Jeová ajuda ita atu laran-metin toʼo rohan
Jeová ajuda ita atu laran-metin toʼo rohan
“Imi neʼebé Maromak nia kbiit tahan tan imi-nia fiar, hadiʼa daudaun atu mosu iha loron ikus.”—1 PED 1:5.
OINSÁ ITA HATÁN?
Oinsá mak Jeová dada ita ba adorasaun neʼebé loos?
Saida mak ita presiza halo atu husik Jeová nia konsellu ajuda ita?
Iha dalan saida deʼit mak Jeová fó laran-manas mai ita?
1, 2. (a) Tanbasá mak ita bele fiar katak Maromak sei ajuda ita atu laran-metin toʼo rohan? (b) Oinsá mak Jeová hatene didiʼak kona-ba ita?
JESUS hatete: “Ema neʼebé fiar metin toʼo rohan sei hetan maksoin.” (Mt 24:13) Liafuan neʼe hatudu katak ita presiza laran-metin ba Jeová toʼo rohan atu bele hetan salvasaun husi Satanás nia mundu aat neʼe nia rohan. Maibé, ida-neʼe laʼós katak Jeová hakarak ita atu tahan toʼo rohan ho ita rasik nia matenek no forsa. Bíblia hatete: “Maromak nia laran la bosok, no Nia sei la husik imi hetan babeur neʼebé boot liu fali imi-nia kbiit; maibé . . . Nia sei fó mós dalan atu imi bele lori nia.” (1 Kor 10:13) Liafuan neʼe hatudu saida mai ita?
2 Liafuan neʼe hatudu katak Jeová tau matan ba ita hodi ita labele hetan babeur ka susar neʼebé boot liu fali ita-nia kbiit. Jeová halo ida-neʼe tanba nia hatene buat hotu kona-ba ita, inklui problema neʼebé ita hasoru, ita ema oinsá, no toʼo iha neʼebé mak ita bele tahan susar. Sin, Bíblia hatudu katak Jeová hatene didiʼak buat hotu kona-ba ita ida-idak. Nia hatene kona-ba ita-nia toman iha ita-nia moris loroloron nian. Nia mós hatene kona-ba buat neʼebé ita hanoin no sente iha ita-nia laran.—Lee Salmo 139:1-3. *
3, 4. (a) Oinsá mak istória kona-ba David ajuda ita atu hatene katak Jeová hanoin ita ida-idak? (b) Oinsá mak Jeová hanoin ita neʼebé moris ohin loron?
3 Maromak neʼebé Boot Liu Hotu hanoin ita ida-idak ka lae? David hanoin kleʼan kona-ba neʼe no hatete ba Jeová: “Kuandu haʼu haree Ita-nia lalehan, buat neʼebé Ita-nia liman mak halo, fulan no fitun sira neʼebé Ita prepara, sé mak ema neʼebé bele mate atu Ita hanoin-hetan nia?” (Sal 8:3, 4) Karik David husu pergunta neʼe tanba nia hanoin filafali oinsá Jeová hanoin nia kuandu nia sei kiʼik. Kuandu David, Jessé nia oan ikun, sei labarik no hein bibi, Jeová haree nia nuʼudar “ema ida neʼebé monu loos ba ninia laran” no foti nia atu sai ulun-naʼin ba povu Israel. (1 Sam 13:14; 2 Sam 7:8) Hanoin toʼok, oinsá David sente kuandu nia hatene katak Maromak, Ida neʼebé kria lalehan no rai, hatene kona-ba ninia hanoin no sentimentu maski nia sei labarik neʼebé hein bibi!
4 Kuandu ita hanoin kona-ba oinsá mak Jeová hanoin ita ohin loron, ida-neʼe mós halo ita hakfodak. Jeová halibur ema “neʼebé folin-boot husi nasaun hotu” atu halaʼo adorasaun neʼebé loos. (Ageu 2:7) Jeová mós ajuda ninia atan sira atu laran-metin nafatin ba nia. Oinsá mak Jeová ajuda ninia atan sira? Atu hatene kona-ba neʼe, mai ita haree oinsá mak Jeová dada ema ba adorasaun neʼebé loos.
