Jeová mak “Ida neʼebé fó sai segredu”
Jeová mak “Ida neʼebé fó sai segredu”
“Tebes duni, imi-nia Maromak mak Maromak maromak sira-nian, no Naʼi ba liurai sira hotu no nia mak Ida neʼebé fó sai segredu.”—DAN 2:47.
OINSÁ ITA HATÁN?
Saida deʼit mak Jeová fó sai ona mai ita kona-ba futuru?
Animál fuik nia ulun númeru ida toʼo neen reprezenta saida deʼit?
Saida mak hanesan entre animál fuik no estátua boot neʼebé Nabucodonosor haree iha ninia mehi?
1, 2. Saida deʼit mak Jeová fó sai ona mai ita? Tanbasá mak nia halo nuneʼe?
KUANDU Maromak nia Ukun atu halakon ema nia governu hotu, ukun boot ida-neʼebé mak sei domina mundu? Tuir loloos, ita hatene resposta tanba Maromak Jeová, “Ida neʼebé fó sai segredu”, hatudu sai ona kona-ba neʼe liuhusi buat neʼebé profeta Daniel no mós apóstolu João hakerek.
2 Jeová hatudu ba mane sira-neʼe vizaun oioin kona-ba animál fuik sira neʼebé mosu no tuirmai lakon no troka fali ho animál seluk. Jeová mós esplika ba Daniel arti husi vizaun kona-ba estátua boot. No nia haruka Daniel no João atu hakerek vizaun sira-neʼe atu ita bele lee iha Bíblia laran. (Rom 15:4) Jeová halo ida-neʼe atu hametin ita-nia fiar katak lakleur tan ninia Ukun sei halakon ema nia governu hotu.—Dan 2:44.
3. Atu komprende profesia ho didiʼak, ita presiza komprende uluk kona-ba saida? Tanbasá?
3 Profesia husi Daniel no João ajuda ita atu hatene sé loos mak liurai primeiru toʼo liurai númeru ualu, no atu hatene ukun neʼebé sei mosu mai tuituir malu. Maibé, atu komprende didiʼak profesia sira-neʼe, ita presiza komprende uluk profesia primeiru neʼebé hakerek iha Bíblia laran. Tanbasá? Tanba Bíblia tomak no profesia hotu liga ho profesia primeiru.
SAMEA NIA BEI-OAN NO ANIMÁL FUIK
4. Sé deʼit mak sai feto nia bei-oan? Saida mak bei-oan neʼe sei halo?
4 Lakleur depois ema kontra hasoru Maromak iha jardín Eden, Jeová halo promesa katak “feto” ida sei iha “bei-oan”. * (Lee Gênesis 3:15. *) Bei-oan neʼe ikusmai sei harahun Satanás iha ninia ulun. Tuirmai, Jeová fó sai katak bei-oan neʼe sei mai husi Abraão, husi nasaun Israel, husi ema judeu, no husi Liurai David. (Gên 22:15-18; 49:10; Sal 89:3, 4; Lc 1:30-33) Ikusmai, sai klaru katak parte primeiru husi bei-oan neʼe mak Kristu Jesus. (Gal 3:16) No ema kristaun kose-mina sira mak parte segundu ba bei-oan neʼe. (Gal 3:26-29) Jesus no ema kose-mina sira-neʼe hamutuk sai parte ba Maromak nia Ukun, no liuhusi Ukun neʼe mak Maromak sei halakon Satanás.—Lc 12:32; Rom 16:20.
5, 6. (a) Daniel no João fó sai kona-ba ukun boot hira? (b) Animál fuik nia ulun sira neʼebé temi iha livru Apokalipse reprezenta saida?
5 Profesia primeiru neʼebé fó sai iha Eden mós koʼalia kona-ba Satanás nia “bei-oan”. Satanás nia bei-oan sei sai inimigu no odi feto nia bei-oan. Entaun, sé mak samea nia bei-oan? Neʼe mak sira hotu neʼebé banati-tuir Satanás atu odi Maromak no kontra Maromak nia povu. Husi uluk toʼo agora, Satanás organiza ninia bei-oan atu sai ukun ka governu oioin. (Lc 4:5, 6) Maibé, ema nia ukun balu deʼit mak halo funu hasoru Maromak nia povu, katak nasaun Israel ka kongregasaun kristaun kose-mina sira. Tansá mak hatene kona-ba neʼe importante? Tanba ida-neʼe sei ajuda ita atu komprende tansá mak Daniel no João nia vizaun sira hatudu katak iha deʼit ukun ualu neʼebé iha kbiit boot.
