Tansá mak tau uluk Jeová nia serbisu iha ita-nia moris?
Tansá mak tau uluk Jeová nia serbisu iha ita-nia moris?
“Loron tomak haʼu-nia ibun sei konta kona-ba Ita-nia hahalok loos, no mós kona-ba salvasaun husi Ita.”—SAL 71:15.
OINSÁ ITA HATÁN?
Tanbasá mak Noé, Moisés, Jeremias, no Paulo tau uluk Jeová nia serbisu iha sira-nia moris?
Saida mak bele ajuda ita atu hatene oinsá ita sei uza ita-nia moris?
Tanbasá mak ita hakarak tau uluk Jeová nia serbisu iha ita-nia moris?
1, 2. (a) Kuandu ita dedika an ba Jeová, ita hatudu saida? (b) Oinsá mak desizaun neʼebé Noé, Moisés, Jeremias, no Paulo halo ajuda ita?
KUANDU ita dedika ita-nia an no hetan batizmu hodi sai Jesus nia dixípulu, neʼe katak ita halo ona hakat neʼebé importante. Ita-nia dedikasaun ba Maromak mak desizaun neʼebé sériu tebes neʼebé ita rasik mak halo. Neʼe hanesan ita dehan: ‘Jeová, haʼu hakarak Ita atu sai haʼu-nia Naʼi. Haʼu mak Ita-nia atan. Haʼu hakarak Ita atu fó-hatene haʼu kona-ba oinsá mak haʼu tenke uza haʼu-nia tempu, planu saida mak haʼu tenke halo, no oinsá mak haʼu tenke uza haʼu-nia rikusoin no matenek.’
2 Se ita mak ema kristaun neʼebé dedika an ona, neʼe mak buat neʼebé ita promete ba Maromak Jeová. Desizaun neʼebé ita halo mak buat neʼebé matenek no loos atu halo. Se ita agora Jeová ninian, oinsá mak ita tenke uza ita-nia tempu? Ita bele hetan resposta ba pergunta neʼe hodi hanoin kona-ba ezemplu husi Noé, Moisés, Jeremias no apóstolu Paulo. Sira ida-idak serbí Maromak ho laran tomak. Ita-nia situasaun mós hanesan sira-nian. Desizaun neʼebé sira halo kona-ba buat neʼebé sira tau uluk iha sira-nia moris, ida-neʼe bele fó laran-manas mai ita atu hanoin kleʼan kona-ba oinsá ita uza ita-nia tempu.—Mt 28:19, 20; 2 Tim 3:1.
ANTES RAI-NABEEN
3. Oinsá mak ita-nia tempu hanesan ho Noé nian?
3 Jesus kompara ita-nia tempu ho Noé nian. Nia dehan: “Hanesan iha Noé nia loron, nuneʼe mós Oan-Mane nia hiʼit an mai.” Jesus mós dehan: “Sira han, hemu, kaben no fó-kaben, toʼo loron neʼebé Noé tama ba ró; sira la hatene buat ida toʼo rai-nabeen mai no sira hotu mate.” (Mt 24:37-39) Ohin loron, ema barak hanoin deʼit kona-ba sira-nia moris, no la hanoin katak ita moris iha loron ikus. Sira la hanoin kona-ba avizu neʼebé Maromak nia atan sira fó sai. Ema barak goza ita tanba la fiar katak Maromak sei halakon ema aat, hanesan iha Noé nia tempu. (2 Ped 3:3-7) Maski Noé hasoru situasaun hanesan neʼe, oinsá mak nia uza ninia tempu?
4. Oinsá mak Noé uza ninia tempu kuandu nia simu ona serbisu husi Jeová? Tanbasá?
4 Maromak hatete ba Noé katak nia sei halakon ema aat hotu, no nia fó serbisu espesiál ba Noé atu halo. Noé harii arka atu bele salva ema no animál sira. (Gên 6:13, 14, 22) Noé mós haklaken kona-ba Jeová nia tesi-lia neʼebé besik atu mai. Apóstolu Pedro bolu nia nuʼudar “justisa nia manu-ain”. Neʼe hatudu katak Noé hakaʼas an atu ajuda ema atu hatene katak sira moris iha tempu ikus. (Lee 2 Pedro 2:5.) Entaun, iha situasaun hanesan neʼe, Noé no ninia família hanoin ulukliu kona-ba halo negósiu ka buka atu iha moris diʼak ka lae? Lae! Tanba sira hatene buat neʼebé sei akontese, sira la husik buat ida atu dada sira-nia atensaun husi sira-nia serbisu ba Jeová.
