Ita bele salva ita-nia moris kaben nian
Ita bele salva ita-nia moris kaben nian
“Ba kaben-naʼin sira, haʼu fó liafuan ida-neʼe: laʼós haʼu, maibé Naʼi.”—1 KOR 7:10.
ITA BELE HATÁN?
Maromak “tau hamutuk” feen no laʼen, ida-neʼe katak sá?
Oinsá mak katuas sira bele ajuda ema kristaun neʼebé hasoru problema iha sira-nia moris kaben nian?
Ita-nia haree kona-ba moris kaben nian tenkesér oinsá?
1. Oinsá mak ema kristaun nia haree kona-ba arranju kaben nian? Tanbasá?
KUANDU mane no feto kristaun kaben, sira halo juramentu kaben nian iha Maromak nia oin. Ida-neʼe mak responsabilidade neʼebé boot. (Ecle 5:4-6) Tanba Jeová mak hahú arranju kaben nian, ida-neʼe katak Jeová mak “tau hamutuk” sira nuʼudar kaben-naʼin. (Mc 10:9) Maski estadu nia lei hatete buat oioin kona-ba arranju kaben nian, maibé kaben-naʼin sira tenke moris hamutuk nafatin. Jeová nia atan sira tenke haree sira-nia juramentu kaben nian hanesan Jeová haree. Ida-neʼe inklui mós sira neʼebé kaben ona antes sira hatene lia-loos.
2. Iha lisaun neʼe, ita sei koʼalia kona-ba pergunta saida deʼit?
2 Moris nuʼudar kaben-naʼin bele lori haksolok ba ita. Maibé se ita iha problema ruma nuʼudar kaben-naʼin, ita bele halo saida atu salva ita-nia moris kaben nian? Ita bele hametin fali ita-nia relasaun nuʼudar feen-laʼen ka lae? Ba feen-laʼen neʼebé iha problema iha sira-nia moris kaben nian, ajuda saida deʼit mak sira bele hetan?
LORI HAKSOLOK KA SUSAR?
3, 4. Se ita halo desizaun neʼebé ladiʼak kona-ba hili kaben, ida-neʼe bele lori rezultadu saida?
3 Kuandu ema kristaun ida nia moris kaben nian laʼo ho didiʼak, ida-neʼe lori haksolok ba nia no fó hahiʼi ba Jeová. Maibé se iha problema iha kaben laran, ida-neʼe lori susar boot no halo nia triste tebes. Ema kristaun klosan neʼebé hanoin atu kaben, nia bele hahú ninia moris kaben nian iha dalan neʼebé diʼak bainhira nia halo tuir Maromak nia matadalan. Maibé se nia halo desizaun neʼebé ladiʼak kona-ba hili kaben, ida-neʼe bele lori susar ba nia no la kontente. Porezemplu, joven balu komesa namora maski sira seidauk prontu atu kaer responsabilidade nuʼudar kaben-naʼin. Ema seluk buka sira-nia kaben liuhusi internét no kaben lalais, no ikusmai lori susar iha sira-nia moris kaben nian. Iha mós ema neʼebé halo sala boot durante tempu neʼebé sira namora, ida-neʼe halo susar ba sira atu hatudu respeitu ba malu kuandu sira komesa moris kaben nian.
4 Ema kristaun balu kaben ho ema neʼebé laʼós “iha Naʼi”, no ikusmai sira hetan rezultadu ladiʼak tanba sira-nia kaben nia fiar la hanesan. (1 Kor 7:39) Se ita iha situasaun hanesan neʼe, diʼak atu halo orasaun ba Jeová hodi husu perdua no ajuda. Jeová sei la halakon rezultadu aat husi desizaun sala neʼebé ita halo iha tempu uluk, maibé se ita arrepende an ho laran, nia sei ajuda ita atu tahan. (Sal 130:1-4) Tan neʼe, hakaʼas an atu halo Maromak kontente, no “Jeová nia haksolok” sei ajuda ita atu tahan.—Neem 8:10.
