“Matan-moris bá kona-ba fariseu nia fermentu”

Jesus fó avizu ba ninia dixípulu sira: “Imi matan-moris bá kona-ba fariseu nia fermentu, katak sira-nia laran-makerek.” (Lc 12:1) Livru Mateus hatudu ho klaru katak Jesus koʼalia kona-ba ema fariseu sira-nia “doutrina”.—Mt 16:12.

Dala ruma, Bíblia uza liafuan “fermentu” atu koʼalia kona-ba buat neʼebé halo aat ba ema. Fariseu sira-nia hanorin no hahalok aat book ema seluk atu halo tuir sira. Maibé, tanbasá mak ema fariseu sira-nia hanorin perigu tebes?

1 Ema fariseu sira foti-an no fiar katak sira diʼak liu no loos liu fali ema seluk.

Jesus hatoʼo ai-knanoik ida kona-ba neʼe hodi dehan: “Fariseu neʼe hamriik tiha, hodi harohan nuneʼe: ‘Naʼi Maromak, haʼu agradese Ita-Boot, basá haʼu laʼós hanesan ema seluk: sira mesak ema naʼok-teen, kaan-teen, laran-foʼer; haʼu la hanesan mós ema publikanu neʼe. Haʼu hadera an semana ida dala rua. Haʼu selu impostu husi haʼu-nia rikusoi tomak.’ Publikanu fali hamriik dook, la barani atu foti matan, maibé baku deʼit nia hirus-matan dehan: ‘Naʼi Maromak, sadiʼa atan haʼu, ema maksalak!’”—Lc 18:11-13.

Jesus gaba publikanu ka kobradór impostu ida neʼebé hatudu hahalok haraik-an, hodi dehan: “Haʼu dehan ba imi katak ema neʼe fila ba uma loos ona, [ema fariseu] lae. Basá ema neʼebé foti-an, Naʼi sei hatún nia; no ema neʼebé haraik-an, Naʼi sei foti nia.” (Lc 18:14) Maski ema barak la gosta kobradór impostu tanba sira barak la hatudu laran-moos, maibé Jesus buka atu ajuda kobradór impostu sira neʼebé hakarak rona nia, hanesan Mateus no Zaqueu neʼebé ikusmai sai ninia dixípulu.

Oinsá se ita sente katak ita diʼak liu fali ema seluk tanba ita iha matenek ruma ka knaar espesiál ruma, ka tanba ita haree ema seluk nia sala ka fraku? Ita presiza halakon kedas hanoin hanesan neʼe husi ita-nia neon, tanba Bíblia hatete: “Domin pasiénsia, domin laran-diʼak. Domin la laran-moras, domin la loko-an; domin la buka oin; domin la book aat ema, domin la buka nia rasik nia diʼak, domin la hirus lalais, nia la hanoin resin buat aat neʼebé nia simu; nia la haksolok wainhira ema halo aat maibé haksolok iha lia-loos.”—1 Kor 13:4-6.

Apóstolu Paulo hatete: “Jesus Kristu mai iha mundu neʼe atu soi ema maksalak sira.” Depois, nia dehan: “Iha ema maksalak sira-neʼe, haʼu mak boot liu.” (1 Tim 1:15) Ita mós tenke iha hanoin hanesan Paulo.

Pergunta atu ita hanoin kleʼan:

Haʼu rekoñese ka lae, katak haʼu ema sala-naʼin no katak haʼu-nia salvasaun depende deʼit ba Jeová nia laran-diʼak? Haʼu sente ka lae, katak haʼu mak diʼak liu fali ema seluk tanba haʼu serbí Jeová kleur ona ka iha knaar espesiál ruma iha Maromak nia organizasaun, ka tanba haʼu iha matenek ruma?

2 Ema fariseu sira halo buat diʼak iha ema nia oin atu ema bele gaba sira. Sira buka naran-boot no hakarak ema bolu sira ho títulu.

