Esperiénsia husi Max Lloyd

Iha kalan boot ida iha tinan 1955, iha rai-Paraguai, Amérika Súl, ema barak haleʼu uma neʼebé haʼu ho haʼu-nia maluk misionáriu bá vizita, no sira hakilar ho hirus dehan: “Ami-nia maromak gosta fakar raan, no nia hakarak gringos nia raan.” Agora, haʼu sei esplika oinsá mak ami gringos, ka ema malae, hasoru situasaun hanesan neʼe.

HAʼU komesa aprende atu halo tuir Maromak Jeová nia hakarak tinan barak liubá iha rai-Austrália. Iha tinan 1938, haʼu-nia aman simu livru ida husi Testemuña ba Jeová ho títulu Enemies. Iha tempu neʼebá, haʼu-nia inan-aman la kontente ona ho sira-nia ulun-naʼin igreja tanba nia hatete katak ema mak inventa informasaun iha Bíblia laran. Tinan ida liu tiha, sira naʼin-rua dedika sira-nia an ba Jeová no hetan batizmu. Husi tempu neʼebá, ami-nia família sempre tau uluk Jeová nia hakarak iha ami-nia moris. Tuirmai, haʼu-nia biin neʼebé tinan lima boot liu haʼu hetan batizmu, no iha tinan 1940, kuandu haʼu sei tinan sia, haʼu mós hetan batizmu.

Lakleur depois Funu Mundiál Segundu hahú, governu Austrália bandu Testemuña ba Jeová atu labele halo no fahe livru sira kona-ba Bíblia. Tan neʼe, haʼu aprende oinsá atu esplika haʼu-nia fiar hodi uza Bíblia deʼit. Haʼu toman atu lori Bíblia ba eskola atu esplika tansá mak haʼu la hatudu sinál respeitu nian ba bandeira no la apoia funu.—Êx 20:4, 5; Mt 4:10; Joao 17:16; 1 Joao 5:21.

Labarik barak iha haʼu-nia eskola hatete katak haʼu mak “espiaun husi rai-Alemaña” no sira lakohi besik ho haʼu. Iha tempu neʼebá, dala ruma ami haree filme iha eskola. Maibé antes atu haree filme, ema hotu tenke hamriik no kanta inu nasionál. Kuandu haʼu sei tuur hela, labarik naʼin-rua ka tolu kaer haʼu-nia fuuk hodi dada haʼu atu hamriik. Ikusmai, eskola hasai haʼu tanba haʼu kaer metin ba haʼu-nia fiar husi Bíblia. Maski nuneʼe, haʼu bele estuda iha haʼu-nia uma liuhusi korreius.

KUMPRE HAʼU-NIA PLANU

Haʼu-nia planu mak komesa serbisu pioneiru kuandu haʼu toʼo tinan 14. Tan neʼe, haʼu sente laran-tun tebes kuandu haʼu-nia inan-aman hatete katak haʼu presiza buka uluk serbisu atu manán osan no tenkesér selu haʼu-nia kuartu ho hahán, maibé sira hatete katak kuandu haʼu toʼo tinan 18 mak haʼu bele komesa halo serbisu pioneiru. Haʼu la kontente kona-ba selu osan ba haʼu-nia inan-aman, tan neʼe haʼu hatete beibeik ba sira katak haʼu hakarak rai osan neʼe atu prepara ba serbisu pioneiru maibé sira hadau deʼit haʼu-nia osan.

Kuandu haʼu-nia tinan toʼo ona atu komesa pioneiru, haʼu-nia inan-aman hatete mai haʼu katak sira  rai hela haʼu-nia osan iha banku. Depois neʼe, sira fó fali osan hotu neʼebé haʼu selu ona ba sira, no hatete ba haʼu atu hola roupa no buat neʼebé haʼu presiza atu serbí nuʼudar pioneiru. Hodi halo nuneʼe, haʼu-nia inan-aman hanorin haʼu atu tau matan ba haʼu-nia an hodi labele tabele deʼit ba ema seluk nia ajuda. Haʼu hafolin tebes treinu neʼe.

Kuandu haʼu no haʼu-nia biin sei kiʼik, ami-nia família simu beibeik pioneiru sira atu hela iha ami-nia uma, no ami kontente atu haklaken hamutuk ho sira. Ami sempre uza ami-nia tempu findesemana atu bá haklaken husi uma ba uma, haklaken iha dalan, no halaʼo estudu Bíblia. Iha tempu neʼebá, Maromak nia organizasaun fó laran-manas ba haklaken-naʼin sira atu uza oras 60 fulan-fulan iha serbisu haklaken. Haʼu-nia inan sempre kumpre oras neʼe hodi hatudu ezemplu diʼak ba haʼu no haʼu-nia biin Lesley.