MAROMAK MAK DADA ITA
5. Oinsá mak Jeová dada ema ba ninia Oan? Fó toʼok ezemplu ida.
5 Jesus hatete: “Ema ida la bele hakbesik haʼu wainhira haʼu Aman neʼebé haruka haʼu mai la dada nia.” (Joao 6:44) Liafuan neʼe hatudu katak atu ita sai Jesus nia dixípulu, ita presiza Maromak nia ajuda. Oinsá mak Jeová dada ita ba ninia Oan? Nia halo nuneʼe liuhusi serbisu haklaken no ninia espíritu santu. Porezemplu, kuandu Paulo no ninia maluk misionáriu sira iha sidade Filipe, sira hasoru feto ida naran Lídia no haklaken ba nia. Kona-ba neʼe, Bíblia hatete: “Maromak loke nia fuan atu see tilun ba buat neʼebé Paulo hateten.” Sin, Maromak uza ninia espíritu santu atu ajuda Lídia komprende no simu lia-loos. Rezultadu mak Lídia ho ninia família hetan batizmu.—Apos 16:13-15.
6. Oinsá mak Maromak dada ita hotu ba adorasaun neʼebé loos?
6 Buat hanesan neʼe akontese ba Lídia deʼit ka lae? Lae duni. Se ita mak ema kristaun neʼebé dedika ona ita-nia an ba Jeová, neʼe katak Jeová mak dada ita ba adorasaun neʼebé loos. Hanesan ita-nia Aman Jeová haree buat neʼebé diʼak iha Lídia nia laran, nia mós haree buat neʼebé diʼak iha ita-nia laran. Kuandu ita foin komesa rona lia-foun diʼak, Jeová uza ninia espíritu santu atu ajuda ita komprende no simu lia-loos. (1 Kor 2:11, 12) Depois, kuandu ita koko atu moris tuir buat neʼebé ita aprende husi Bíblia, nia haraik bensaun ba ita-nia hakaʼas-an. Ikusmai, kuandu ita dedika ita-nia an ba Jeová, nia sente laran-kontente. Sin, husi tempu neʼebé ita foin komesa serbí Jeová, nia sempre hamutuk ho ita no ajuda ita.
7. Oinsá mak ita bele hatene katak Maromak sei ajuda ita atu laran-metin nafatin?
7 Tanba Jeová ajuda ita atu komesa serbí nia, ita fiar katak nia mós sei kontinua ajuda ita atu laran-metin nafatin ba nia. Jeová hatene katak ita tama lia-loos laʼós ho ita-nia kbiit rasik, no nia mós hatene katak ita hela iha lia-loos laʼós ho ita-nia kbiit rasik. Apóstolu Pedro hatete ba ema kristaun kose-mina sira katak “Maromak nia kbiit tahan” sira ka proteje sira hodi sira bele laran-metin nafatin ba nia. (1 Ped 1:4, 5) Pedro nia liafuan neʼe laʼós deʼit ba ema kose-mina maibé ba ema kristaun hotu. Oinsá mak Jeová “tahan” ka proteje ita ohin loron? Ita hakarak hatene resposta ba pergunta neʼe tanba ita hotu presiza Maromak nia ajuda atu ita laran-metin nafatin ba nia.
MAROMAK AJUDA ITA ATU LA HALO SALA
8. Tanbasá mak ita presiza kuidadu atu labele halo sala boot?
8 Tanba ita ema sala-naʼin no hasoru susar oioin iha ita-nia moris, ida-neʼe bele hanetik ita atu la hanoin tuir Jeová nia hanoin. Ikusmai, ida-neʼe bele halo ita halo sala boot maski ita la halo ho neon. (Lee Galasia 6:1.) Ida-neʼe mak buat neʼebé akontese ba David.
9, 10. Oinsá mak Jeová ajuda David atu labele halo sala boot? Saida mak ita bele fiar kona-ba Jeová?
9 Kuandu Liurai Saul duni tuir David atu oho nia, David hatudu pasiénsia boot no kontrola an hodi la buka selu fali aat ba Saul nia hahalok aat. (1 Sam 24:2-7) Maibé liu tiha neʼe, problema ida akontese ba David neʼebé halo nia la bele kontrola an. Loron ida, kuandu nia ho ninia atan sira presiza hahán no bee, nia husu ajuda ho respeitu ba ema Israel ida naran Nabal. Maibé Nabal koʼalia ladiʼak ba David no lakohi ajuda David. Ida-neʼe halo David sai hirus tebes no hakarak atu selu aat fali ba Nabal no mane hotu neʼebé iha Nabal nia uma. David la hanoin katak se nia oho ema neʼebé la sala, Jeová sei fó tesi-lia todan ba nia. Maibé iha situasaun hanesan neʼe, Nabal nia feen, naran Abigail, hapara David atu labele halo sala boot. David haree katak Jeová mak uza Abigail atu salva nia hodi labele halo sala boot. Tan neʼe, David hatete ba Abigail: “Hahiʼi ba Jeová, Maromak Israel nian, neʼebé haruka ó ohin atu mai hasoru haʼu! No Maromak fó bensaun ba ó-nia matenek, no fó bensaun ba ó neʼebé hanetik haʼu ohin neʼe atu la hetan sala kona-ba ema nia raan no halo haʼu-nia liman rasik salva haʼu.”—1 Sam 25:9-13, 21, 22, 32, 33.
