Jeová halibur ninia família
Jeová halibur ninia família
“Halo buat hotu-hotu atu imi bele sai laran ida deʼit iha espíritu.”—EF 4:1, 3.
OINSÁ ITA HATÁN?
Saida mak Jeová halo hodi kumpre ninia hakarak?
Oinsá mak ita bele “sai laran ida deʼit”?
Saida deʼit mak ajuda ita atu hatudu “laran-diʼak ba malu”?
1, 2. Saida mak Jeová nia hakarak kona-ba mundu no ema?
KUANDU ita rona liafuan “família”, ida-neʼe halo ita hanoin kona-ba saida? Ita hanoin kona-ba domin no haksolok ka lae? Ita hanoin kona-ba serbisu hamutuk atu halo buat ruma? Ka kona-ba fatin neʼebé diʼak atu aprende buat barak no koʼalia nakloke ba malu? Se ita iha família neʼebé diʼak, karik ita hanoin kedas kona-ba buat hirak-neʼe. Maromak Jeová mak família nia Hun. (Ef 3:14, 15) Nia hakarak ninia kriatura hotu iha lalehan no rai sai família ida deʼit no sente seguru, fiar ba malu, no haksolok ho unidade.
2 Maibé, depois Adão ho Eva halo tiha sala, ema la sai parte tan iha Maromak nia família. Maski nuneʼe, Jeová la troka ninia hakarak. Nia sei halo Adão no Eva nia oan no bei-oan sai barak hodi hela iha mundu neʼebé sai paraízu hanesan jardín Eden. (Gên 1:28; Isa 45:18) No Jeová prepara buat hotu neʼebé presiza atu kumpre ninia hakarak neʼe. Livru Efeso esplika kona-ba unidade no mós kona-ba arranju oioin neʼebé Jeová halo atu ninia kriatura sira hotu sai ida deʼit. Entaun, mai ita lee eskritura balu husi livru Efeso no hanoin oinsá mak ita bele apoia Jeová nia hakarak atu halo ninia kriatura hotu iha lalehan no rai hetan unidade nuʼudar família ida deʼit.
ARRANJU ATU HALIBUR HAMUTUK
3. Tuir Efeso 1:10, saida mak Maromak komesa halo iha tempu neʼebé loos? Horibainhira mak komesa parte primeiru husi arranju neʼe?
3 Buat hotu neʼebé Jeová halo, nia halo atu kumpre ninia hakarak. Tan neʼe, iha tempu neʼebé loos, Maromak komesa atu halo arranju hodi “halibur” ninia kriatura hotu atu sai família ida deʼit. (Lee Efeso 1:8-10.) Ninia arranju neʼe iha parte rua. Parte primeiru mak halibur ema kose-mina hodi prepara sira atu moris iha lalehan hodi serbisu hamutuk ho Jesus Kristu nuʼudar sira-nia Ulun. Ida-neʼe komesa ona iha loron Pentekostes 33 kuandu Jeová hahú halibur ema neʼebé sei ukun hamutuk ho Kristu iha lalehan hodi kose mina ba sira ho espíritu santu. (Apos 2:1-4) Liuhusi Jesus nia sakrifísiu, Maromak bolu sira nuʼudar ema loos neʼebé merese atu simu moris. Ho nuneʼe, ema kose-mina sira hatene katak sira sai ona “Maromak nia oan” hakiak.—Rom 3:23, 24; 5:1; 8:15-17.
4, 5. Parte segundu husi Maromak nia arranju mak saida?
4 Parte segundu mak halibur no prepara ema neʼebé atu moris iha mundu foun hodi simu Kristu nia ukun. Ema neʼebé tama uluk mundu foun mak “ema-lubun boot”. (Apok 7:9, 13-17; 21:1-5) Tuirmai, durante Kristu nia Ukun ba Tinan Rihun Ida, Maromak sei fó moris-hiʼas ba ema rihun ba rihun neʼebé mate ona atu sira moris hamutuk ho ema-lubun boot neʼe. (Apok 20:12, 13) Iha tempu neʼebá, ema-lubun boot no ema neʼebé moris hiʼas fali, sira hotu sei sai ida deʼit nuʼudar ‘buat neʼebé iha rai’. Hanoin toʼok kona-ba tempu neʼe, ita sei iha oportunidade barak atu hatudu ita-nia unidade! Liutiha tinan rihun ida, Maromak sei husik Satanás atu koko ema iha rai ba dala ikus, no ikusmai sira neʼebé laran-metin nafatin sei sai “Maromak nia oan”.—Rom 8:21; Apok 20:7, 8.
