IHA tinan 1886, ita-nia irmaun sira iha Bible House (Uma Bíblia) iha Allegheny, Pennsylvania, rai-Estadus Unidus, haruka livru Millennial Dawn, Volume I, hamutuk 100 ba sidade Chicago, Illinois. Irmaun Charles Taze Russell hakarak atu fahe livru foun neʼe iha loja sira neʼebé faʼan livru, no iha loja boot ida neʼebé faʼan livru relijiaun nian hatán atu faʼan livru Dawn. Maibé liutiha semana rua, livru sira-neʼe hotu fila fali ba Bible House.

Pastór protestante ida neʼebé naran-boot, nia haree livru Dawn hamutuk ho ninia livru sira iha loja neʼe no sai hirus tebes. Pastór neʼe dehan ba loja-naʼin katak se nia faʼan nafatin livru Dawn, nia ho ninia maluk pastór naran-boot sira sei hasai sira-nia livru husi loja neʼe no faʼan iha fatin seluk. Maski loja-naʼin la kontente, maibé tanba pastór neʼe ameasa nia, nia tenke haruka fali livru Dawn. Liután neʼe, maski ita-nia irmaun sira fó sai livru neʼe iha jornál barak, maibé ema neʼebé la gosta kona-ba livru sira neʼebé irmaun sira halo, sira hapara jornál sira atu labele fó sai informasaun kona-ba livru neʼe. Entaun, oinsá mak livru foun neʼe bele toʼo ba ema neʼebé buka lia-loos?

Irmaun-irmán sira neʼebé halo serbisu haklaken tempu-tomak, neʼebé uluk bolu nuʼudar kolportór, * sira mak rezolve problema neʼe. Iha tinan 1881, livru Zionʼs Watch Tower hatete katak presiza haklaken-naʼin 1.000 atu fahe livru sira hodi uza sira-nia tempu tomak. Maski kolportór sira hamutuk naʼin-atus balu deʼit, sira kari fini lia-loos nian iha fatin barak. Toʼo tinan 1897, ita-nia irmaun-irmán sira, liuliu kolportór sira, fahe ona livru Dawn besik 1.000.000. Sira barak moris ho osan uitoan neʼebé sira simu hodi fahe livru sira.

Entaun, sé deʼit mak sai kolportór? Sira balu sei joven, no balu ema boot. Sira barak sei klosan ka kaben-naʼin neʼebé seidauk iha oan, no iha mós família barak neʼebé halo serbisu kolportór. Kolportór regulár haklaken ba loron tomak, no kolportór estra uza oras ida ka rua atu haklaken loron-loron. Maski laʼós ema hotu mak iha saúde ka situasaun diʼak atu sai kolportór, maibé iha tinan 1906, diskursu ida iha reuniaun boot hatete katak irmaun-irmán sira neʼebé hakarak sai kolportór, sira la presiza “iha eskola boot, matenek boot, ka koʼalia hanesan anju”.

Iha rai barak iha mundu tomak, ema baibain mak halaʼo serbisu haklaken no ida-neʼe lori rezultadu diʼak. Porezemplu, durante tinan hitu nia laran, irmaun ida fahe livru maizumenus 15.000. Maibé nia  hatete: “Haʼu serbí nuʼudar kolportór laʼós atu faʼan livru sira, maibé atu fó sasin kona-ba Jeová no lia-loos.” Iha fatin neʼebé deʼit neʼebé kolportór sira bá, fini lia-loos nian moris no grupu Estudante Bíblia komesa aumenta ba beibeik.

Ulun-naʼin igreja hatún kolportór sira hodi hatete katak sira laʼo bá-mai deʼit atu faʼan livru sira. Maibé, iha tinan 1892, livru Watch Tower hatete kona-ba kolportór sira: “Ema uitoan deʼit mak hatene sira nuʼudar Naʼi nia reprezentante neʼebé loos, ka rekoñese katak Naʼi hafolin sira-nia haraik-an no sakrifísiu.” Tuir loloos, moris nuʼudar kolportór laʼós moris diʼak hanesan ema neʼebé riku. Sira barak haklaken hodi laʼo ain deʼit ka saʼe bisikleta. Kuandu sira haklaken ba ema neʼebé hakarak livru maibé la iha osan, sira troka fali livru sira ho ai-han. Maski sira haklaken loron tomak no kole, maibé sira kontente atu fila fali ba sira-nia tenda ka kuartu neʼebé sira aluga. Ikusmai, sira komesa uza Karrosa Kolportór nian, neʼebé hanesan uma-karreta, hodi ajuda sira atu la gasta tempu no osan barak. *

Komesa iha tinan 1893 kuandu halaʼo reuniaun boot iha Chicago, iha mós programa espesiál kona-ba kolportór sira, inklui konta sira-nia esperiénsia, oinsá atu haklaken iha dalan neʼebé diʼak liután, no oinsá atu halo serbisu nuʼudar kolportór. Iha diskursu ida, irmaun Russell fó laran-manas ba haklaken-naʼin sira atu han barak iha tempu matabixu, hemu susu-been kopu ida durante tempu haklaken, no han sorvete iha loron manas.

Kolportór sira neʼebé hakarak buka maluk atu haklaken hamutuk, sira tau fita ho kór kinur. Irmaun-irmán sira neʼebé foin komesa serbí nuʼudar kolportór, sira haklaken ho maluk kolportór neʼebé iha esperiénsia. Sira presiza duni atu hetan treinu hanesan neʼe. Porezemplu, irmán ida neʼebé foin komesa serbí nuʼudar kolportór hatudu livru sira ba uma-naʼin ho laran nakdedar no hatete: “Ita lakohi lee livru sira-neʼe, loos ka lae?” Maibé uma-naʼin neʼe hakarak no ikusmai nia sai ita-nia irmán ida.

Irmaun ida hanoin: ‘Haʼu kontinua haʼu-nia serbisu diʼak no tinan-tinan fó dolar 1.000 nuʼudar kontribuisaun ba serbisu haklaken, ka haʼu serbí nuʼudar kolportór?’ Irmaun ida seluk hatete ba irmaun neʼe katak maski rua-rua bele halo Naʼi kontente, maibé se nia fó ninia tempu ba Naʼi, nia sei hetan bensaun barak liután. Irmán Mary Hinds hatete katak sai kolportór mak “dalan neʼebé diʼak liu atu ajuda ema barak.” No irmán Alberta Crosby neʼebé moedór mós hatete: “Loron ba loron, haʼu hafolin liután serbisu kolportór.”

Ohin loron, kolportór sira-neʼe nia bei-oan rasik ka bei-oan espirituál barak sei kontinua halaʼo serbisu neʼebé sira uluk halo. Se iha ita-nia família seidauk iha kolportór ka pioneiru ida, oinsá se ita rasik komesa tradisaun kona-ba serbisu pioneiru iha ita-nia família? Ita mós sei hafolin liután serbisu haklaken loron ba loron.

[Nota–rodapé]

[Dezeñu iha pájina 32]

Sira la presiza “iha eskola boot, matenek boot, ka koʼalia hanesan anju”

[Dezeñu iha pájina 31]

Iha 1930, irmaun Alfred W. Osei serbí nuʼudar kolportór iha rai-Gana

[Dezeñu iha pájina 32]

Leten: Maizumenus iha 1918, Edith Keen no Gertrude Morris nuʼudar kolportór, iha Inglaterra; kraik: Stanley Cossaboom no Henry Nonkes ho kaixa mamuk tanba fahe livru barak ona, iha Estadus Unidus