KUANDU PROBLEMA MOSU IHA MORIS KABEN NIAN
5. Kuandu ita la kontente ho ita-nia moris kaben nian, ita la bele hanoin kona-ba saida?
5 Ema balu neʼebé la kontente ho sira-nia moris kaben nian, karik sira hanoin: ‘Haʼu manán saida atu salva haʼu-nia moris kaben nian? Karik diʼak liu haʼu kaben fali ho ema seluk deʼit!’ Dala ruma sira mós hanoin atu soe malu no dehan ba sira-nia an: ‘Haʼu hakarak sai livre deʼit! Haʼu bele soe malu ka lae? Maski haʼu labele soe malu tuir Bíblia nia matadalan, karik haʼu bele haketak malu deʼit no goza haʼu-nia moris.’ Duké hanoin hanesan neʼe, ema kristaun presiza hakaʼas an iha situasaun neʼebé sira hasoru daudauk hodi halo tuir Maromak nia matadalan.
6. Jesus nia liafuan iha Mateus 19:9 katak sá?
6 Tuir loloos, se ema kristaun ida soe malu, ida-neʼe la dehan katak ema neʼe iha liberdade atu kaben fali ho ema seluk tuir Bíblia nia matadalan. Jesus hatete: “Ema neʼebé soe nia feen, sala-foʼer deʼit mak lae, hodi hola fali feto seluk, ema neʼe halo sala adultériu nian.” (Mt 19:9) Hahalok sala-foʼer inklui halo relasaun seksuál ho ema neʼebé laʼós ninia kaben, no mós hahalok seksuál seluk neʼebé aat tebes. Tan neʼe, kuandu ema kristaun ida hanoin atu soe malu maski nia ka ninia kaben la halo sala-foʼer, nia presiza hanoin didiʼak kona-ba neʼe hodi halo orasaun no husu Maromak nia ajuda.
7. Se ema kristaun nia moris kaben nian la laʼo ho didiʼak, karik ema seluk sei hanoin saida?
7 Kuandu ema kristaun ruma nia moris kaben nian la laʼo ho didiʼak, karik ida-neʼe hatudu katak ninia relasaun ho Maromak mós fraku. Apóstolu Paulo hatete: “Oinsá ema ida bele tau matan ba Maromak nia [kongregasaun] wainhira nia la hatene tau matan ba nia família rasik?” (1 Tim 3:5) Se feen-laʼen dehan katak sira ema kristaun maibé sira-nia moris kaben nian la laʼo ho didiʼak, karik ema seluk sei hanoin katak sira la moris tuir buat neʼebé sira hanorin ba ema seluk.—Rom 2:21-24.
8. Kuandu feen-laʼen kristaun hanoin atu haketak malu ka soe malu, ida-neʼe hatudu saida kona-ba sira?
8 Kuandu feen-laʼen kristaun hanoin atu haketak malu ka soe malu maski la iha razaun neʼebé loos tuir Bíblia nia matadalan, ida-neʼe hatudu katak sira iha buat ruma neʼebé la loos kona-ba sira-nia relasaun ho Jeová. Karik sira ida ka sira naʼin-rua la halo tuir matadalan husi Bíblia. Se sira naʼin-rua ‘tau fiar ba Jeová ho sira-nia laran tomak’, sira bele salva sira-nia moris kaben nian.—Lee Provérbios 3:5, 6. *
9. Ema kristaun balu neʼebé la rende an ho sira-nia moris kaben nian, ikusmai hetan rezultadu saida?
9 Ema barak neʼebé uluk iha problema iha sira-nia relasaun nuʼudar feen-laʼen, ikusmai sira konsege hadiʼa fali. Kuandu ema kristaun sira neʼebé iha problema iha sira-nia moris kaben nian no sira la rende an lalais, ikusmai sira sei hetan rezultadu neʼebé diʼak. Porezemplu, hanoin toʼok kona-ba feen kristaun neʼebé nia laʼen nia fiar la hanesan. Apóstolu Paulo hakerek: “Feto sira, imi rona imi-nia kaben bá; atu imi bele lori sira balun mai neʼebé la halo tuir liafuan, laʼós tanba liafuan ruma, maibé ho sira feen nia hahalok, wainhira sira haree imi-nia hahalok santu no momoos.” (1 Ped 3:1, 2) Sin, tanba kaben nia hahalok diʼak, ema neʼebé fiar la hanesan ikusmai bele simu lia-loos! Ema kristaun neʼebé salva ninia moris kaben nian, ninia hahalok neʼe fó hahiʼi ba Maromak no família tomak sei hetan bensaun.
