“Haʼu-nia mehi sai loos”

Uluk Emilia serbí nuʼudar pioneiru regulár, maibé tinan sanulu-resin-lima liubá, nia tenke para serbisu neʼe. Foin lalais nia komesa hanoin kona-ba oinsá nia sente kontente iha tempu neʼebá, no nia hakarak atu serbí fali nuʼudar pioneiru.

Maibé, Emilia nia serbisu atu manán osan presiza uza oras barak, no ida-neʼe halo nia la kontente. Loron ida, kuandu nia hamutuk ho maluk serbisu-naʼin, nia dehan: “Haʼu hein katak haʼu bele hamenus haʼu-nia oras serbisu nian!” Emilia nia xefe rona kona-ba neʼe, no husu Emilia se nia hakarak duni atu halo nuneʼe. Nia hatán: “Sin.” Maibé, iha kompañia neʼe, serbisu-naʼin hotu tenke serbisu loron tomak. Tan neʼe, Emilia presiza hasoru diretór atu simu lisensa hodi hamenus serbisu. Entaun, Emilia prepara atu hasoru diretór no husu Maromak nia ajuda atu nia bele koʼalia ho kalma no ho aten-brani.

Kuandu Emilia hasoru diretór, nia koʼalia ho respeitu no aten-brani hodi husu atu hamenus ninia oras serbisu nian. Nia dehan: “Haʼu mak Testemuña ba Jeová no kuandu haʼu la serbisu, haʼu uza haʼu-nia tempu hodi ajuda ema seluk atu aprende kona-ba Bíblia. Ohin loron ema barak la hatene kona-ba morál, no sira presiza matadalan husi Bíblia atu halo desizaun neʼebé diʼak. Haʼu sei hakaʼas an nafatin atu halo serbisu diʼak ba kompañia neʼe, maibé haʼu husu atu hamenus oras serbisu nian hodi haʼu bele iha tempu barak liután atu ajuda ema seluk.”

Diretór rona didiʼak ba Emilia, no nia dehan katak uluk nia mós hanoin atu halo serbisu hodi ajuda ema seluk. Diretór dehan: “Haʼu komprende buat neʼebé ó husu no haʼu fó lisensa ba ó atu hamenus serbisu. Maibé, ó komprende ka lae katak ó-nia osan mós sei hamenus?” Emilia esplika katak nia bele halo ninia moris sai simples, no dehan: “Haʼu sente kontente kuandu haʼu ajuda ema seluk.” Diretór hatete: “Haʼu respeitu ema neʼebé uza sira-nia tempu atu ajuda ema seluk.”

Iha tempu neʼebá, la iha ema ida iha kompañia neʼe neʼebé simu lisensa atu hamenus oras serbisu nian. Maski nuneʼe, Emilia serbisu ba loron haat deʼit semana-semana. Nia mós hakfodak katak kompañia aumenta ninia osan, no agora nia simu osan neʼebé hanesan nia uluk simu! Nia dehan: “Haʼu-nia mehi sai loos, no haʼu bele serbí fali nuʼudar pioneiru regulár!”

Ita mós hanoin kona-ba halo mudansa ba ita-nia moris hodi ita bele serbí nuʼudar pioneiru ka lae? Se ita serbí uluk nuʼudar pioneiru maibé para, ita bele serbí fali nuʼudar pioneiru ka lae?

[Liafuan neʼebé foti husi pájina 32]

Diretór hatete: “Haʼu respeitu ema neʼebé uza sira-nia tempu atu ajuda ema seluk”