10 Saida mak ita bele aprende husi istória neʼe? Jeová uza Abigail atu ajuda David atu labele halo sala boot. Jeová mós halo hanesan neʼe ba ita ohin loron. Ida-neʼe la dehan katak Jeová sempre ajuda ita atu labele halo sala hodi haruka ema ruma atu ajuda ita. Ita mós la hatene saida loos mak Maromak sei halo iha situasaun ruma, ka buat saida deʼit mak nia sei husik atu akontese. (Ecle 11:5) Maski nuneʼe, ita bele fiar katak Jeová sempre hatene ita-nia situasaun no ajuda ita atu laran-metin nafatin ba nia. Nia promete: “Haʼu sei halo ó sai matenek no hanorin ó kona-ba dalan neʼebé ó tenke tuir. Haʼu sei fó konsellu hodi tau matan ba ó.” (Sal 32:8) Oinsá mak Jeová fó konsellu mai ita? Hodi halo saida deʼit mak ita bele hetan ajuda husi Jeová nia konsellu? Tanbasá mak ita bele fiar katak Jeová sei kontinua nafatin hatudu dalan ba ninia povu ohin loron? Agora, mai ita buka-hatene resposta ba pergunta sira-neʼe husi livru Apokalipse.
JEOVÁ NIA KONSELLU AJUDA ITA
11. Jeová hatene kona-ba saida deʼit neʼebé akontese iha kongregasaun laran?
11 Iha apóstolu João nia vizaun neʼebé hakerek iha livru Apokalipse kapítulu 2 no 3, Liurai Jesus Kristu haree buat neʼebé akontese iha kongregasaun hitu iha Ásia Menór. Vizaun neʼe hatudu katak Kristu la haree deʼit ba buat neʼebé kongregasaun sira halo nuʼudar grupu, maibé nia mós haree buat hotu neʼebé ema ida-idak halo iha kongregasaun. Porezemplu, Jesus temi saida loos mak akontese iha kongregasaun balu nia laran no temi mós ema balu nia naran, nia mós gaba no fó konsellu ba kongregasaun ida-idak hodi tuir sira-nia presiza. Ida-neʼe hatudu saida mai ita? Ida-neʼe hatudu katak maski Jesus nia konsellu neʼe liuliu ba ema kose-mina sira depois tinan 1914, maibé kongregasaun hotu iha mundu tomak mós bele hetan buat diʼak hodi halo tuir Jesus nia konsellu neʼe. Sin, ida-neʼe hatudu katak liuhusi Jesus, Jeová hatudu dalan ba Ninia povu. Entaun, oinsá mak ita bele husik Jeová atu hatudu dalan mai ita?
12. Oinsá mak ita bele husik Jeová atu hatudu dalan mai ita?
12 Dalan ida atu ita husik Jeová hatudu dalan mai ita mak hodi estuda Bíblia mesak. Liuhusi livru sira neʼebé mai husi atan laran-metin no matenek, Jeová fó konsellu barak mai ita. (Mt 24:45) Maibé, atu konsellu sira-neʼe bele ajuda ita, ita tenke buka tempu atu estuda kona-ba konsellu sira-neʼe no halo tuir iha ita-nia moris. Kuandu ita estuda mesak, ita hatudu katak ita hakarak Jeová proteje ita atu “labele monu” ba sala. (Jud 24) Kuandu ita estuda buat balu husi ita-nia livru sira, dala ruma ita sente: ‘Informasaun neʼe kona loos ba haʼu!’ Ita mós iha esperiénsia hanesan neʼe ka lae? Se nuneʼe, ita presiza simu ida-neʼe nuʼudar konsellu husi Jeová. Hanesan kolega ida book ita-nia kabaas atu dada ita-nia atensaun, nuneʼe mós Jeová uza ninia espíritu santu atu ajuda ita atu hatene buat ruma neʼebé ita presiza atu hadiʼa. Kuandu ita prontu simu matadalan husi Jeová nia espíritu santu, neʼe katak ita husik Jeová hatudu dalan mai ita. (Lee Salmo 139:23, 24. *) Tan neʼe, diʼak atu ita hanoin kona-ba ita-nia toman atu estuda Bíblia.
