Ita haleno Jeová nia glória ka lae?
Ita haleno Jeová nia glória ka lae?
“Hanesan espellu, . . . ita haleno Jeová nia glória.”—2 KOR 3:18, MF.
OINSÁ ITA HATÁN?
Maski ita sala-naʼin, tanbasá mak ita bele haleno Jeová nia glória?
Oinsá mak orasaun no reuniaun ajuda ita atu haleno Maromak nia glória?
Hodi nafatin fó glória ba Jeová, ita presiza halo saida deʼit?
1, 2. Tanbasá mak ema bele halo tuir Jeová nia hahalok sira?
DALA ruma ita hotu hatudu hahalok neʼebé hanesan ho ita-nia inan ka aman. Karik ita rona ema hatete ba labarik-mane: “Ó hanesan deʼit ho ó-nia aman”, ka ba labarik-feto: “Ó halo haʼu hanoin-hetan kona-ba ó-nia inan.” Liután neʼe, dala barak labarik sira koko atu halo tuir buat neʼebé sira-nia inan-aman halo. Maibé oinsá ho ita? Ita bele halo tuir ita-nia Aman Jeová nia hahalok ka lae? Maski ita la bele haree nia, ita bele aprende kona-ba Jeová nia hahalok furak sira hodi haree didiʼak buat neʼebé nia kria. Ita mós aprende kona-ba Jeová nia hahalok sira hodi estuda Bíblia no hodi hanoin kleʼan kona-ba buat neʼebé ita lee, liuliu kona-ba ninia Oan Jesus nia liafuan no hahalok. (Joao 1:18; Rom 1:20) Tan neʼe, ita bele halo tuir Jeová nia hahalok sira, no hodi halo nuneʼe, ita bele haleno ninia glória.
2 Antes Maromak kria ema, nia hatene ona katak ema bele halo ninia hakarak, halo tuir ninia hahalok sira, no fó glória ba nia. (Lee Gênesis 1:26, 27. *) Nuʼudar ema kristaun, ita hakarak halo tuir ita-nia Maromak nia hahalok. Se ita halo nuneʼe, ita iha oportunidade espesiál atu haleno Maromak nia glória. Ita bele halo nuneʼe maski ita ida-idak nia kultura ka rasa la hanesan no edukasaun neʼebé ita hetan mós la hanesan. Tanbasá? Tanba “Maromak la fihir ema. Maibé, iha nasaun hotu, Maromak simu hotu ema sira neʼebé taʼuk Nia no halo hahalok neʼebé loos.”—Apos 10:34, 35.
3. Ita sente oinsá kuandu serbí Jeová?
3 Ema kristaun kose-mina sira haleno Jeová nia glória. Apóstolu Paulo, neʼebé mós ema kose-mina ida, hatete: “Ita hotu, hanesan espellu, ho ita-nia oin la taka, ita haleno Jeová nia glória, ita nakfila an ba ilas neʼebé hanesan husi glória ba glória.” (2 Kor 3:18, MF) Kuandu Paulo hakerek eskritura neʼe, nia koʼalia kona-ba tempu neʼebé Moisés tun husi Foho Sinai hodi lori Ukun-Fuan Sanulu. Iha tempu neʼebá, Moisés nia oin nabilan ho naroman tanba nia foin koʼalia ho Jeová. (Êx 34:29, 30) Maski ema kristaun nia oin la nabilan hanesan Moisés, maibé kuandu sira koʼalia kona-ba Jeová, ninia hahalok sira no ninia hakarak ba ema, sira-nia oin sai nabilan ho haksolok. Tan neʼe, maski ita mak ema kose-mina ka ema husi bibi seluk, ita bele sai hanesan espellu neʼebé haleno Jeová nia glória iha ita-nia moris no iha serbisu haklaken. (2 Kor 4:1) Ita haleno Jeová nia glória ka lae, hodi halaʼo ita-nia moris iha dalan neʼebé halo nia kontente no mós hodi hola parte beibeik iha serbisu haklaken?