DESIZAUN NEʼEBÉ LIURAI-OAN IDA HALO
5, 6. (a) Hanorin neʼebé Moisés simu iha Egiptu prepara nia atu halo saida? (b) Tanbasá mak Moisés lakohi simu buat neʼebé nia bele hetan iha Egiptu?
5 Agora ita sei koʼalia kona-ba Moisés nia ezemplu. Moisés sai boot iha liurai Faraun nia palásiu iha rai-Egiptu tanba Faraun nia oan-feto mak hakiak nia. Nuʼudar liurai-oan, Moisés aprende “tuir ema Egiptu nia matenek” husi tempu joven. (Apos 7:22; Êx 2:9, 10) Karik hanorin neʼebé nia hetan prepara nia atu halaʼo serbisu iha Faraun nia palásiu. Nia bele hetan pozisaun aas iha nasaun neʼebé iha kbiit boot liu iha tempu neʼebá, no bele iha rikusoin, knaar espesiál, no mós ksolok neʼebé nia bele hetan tanba ninia pozisaun. Maibé, buat sira-neʼe importante ba Moisés ka lae?
6 Tanba Moisés nia inan-aman rasik hanorin nia husi kiʼik kedas, nia hatene saida mak Jeová promete ona ba ninia beiʼala sira, Abraão, Isaac, no Jacob, no nia tau fiar ba ida-neʼe. Ita bele fiar katak Moisés hanoin didiʼak kona-ba ninia futuru no mós kona-ba oinsá mak nia bele laran-metin nafatin ba Jeová. Entaun, kuandu tempu toʼo atu hili entre moris nuʼudar liurai-oan Egiptu nian ka nuʼudar ema Israel neʼebé atan, desizaun saida mak nia halo? Moisés hili atu “ema trata aat nia hamutuk ho Maromak nia povu liu fali haksolok ba tempu uitoan iha sala laran”. (Lee Ebreu 11:24-26.) Ikusmai, nia halo tuir Jeová nia matadalan kona-ba oinsá uza ninia moris. (Êx 3:2, 6-10) Tanbasá mak nia halo ida-neʼe? Tanba nia fiar ba buat hotu neʼebé Maromak promete. Nia hatene katak nia la iha futuru iha rai-Egiptu. Tuir loloos, lakleur tan nasaun neʼe sei hetan kastigu ho malisan sanulu husi Maromak. Entaun, lisaun saida mak ema neʼebé dedika an ba Jeová hetan husi Moisés nia ezemplu? Duké hanoin deʼit kona-ba ita-nia serbisu ka hetan ksolok iha mundu neʼe, ita presiza hanoin ulukliu kona-ba Jeová no ninia serbisu.
JEREMIAS HATENE SAIDA MAK ATU MOSU
7. Oinsá mak Jeremias nia situasaun hanesan ho ita-nian?
7 Maromak nia atan ida seluk neʼebé tau uluk Jeová nia serbisu iha ninia moris mak profeta Jeremias. Jeová haruka Jeremias nuʼudar ninia profeta atu haklaken mensajen tesi-lia nian ba ema iha Jerusalém no Judá neʼebé husik ona adorasaun ba Jeová. Jeremias moris “iha loron sira-nia rohan”. (Jer 23:19, 20) Nia hatene ho didiʼak katak lakleur tan Jerusalém no Judá sei lakon.
8, 9. (a) Tanbasá mak Baruc presiza hadiʼa ninia hanoin? (b) Kuandu halo desizaun, ita presiza hanoin kona-ba saida?