13. Tanbasá mak ita presiza hanoin didiʼak kona-ba ita-nia toman atu estuda Bíblia?
13 Se ita gasta demais ita-nia tempu ba atividade halimar nian, ita sei la iha tempu atu estuda mesak. Irmaun ida hatete katak fasil atu husik ida-neʼe akontese. Nia dehan: “Ohin loron, atividade halimar nian sai barak liu fali tempu uluk, no ita mós bele halo buat sira-neʼe hodi ladún gasta osan. Ita bele haree televizaun, halimar ho komputadór, no mós ho telemovel. Buat sira-neʼe haleʼu ita.” Se ita la kuidadu kona-ba neʼe, ikusmai neineik-neineik ita sei la iha tan tempu atu estuda Bíblia ho didiʼak. (Ef 5:15-17) Tan neʼe, ita ida-idak presiza husu ba ita-nia an: ‘Haʼu uza beibeik haʼu-nia tempu atu estuda kona-ba buat neʼebé kleʼan husi Maromak nia Liafuan ka lae? Haʼu estuda deʼit kuandu haʼu prepara diskursu ba reuniaun ka lae?’ Karik ita presiza uza ho didiʼak ita-nia tempu atu estuda Bíblia mesak no halaʼo Adorasaun Família nian hodi estuda kona-ba buat neʼebé kleʼan liu iha Maromak nia Liafuan no buka-hatene Jeová nia matenek hanesan buka rikusoin. Matenek ida-neʼe bele proteje no ajuda ita atu laran-metin toʼo rohan.—Prov 2:1-5.
HETAN LARAN-MANAS HUSI JEOVÁ
14. Oinsá mak Bíblia hatudu katak Jeová hanoin kona-ba ita-nia sentimentu?
14 David hasoru susar oioin iha ninia moris, neʼebé halo nia sente triste. (1 Sam 30:3-6) Bíblia hatudu katak Jeová hatene oinsá David sente. (Lee Salmo 34:18; 56:8. *) Nuneʼe mós ho ita, Maromak hatene kuandu ita “sente triste” no “laran-kraik”. Hodi hanoin-hetan katak Jeová hatene oinsá ita sente, ida-neʼe fó kmaan mai ita, hanesan mós ho David, neʼebé hatete: “Haʼu sei haksolok no kontente iha Ita-nia laran-diʼak neʼebé nakonu ho domin, tanba Ita haree haʼu-nia terus; Ita hatene kona-ba haʼu-nia laran-susar.” (Sal 31:7) Ida-neʼe la dehan katak Jeová hatene deʼit ita-nia susar, maibé nia mós ajuda no fó kmaan no ksolok mai ita. Dalan ida neʼebé Jeová halo nuneʼe mak liuhusi reuniaun kristaun.
15. Saida mak ita bele aprende husi Asaf?
15 Buat neʼebé akontese ba Asaf ajuda ita atu hatene tanbasá importante atu tuir reuniaun. Kuandu Asaf haree katak ema diʼak hetan susar barak no ema aat moris kontente, ida-neʼe halo nia laran-tun no hanoin katak saugati deʼit atu serbí Jeová. Asaf fó sai oinsá nia sente hodi dehan: “Haʼu-nia laran sente moruk, no haʼu sente moras iha haʼu-nia rins.” Rezultadu mak nia besik atu la serbí Jeová ona. Maibé, saida mak ajuda Asaf atu hadiʼa ninia hanoin? Nia dehan: “Haʼu tama iha Maromak nia santuáriu boot.” Sin, hodi hamutuk ho ninia maluk sira neʼebé adora Jeová, ida-neʼe ajuda Asaf atu hadiʼa ninia hanoin. Nia hanoin-hetan katak maski ema aat sira moris kontente, maibé ida-neʼe ba tempu uitoan deʼit no Jeová sei hadiʼa situasaun neʼebé la iha justisa. (Sal 73:2, 13-22) Karik ita mós dala ruma sente hanesan Asaf. Kuandu ita haree buat neʼebé la loos iha Satanás nia mundu aat neʼe, ida-neʼe bele halo ita triste no laran-tun. Maibé, hodi halibur hamutuk ho ita-nia irmaun-irmán sira, ita bele hetan kmaan no ajuda atu kontinua serbí Jeová ho haksolok.