10, 11. Problema saida deʼit mak bele mosu iha moris kaben nian? Maibé ema kristaun bele fiar saida?
10 Ema kristaun barak deside atu kaben ho maluk kristaun neʼebé hetan ona batizmu tanba sira hakarak halo Jeová kontente. Maski nuneʼe, sira-nia moris kaben nian bele hetan susar. Karik sira ida hetan moras kona-ba emosaun, ka para ona atu bá haklaken. Porezemplu, irmán Linda, * neʼebé laran-manas atu haklaken no badinas atu haboot ninia oan, kuandu ninia laʼen komesa halo buat neʼebé laloos no la arrepende an, no ikusmai kongregasaun hasai nia, nia sente katak nia la bele halo buat ida ona. Entaun, se ema kristaun ida iha situasaun hanesan neʼe, saida mak nia bele halo?
11 Karik ita husu: ‘Haʼu presiza hakaʼas an nafatin atu salva haʼu-nia moris kaben nian maski haʼu hasoru susar ka lae?’ Ema ida labele foti desizaun ba ita kona-ba ida-neʼe. Maibé, ita iha razaun diʼak atu la rende an lalais. Jeová hafolin ema kristaun neʼebé tahan ho ninia moris kaben nian tanba hakarak iha laran neʼebé moos iha Maromak nia oin. (Lee 1 Pedro 2:19, 20.) Liuhusi ninia Liafuan no espíritu santu, Jeová sei ajuda ema kristaun neʼebé hakaʼas an atu hametin sira-nia moris kaben nian.
SIRA PRONTU ATU AJUDA ITA
12. Se ita buka katuas sira-nia ajuda, sira sei sente oinsá kona-ba ita?
12 Se ita iha problema ruma iha ita-nia moris kaben nian, diʼak atu husu ajuda husi maluk kristaun neʼebé iha ona esperiénsia. Katuas kristaun sira halo serbisu nuʼudar bibi-atan hodi tau matan ba kongregasaun, no sira sei kontente atu ajuda ita hodi uza konsellu husi Bíblia. (Apos 20:28; Tgo 5:14, 15) Ita lalika hanoin katak se ita fó sai ita-nia problema ba katuas sira no husu sira-nia ajuda, sira sei la respeitu tan ita no ita-nia kaben. Tuir loloos, kuandu katuas sira haree katak ita hakarak halo Maromak kontente, sira-nia domin no respeitu ba ita sei aumenta liután.
13. Konsellu saida mak ita bele hetan iha 1 Korinto 7:10-16?
13 Kuandu ema kristaun ida neʼebé ninia kaben fiar la hanesan mak husu katuas sira-nia ajuda, katuas sira bele uza Paulo nia konsellu neʼebé dehan: “Ba kaben-naʼin sira, haʼu fó liafuan ida-neʼe: laʼós haʼu, maibé Naʼi, feen ida labele haketak an husi nia laʼen; maibé nia haketak an karik, nia tenke hela mesak ka hadame malu fali ho nia laʼen; no laʼen ida labele soe nia feen. . . . Basá, [feto], oinsá ó hatene, katak ó sei soi ó-nia laʼen; ka mane, oinsá ó hatene, katak ó sei soi ó-nia feen?” (1 Kor 7:10-16) Sin, kuandu ema kristaun nia kaben neʼebé fiar la hanesan ikusmai sai Jeová nia atan, neʼe mak bensaun boot tebes!
14, 15. Ho razaun saida deʼit mak karik feen kristaun hanoin atu haketak an husi ninia kaben? Tanbasá mak ema kristaun presiza halo orasaun no hanoin didiʼak ninia sentimentu?