6 Maizumenus iha tinan 96, apóstolu João simu vizaun tuituir malu husi Jesus. (Apok 1:1) Iha ninia vizaun ida, nia haree samea boot neʼebé reprezenta Diabu, hamriik iha tasi-ibun. (Lee Apokalipse 13:1, 2.) João mós haree animál fuik oin-seluk ida sai husi tasi neʼe no nia simu kbiit boot husi Diabu. Tuirmai, anju ida fó sai ba João katak animál mean neʼe, neʼebé iha ulun hitu, neʼebé nuʼudar ilas husi animál neʼebé temi iha Apokalipse 13:1, reprezenta “liurai hitu”, ka ukun sira. (Apok 13:14, 15; 17:3, 9, 10) Iha tempu neʼebá, João hakerek katak liurai lima monu tiha ona, ida ukun daudauk, no ida seluk “sei mai”. Sé loos mak liurai ka ukun sira-neʼe? Mai ita haree saida mak animál nia ulun ida-idak neʼebé temi iha Apokalipse kapítulu 13 reprezenta. No ita mós sei aprende kona-ba ukun sira-neʼe balu husi livru Daniel. Daniel nia profesia esplika ho klaru kona-ba ukun sira-neʼe maski liutiha tempu kleur mak sira foin mosu atu ukun.
ULUN IDA REPREZENTA EGIPTU NO IDA TUIRMAI ASÍRIA
7. Ulun primeiru reprezenta saida? Tanbasá?
7 Ulun primeiru reprezenta Egiptu. Tanbasá? Tanba Egiptu mak ukun boot primeiru atu sai inimigu ba Maromak nia povu. Abraão nia bei-oan sira mak ikusmai sai beiʼala ba feto nia bei-oan. Abraão nia bei-oan sai barak tebes iha rai-Egiptu. Tuirmai, ema Egiptu hanehan ema Israel. Satanás koko atu halakon Maromak nia povu antes feto nia bei-oan moris mai. Oinsá mak nia halo ida-neʼe? Hodi book Faraun atu oho Israel nia oan-mane sira hotu. Maibé Jeová estraga Satanás nia planu neʼe no halo Ninia povu sai livre husi situasaun atan nian iha Egiptu. (Êx 1:15-20; 14:13) Ikusmai, Jeová fó ba ema Israel rai neʼebé nia promete ona.
8. Ulun segundu reprezenta saida? Nia koko atu halo saida?
8 Ulun segundu reprezenta Asíria. Ukun boot neʼe mós koko atu halakon Maromak nia povu. Maski foufoun Jeová uza Asíria atu fó kastigu ba Israel nia suku sanulu tanba sira kontra nia no la laran-metin ba nia, maibé tuirmai Asíria koko atu halakon Jerusalém. Tuir loloos, Satanás iha planu atu halakon liurai nia umakain neʼebé ikusmai sei toʼo ba Jesus. Tanba buat neʼebé ema Asíria halo laʼós Jeová nia hakarak, nia halo milagre hodi halakon sira no fó salvasaun ba ninia povu.—2 Reis 19:32-35; Isa 10:5, 6, 12-15.
ULUN TERSEIRU MAK BABILÓNIA
9, 10. (a) Jeová husik Babilónia atu halo saida? (b) Atu profesia bele sai loos, saida mak tenke akontese?
9 Animál fuik nia ulun terseiru neʼebé João haree reprezenta Babilónia nia ukun. Jeová husik Babilónia atu harahun Jerusalém no lori povu sira ba dadur. Maibé, antes ida-neʼe akontese, Jeová fó avizu ba ema Israel sira neʼebé kontra nia kona-ba buat neʼebé Babilónia sei halo ba sira. (2 Reis 20:16-18) Jeová mós fó-hatene nanis katak nia sei la husik tan Israel nia liurai atu tuur iha “Jeová nia kadunan” iha Jerusalém. (1 Crôn 29:23) Maibé, Jeová mós promete katak Liurai David nia bei-oan ida sei mai no nia sei kaer ukun neʼe tanba nia mak iha “direitu legál”.—Eze 21:25-27.
