Esperiénsia Husi Elva Gjerde

Maizumenus tinan 70 liubá, bainaka ida mai vizita haʼu-nia aman no buat ida neʼebé nia hatete troka haʼu-nia moris. Husi tempu neʼebá toʼo ohin loron, iha mós ema seluk neʼebé ajuda haʼu iha haʼu-nia moris no iha belun ida neʼebé haʼu hafolin liu. Haʼu sei konta kona-ba neʼe.

HAʼU moris iha tinan 1932, iha sidade Sydney iha rai-Austrália. Haʼu-nia inan-aman fiar Maromak maibé sira la bá igreja. Haʼu-nia inan hanorin haʼu katak Maromak sempre haree haʼu no se haʼu nakar, Maromak sei fó kastigu ba haʼu. Ida-neʼe halo haʼu taʼuk tebes ba Maromak. Maibé haʼu gosta Bíblia. Haʼu gosta rona haʼu-nia tia konta istória barak husi Bíblia, no tan neʼe haʼu sempre hein nia atu vizita ami iha findesemana.

Kuandu haʼu maizumenus tinan 13, haʼu-nia inan simu livru sira husi señora ida neʼebé Testemuña ba Jeová. Haʼu-nia aman lee livru sira-neʼe no nia kontente tebes ho buat neʼebé nia lee, tan neʼe ikusmai nia komesa estuda Bíblia ho Testemuña sira. Kuandu bainaka estuda ho haʼu-nia aman, haʼu rona subasubar ba buat neʼebé sira estuda. Iha kalan ida, haʼu-nia aman haree haʼu no haruka haʼu atu bá haʼu-nia kuartu, maibé irmaun neʼe hatete ba haʼu-nia aman: “Oinsá se ita husik Elva tuur hamutuk ho ita?” Ida-neʼe loke dalan ba haʼu atu troka haʼu-nia moris no sai belun ho Maromak Jeová.

Lakleur depois neʼe, haʼu ho haʼu-nia aman komesa tuir reuniaun kristaun sira. Buat neʼebé haʼu-nia aman aprende book nia atu halo mudansa iha ninia moris, hanesan la sai hirus lalais. Ida-neʼe book haʼu-nia inan no haʼu-nia maun naran Frank atu sira mós tuir reuniaun sira. * Ami naʼin-haat laʼo ba oin iha lia-loos no liutiha tempu balu ami hotu hetan batizmu nuʼudar Testemuña ba Jeová. Husi tempu neʼebá, maluk kristaun barak neʼebé idade liu haʼu, sira ajuda haʼu iha situasaun oioin neʼebé haʼu hasoru.

HALO DESIZAUN KONA-BA SERBISU

Nuʼudar joven, haʼu kontente atu hakbesik ba ema neʼebé idade liu haʼu iha kongregasaun. Sira ida mak irmán Alice Place, nia mak ema neʼebé ulukliu haklaken ba ami-nia família. Irmán neʼe sai hanesan haʼu-nia avó-feto rasik. Irmán Alice treinu haʼu atu bá haklaken no fó laran-manas mai haʼu atu laʼo ba oin toʼo hetan batizmu. Ikusmai, haʼu hetan batizmu kuandu haʼu sei tinan 15.

Haʼu mós sai kolega diʼak ho feen-laʼen ida neʼebé idade ona, naran Percy no Madge [Margaret] Dunham. Sira uluk serbí nuʼudar misionáriu iha rai-Letónia, maibé tanba Funu Mundiál Segundu komesa iha rai-Europa, sira simu konvite atu serbí iha Betel Austrália, neʼebé ladook husi sidade Sydney. Hodi ransu ho sira, ida-neʼe ajuda haʼu atu hanoin didiʼak kona-ba haʼu-nia planu ba futuru. Uluk, haʼu gosta tebes matemátika no hakarak atu sai mestra  matemátika. Maibé, irmaun Percy no irmán Madge sempre hakbesik ba haʼu, no sira konta sira-nia esperiénsia neʼebé diʼak kona-ba tempu neʼebé sira serbí nuʼudar misionáriu. Ida-neʼe ajuda haʼu atu haree ho klaru katak hanorin Bíblia sei halo haʼu kontente liu fali hanorin matemátika. Tan neʼe, haʼu troka haʼu-nia planu no deside atu sai misionáriu.

Irmaun no irmán Dunham fó laran-manas mai haʼu atu halo serbisu pioneiru hodi hetan treinu atu sai misionáriu. Tan neʼe, iha tinan 1948, kuandu haʼu tinan 16, haʼu komesa pioneiru no haklaken hamutuk ho maluk joven sira naʼin-10 neʼebé serbí nuʼudar pioneiru ho laran-haksolok iha haʼu-nia kongregasaun iha Hurstville, iha Sydney.