 Maibé kona-ba neʼe, Jesus hatete: “Sira halo buat hotu atu ema haree sira. Nuneʼe, sira kesi fita boot ida ba sira-nia reen-toos hodi hanaruk sira-nia tais ninin; sira kaan atu tuur iha fatin uluk iha festa sira hodi buka tuur iha oin iha sinagoga laran; sira hakarak ema kumprimenta sira iha prasa hodi bolu sira ‘Rabbi’.” (Mt 23:5-7) Jesus nia hahalok la hanesan duni ho ema fariseu sira. Maski Jesus mak Maromak nia Oan neʼebé perfeitu, maibé nia ema neʼebé haraik-an. Porezemplu, kuandu ema ida bolu Jesus nuʼudar mestre “diʼak”, nia hatete: “Tansá ó dehan haʼu diʼak? La iha ema diʼak; Maromak mesak mak diʼak.” (Mc 10:18) Iha tempu seluk, Jesus mós fase ninia dixípulu sira-nia ain, hodi fó ezemplu diʼak kona-ba hahalok haraik-an ba sira.—Joao 13:1-15.

Ema kristaun neʼebé loos presiza serbí ninia maluk kristaun sira. (Gal 5:13) Ida-neʼe importante tebes, liuliu ba irmaun sira neʼebé hakarak atu serbí nuʼudar katuas iha kongregasaun. Maski diʼak atu irmaun ida hakaʼas an atu sai katuas, maibé razaun atu nia hakarak sai katuas mak atu ajuda ema seluk, laʼós atu hakarak simu pozisaun ka naran-boot. Sin, sira neʼebé serbí nuʼudar katuas iha kongregasaun presiza “haraik-an” hanesan Jesus.—Mt 11:29; 1 Tim 3:1, 6, MF.

Pergunta atu ita hanoin kleʼan:

Haʼu buka atu hakbesik liu ba irmaun sira neʼebé iha responsabilidade iha kongregasaun hodi hakarak deʼit atu hetan knaar espesiál ka pozisaun ruma? Haʼu hakarak liu atu halo serbisu neʼebé ema bele haree hodi gaba haʼu ka lae? Haʼu mak ema neʼebé buka oin ka lae?

3 Ema fariseu sira iha lei no tradisaun barak neʼebé halo susar ba ema baibain atu halo tuir Maromak nia Ukun-Fuan.

 Maromak Jeová fó nia Ukun-Fuan ba ema Israel atu hatudu oinsá atu adora nia. Maibé, nia la fó lista naruk kona-ba buat hotu neʼebé sira tenke halo no labele halo. Porezemplu, maski Ukun-Fuan bandu sira atu labele halo serbisu iha loron Sábadu, maibé Ukun-Fuan neʼe la fó sai kona-ba buat hotu neʼebé sira labele halo iha loron neʼe. (Êx 20:10) Maibé, ema fariseu sira aumenta lei no tradisaun barak tanba hanoin katak Jeová nia Ukun-Fuan ladún kompletu. Jesus la halo tuir lei neʼebé ema fariseu sira aumenta. Nia halo tuir deʼit Maromak nia Ukun-Fuan. (Mt 5:17, 18; 23:23) Jesus komprende tansá mak Maromak fó Ukun-Fuan ba ninia povu, no nia hatene katak Maromak hakarak atu ema hatudu laran-sadiʼa no hanoin malu. Jesus hatudu laran-diʼak, maski ninia dixípulu sira halo nia laran-triste. Porezemplu, iha kalan antes Jesus mate, nia hatete dala barak ba ninia apóstolu naʼin-tolu atu hadeer hela no matan-moris, maibé sira dukur beibeik. Maski nuneʼe, Jesus hatete ho laran-diʼak: “Espíritu hakarak tebes, maibé isin kbiit-laek.”—Mc 14:34-42.

Pergunta atu ita hanoin kleʼan:

Dala barak haʼu hakarak ema seluk atu halo tuir deʼit haʼu-nia hanoin ka lae? Haʼu hakarak ema seluk atu halo buat neʼebé sira la iha kbiit atu halo ka lae?

Hanoin didiʼak lai kona-ba oinsá Jesus nia hanorin la hanesan duni ho ema fariseu sira-nian. Ita iha hahalok ruma neʼebé ita presiza hadiʼa hodi bele banati-tuir Jesus ka lae? Se nuneʼe, hakaʼas an atu troka hahalok neʼe.

[Dezeñu iha pájina 28]

Ema fariseu sira tau kaixa eskritura nian iha sira-nia reen-toos.—Mt 23:2, 5.

[Dezeñu iha pájina 29]

La hanesan ho ema fariseu sira neʼebé foti-an, katuas kristaun serbí ema seluk ho haraik-an

[Dezeñu iha pájina 30]

Ita hatudu laran-diʼak ba ema seluk hanesan Jesus ka lae?