8 Tanba Jeremias iha fiar hanesan neʼe, ida-neʼe book nia atu halo saida? Ida-neʼe book nia atu la buka buat neʼebé lakleur tan sei lakon tanba halo ida-neʼe saugati deʼit. Maibé, Jeremias nia sekretáriu, Baruc, dala ruma la haree buat hotu ho klaru hanesan Jeremias. Tan neʼe, Maromak leno Jeremias atu koʼalia ba Baruc, hodi dehan: “Haree! Buat neʼebé haʼu harii haʼu sobu, no buat neʼebé haʼu kuda haʼu fokit, nuneʼe mós ho rai tomak neʼe. Maibé kona-ba ó, ó buka nafatin buat boot sira ba ó-nia an. Keta buka tan. Tanba haʼu sei lori susar ba ema hotu, . . . no haʼu sei proteje ó-nia moris iha fatin hotu neʼebé ó bá.”—Jer 45:4, 5.
9 Ita ladún hatene ho loloos “buat boot” saida mak Baruc buka ba nia an rasik. * Maibé, ita hatene katak buat sira-neʼe sei la hela ba tempu kleur tanba sei lakon kuandu Babilónia manán Jerusalém iha tinan 607 molok Kristu. Saida mak ita aprende husi ida-neʼe? Atu hetan buat neʼebé ita presiza ba ita-nia moris, ita tenke halo planu balu kona-ba futuru. (Prov 6:6-11) Maibé, matenek duni se ita uza ita-nia tempu no forsa atu buka buat neʼebé hela ba nafatin, loos ka lae? Maski Jeová nia organizasaun iha planu atu kontinua harii Reuniaun-Fatin foun, harii uma ba sukursál sira, no projetu seluk tan, maibé ita hatene katak buat sira-neʼe iha folin tanba ida-neʼe apoia Maromak nia Ukun. Entaun, diʼak atu Maromak nia atan hotu neʼebé dedika an ona hanoin kona-ba buat neʼebé iha folin kuandu halo planu sira. Ita tau duni Maromak nia hakarak uluk iha ita-nia moris ka lae?—Mt 6:33.
‘HAʼU HAREE BUAT HOTU HANESAN BUAT MESAK FOʼER’
10, 11. (a) Antes Paulo sai ema kristaun, oinsá mak nia uza ninia moris? (b) Tanbasá mak Paulo troka ninia hanoin?
10 Ikusliu, mai ita koʼalia kona-ba Paulo nia ezemplu. Antes nia sai ema kristaun, nia hetan oportunidade atu bele sai ema-boot. Porezemplu, nia estuda lei judeu nian ho mestre ida neʼebé naran-boot iha tempu neʼebá. Amlulik boot judeu nian tau fiar ba nia no fó nia serbisu importante. Se kompara ho Paulo nia maluk sira seluk, nia laʼo ba oin lalais liu iha relijiaun judeu nian. (Apos 9:1, 2; 22:3; 26:10; Gal 1:13, 14) Maibé, Paulo nia moris troka kuandu nia hatene katak Jeová la fó ona ninia bensaun ba nasaun Israel.
11 Paulo hatene katak serbisu neʼebé nia halo iha relijiaun judeu nian mak saugati deʼit iha Jeová nia haree no katak nasaun Israel la iha futuru. (Mt 24:2) Paulo hatete katak buat foun neʼebé nia komprende kona-ba Maromak nia hakarak no mós ninia knaar espesiál iha Maromak nia serbisu, ida-neʼe iha folin boot liu fali buat hotu neʼebé uluk nia hanoin mak importante no agora nia haree buat neʼe hotu “hanesan buat mesak foʼer”. Sin, Paulo husik ninia serbisu iha relijiaun judeu nian no uza ninia moris tomak atu haklaken lia-foun diʼak.—Lee Filipe 3:4-8, 15; Apos 9:15.
TAU MAROMAK NIA SERBISU ULUK
12. Saida mak Jesus tau uluk iha ninia moris depois nia hetan batizmu?
12 Noé, Moisés, Jeremias, Paulo, no ema barak seluk neʼebé hanesan sira, uza sira-nia tempu no forsa atu halo Maromak nia serbisu. Sira hatudu ezemplu diʼak mai ita. Klaru katak Maromak Jeová nia atan neʼebé hatudu ezemplu diʼak liu hotu mak Jesus. (1 Ped 2:21) Depois Jesus hetan batizmu, nia uza ninia moris tomak iha rai atu haklaken lia-foun diʼak no atu hahiʼi Jeová. Ida-neʼe hatudu katak ema kristaun ida neʼebé simu Jeová nuʼudar ninia Naʼi presiza tau uluk Maromak nia serbisu iha ninia moris. Ita mós halo hanesan neʼe ka lae? Entaun, oinsá mak ita bele tetu didiʼak kona-ba ita-nia planu atu serbí Maromak no mós atu halo serbisu seluk?—Lee Salmo 71:15; * Salmo 145:2. *
13, 14. (a) Ema kristaun hotu hetan laran-manas atu halo saida? (b) Ksolok saida mak Maromak nia povu bele hetan?