5 Ohin loron, Jeová prepara daudauk ema kose-mina sira atu bá lalehan no bibi seluk neʼebé sei moris iha mundu foun. Maibé, oinsá mak ema ida-idak bele apoia Maromak nia arranju neʼe?
“SAI LARAN IDA DEʼIT IHA ESPÍRITU”
6. Eskritura saida deʼit mak hatudu katak ema kristaun tenkesér halibur malu?
6 Bíblia hatete katak ema kristaun tenkesér halibur malu. (1 Kor 14:23; Ebr 10:24, 25) Maibé atu ita sai laran ida deʼit, neʼe laʼós deʼit katak halibur malu iha fatin ruma, hanesan iha merkadu ka iha estádiu. Atu iha unidade neʼebé loos, ita presiza halo tuir Jeová nia hanorin no husik Maromak nia espíritu santu mak ajuda ita atu hadiʼa ita-nia hahalok.
7. Saida deʼit mak ita presiza halo atu “sai laran ida deʼit iha espíritu”?
7 Tanba ita tau fiar ba Jesus nia sakrifísiu, Jeová haree ita nuʼudar ema loos, hodi simu ema kose-mina nuʼudar ninia oan no bibi seluk nuʼudar ninia belun. Maski nuneʼe, durante ita moris iha mundu aat neʼe, ita hotu dala ruma iha problema ho ema seluk. (Rom 5:9; Tgo 2:23) Tan neʼe mak Bíblia hatete mai ita atu hatudu pasiénsia ba malu. Entaun, saida deʼit mak ita presiza halo atu haburas ita-nia unidade hamutuk ho maluk kristaun sira? Ita presiza haraik-an no laran-maus hodi ‘la hanoin ita an rasik’. Liután neʼe, Paulo fó konsellu ba ita hodi dehan: “Halo buat hotu-hotu atu imi bele sai laran ida deʼit iha espíritu, husi dame neʼebé halibur imi hamutuk.” (Lee Efeso 4:1-3.) Halo tuir konsellu neʼe envolve mós husik Maromak nia espíritu santu atu hadiʼa ita-nia hahalok no haburas hahalok diʼak neʼebé espíritu mak lori mai. Ida-neʼe sei ajuda ita atu rezolve problema ho ema seluk no halo ita sai laran ida deʼit. Maibé, kuandu ita halo tuir ita-nia hakarak isin nian, ida-neʼe sei estraga ita-nia unidade.
8. Oinsá mak isin nia hahalok bele estraga unidade?
8 Mai ita haree oinsá mak “isin nia hahalok” bele estraga unidade. Paulo hatete: “Isin nia hahalok sira bele haree ho momoos, neʼe mak sala-foʼer, hahalok la moos, hahalok arbiru deʼit.” (Gal 5:19, MF) Porezemplu, hahalok sala-foʼer halo ema hadook an husi Jeová no kongregasaun. Kuandu ema ida la laran-metin ba ninia kaben, ida-neʼe bele lori susar ba família, hanesan halo feen-laʼen soe malu, ka haketak oan husi inan ka aman. Kuandu ema ida halo hahalok la moos, ida-neʼe lori perigu ba ninia relasaun ho Jeová no ho sira neʼebé hadomi nia. Porezemplu, ita hatene katak se ita hakarak halo buat rua sai metin ba malu hodi uza lem, klaru katak ita presiza hamoos uluk parte neʼebé ita atu tau lem. Kuandu ema ida halo hahalok arbiru deʼit, ida-neʼe hatudu katak nia la halo tuir no la respeitu Maromak nia ukun-fuan. Hahalok sira seluk neʼebé temi nuʼudar “isin nia hahalok” mós halo ema haketak an husi Maromak no estraga unidade ho ema seluk. Jeová odi hahalok sira-neʼe.