Durante tinan haat nia laran, haʼu halo serbisu pioneiru iha área haat seluk tan iha New South Wales no Queensland. Haʼu-nia estudante ida naran Betty Law (agora Remnant), nia tinan rua boot liu haʼu, no ikusmai nia sai haʼu-nia maluk pioneiru iha sidade naran Cowra, neʼebé dook maizumenus kilómetru 230 husi Sydney. Maski ami pioneiru hamutuk ba tempu uitoan deʼit, haʼu ho Betty sai kolega diʼak toʼo agora.

Kuandu haʼu simu knaar nuʼudar pioneiru tempu-tomak, haʼu muda ba sidade naran Narrandera, neʼebé dook kilómetru 220 husi Cowra. Haʼu-nia maluk pioneiru foun mak irmán Joy Lennox (agora Hunter), nia mós tinan rua boot liu haʼu no laran-manas atu haklaken. Iha fatin neʼe, ami naʼin-rua deʼit mak Testemuña. Haʼu ho Joy hetan hela-fatin iha feen-laʼen ida nia uma, sira naran Ray no Ester Iron. Kaben-naʼin neʼe laran-luak no sira iha oan-mane ida ho oan-feto naʼin-tolu, no sira hotu hatudu interese ba lia-loos. Iha loron baileet, Ray ho ninia oan-mane serbisu iha toʼos-trigu no tau matan ba bibi-malae iha fatin dook husi sidade, no Ester ho oan-feto naʼin-tolu tau matan ba sira-nia uma neʼebé fó aluga ba ema barak. Domingu-domingu, haʼu ho Joy halo serbisu hodi prepara ai-han barak tebes ba família Irons no mós ba mane maizumenus naʼin-12 neʼebé aluga sira-nia uma, neʼebé serbisu harii dalan komboiu nian. Tanba ami halo serbisu neʼe, ida-neʼe ajuda ami atu hamenus osan atu selu kuartu neʼebé ami aluga. Depois ami han no hamoos tiha, ami fahe fali ai-han espirituál ba família Irons hodi estuda Livru Haklaken semana-semana. Ikusmai, Ray, Ester, no sira-nia oan naʼin-haat hotu simu lia-loos no sai ema primeiru iha Kongregasaun Narrandera.

Iha tinan 1951, haʼu tuir reuniaun boot husi Testemuña ba Jeová iha Sydney. Iha neʼebá, haʼu tuir enkontru espesiál ida ba pioneiru sira neʼebé hakarak serbí nuʼudar misionáriu. Iha enkontru neʼe, neʼebé halaʼo iha tenda boot, ema maizumenus naʼin-300 tuir no irmaun Nathan Knorr neʼebé mai husi Betel Brooklyn hatete ba ami katak presiza lori lia-foun diʼak ba mundu tomak. Ami rona didiʼak ba ninia liafuan hotu. Pioneiru sira barak neʼebé tuir enkontru iha neʼebá ikusmai bá hodi habelar serbisu haklaken iha área sira iha parte súl husi Tasi Pasífiku nian no mós iha fatin seluk. Lakleur, haʼu haksolok tebes tanba ami naʼin-17 husi rai-Austrália hetan konvite atu tuir Eskola Gilead klase 19, neʼebé halaʼo iha tinan 1952. Ho tinan 20 deʼit, haʼu-nia mehi atu halo serbisu nuʼudar misionáriu besik atu sai loos ona!

HADIʼA HAʼU-NIA HAHALOK

Eskola Gilead ajuda haʼu laʼós deʼit atu aumenta haʼu-nia matenek kona-ba Bíblia no hametin liután haʼu-nia fiar, maibé ajuda mós haʼu atu hadiʼa haʼu-nia hahalok. Haʼu sei joven no haʼu ema neʼebé hakarak buat hotu laʼo ho loloos, no haʼu hakarak hanesan neʼe ba haʼu-nia an rasik no mós ba ema seluk. Haʼu mós iha hanoin neʼebé kloot tebes kona-ba buat balu. Porezemplu, haʼu hakfodak bainhira haʼu haree irmaun Knorr halimar bola hamutuk ho irmaun joven sira neʼebé serbí iha Betel.

Mestre sira iha Gilead neʼebé iha esperiénsia barak  haree katak haʼu iha hanoin neʼebé sala. Tan neʼe, sira hatudu laran-diʼak mai haʼu no ajuda haʼu atu troka haʼu-nia hanoin. Neineik-neineik, haʼu komesa hatene katak Jeová mak Maromak neʼebé hadomi no hafolin ema, laʼós Maromak hirusdór. Haʼu mós hetan ajuda husi haʼu-nia maluk estudante sira. Haʼu sei hanoin-hetan estudante ida hatete mai haʼu: “Elva, Jeová la hateke tun mai ita hodi kaer hela xikote. Keta fó terus ba ó-nia an!” Liafuan neʼebé nia koʼalia nakloke mai haʼu kona duni haʼu-nia laran.