10 Profesia seluk hatudu katak ema judeu sira sei nafatin halaʼo adorasaun iha templu iha Jerusalém toʼo Mesias, ka Ida neʼebé hetan kose-mina mai. (Dan 9:24-27) Profesia seluk tan, neʼebé hakerek antes ema Israel sai dadur iha Babilónia, fó sai katak Mesias sei moris mai iha Belém. (Miq 5:2) Atu profesia sira-neʼe bele sai loos, ema judeu sira tenke sai livre husi dadur hodi fila fali ba Jerusalém no harii fali templu. Maibé, ema Babilónia iha toman atu nunka husik ema sira neʼebé sira kaer. Entaun, oinsá mak ema Israel bele fila fali ba sira-nia rai? Jeová fó sai ninia resposta ba ninia profeta sira.—Amós 3:7.
11. Símbolu saida deʼit mak Jeová uza atu reprezenta Babilónia nia ukun? (Haree nota-rodapé.)
11 Profeta Daniel mós sai dadur iha Babilónia hamutuk ho ema Israel seluk. (Dan 1:1-6) Maromak Jeová uza Daniel atu fó sai kona-ba ukun boot sira seluk neʼebé mosu tuituir malu depois Babilónia nia ukun. Jeová fó sai segredu neʼe hodi uza símbolu oioin. Porezemplu, Jeová halo Babilónia nia liurai, naran Nabucodonosor, atu mehi kona-ba estátua boot neʼebé halo husi buat oioin. (Dan 2:1, 19, 31-38) Liuhusi Daniel, Jeová fó sai katak estátua nia ulun neʼebé husi osan-mean reprezenta Babilónia nia ukun. * Estátua neʼe nia hirus-matan no kabaas neʼebé husi osan-mutin mak ukun boot seluk neʼebé mosu depois Babilónia. Entaun, sé mak ukun boot neʼe? No oinsá nia haree Maromak nia povu?
ULUN NÚMERU HAAT MAK MÉDIA HO PÉRSIA
12, 13. (a) Saida deʼit mak Jeová fó sai kona-ba ukun neʼebé sei halakon Babilónia? (b) Tanbasá mak animál fuik nia ulun númeru haat reprezenta Média ho Pérsia?
12 Maizumenus tinan atus ida antes Daniel nia tempu, Jeová esplika ho klaru liuhusi profeta Isaías kona-ba ukun boot ida-neʼebé mak sei manán Babilónia. Jeová la fó sai deʼit dalan oinsá mak sidade Babilónia sei monu, maibé fó sai mós kona-ba ema neʼebé sei manán Babilónia. Liurai neʼebé ataka Babilónia mak Ciro husi Pérsia. (Isa 44:27, 28; 45:1, 2) Daniel simu vizaun rua tan kona-ba Média ho Pérsia nia ukun. Iha Daniel nia vizaun ida, nia haree ursu neʼebé mosu hodi hamriik iha sorin ida atu “han naʼan barak”. (Dan 7:5) Ursu neʼe reprezenta Média ho Pérsia nia ukun. Iha vizaun ida seluk, Daniel mós haree animál seluk neʼebé reprezenta ukun neʼe. Nia haree bibi-malae aman neʼebé iha dikur rua.—Dan 8:3, 20.
13 Maromak Jeová uza Média ho Pérsia atu kumpre profesia hodi halakon Babilónia no halo livre ema Israel hodi fila fali ba sira-nia rai. (2 Crôn 36:22, 23) Maibé, ikusmai ukun neʼe besik atu halakon Maromak nia povu. Livru Ester iha Bíblia laran konta kona-ba primeiru ministru husi Pérsia nia planu neʼebé aat. Primeiru ministru neʼe naran Haman. Nia halo planu atu halakon ema judeu hotu neʼebé hela iha fatin sira neʼebé Pérsia mak ukun, no nia hili loron ida hodi oho ema judeu sira. Maibé, Jeová proteje fali ninia povu husi Satanás nia bei-oan neʼebé odi sira. (Ester 1:1-3; 3:8, 9; 8:3, 9-14) Tan neʼe, ita bele dehan katak animál nia ulun númeru haat neʼebé hakerek iha livru Apokalipse mak reprezenta Média ho Pérsia.
ULUN NÚMERU LIMA MAK GRÉSIA
14, 15. Informasaun saida deʼit mak Jeová fó sai kona-ba Grésia nia ukun?