ITA HAKARAK HALENO JEOVÁ NIA GLÓRIA
4, 5. (a) Hanesan Paulo, ita hotu presiza luta hasoru saida iha ita-nia laran? (b) Sala lori rezultadu saida deʼit mai ita?
4 Nuʼudar Jeová nia atan, ita hakarak fó glória ba ita-nia Kriadór iha buat hotu neʼebé ita halo. Maibé dala barak, ita halo sala maski ita hakarak halo buat neʼebé loos. Apóstolu Paulo mós hanesan ho ita. (Lee Roma 7:21-25.) Nia hatete ho klaru kona-ba tansá mak ita hotu presiza luta hasoru sala, hodi dehan: “Ema hotu-hotu halo tiha sala no lakon ona Maromak nia glória.” (Rom 3:23) Sin, ema hotu moris mai nuʼudar sala-naʼin tanba Adão, nuneʼe sala ukun ita nuʼudar liurai.—Rom 5:12; 6:12.
5 Saida mak sala? Sala katak buat naran deʼit neʼebé kontra Jeová nia hakarak, ninia dalan sira, no ninia hahalok. Sala neʼe hanetik ita atu la bele iha relasaun diʼak ho Maromak. Tanba sala, ita ema la bele haleno Maromak nia glória iha dalan neʼebé kompletu, ida-neʼe hanesan ema neʼebé hana rama-oan, maibé rama-oan neʼe la kona iha fatin neʼebé loos. Dala ruma ita halo sala ho neon, maibé dala ruma ita mós halo sala la ho neon. (Núm 15:27-31) Sala iha forsa makaʼas no haketak ita husi ita-nia Kriadór. (Sal 51:5; Isa 59:2; Kol 1:21) Tanba ema barak moris iha dalan neʼebé la tuir Jeová nia hakarak, ida-neʼe halo sira lakon oportunidade espesiál atu haleno Maromak nia glória. Sin, tanba rezultadu neʼebé ema hotu hetan husi sala, la iha buat seluk neʼebé aat liu fali sala.
6. Maski ita sala-naʼin, tanbasá mak ita bele haleno Jeová nia glória?
6 Maski ita moris nuʼudar ema sala-naʼin, Jeová fó esperansa mai ita. (Rom 15:13) Liuhusi Jesus nia moris nuʼudar sakrifísiu, Jeová fó oportunidade mai ita atu sai livre husi sala. Tanba ita tau fiar ba sakrifísiu neʼe, ida-neʼe halo ita laʼós “sala nia atan” tan atu bele haleno Jeová nia glória no sai ninia belun. (Rom 5:19; 6:6; Joao 3:16) Se ita nafatin Maromak nia belun, ita bele fiar katak nia sei haraik bensaun mai ita agora, no iha futuru nia sei halo ita sai ema neʼebé perfeitu no moris ba nafatin. Loos duni, bensaun boot tebes tanba Maromak hanoin katak ita ida-idak bele haleno ninia glória maski ita ema sala-naʼin!
HALENO MAROMAK NIA GLÓRIA
7. Se ita hakarak haleno Maromak nia glória, ita presiza rekoñese saida?
7 Atu bele haleno Maromak nia glória, ita presiza rekoñese katak ita ema sala-naʼin. (2 Crôn 6:36) Tan neʼe, ita presiza hatene saida mak ita-nia fraku no luta hasoru ida-neʼe. Porezemplu, se ita-nia fraku mak haree pornografia, ita presiza rekoñese katak ita presiza husu katuas sira-nia ajuda. (Tgo 5:14, 15) Ida-neʼe mak hakat primeiru neʼebé ita presiza halo se ita hakarak fó glória ba Maromak. Nuʼudar Jeová nia atan sira, ita presiza hatene ho loloos se ita moris tuir ninia hakarak no matadalan sira. (Prov 28:18; 1 Kor 10:12) Maski ita ida-idak nia fraku la hanesan, maibé ita tenke kontinua luta hasoru ita-nia fraku hodi bele haleno Maromak nia glória.