Depois Eskola Gilead hotu tiha, ami estudante naʼin-lima hetan knaar atu serbí iha rai-Namíbia, iha Áfrika. Lakleur depois ami bá iha rai neʼebá, ami naʼin-lima halaʼo estudu Bíblia hamutuk 80. Haʼu gosta tebes rai-Namíbia no haʼu-nia serbisu nuʼudar misionáriu, maibé haʼu-nia laran monu ona ba irmaun ida neʼebé estuda hamutuk ho haʼu iha Eskola Gilead, neʼebé hetan knaar iha rai-Suisa. Tan neʼe, liutiha tinan ida iha rai-Namíbia, haʼu muda ba rai-Suisa no ami kaben. Depois, haʼu tuir haʼu-nia laʼen neʼebé serbí nuʼudar katuas área nian.

HETAN SUSAR BOOT

Durante tinan lima nia laran, ami kontente atu vizita kongregasaun oioin. Depois, ami simu konvite atu serbí iha Betel Suisa. Iha neʼebá, haʼu haksolok tebes hodi ransu ho irmaun-irmán sira neʼebé idade liu haʼu, neʼebé iha esperiénsia barak.

Maibé lakleur, susar boot kona haʼu. Haʼu hakfodak katak haʼu-nia laʼen la laran-metin ba haʼu no mós ba Jeová. Depois, nia husik haʼu. Ida-neʼe halo haʼu laran-kanek tebes! Se haʼu la iha kolega sira iha Betel neʼebé idade boot liu haʼu neʼebé ajuda haʼu no hatudu domin mai haʼu karik, haʼu la hatene oinsá loos atu tahan hasoru susar ida-neʼe. Sira rona mai haʼu kuandu haʼu presiza koʼalia, no kuandu haʼu presiza tempu hakmatek, sira husik haʼu. Sira fó kmaan mai haʼu no apoia haʼu liuhusi sira-nia liafuan no hahalok, ida-neʼe ajuda haʼu atu tahan hasoru susar neʼe no ajuda mós haʼu atu hakbesik liután ba Jeová.

Haʼu mós hanoin-hetan liafuan sira neʼebé haʼu rona uluk husi haʼu-nia maluk sira neʼebé iha esperiénsia barak. Ida-neʼe inklui mós irmán Madge Dunham nia liafuan. Loron ida, nia hatete: “Elva, nuʼudar ó serbí Jeová iha ó-nia moris, ó sei hetan susar barak, maibé karik susar neʼebé boot liu sei mai husi ema neʼebé besik liu ó. Kuandu ó hasoru susar hanesan neʼe, hakbesik ba Jeová. Hanoin-hetan katak ó la serbí ema maibé ó serbí Jeová!” Irmán Madge nia konsellu neʼe fó laran-manas mai haʼu iha tempu susar. Haʼu la husik haʼu-nia laʼen nia sala atu hadook haʼu husi Jeová.

Ikusmai, haʼu deside atu fila ba Austrália atu halo serbisu pioneiru besik haʼu-nia família. Durante haʼu-nia viajen atu fila, haʼu haklaken ba grupu ida iha ró laran no koʼalia beibeik kona-ba Bíblia ho sira. Sira ida mak mane husi rai-Noruega, naran Arne Gjerde, ema neʼebé la koʼalia barak. Nia gosta buat neʼebé nia rona no liutiha tempu balu, nia vizita haʼu ho haʼu-nia família iha Sydney. Nia laʼo ba oin lalais iha lia-loos no lakleur nia sai Testemuña. Iha tinan 1963, haʼu kaben ho Arne, no liutiha tinan rua, ami iha oan-mane ida, naran Gary.

LAKON DOBEN IDA TAN

Moris família nian hamutuk ho haʼu-nia laʼen no oan halo haʼu kontente tebes. Arne halo ami-nia uma sai luan liután atu haʼu-nia inan-aman neʼebé idade ona bele hela hamutuk ho ami. Maibé liutiha tinan neen depois ami kaben, ami hasoru susar boot. Arne hetan kankru iha kakutak laran. Kuandu Arne baixa iha ospitál no hetan tratamentu, haʼu  vizita nia loron-loron. Ba tempu balu, Arne sai diʼak, maibé nia sai moras todan toʼo doutór hatete katak Arne sei moris ba semana balu deʼit. Maski nuneʼe, nia sai diʼak fali. Ikusmai, nia fila ba uma, no haʼu tau matan ba nia. Neineik-neineik nia komesa laʼo diʼak fali, no bele halaʼo ninia knaar nuʼudar katuas iha kongregasaun. Tanba nia kontente nafatin no hatene oinsá atu halo ami kontente, ida-neʼe ajuda nia atu hetan fali isin-diʼak no halo fasil ba haʼu atu tau matan ba nia.