14 Feen kristaun iha razaun saida deʼit atu bele “haketak an” husi ninia laʼen? Ema balu deside atu haketak an husi sira-nia kaben tanba sira-nia kaben lakohi tau matan ba família toʼo la iha osan ka hahán, halo violénsia makaʼas toʼo halo sira sente katak sira-nia moris iha perigu laran, ka fó-terus makaʼas atu labele serbí Maromak.
15 Kona-ba haketak-malu, ida-neʼe mak desizaun neʼebé ema ida-idak tenke halo. Maibé, atu halo nuneʼe, ema kristaun presiza halo orasaun no hanoin didiʼak ninia sentimentu. Porezemplu, ema neʼebé iha situasaun hanesan neʼe bele husu ba ninia an: ‘Haʼu-nia kaben neʼebé fiar la hanesan, nia deʼit mak hanetik haʼu atu labele serbí Jeová, ka haʼu rasik mós la badinas atu estuda Bíblia, tuir reuniaun, no haklaken beibeik ka lae?’
16. Tanbasá mak ema kristaun labele halo desizaun lalais kona-ba soe-malu?
16 Tanba ita hafolin ita-nia relasaun ho Maromak no ita mós hatudu respeitu ba ninia arranju kaben nian, ita labele halo desizaun lalais kona-ba soe-malu. Nuʼudar Jeová nia atan, ita hanoin kona-ba ninia naran neʼebé santu no ita lakohi halo desizaun neʼebé halo ema hanoin ladiʼak kona-ba Jeová. Tan neʼe, ita lakohi sai traidór ba ita-nia kaben hodi halo planu atu soe malu no kaben fali ho ema seluk.—Jer 17:9; Mal 2:13-16.
17. Iha situasaun saida mak ita bele hatete katak Maromak bolu ema kristaun ba dame?
17 Ema kristaun neʼebé ninia kaben fiar la hanesan, nia presiza hakaʼas an atu hametin ninia relasaun nuʼudar kaben-naʼin. Maibé, kuandu ema kristaun ida halo buat hotu neʼebé nia bele atu salva ninia moris kaben nian, nia la presiza sente sala se ninia kaben deside atu husik nia. Paulo hatete: “Ema neʼebé laʼós fiar-naʼin haketak malu karik, nia bele haketak malu. Nuneʼe maun-alin ka biin-feton la kesi tiha ona; basá Maromak bolu imi ba dame.”—1 Kor 7:15. *
TAU FIAR BA JEOVÁ
18. Ema neʼebé hakaʼas an atu salva moris kaben nian bele hetan rezultadu diʼak saida?
18 Kuandu ita hasoru problema iha ita-nia moris kaben nian, ita presiza husu Jeová nia ajuda atu fó aten-brani mai ita hodi bele halo buat neʼebé loos no tau fiar nafatin ba nia. (Lee Salmo 27:14. *) Hanoin toʼok kona-ba irmán Linda, neʼebé temi uluk. Maski nia hakaʼas an atu salva ninia moris kaben nian durante tinan barak, maibé ikusmai sira soe malu. Irmán Linda sente katak nia hakaʼas an saugati deʼit ka lae? Nia hatete: “Lae duni. Liuhusi haʼu-nia hakaʼas-an, haʼu fó sasin diʼak ba ema seluk. Haʼu-nia laran moos kona-ba neʼe. Maibé rezultadu neʼebé diʼak liu mak hahalok neʼebé haʼu hatudu ba tinan barak ajuda haʼu-nia oan-feto atu hamriik metin nafatin iha lia-loos. Ikusmai, nia dedika ninia an ba Jeová no sai Testemuña neʼebé laran-manas.”