9. Atu hatene se ita hakaʼas an atu sai laran ida deʼit iha espíritu, pergunta saida deʼit mak ita bele husu?
9 Tan neʼe, ita ida-idak presiza husu ba ita-nia an: ‘Haʼu hakaʼas an duni atu haburas dame no unidade ho maluk kristaun sira ka lae? Haʼu halo saida kuandu problema ruma mosu? Haʼu koʼalia kona-ba neʼe ba haʼu-nia kolega barak atu sira bele apoia haʼu ka lae? Haʼu hein deʼit atu katuas sira mak rezolve haʼu-nia problema no haʼu rasik lakohi hakaʼas an atu hadame malu ka lae? Se haʼu hatene katak ema ruma iha problema ho haʼu, haʼu hadook an deʼit husi ema neʼe tanba haʼu lakohi koʼalia kona-ba problema neʼe ka lae?’ Tuir loloos, se ita halo hanesan neʼe, ida-neʼe hatudu katak ita la apoia Jeová nia hakarak atu halibur ema hotu atu sai laran ida deʼit iha Kristu.
10, 11. (a) Tanbasá mak importante tebes atu iha dame ho ita-nia maluk kristaun sira? (b) Hodi halo saida deʼit mak ita bele haburas dame no simu Jeová nia bensaun?
10 Jesus hatete: “Wainhira ó atu hasaʼe ó-nia buat-karan iha altár no hanoin fali iha neʼebá katak ó-nia maun-alin iha buat ruma hasoru ó, husik lai ó-nia buat-karan iha altár oin hodi bá uluk dame malu ho nia, hafoin mai hasaʼe ó-nia buat-karan. Buka dame malu lalais ho ema neʼebé kontra ó.” (Mt 5:23-25) Tiago mós hatete katak “sira neʼebé buka dame kari ai-hun neʼebé sei fó fuan justisa nian”. (Tgo 3:17, 18) Sin, se ita hakarak haburas hahalok neʼebé loos no justisa, ita presiza duni atu sai ema neʼebé buka dame.
11 Mai ita hanoin kona-ba ezemplu ida. Iha rai balu neʼebé kleur ona iha funu, ema taʼuk atu halo toʼos iha fatin barak tanba soldadu sira hakoi bomba. Kuandu bomba nakfera iha fatin ida, toʼos-naʼin barak husik fatin neʼe. Tan neʼe ema iha área neʼe lakon sira-nia serbisu, no ida-neʼe mós lori susar ba ema iha sidade atu hetan hahán. Hanesan neʼe mós ho ita, kuandu ita iha hahalok ruma neʼebé halo susar atu iha dame ho ita-nia maluk, ita mós bele sai hanesan bomba, no ida-neʼe hanetik ita atu laʼo ba oin nuʼudar ema kristaun. Maibé hodi sai prontu atu fó perdua ba malu no hatudu laran-diʼak ba malu, ita hotu bele haburas dame no simu Jeová nia bensaun.
12. Oinsá mak katuas kristaun sira ajuda ita atu iha unidade?
12 Liután neʼe, katuas kristaun sira neʼebé nuʼudar kmanek husi Maromak mós ajuda ita atu “hetan laran ida deʼit iha fiar”. (Ef 4:13) Sira ajuda ita atu hadiʼa ita-nia hahalok no haburas hahalok diʼak hodi serbí Jeová hamutuk ho ita no fó konsellu mai ita liuhusi Bíblia. (Ef 4:22-24) Kuandu sira fó konsellu ba ita, diʼak atu hanoin-hetan katak Jeová uza sira atu prepara ita atu moris iha mundu foun. Oinsá ho imi katuas kristaun sira? Kuandu imi fó konsellu ruma ba maluk kristaun, diʼak atu halo nuneʼe iha dalan neʼebé hatudu katak imi hakarak ajuda sira.—Gal 6:1.