SERBISU PIONEIRU IHA TASMÁNIA

Fatin primeiru neʼebé haʼu serbí nuʼudar pioneiru mak illa Tasmánia iha rai-Austrália. Iha fatin neʼe, haʼu serbí hamutuk ho haʼu-nia biin ho ninia laʼen. Maibé lakleur, sira husik fatin neʼe atu tuir Eskola Gilead klase 15. Irmaun-irmán balu hanoin katak la toʼo fulan tolu haʼu sei husik fatin neʼe tanba haʼu mesak deʼit ona no haʼu mak ema moedór neʼebé nunka dook husi família. Maski nuneʼe, haʼu kontinua serbí iha neʼebá, no iha tinan 1950, haʼu simu knaar nuʼudar katuas neʼebé tau matan ba kongregasaun. Depois neʼe, haʼu sai pioneiru tempu-tomak no irmaun joven ida serbí hamutuk ho haʼu nuʼudar pioneiru.

Ami-nia haklaken-fatin foun mak sidade ida neʼebé ema barak keʼe fatuk atu buka riti, no iha neʼebá la iha Testemuña ida. Kuandu ami saʼe bís no toʼo iha neʼebá, besik kalan ona. Iha kalan neʼe, ami toba iha otél neʼebé tuan. Loron tuirmai, ami komesa haklaken husi uma ba uma, no ami husu uma-naʼin sira se sira hatene kona-ba kuartu atu aluga. Kuandu atu kalan, ema ida hatete katak igreja protestante nia sorin iha pastór nia uma neʼebé mamuk no diʼak atu husu ba señór ida neʼebé serbisu hamutuk ho pastór. Señór neʼe hatudu laran-diʼak mai ami no husik ami atu hela iha uma neʼe. Dadeer-dadeer, ami sai husi pastór nia uma atu bá haklaken, no ami sente ida-neʼe kómiku uitoan.

Iha serbisu haklaken, ami hetan ema barak neʼebé hakarak hatene kona-ba lia-loos no ami komesa estuda Bíblia ho ema barak. Kuandu igreja nia ema-boot sira iha sidade kapitál hatene kona-ba neʼe no mós katak Testemuña ba Jeová mak hela iha pastór nia uma, sira hatete ba señór neʼebé fó hela-fatin mai ami atu haruka ami sai. Tan neʼe, dala ida tan, ami la hatene iha neʼebé mak ami atu hela!

Loron tuirmai, ami haklaken toʼo lokraik, depois ami komesa buka fatin atu ami bele toba, maibé ami hetan deʼit estádiu nia tuur-fatin. Ami subar ami-nia pasta sira iha neʼebá no komesa fali haklaken. Rai atu besik nakukun, maibé ami deside atu hakaʼas an atu vizita uma balu tan neʼebé ami seidauk vizita hotu. No iha uma sira-neʼe ida, señór ida  hatete katak ami bele hela iha uma kiʼik iha kotuk!

SAI KATUAS ÁREA NIAN NO BÁ ESKOLA GILEAD

Haʼu haklaken iha neʼebá durante fulan ualu, depois haʼu simu konvite husi sukursál Austrália atu serbí nuʼudar katuas área nian. Ida-neʼe halo haʼu hakfodak tebes, tanba haʼu foin tinan 20 deʼit. Depois haʼu hetan treinu ba semana balu, haʼu komesa vizita kongregasaun sira. Maski irmaun-irmán barak mak tinan boot liu haʼu, sira la hatún haʼu neʼebé tinan kiʼik maibé hatudu respeitu ba knaar neʼebé haʼu halaʼo.

Nuʼudar katuas área nian, haʼu presiza uza transporte oioin atu halo viajen husi kongregasaun ida ba kongregasaun seluk. Dala ruma haʼu saʼe bís, dala ruma saʼe komboiu ka karreta, no dala ruma haʼu mós saʼe iha motór nia kotuk hodi lori pasta boot neʼebé tau sasán no ida seluk neʼebé uza ba haklaken. Haʼu kontente tebes atu hela iha irmaun-irmán sira-nia uma. Loron ida, haʼu simu konvite husi katuas kristaun ida neʼebé laran-manas tebes atu haʼu hela iha ninia uma. Maibé uma neʼe seidauk halo hotu, no iha semana neʼe, haʼu toba iha hariis-fatin deʼit. Maski nuneʼe, haʼu kontente tebes atu hamutuk ho irmaun neʼe.