Maibé, iha tinan 1986, Arne sai moras todan fali. Iha tempu neʼebá, haʼu-nia inan-aman mate tiha ona, tan neʼe, atu besik liu ho ami-nia kolega diʼak sira, ami muda ba fatin kapás iha área Blue Mountains, neʼebé dook husi Sydney. Lakleur, Gary kaben ho irmán diʼak ida, naran Karin, no sira hatete mai ami atu hela hamutuk ho sira iha uma ida deʼit. Nuneʼe, ami hotu muda ba fatin ida neʼebé besik loos ho ami-nia hela-fatin uluk nian.

Durante tinan ida ho balun nia laran antes Arne mate, nia toba deʼit iha kama no nia presiza haʼu atu tau matan nafatin ba nia. Tanba haʼu iha uma deʼit ba tempu barak, loron-loron haʼu uza oras rua atu estuda Bíblia no livru sira. Iha tempu neʼebá, haʼu hetan konsellu diʼak kona-ba oinsá atu tahan hasoru haʼu-nia situasaun. Haʼu mós kontente atu hetan vizita husi irmaun-irmán sira neʼebé idade boot liu haʼu, no balu hasoru ona susar hanesan haʼu. Ida-neʼe fó laran-manas tebes mai haʼu! Ikusmai, iha Abríl 2003, Arne mate. Nia laran-metin ba esperansa atu moris hiʼas fali iha futuru.

AJUDA BOOT LIU NEʼEBÉ HAʼU HETAN

Kuandu haʼu sei joven, haʼu ema neʼebé gosta atu buat hotu laʼo ho loloos. Maibé tuir loloos, ita-nia moris dala barak la sai hanesan ita hakarak. Haʼu hetan bensaun barak, maibé haʼu mós hetan susar boot rua. Haʼu lakon haʼu-nia laʼen ida tanba nia laran la metin ba haʼu, no haʼu mós lakon haʼu-nia laʼen ida seluk tanba moras. Iha tempu susar sira-neʼe, haʼu hetan konsellu no kmaan iha dalan oioin. Maibé, ajuda boot liu neʼebé haʼu hetan mak husi Maromak Jeová, “Ida neʼebé Idade Boot Liu”. (Dan 7:9) Ninia konsellu ajuda haʼu atu hadiʼa haʼu-nia hahalok no ajuda mós haʼu atu halo serbisu nuʼudar misionáriu. Kuandu problema mosu, ‘Jeová nia laran-diʼak neʼebé nakonu ho domin hametin haʼu no ninia konsola hamaus haʼu’. (Sal 94:18, 19) Haʼu mós hetan domin no ajuda husi família no husi ‘belun loos neʼebé mosu mai iha tempu susar nia laran’. (Prov 17:17) Sira barak mak irmaun-irmán sira neʼebé idade liu haʼu.

Job husu: ‘Iha matenek iha ema neʼebé idade ona, loos ka lae?’ (Jó 12:12) Kuandu haʼu hanoin filafali kona-ba haʼu-nia moris, haʼu bele hatete ho klaru katak resposta ba pergunta neʼe mak “loos”. Konsellu husi ema neʼebé idade liu ajuda duni haʼu, haʼu hetan kmaan husi sira, no haʼu laran-haksolok hodi sai belun ho sira. Haʼu kontente tebes tanba haʼu bele hakbesik ba sira.

Agora, haʼu tinan 80 ona. Haʼu-nia esperiénsia halo haʼu hatene kona-ba buat neʼebé ema ho idade boot presiza, no haʼu gosta vizita ema hanesan neʼe no ajuda sira. Maibé haʼu mós gosta hamutuk ho ema neʼebé joven. Haʼu kontente atu haree sira-nia forsa no laran-manas, tanba ida-neʼe anima haʼu. Haʼu mós sente kontente tebes atu ajuda joven sira kuandu sira hakbesik ba haʼu hodi buka konsellu.

[Nota–rodapé]

[Dezeñu iha pájina 14]

Haʼu ho irmán Joy Lennox serbí nuʼudar pioneiru iha Narrandera

[Dezeñu iha pájina 15]

Haʼu ho família Betel Suisa iha tinan 1960

[Dezeñu iha pájina 16]

Haʼu ho Arne kuandu nia sei moras