“IMI LARAN-DIʼAK BA MALU”
13. Se ita la halo tuir konsellu iha Efeso 4:25-32, ida-neʼe lori rezultadu saida?
13 Efeso 4:25-29 esplika kona-ba buat neʼebé ita labele halo. Ita labele bosok, labele sai laran-nakali, labele sai baruk, no labele koʼalia liafuan aat. Duké halo nuneʼe, ita presiza koʼalia liafuan neʼebé diʼak hodi hametin malu. Tuir loloos, se ita la halo tuir konsellu neʼe, ita “halo Maromak nia espíritu santu laran-susar” tanba espíritu santu mak forsa neʼebé haburas unidade. (Ef 4:30) Atu haburas dame no unidade, ita mós presiza halo tuir konsellu neʼebé Paulo dehan: “Hadook tiha husi imi leet laran-moras tomak, laran-hirus, laran-nakali, lia aat no lia hasoru Maromak no mós laran-dodok. Maibé imi laran-diʼak ba malu, nuʼudar Maromak haraik tiha ba imi iha Kristu.”—Ef 4:31, 32.
14. (a) Tanbasá mak Paulo fó konsellu atu hatudu “laran-diʼak ba malu”? (b) Saida mak ajuda ita atu hatudu laran-diʼak ba malu?
14 Paulo fó konsellu atu hatudu “laran-diʼak ba malu” tanba dala ruma ita la hatudu laran-diʼak no ita presiza hakaʼas an atu hatudu laran-diʼak liután. Sin, ita presiza aprende no treinu ita-nia an atu hanoin uluk kona-ba ema seluk nia diʼak duké hanoin kona-ba ita rasik nia diʼak. (Flp 2:4) Porezemplu, dala ruma ita hakarak atu koʼalia buat ruma hodi halo ema seluk hamnasa ka halo ema hanoin katak ita matenek. Maibé hodi hanoin uluk antes atu koʼalia, ida-neʼe ajuda ita atu hatudu “laran-diʼak ba malu”.
HABURAS DOMIN NO RESPEITU IHA FAMÍLIA LARAN
15. Oinsá mak Efeso 5:28 book laʼen sira atu halo tuir Kristu nia ezemplu?
15 Bíblia kompara relasaun entre feen-laʼen ho relasaun entre kongregasaun no Kristu. Kristu nia ezemplu ajuda laʼen sira atu hatene oinsá mak sira presiza hatudu domin no tau matan ba sira-nia feen, no ajuda mós feen sira atu hatene oinsá mak sira presiza hakruʼuk ba laʼen nuʼudar sira-nia ulun. (Ef 5:22-33) Kuandu Paulo hatete: “Mane sira sei hadomi sira-nia kaben hanesan sira hadomi sira rasik nia isin-lolon”, nia hanoin kona-ba saida? (Ef 5:28) Iha versíkulu foin antes neʼe, nia hatete katak Kristu hadomi no saran ninia an rasik ba kongregasaun no uza Maromak nia liafuan atu “hamoos” kongregasaun. Entaun, laʼen sira mós iha responsabilidade atu ajuda sira-nia família hodi hametin sira-nia relasaun ho Jeová. Laʼen sira neʼebé halo nuneʼe, sira apoia Jeová nia hakarak atu halibur ninia kriatura sira hotu atu sai família ida deʼit neʼebé simu Kristu nia ukun.
16. Kuandu inan-aman sira halaʼo ho didiʼak sira-nia responsabilidade neʼebé mai husi Jeová, ida-neʼe lori rezultadu saida?
