tinan 1964, ami simu fali konvite atu hela iha Betel. Depois, iha tinan 1976, kuandu sukursál sira komesa forma Grupu Koordenadór, haʼu simu knaar atu serbí iha grupu neʼe. Ba tinan barak ona, Esther sempre apoia haʼu.

“IMI SEI LA IHA HAʼU BA NAFATIN”

Dala barak, haʼu iha oportunidade atu fila fali ba sede-jerál iha Novaiorke. Kuandu haʼu bá vizita iha neʼebá, haʼu simu konsellu diʼak husi irmaun sira iha Grupu Administradór. Porezemplu, loron ida, kuandu haʼu hatete ba irmaun Knorr katak haʼu estrese kona-ba la bele ramata ami-nia serbisu hodi tuir planu, irmaun Knorr hatudu oin-midar no hatete: “Keta hanoin barak. Serbisu deʼit bá!” Husi tempu neʼebá, kuandu haʼu iha serbisu barak demais, haʼu kontinua halo hotu serbisu ida no depois halo hotu serbisu seluk duké sai estrese, no baibain haʼu konsege halo ramata serbisu tuir planu.

Kuandu Jesus atu besik mate, nia hatete ba ninia dixípulu sira: “Imi sei la iha haʼu ba nafatin.” (Joao 12:8) Ita bibi seluk mós hatene katak ita sei la iha Kristu nia alin kose-mina sira ba nafatin iha rai. Tan neʼe, haʼu kontente tebes katak durante tinan 70 nia laran, haʼu iha oportunidade furak tebes atu ransu ho irmaun-irmán kose-mina barak hodi kaer ema judeu nia roupa.

[Nota–rodapé]

[Liafuan neʼebé foti husi pájina 21]

Irmaun Knorr hatudu oin-midar no hatete: “Keta hanoin barak. Serbisu deʼit bá!”

[Dezeñu iha pájina 19]

(Liman-karuk) Haʼu-nia inan no aman

(Liman-loos) Iha 1948, iha eskola Gilead nia oin, haʼu hatais kazaku neʼebé haʼu-nia inan fó mai haʼu

[Dezeñu iha pájina 20]

Iha 1997, iha inaugurasaun ba sukursál Fransa, haʼu tradús irmaun Lloyd Barry nia diskursu

[Dezeñu iha pájina 21]

(Liman-karuk) Ho Esther iha loron kazamentu nian

(Liman-loos) Haklaken hamutuk ho Esther