14 Ulun númeru lima husi animál fuik neʼebé temi iha livru Apokalipse reprezenta Grésia. Ida-neʼe hanesan buat neʼebé Daniel fó-hatene nanis ona uluk kuandu nia esplika kona-ba liurai Nabucodonosor nia mehi. Daniel hatudu katak estátua nia kabun neʼebé halo husi riti reprezenta Grésia. Daniel mós simu vizaun rua tan neʼebé esplika ho klaru liu kona-ba ukun neʼe no mós kona-ba ukun-naʼin neʼebé naran-boot.
15 Iha Daniel nia vizaun ida, nia haree leopardu ida neʼebé iha liras haat, neʼe hatudu katak ukun neʼe sei manán ninia inimigu sira ho lalais. Leopardu neʼe reprezenta Grésia. (Dan 7:6) Iha vizaun seluk, Daniel fó sai kona-ba oinsá bibi-timur ida, neʼebé iha dikur boot ida, ho lalais oho bibi-malae aman neʼebé iha dikur rua, katak Média ho Pérsia. Jeová hatete ba Daniel katak bibi-timur neʼe reprezenta Grésia no dikur boot neʼe reprezenta liurai ida. Liután neʼe, Daniel hakerek katak dikur boot neʼe sei tohar no dikur haat neʼebé kiʼik sei moris iha ninia fatin. Maski profesia neʼe hakerek maizumenus tinan atus rua antes Grésia domina mundu, maibé profesia hotu neʼe sai loos. Alexandre Boot, liurai naran-boot ida iha Grésia antigu, mak dirije funu hodi kontra hasoru Média ho Pérsia. Maibé lakleur deʼit, dikur boot neʼe tohar tanba liurai neʼe mate kuandu nia tinan 32 deʼit. Tuirmai, ninia ukun fahe ba ninia komandante naʼin-haat.—Lee Daniel 8:20-22. *
16. Saida mak Liurai Antíoco IV halo?
16 Depois manán tiha Pérsia, Grésia ukun mós rai-Israel. Iha tempu neʼe, ema judeu sira hela fali ona iha rai neʼebé Maromak promete no harii fali ona templu iha Jerusalém. Ema Israel sei nafatin Maromak nia povu neʼebé nia hili, no Maromak nafatin haree templu nuʼudar fatin atu adora nia. Maibé, iha tinan 168 molok Kristu, animál fuik nia ulun númeru lima neʼe, neʼebé reprezenta Grésia, ataka Maromak nia povu. Liurai Antíoco IV mak ema ida husi komandante haat neʼebé hetan Alexandre nia ukun neʼebé fahe ona. Liurai Antíoco IV harii altár maromak falsu nian ida iha área templu nian iha Jerusalém no fó lei katak sira neʼebé tuir relijiaun judeu nian tenke hetan kastigu-mate. Neʼe mak hahalok aat duni neʼebé hatudu katak Satanás nia bei-oan odi Maromak nia povu! Maibé lakleur deʼit, Grésia la sai tan nuʼudar ukun boot neʼebé domina mundu. Entaun, ulun númeru neen husi animál fuik reprezenta saida?
ULUN NÚMERU NEEN MAK ROMA NEʼEBÉ “HALO TAʼUK NO AAT TEBES”
17. Ulun númeru neen iha parte importante saida atu kumpre profesia iha Gênesis 3:15?
17 Iha tempu neʼebé João simu vizaun kona-ba animál fuik, Roma mak domina mundu. (Apok 17:10) Ulun númeru neen, neʼebé reprezenta Roma, iha parte importante atu kumpre profesia neʼebé hakerek iha Gênesis 3:15. Satanás uza ema-boot husi Roma atu hakanek feto nia bei-oan iha “ninia ain-tuban”. Oinsá? Sira tesi lia falsu ba Jesus katak Jesus kontra lei no sira oho nia. (Mt 27:26) Maibé lakleur deʼit, kanek neʼe sai diʼak fali tanba Jeová halo Jesus moris hiʼas.
18. (a) Nasaun foun ida-neʼebé mak Jeová hili? Tanbasá? (b) Oinsá mak samea nia bei-oan kontinua hatudu hahalok odi ba feto nia bei-oan?