16 Inan-aman presiza hanoin-hetan katak atu tau matan ba sira-nia oan mak sira-nia responsabilidade neʼebé mai husi Jeová. Maski nuneʼe, ema barak ohin loron “la hatene sadiʼa maluk”. (2 Tim 3:1, 3) Mane barak la halaʼo sira-nia responsabilidade nuʼudar aman, no ida-neʼe halo oan sira la kontente no lori rezultadu ladiʼak ba sira. Maibé Paulo fó konsellu ba aman sira: “Keta halo imi-nia oan sira laran-susar. Maibé hanorin sira dixiplina no Naʼi nia doutrina loloos.” (Ef 6:4) Iha uma-laran mak fatin neʼebé labarik sira hahú atu aprende kona-ba oinsá atu hatudu domin ba malu no hatudu respeitu ba ema neʼebé mak sira-nia ulun. Inan-aman sira neʼebé hanorin buat hirak-neʼe ba sira-nia oan, sira apoia Jeová nia hakarak atu halibur ninia kriatura sira atu sai família ida deʼit. Ita presiza halo ita-nia uma-laran nakonu ho domin hodi soe hahalok hirus malu ka koʼalia aat ba malu, tanba hodi halo nuneʼe, ita hanorin ita-nia oan sira oinsá atu hatudu domin ba malu no respeitu sira-nia ulun. Ida-neʼe sei prepara oan sira atu moris iha mundu foun.
17. Ita presiza halo saida atu luta hasoru Diabu?
17 Ita labele haluha katak Diabu Satanás sempre koko atu hapara ita atu labele halo tuir Maromak nia hakarak. Ohin loron, ema barak halo tuir Diabu nia hakarak, porezemplu mane no feto hela hamutuk maski la kaben, ema soe malu, no simu kaben entre mane ho mane ka feto ho feto. Maibé ita la halo tuir mundu nia hahalok aat sira-neʼe. Ita halo tuir Kristu nia ezemplu. (Ef 4:17-21) Tan neʼe, hodi luta hasoru Diabu no anju aat sira, ita presiza “tau Maromak nia hatais funu nian”.—Lee Efeso 6:10-13.
“LAʼO IHA DOMIN”
18. Saida mak xave atu iha unidade?
18 Se ita hakarak haburas unidade, ita presiza iha domin. Ida-neʼe mak xave atu iha unidade. Tanba ita-nia laran nakonu ho domin ba ita-nia “Naʼi [Jesus] ida deʼit”, ba ita-nia “Maromak [Jeová] ida deʼit”, no ba ita-nia maluk kristaun, ida-neʼe book ita atu kontinua haburas ita-nia dame no unidade. (Ef 4:3-6) Kona-ba domin hanesan neʼe, Jesus halo orasaun hodi dehan: “Haʼu la harohan deʼit ba sira-neʼe, maibé mós ba sira neʼebé sei fiar iha haʼu tan sira-neʼe nia liafuan; atu sira hotu sai ida deʼit nuʼudar Ita, Aman, horik iha haʼu, no haʼu iha Ita; atu sira mós hela iha ita naʼin-rua . . . Haʼu fó-hatene tiha ba sira Ita-nia naran, no haʼu sei fó-hatene liután, atu domin neʼebé Ita hadomi haʼu bele hela iha sira, no haʼu hela iha sira.”—Joao 17:20, 21, 26.
19. Ita hakarak halo saida?
19 Se ita iha hahalok ruma neʼebé susar atu hadiʼa, ita-nia domin bele book ita atu halo orasaun hanesan ema neʼebé hakerek salmu ida, neʼebé dehan: “Halo haʼu-nia laran sai metin atu hamtaʼuk Ita-nia naran.” (Sal 86:11) Sin, ita tenke kontinua halo funu hasoru Diabu neʼebé koko atu hadook ita husi ita-nia Aman iha lalehan no mós ita-nia maluk kristaun sira. Entaun, mai ita hakaʼas an atu “banati-tuir Maromak, nuʼudar nia oan doben sira” no nafatin “laʼo iha domin” iha família laran, iha kongregasaun laran, no iha ita-nia serbisu ba Jeová.—Ef 5:1, 2.
[Pergunta estudu nian]
[Dezeñu iha pájina 29]
Hodi husik ninia buat-karan iha altár oin, nia bá dame malu ho ninia maluk
[Dezeñu iha pájina 31]
Inan-aman sira, hanorin oan sira atu hatudu respeitu ba ema seluk