8. Maski ita la perfeitu, ita presiza halo saida?
8 Jesus deʼit mak sempre halo Maromak kontente no haleno Ninia glória iha dalan neʼebé perfeitu. Maski ita la perfeitu hanesan Jesus, maibé ita presiza hakaʼas an atu halo tuir ninia ezemplu. (1 Ped 2:21) Jeová hatene oinsá ita hakaʼas an atu fó glória ba nia, no nia fó bensaun ba ita-nia hakaʼas-an neʼe.
9. Oinsá mak Bíblia ajuda ita atu haleno Maromak nia glória iha dalan neʼebé diʼak liután?
9 Bíblia bele ajuda ita atu hatene oinsá mak ita bele haleno Maromak nia glória iha dalan neʼebé diʼak liután. Ita presiza estuda didiʼak Bíblia no hanoin kleʼan kona-ba buat neʼebé Bíblia hatete. (Sal 1:1-3) Kuandu ita lee Bíblia loron-loron, ida-neʼe ajuda ita atu hatene hahalok saida deʼit mak ita presiza hadiʼa. (Lee Tiago 1:22-25.) Buat neʼebé ita aprende husi Bíblia hametin ita-nia fiar no hametin ita-nia hakarak atu hadook an husi sala boot no atu halo Jeová kontente.—Sal 119:11, 47, 48.
10. Oinsá mak orasaun ajuda ita atu bele serbí Jeová iha dalan neʼebé diʼak liután?
10 Atu haleno Maromak nia glória, ita mós ‘labele kole atu harohan’. (Rom 12:12) Liuhusi orasaun, ita presiza husu Jeová nia ajuda atu ita bele serbí nia iha dalan neʼebé nia simu. Ita bele husu espíritu santu, husu atu hametin ita-nia fiar, no husu forsa atu tahan hasoru tentasaun. Ita mós bele husu nia atu fó matenek mai ita atu bele hanorin Bíblia iha dalan neʼebé diʼak liután. (Mt 6:13; Lc 11:13; 17:5; 2 Tim 2:15) Ita presiza tau fiar ba ita-nia Aman Jeová, hanesan labarik ida neʼebé tau fiar ba ninia aman. Se ita husu Jeová nia ajuda atu bele serbí nia iha dalan neʼebé diʼak liután, entaun ita bele fiar katak nia sei ajuda ita. Ita lalika hanoin katak ita-nia orasaun sei halo Jeová hirus. Tan neʼe, mai ita halo orasaun hodi hahiʼi Jeová, fó-agradese ba nia, no husu ninia matadalan liuliu kuandu ita hasoru susar ruma. Ita mós bele husu Jeová nia ajuda atu serbí nia iha dalan neʼebé fó glória ba ninia naran neʼebé santu.—Sal 86:12; Tgo 1:5-7.
11. Oinsá mak ita-nia reuniaun bele ajuda ita atu haleno Maromak nia glória?
11 Maromak fó knaar ba atan laran-metin no matenek atu tau matan ba ninia bibi. (Mt 24:45-47; Sal 100:3) Atan laran-metin no matenek hakarak ajuda ita hotu atu haleno Jeová nia glória. Dalan ida atu halo nuneʼe mak liuhusi reuniaun kristaun sira. Hanesan alfaiate sira muda ita-nia roupa atu haree diʼak liután, ita-nia reuniaun sira mós ajuda ita atu hadiʼa ita-nia moris no ita-nia hahalok nuʼudar ema kristaun. (Ebr 10:24, 25) Tan neʼe, mai ita hakaʼas an atu toʼo reuniaun-fatin tuir oras. Se ita-nia toman mak sempre toʼo reuniaun tarde, ita lakon buat diʼak neʼebé bele ajuda ita atu hadiʼa ita-nia hahalok.
MAI ITA BANATI-TUIR MAROMAK
12. Oinsá mak ita bele banati-tuir Maromak?
12 Hodi bele haleno Jeová nia glória, ita presiza “banati-tuir Maromak”. (Ef 5:1) Dalan ida atu banati-tuir Jeová mak hodi aprende atu hanoin tuir ninia hanoin. Kuandu ita koko atu halo buat ruma tuir deʼit ita-nia dalan rasik no la halo tuir Maromak nia hanoin, ida-neʼe katak ita la fó glória ba Maromak no halo susar ba ita-nia an rasik. Tanba ita moris iha Satanás nia mundu, ita tenke hakaʼas an atu odi buat neʼebé Jeová odi no hadomi buat neʼebé Jeová hadomi. (Sal 97:10; 1 Joao 5:19) Ita presiza fiar ho laran tomak katak dalan loos liu hotu atu serbí Maromak mak hodi halo buat hotu ba ninia glória.—Lee 1 Korinto 10:31.
