Ita hanoin-hetan ka lae?

Ita gosta lee Livru Haklaken husi fulan balu liubá ka lae? Se nuneʼe, haree toʼok se Ita bele hatán pergunta sira tuirmai neʼe:

Oinsá mak Salomão nia ezemplu neʼebé ladiʼak bele sai nuʼudar avizu mai ita?

Maromak haraik bensaun no uza Liurai Salomão. Maibé, durante Salomão nia ukun, nia la halo tuir tan Maromak nia konsellu. Nia kaben ho Faraun nia oan-feto neʼebé la adora Jeová, nia mós kaben ho feto barak neʼebé adora maromak falsu, no neineik-neineik nia husik ida-neʼe lori nia ba adorasaun falsu. Tan neʼe, ita tenke kuidadu kona-ba haburas toman neʼebé sala. (Deut 7:1-4; 17:17; 1 Reis 11:4-8)​—15/12, pájina 10-12.

Tanbasá mak sala atu halo abortu?

Moris mak buat neʼebé sagradu ba Maromak. Maski bebé iha kabun laran seidauk forma kompletu, maibé Maromak haree ida-neʼe nuʼudar buat neʼebé moris ona. (Sal 139:16) Maromak hatete katak ema sei hetan kastigu se nia hakanek ka hamate bebé neʼebé iha kabun laran. Tan neʼe iha Maromak nia haree, hamate bebé iha kabun laran, neʼe hanesan oho-ema. (Êx 21:22, 23)—1/1, pájina 6.

Oinsá mak aman sira bele iha relasaun besik nafatin ho sira-nia oan-mane hahú husi kiʼik toʼo sai boot?

Komesa kuandu oan sei kiʼik. Oan-mane sira baibain gosta tebes atu banati-tuir sira-nia aman. Tan neʼe, kuandu oan sei kiʼik, diʼak atu aman aproveita oportunidade neʼe. Se bele, diʼak atu envolve oan iha aman nia atividade loroloron nian. Halo buat neʼebé imi naʼin-rua gosta. Neʼe katak karik aman presiza husik nia rasik nia hakarak. Ajuda oan haburas fiar-an. Hodi nia bele sai ema boot neʼebé bele foti desizaun ho matenek, nia presiza duni gaba husi aman.—1/1, pájina 10-12.

Oinsá mak Jesus hanorin Tiago no João kona-ba laran-sadiʼa?

Jesus no ninia apóstolu sira mak ema judeu, no ema judeu barak la gosta ema samaritanu. Tiago no João sai hirus ba ema samaritanu sira neʼebé lakohi simu sira, no sira husu Jesus: ‘Ita hakarak ami hamulak atu ahi tun hodi han sira?’ Maibé, Jesus hatán oinsá? Nia hatete katak sira labele koʼalia aat hanesan neʼe!—1/1, pájina 18-19.

Mundu sei lakon duni iha tinan 2012 ka lae?

Ema balu fiar katak mundu neʼe sei lakon iha loron 21 fulan-Dezembru tinan 2012, tanba loron neʼe mak loron ikus husi ema Maya antigu nia kalendáriu. Maibé Bíblia hatete: “Jerasaun ida mai no jerasaun ida bá, maibé mundu sei hela ba tempu neʼebé la bele sura.” (Ecle 1:4; Isa 45:18)—1/1, pájina 20.

Maromak hadomi ema diʼak no ema aat hotu ka lae?

Iha duni hahalok sira neʼebé Maromak odi. Maibé neʼe la dehan katak nia sempre odi ema neʼebé halo hahalok sira-neʼe. Maromak hatene kona-ba sira-nia situasaun moris nian. Porezemplu, nia hanoin sira-nia fraku, no fatin neʼebé sira hela, no dalan neʼebé inan-aman haboot sira, no karik sira la iha oportunidade atu aprende kona-ba Maromak. Maski inan-aman odi hahalok aat neʼebé oan halo, maibé sira nafatin hadomi no fó dixiplina ba oan neʼe atu ajuda nia troka ninia hahalok. Tanba Maromak Jeová hadomi ema, nia mós halo hanesan neʼe atu salva ema neʼebé hakarak troka sira-nia hahalok aat.—1/1, pájina 21-22.

Tanbasá mak ita bele fiar katak husi apóstolu sira-nia tempu toʼo ohin loron sempre iha ema kristaun loos neʼebé hetan kose-mina?

Iha Jesus nia ai-knanoik ida, nia kompara ema kose-mina sira ho “trigu” neʼebé moris hamutuk ho “duʼut aat”. (Mt 13:24-30, 38) Klaru katak ita la hatene sé loos mak sai parte iha grupu “trigu” neʼe, maibé ai-knanoik neʼe hatudu katak husi apóstolu sira-nia tempu toʼo ohin loron sempre iha ema kristaun loos neʼebé hetan kose-mina.—15/1, pájina 7.

Oinsá atu manán hasoru laran-moras?

Haburas domin neʼebé loos ba malu. Halibur hamutuk ho Maromak nia povu. Buka atu halo buat neʼebé diʼak, no “haksolok ho sira neʼebé haksolok”. (Rom 12:15)—15/2, pájina 16-17.

Kuandu fó konsellu, Bíblia nia matadalan saida mak bele ajuda ita?

Hatene didiʼak ninia situasaun. Keta ansi atu fó resposta. Haraik an hodi aplika Maromak nia Liafuan. Buka informasaun husi ita-nia livru sira. Keta halo desizaun ba ema seluk.—15/3, pájina 7-9.