16. Oinsá mak Ana nia ezemplu bele ajuda ita?
16 Maibé, oinsá se buat ruma iha kongregasaun halo susar ba ita atu bá reuniaun? Porezemplu, karik ita iha problema ruma ho irmaun ka irmán ida, ka ita sente moe atu tuir reuniaun tanba ita la kaer ona responsabilidade ruma iha kongregasaun. Se nuneʼe, Ana nia ezemplu bele ajuda ita. (Lee 1 Samuel 1:4-6. *) Ana hetan susar husi ninia laʼen nia feen seluk, naran Penina. Ana nia situasaun sai susar tebes liuliu kuandu família tomak bá Silo tinan-tinan atu hasaʼe sakrifísiu ba Jeová. Ida-neʼe halo nia triste tebes toʼo halo “nia tanis no lakohi han”. Maski nuneʼe, Ana la husik situasaun neʼe hapara nia atu bá adora Maromak Jeová. Jeová hafolin Ana nia laran-metin no ikusmai fó bensaun ba nia.—1 Sam 1:11, 20.
17, 18. (a) Iha dalan saida deʼit mak ita bele hetan laran-manas no haksolok iha reuniaun? (b) Ita sente oinsá kona-ba Jeová nia ajuda atu laran-metin toʼo rohan?
17 Ohin loron, ema kristaun presiza halo tuir Ana nia ezemplu hodi tuir beibeik reuniaun. Iha reuniaun mak ita bele hetan laran-manas no haksolok. (Ebr 10:24, 25) Porezemplu, liafuan ruma neʼebé ita rona husi diskursu ka komentáriu sira husi ita-nia irmaun-irmán sira fó kmaan ba ita no book ita-nia laran. Hodi koʼalia ho irmaun-irmán sira antes no depois reuniaun, ida-neʼe mós halo ita sente kontente. (Prov 15:23; 17:17) Liután neʼe, kuandu ita kanta hamutuk ba Jeová, ida-neʼe halo ita laran-manas. Ita presiza duni atu hetan kmaan iha reuniaun liuliu kuandu ita iha buat ruma neʼebé halo ita hanoin barak. Sin, liuhusi reuniaun mak Jeová fó kmaan ba ita no ajuda ita atu laran-metin nafatin ba nia.—Sal 94:18, 19.
18 Hodi fiar katak Jeová hadomi no tau matan mai ita, ida-neʼe halo ita sente seguru hanesan Asaf hatete ba Jeová: “Ita kaer haʼu-nia liman loos. Ho Ita-nia konsellu Ita sei hatudu dalan mai haʼu.” (Sal 73:23, 24) Ita agradese tebes ba Jeová tanba nia proteje no ajuda ita atu laran-metin toʼo rohan!
[Nota–rodapé]
^ par. 2 Salmo 139:1-3: “1 Oh, Jeová, Ita haree haʼu ho didiʼak, no Ita hatene haʼu. 2 Ita rasik hatene kuandu haʼu tuur no hamriik. Ita hatene haʼu-nia hanoin maski Ita dook. 3 Ita haree haʼu kuandu haʼu halo viajen no mós kuandu haʼu toba, no Ita koñese didiʼak haʼu-nia dalan hotu.”
^ par. 12 Salmo 139:23, 24: “23 Oh, Maromak, buka didiʼak haʼu bá, no hatene haʼu-nia laran. Haree didiʼak bá, no hatene haʼu-nia neon-susar, 24 no haree se iha haʼu-nia laran iha hahalok ruma neʼebé lori susar. No, lori haʼu ba iha dalan rohan-laek nian.”
^ par. 14 Salmo 34:18: “Jeová besik ba sira neʼebé sente triste iha laran, no salva sira neʼebé laran-kraik.”
Salmo 56:8: “Ita rasik hakerek haʼu-nia susar nuʼudar ema neʼebé halai subar. Favór ida, rai haʼu-nia matan-been iha Ita-nia botir husi kulit. Sira laʼós iha Ita-nia livru?”
^ par. 16 1 Samuel 1:4-6: “4 No iha loron ida, kuandu Elcana hasaʼe sakrifísiu, nia fó parte balu ba ninia feen Penina no ba Penina nia oan-mane no oan-feto sira hotu; 5 maibé ba Ana, nia fó parte ida. Maski nuneʼe, Ana mak nia hadomi, no kona-ba Jeová, nia la husik Ana atu iha oan. 6 No feen seluk mós hakanek ninia laran makaʼas no halo nia sente laran-susar tanba Jeová la husik Ana atu iha oan.”
[Pergunta estudu nian]
[Dezeñu iha pájina 28]
Jeová mak dada ita ida-idak ba adorasaun neʼebé loos
[Dezeñu iha pájina 30]
Ita hetan ajuda hodi halo tuir konsellu husi Maromak
[Dezeñu iha pájina 31]
Ita hetan laran-manas atu laran-metin toʼo rohan