13 Ba tinan barak ona, Jeová nia organizasaun fó laran-manas beibeik ba ema kristaun sira atu hanoin didiʼak no halo orasaun kona-ba serbí nuʼudar pioneiru. Maski ema kristaun balu la iha situasaun diʼak atu hatama oras 70 fulan-fulan, maibé sira lalika sente la diʼak kona-ba neʼe. (1 Tim 5:8) Maibé, oinsá ho Ita rasik? Ita bele halo serbisu pioneiru ka lae?
14 Hanoin fali kona-ba ksolok neʼebé Maromak nia atan barak hetan durante tempu Memoriál nian iha tinan neʼe. Durante fulan-Marsu, iha arranju espesiál ba haklaken-naʼin neʼebé hakarak serbí nuʼudar pioneiru estra. Iha tempu neʼe, sira bele hili atu hatama oras 30 ka 50. (Sal 110:3) Tanba ema rihun ba rihun serbí nuʼudar pioneiru estra, ida-neʼe halo kongregasaun sira sai kontente liu. Entaun, ita mós bele halo planu atu serbí nuʼudar pioneiru estra hodi bele sente ksolok hanesan neʼe ka lae? Se nuneʼe, iha loron ida-idak nia rohan, ita sei sente kontente tebes hodi dehan: “Jeová, haʼu halo buat hotu neʼebé haʼu bele halo iha Ita-nia serbisu.”
15. Saida mak joven kristaun tenke hanoin kuandu sira sei eskola hela?
15 Se ita mak joven kristaun ida neʼebé besik ona atu ramata ita-nia eskola, karik ita iha saúde diʼak no ladún iha responsabilidade barak. Entaun, ita hanoin didiʼak ona ka lae, atu serbí nuʼudar pioneiru regulár? Dala barak, mestre sira hanoin katak diʼak liu ba ita atu bá universidade hodi bele iha serbisu diʼak tanba sira tau fiar ba ema nia organizasaun no mós ba osan. Maibé buat sira-neʼe la bele hela ba nafatin. Iha parte seluk, se ita tau uluk Maromak nia serbisu iha ita-nia moris, neʼe katak ita uza ita-nia tempu ho didiʼak no buka buat neʼebé bele ajuda ita atu iha futuru neʼebé diʼak. Hodi halo nuneʼe, ita sei banati-tuir Jesus nia ezemplu neʼebé perfeitu. Ida-neʼe mak desizaun neʼebé matenek no sei halo ita kontente no sei proteje ita. Neʼe mós hatudu katak ita la husik buat ida atu hapara ita hodi moris tuir ita-nia dedikasaun ba Jeová.—Mt 6:19-21; 1 Tim 6:9-12.
16, 17. Pergunta saida deʼit mak ita bele husu ba ita-nia an kona-ba ita-nia serbisu ba Jeová?
16 Ohin loron, Maromak nia atan barak presiza uza tempu barak atu halo serbisu hodi tau matan ba sira-nia família. Maibé, ema kristaun balu dala ruma serbisu hodi uza tempu barak liu fali buat neʼebé sira presiza. (1 Tim 6:8) Mundu neʼe hakaʼas ita atu fiar katak ita sei la bele moris diʼak se ita la iha sasán oioin ka sasán foun sira. Maibé, ema kristaun loos lakohi atu Satanás no ninia mundu neʼe mak hatudu dalan ba sira kona-ba oinsá atu halaʼo moris. (1 Joao 2:15-17) Oinsá ho sira neʼebé tinan toʼo ona atu para serbisu? Buat neʼebé diʼak liu atu sira bele halo iha sira-nia moris mak uza sira-nia tempu hodi serbí nuʼudar pioneiru no tau Jeová nia serbisu uluk.