19. Se ita hakaʼas an atu salva ita-nia moris kaben nian, ita bele hetan rezultadu diʼak saida?
19 Feen kristaun ida naran Marilyn, nia kontente tanba nia tau fiar ba Jeová no hakaʼas an atu salva ninia moris kaben nian. Nia hatete katak uluk nia hanoin katak diʼak liu nia haketak malu ho ninia laʼen tanba ninia laʼen la tau matan ba nia no hapara nia atu labele serbí Jeová. Uluk, ninia laʼen serbí nuʼudar katuas kristaun, maibé ikusmai nia envolve an ho negósiu neʼebé la tuir Bíblia nia matadalan. Nia komesa falta reuniaun no sira naʼin-rua la koʼalia ba malu ona. Liután neʼe, tanba terrorista ataka sira-nia sidade, ida-neʼe halo irmán Marilyn taʼuk no halo susar ba nia atu hamutuk ho ema seluk. Maibé ikusmai, irmán neʼe rekoñese katak nia rasik mós sala kona-ba sira-nia problema entre feen-laʼen. Nia ho ninia laʼen komesa fali atu koʼalia ba malu, estuda fali nuʼudar família, no tuir fali reuniaun beibeik. Katuas sira mós hatudu laran-diʼak no ajuda sira. Sira-nia situasaun sai diʼak fali hanesan sira foin komesa moris kaben nian. Liutiha tempu balu, ninia laʼen hetan fali knaar iha kongregasaun. Irmán neʼe hatete katak liuhusi ninia esperiénsia neʼebé ladiʼak, nia aprende buat barak no hetan rezultadu diʼak.
20, 21. Ita presiza hakaʼas an atu halo saida deʼit kona-ba ita-nia moris kaben nian?
20 Maski ita seidauk kaben ka kaben ona, ita hotu presiza hatudu aten-brani nafatin atu halo buat neʼebé loos no tau fiar ba Jeová nia ajuda. Se ita hasoru problema iha ita-nia moris kaben nian, ita presiza hakaʼas an atu halo buat hotu neʼebé ita bele halo atu rezolve problema neʼe no hanoin-hetan katak ema neʼebé kaben ona “laʼós naʼin-rua tan, maibé isin ida deʼit”. (Mt 19:6) Liután neʼe, maski ita hasoru susar oioin hodi moris hamutuk ho ita-nia kaben neʼebé fiar la hanesan, maibé se ita tahan nafatin, ikusmai ita bele hetan haksolok hodi ajuda ita-nia kaben atu serbí Jeová.
21 Maski ema ida-idak nia situasaun la hanesan, ita hotu presiza halo buat neʼebé loos hodi fó sasin diʼak ba ema seluk neʼebé laʼós parte husi kongregasaun. Se problema boot mosu iha ita-nia moris kaben nian no ita hanoin atu haketak malu, ita presiza hanoin ho laran neʼebé moos kona-ba tanbasá mak ita hakarak halo ida-neʼe. Ita mós presiza hanoin didiʼak kona-ba Bíblia nia matadalan no husu katuas sira-nia ajuda. Maibé, buat neʼebé importante liu mak ita hotu hakaʼas an nafatin atu halo Maromak Jeová kontente liuhusi ita-nia hahalok no hatudu katak ita hafolin duni arranju kaben nian nuʼudar prezente diʼak husi Jeová.
[Nota–rodapé]
^ par. 8 Provérbios 3:5, 6: “5 Tau fiar ba Jeová ho ó-nia laran tomak no labele sadere ba ó-nia matenek rasik. 6 Iha ó-nia dalan hotu fó atensaun ba nia, no nia rasik sei halo ó-nia dalan sai loos.”
^ par. 10 Naran sira laʼós naran neʼebé loos.
^ par. 18 Salmo 27:14: “Tau fiar ba Jeová; aten-brani bá no halo ó-nia laran metin. Sin, tau fiar ba Jeová.”
[Pergunta estudu nian]
[Dezeñu iha pájina 10]
Ema kristaun neʼebé hakaʼas an atu salva sira-nia moris kaben nian hetan rezultadu diʼak
[Dezeñu iha pájina 12]
Tau fiar nafatin ba Jeová no husu nia atu fó aten-brani mai ita
[Dezeñu iha pájina 9]
Jeová fó bensaun ba ema kristaun neʼebé hakaʼas an atu hametin sira-nia moris kaben nian
[Dezeñu iha pájina 11]
Kongregasaun kristaun bele fó kmaan no ajuda ita