18 Ulun-naʼin relijiaun nian iha Israel futu-lia ho ema Roma hodi kontra Jesus, no ema Israel barak mós la simu Jesus. Tan neʼe, Jeová la simu tan ema Israel nuʼudar ninia povu. (Mt 23:38; Apos 2:22, 23) Agora nia hili nasaun foun, “Israel Maromak nian”. (Gal 3:26-29; 6:16, MF) Nasaun neʼe mak kongregasaun ema kristaun kose-mina sira, neʼe inklui ema judeu no ema jentiu sira. (Ef 2:11-18) Depois Jesus mate no moris hiʼas fali, samea nia bei-oan kontinua hatudu hahalok odi ba feto nia bei-oan. Dala barak, Roma koko atu halakon kongregasaun kristaun neʼebé mak parte segundu ba feto nia bei-oan. *
19. (a) Saida mak Daniel fó sai kona-ba ukun boot númeru neen? (b) Saida mak ita sei estuda iha lisaun tuirmai?
19 Mehi neʼebé Daniel esplika ba Nabucodonosor koʼalia kona-ba ain husi besi no neʼe reprezenta Roma nia ukun. (Dan 2:33) Daniel mós haree vizaun ida kona-ba ukun boot seluk neʼebé sei mosu husi Roma hodi domina mundu. (Lee Daniel 7:7, 8. *) Ba tinan barak, Roma haree hanesan buat neʼebé “halo taʼuk no aat tebes no iha forsa boot tebes”. Maibé, profesia neʼe fó-hatene katak “dikur sanulu” sei mosu husi Roma nia ukun, no “dikur seluk, dikur kiʼik ida” sei mosu no sei iha forsa boot liu fali ukun sira seluk. Dikur sanulu reprezenta saida? Dikur kiʼik reprezenta sé? Iha dalan saida deʼit mak dikur kiʼik neʼe liga ho estátua boot neʼebé Nabucodonosor haree iha ninia mehi? Iha lisaun tuirmai iha pájina 14, ita sei hatán pergunta sira-neʼe.
[Nota–rodapé]
^ par. 4 Feto neʼe reprezenta Jeová nia organizasaun iha lalehan neʼebé hanesan ninia feen. Organizasaun neʼe iha kriatura espíritu sira.—Isa 54:1; Gal 4:26; Apok 12:1, 2.
^ par. 4 Gênesis 3:15: “Haʼu sei halo ó odi feto neʼe, no ó-nia bei-oan no feto neʼe nia bei-oan sei odi malu. Nia sei harahun ó-nia ulun no ó sei hakanek ninia ain-tuban.”
^ par. 11 Estátua nia ulun neʼebé hakerek iha livru Daniel no animál fuik nia ulun terseiru neʼebé fó sai iha Apokalipse mak reprezenta Babilónia nia ukun. Haree informasaun iha pájina 12-13.
^ par. 15 Daniel 8:20-22: “20 Bibi-malae aman neʼe, neʼebé ó haree iha dikur rua mak reprezenta liurai sira husi Média no Pérsia. 21 No bibi-timur aman neʼebé iha fulun barak mak reprezenta liurai husi Grésia; no kona-ba dikur boot neʼebé moris entre ninia matan rua mak reprezenta liurai primeiru. 22 Maibé dikur neʼe tohar, no ikusmai dikur haat mosu iha ninia fatin, no husi ninia nasaun sei mosu ukun haat, maibé sira la iha kbiit hanesan nia.”
^ par. 18 Maski ema Roma halakon Jerusalém iha tinan 70, maibé hahalok neʼe laʼós parte atu kumpre profesia iha Gênesis 3:15. Tanba iha tempu neʼe, ema Israel laʼós tan nasaun neʼebé Maromak hili.
^ par. 19 Daniel 7:7, 8: “7 Depois neʼe, haʼu kontinua haree iha vizaun iha kalan neʼe, no haʼu haree animál númeru haat. Animál neʼe halo taʼuk no aat tebes no iha forsa boot tebes. Ninia nehan sira boot no husi besi. Nia tolan no harahun buat hotu, no buat neʼebé hela, nia sama ho ninia ain. Nia la hanesan ho animál seluk hotu neʼebé mosu uluk, no nia iha dikur sanulu. 8 Haʼu kontinua hateke ba dikur sira-neʼe, no haʼu haree dikur seluk, dikur kiʼik ida, mosu iha sira leet, no iha neʼebá iha dikur tolu neʼebé fokit sai tiha iha dikur neʼe nia oin. No iha dikur neʼe iha matan hanesan ema nian, no iha ibun neʼebé koʼalia lia foti-an oioin.”
[Pergunta estudu nian]