17 Jeová nia atan hotu neʼebé dedika an ona, bele husu ba sira-nia an: ‘Saida mak haʼu buka uluk iha haʼu-nia moris? Haʼu tau uluk Jeová nia serbisu ka lae? Haʼu banati-tuir Jesus no hatudu katak haʼu prontu atu uza haʼu-nia tempu no forsa atu serbí Maromak ka lae? Haʼu halo tuir Jesus nia avizu ka lae atu kontinua laʼo tuir nia? Haʼu bele hadiʼa haʼu-nia situasaun hodi bele uza tempu barak liután atu haklaken ka atu halo serbisu seluk ba Maromak ka lae? Maski haʼu-nia situasaun agora la husik haʼu atu halo serbisu barak ba Maromak, maibé haʼu buka dalan oioin atu uza haʼu-nia tempu no forsa ba Jeová ka lae?’
‘LA’ÓS DEʼIT HAKARAK MAIBÉ HALO DUNI’
18, 19. Ita bele halo orasaun kona-ba saida? Tanbasá mak orasaun hanesan neʼe monu loos ba Jeová nia laran?
18 Ita hotu haksolok tebes atu haree Maromak nia atan sira-nia laran-manas. Maibé, ita balu neʼebé bele serbí nuʼudar pioneiru karik sente katak ita ladún iha hakarak ka ita sente katak ita la iha matenek atu sai pioneiru. (Êx 4:10; Jer 1:6) Entaun, saida mak ita sei halo? Halo orasaun ba Jeová hodi husu ajuda. Paulo hatete katak Jeová book ita “laʼós deʼit atu hakarak, maibé mós atu halo duni buat neʼebé monu loos ba nia laran”. (Flp 2:13) Tan neʼe, se ita sente katak ita ladún hakarak atu aumenta ita-nia serbisu haklaken, diʼak atu husu ba Jeová atu fó ita hakarak no matenek atu bele halo ida-neʼe.—2 Ped 3:9, 11.
19 Noé, Moisés, Jeremias, Paulo, no Jesus mak ema neʼebé laran-metin ba Maromak. Sira uza sira-nia tempu no forsa atu haklaken Jeová nia liafuan. Sira la husik buat ida atu dada sira-nia atensaun husi sira-nia serbisu ba Jeová. Mundu aat neʼe nia rohan besik ona, entaun ita hotu neʼebé dedika ona ita-nia moris ba Maromak presiza hakaʼas an atu halo tuir ezemplu sira-neʼe husi Bíblia. (Mt 24:42; 2 Tim 2:15) Hodi halo nuneʼe, ita bele halo kontente Jeová no sei hetan bensaun barak.—Lee Malaquias 3:10. *
[Nota–rodapé]
^ par. 9 Haree livru Firman Allah untuk Kita melalui Yeremia, pájina 104-106.
^ par. 12 Salmo 71:15: “Loron tomak haʼu-nia ibun sei konta kona-ba Ita-nia hahalok loos, no mós kona-ba salvasaun husi Ita, basá haʼu la bele sura dala hira mak Ita halo ida-neʼe.”
^ par. 12 Salmo 145:2: “Loron tomak haʼu sei hahiʼi Ita, no haʼu sei hanaʼi Ita-nia naran toʼo tempu neʼebé la bele sura, toʼo ba nafatin.”
^ par. 19 Malaquias 3:10: “‘Lori porsentu sanulu hotu ba iha fatin atu rai sasán, atu iha ai-han iha haʼu-nia uma, no favór ida, koko haʼu bá kona-ba neʼe’, Jeová, Naʼi funu-naʼin hatete, ‘se haʼu sei la loke ba imi odamatan bee nian iha lalehan no haʼu loloos sei fakar ba imi bensaun toʼo imi la kuran tan buat ida.’”
[Pergunta estudu nian]
[Dezeñu iha pájina 21]
Ema lakohi rona avizu neʼebé Noé haklaken
[Dezeñu iha pájina 24]
Ita hanoin didiʼak ona ka lae atu serbí nuʼudar pioneiru regulár?