13. Tanbasá mak ita tenke odi sala? Se ita odi sala, ita sei halo saida?
13 Tanba Jeová odi sala, ita mós tenke odi sala. Se ita odi sala, ita sei hadook ita-nia an husi buat naran deʼit neʼebé bele book ita atu halo sala. Porezemplu, ita presiza proteje ita-nia an husi hanorin falsu husi ema neʼebé husik tiha lia-loos tanba ema hanesan neʼe la fó tan glória ba Maromak. (Deut 13:6-9) Tan neʼe, mai ita hadook an husi ema hanesan neʼe no mós husi ema naran deʼit neʼebé temi sira-nia an nuʼudar ita-nia maluk kristaun maibé la fó glória ba Maromak, maski dala ruma ema hanesan neʼe mak ita-nia família rasik. (1 Kor 5:11) Kuandu ema husik tiha lia-loos ka kritika Jeová nia organizasaun, ita lalika buka razaun oioin atu hatudu katak sira mak sala. Tuir loloos, ita lakohi atu buka-hatene kona-ba sira-nia hanoin liuhusi livru ruma ka internét, tanba ida-neʼe bele estraga ita-nia relasaun ho Jeová.—Lee Isaías 5:20; * Mateus 7:6.
14. Saida mak dalan importante liu atu banati-tuir Jeová? Tanbasá?
14 Dalan importante liu atu banati-tuir Jeová mak hodi hatudu domin. (1 Joao 4:16-19) Tuir loloos, domin neʼebé ita hatudu ba malu mak sinál neʼebé hatudu katak ita Jesus nia dixípulu no Jeová nia atan. (Joao 13:34, 35) Maski dala ruma susar ba ita ema sala-naʼin atu hatudu domin, maibé ita presiza hakaʼas an atu halo ida-neʼe. Se ita haburas domin no hahalok kristaun seluk, ida-neʼe sei ajuda ita atu hadook an husi sala no hahalok neʼebé la hatudu laran-diʼak.—2 Ped 1:5-7.
15. Domin book ita atu hatudu hahalok saida deʼit ba ema seluk?
15 Domin book ita atu halo buat diʼak ba ema seluk. (Rom 13:8-10) Porezemplu, feen no laʼen neʼebé hadomi malu, sira sempre laran-metin ba malu. Se ita hadomi no respeitu katuas kristaun sira, ita sei prontu atu halo tuir sira. Oan sira neʼebé hadomi inan-aman, sira halo tuir no hatudu respeitu ba inan-aman no la koʼalia buat ladiʼak kona-ba inan-aman. Se ita hadomi ema seluk, ita la hanoin katak ita mak importante liu sira no ita mós koʼalia ho sira iha dalan neʼebé hatudu respeitu. (Tgo 3:9) Katuas kristaun sira neʼebé hadomi Maromak nia bibi mós hatudu laran-diʼak ba sira.—Apos 20:28, 29.
16. Oinsá mak domin bele ajuda ita iha ita-nia serbisu haklaken?
16 Ita mós presiza hatudu domin ba ema seluk liuhusi ita-nia serbisu haklaken. Tanba ita hadomi tebes Jeová, ida-neʼe ajuda ita atu la laran-tun maski ema la rona ita. Duké sente hanesan neʼe, ita kontinua haklaken lia-foun diʼak ba ema seluk. Domin book ita atu prepara didiʼak no hakaʼas an atu hanorin Maromak nia Liafuan ho didiʼak. Se ita iha domin neʼebé loos ba Maromak no ba ema seluk, ita sei la haree ita-nia serbisu haklaken hanesan knaar ida neʼebé ita tenke halo deʼit. Duké hanoin hanesan neʼe, ita presiza hanoin katak serbisu haklaken mak knaar espesiál neʼebé ita simu no halaʼo knaar neʼe ho laran-haksolok.—Mt 10:7.
NAFATIN FÓ GLÓRIA BA JEOVÁ
17. Tanba sala lori susar mai ita, saida mak ita presiza halo?
17 Ema barak iha mundu neʼe la hatene katak sala mak buat neʼebé lori susar boot mai ita, maibé ita hatene kona-ba neʼe. Tan neʼe, ita presiza duni atu luta hasoru ita-nia hakarak atu halo sala. Ita mós presiza treinu ita-nia laran hodi nuneʼe kuandu hakarak atu halo sala mosu iha ita-nia laran, ita bele halo kedas buat ruma atu labele monu ba sala. (Rom 7:22, 23) Loos duni, maski ita ema fraku, maibé Maromak bele fó forsa mai ita atu halo buat neʼebé loos iha situasaun naran deʼit.—2 Kor 12:10.
18, 19. (a) Saida mak ajuda ita atu manán hasoru Satanás no anju aat sira? (b) Ita hakarak kontinua atu halo saida?
18 Tanba ita hakarak fó glória ba Jeová, ita tenke funu hasoru Satanás no anju aat sira. Atu bele manán funu neʼe, ita iha ‘hatais funu nian neʼebé Maromak haraik tiha ba ita’. (Ef 6:11-13) Satanás koko makaʼas atu naʼok glória neʼebé tuir loloos Jeová deʼit mak iha direitu atu simu. Satanás mós hakaʼas an atu estraga ita-nia relasaun ho Jeová nuʼudar belun. Maibé, Satanás lakon kuandu ita hamutuk ho ema rihun ba rihun neʼebé sala-naʼin, inklui mane, feto, no labarik toʼo ema boot hatudu laran-metin nafatin hodi fó glória ba Maromak! Tan neʼe, mai ita kontinua fó hahiʼi ba Jeová hanesan kriatura sira iha lalehan neʼebé hatete: “Ita-Boot soʼi atu simu glória, hanaʼi no kbiit, basá Ita-Boot hakiak buat hotu no tan deʼit Ita-Boot nia hakarak mak buat hotu mosu no iha.”—Apok 4:11.
19 Sin, ita hotu hakarak duni atu nafatin fó glória ba Jeová maski ita hasoru situasaun naran deʼit. Kuandu Jeová haree ninia atan barak neʼebé hakaʼas an atu banati-tuir nia no haleno ninia glória, ida-neʼe halo nia sente kontente tebes. (Prov 27:11) Ita sente hanesan David, neʼebé kanta: “Haʼu hahiʼi Ita ho haʼu-nia laran tomak, oh, Jeová, no haʼu sei fó glória ba Ita-nia naran toʼo tempu neʼebé la bele sura.” (Sal 86:12) Lakleur tan, ema neʼebé halo tuir Jeová sei haksolok hodi haleno ninia glória iha dalan neʼebé perfeitu no hahiʼi Jeová ba nafatin. Entaun, ho esperansa neʼe, ita haleno daudauk Maromak Jeová nia glória ka lae?
[Nota–rodapé]
^ par. 2 Gênesis 1:26, 27: “26 Tuirmai Maromak dehan: ‘Mai ita halo ema tuir ita-nia ilas, no sai hanesan ita, no husik sira domina ikan iha tasi no manu sira iha lalehan no animál maus sira iha rai no animál seluk neʼebé dolar iha rai leten.’ 27 No Maromak komesa kria ema tuir nia ilas, iha Maromak nia ilas nia kria ema; nia kria sira mane no feto.”
^ par. 13 Isaías 5:20: “Susar ba sira neʼebé hatete katak buat neʼebé diʼak mak aat no buat neʼebé aat mak diʼak, sira neʼebé troka nakukun ba naroman no naroman ba nakukun, sira neʼebé troka moruk ba midar no midar ba moruk!”
[Pergunta estudu nian]
[Dezeñu iha pájina 27]
Ita haleno Jeová nia glória hodi halo buat hirak-neʼe ka lae?