Iha tinan 1953, haʼu simu konvite atu tuir Eskola Gilead klase 22. Haʼu hakfodak no kontente, maibé haʼu mós laran-susar. Haʼu-nia biin ho ninia laʼen ramata Eskola Gilead iha 30 Jullu 1950 no sira hetan knaar atu serbí iha rai-Pakistaun, maibé la toʼo tinan ida, Lesley sai moras no ikusmai nia mate iha neʼebá. Haʼu hanoin haʼu-nia inan-aman sente oinsá se haʼu bá rai seluk lakleur depois haʼu-nia biin mate. Maibé, sira hatete: “Bá serbí Jeová iha fatin neʼebé deʼit neʼebé nia haruka.” Iha tempu neʼebá mak haʼu hasoru haʼu-nia aman ba dala ikus. Nia mate iha tinan 1957.

Atu tuir Eskola Gilead iha Novaiorke, haʼu saʼe ró ba semana neen hamutuk ho maluk kristaun naʼin-lima husi Austrália. Durante iha ró laran, ami uza ami-nia tempu atu lee no estuda Bíblia, no haklaken ba ema. Toʼo tiha Novaiorke, antes atu tuir Eskola Gilead iha South Lansing, ami tuir uluk reuniaun boot internasionál iha Yankee Stadium, neʼebé halaʼo iha Jullu 1953. Iha reuniaun neʼe, ema naʼin-165.829 mak tuir.

Ami-nia klase iha Eskola Gilead iha estudante naʼin-120 neʼebé mai husi rai oioin iha mundu tomak. Iha tempu neʼebá, kuandu ami tuir graduasaun mak ami foin hatene iha rai neʼebé mak ami atu bá serbí, no depois ami halai kedas ba biblioteka atu buka-hatene kona-ba rai neʼe. Haʼu simu knaar atu serbí iha rai-Paraguai, no haʼu hatene katak iha rai neʼe iha funu barak no ema hadau malu ukun. Lakleur depois haʼu toʼo iha Paraguai, iha kalan ida, haʼu rona tarutu no lian barak iha liʼur, tan neʼe dadeer-saan tuirmai haʼu husu misionáriu sira seluk “selebrasaun” saida mak ema halo iha liʼur. Sira hatudu oin-midar mai haʼu no hatete katak ema foin manán funu hodi kaer governu no ida-neʼe akontese beibeik. Depois sira hatete ba haʼu atu haree ba liʼur, no haʼu haree soldadu barak hamriik iha dalan!

 ESPERIÉNSIA NEʼEBÉ HAʼU LA BELE HALUHA

Loron ida, haʼu tuir katuas área nian atu vizita kongregasaun ida atu hatudu filme The New World Society in Action. Ami halo viajen ba oras ualu ka sia hodi lori mákina atu hatudu filme, ami presiza saʼe komboiu, depois saʼe karrosa neʼebé kuda mak lori no ikusmai karrosa seluk neʼebé karau mak dada. Ikusmai ami toʼo iha kongregasaun neʼe, no loron tuirmai, ami vizita ema no konvida sira hotu atu haree filme iha kalan. Iha kalan neʼe, maizumenus ema naʼin-15 mak mai haree filme neʼe.

Ami komesa hatudu filme iha uma liʼur, maibé derrepente deʼit ema haruka ami atu tama lalais iha uma laran. Kuandu ami kaer mákina sira no foin tama iha uma laran, ami rona mane sira hakilar no halo kilat tarutu, no hatete: “Ami-nia maromak gosta fakar raan, no nia hakarak gringos nia raan.” Iha neʼebá, iha gringos, ka ema malae naʼin-rua deʼit, no ida mak haʼu! Ema neʼebé mai haree filme la husik mane sira-neʼe atu tama iha uma laran. Maibé, sira mai fali iha tuku tolu dadeer-saan, no sira halo kilat tarutu no hatete katak sira sei kaer ami kuandu ami fila fali ba sidade.

Irmaun sira kontaktu ho xefe polísia, no iha lokraik nia mai ho kuda rua atu lori ami ba sidade. Iha dalan atu bá sidade, kuandu ami besik ai-hun sira neʼebé ema bele subar, xefe polísia neʼe losu ninia kilat no haree fatin perigu neʼe. Haʼu haree katak diʼak atu uza kuda atu laʼo rai, tan neʼe liutiha tempu balu haʼu hola kuda ida.

MISIONÁRIU BARAK LIUTÁN

Maski ulun-naʼin igreja nian fó susar mai ami, maibé ema neʼebé simu lia-loos aumenta ba beibeik. Iha tinan 1955, misionáriu naʼin-lima tan mai toʼo Paraguai, no sira ida mak irmán klosan husi rai-Kanadá, naran Elsie Swanson, neʼebé tuir Eskola Gilead klase 25. Antes nia hetan knaar atu bá serbí iha sidade seluk, ami iha oportunidade atu koñese malu iha sukursál. Nia uza ninia moris atu serbí Jeová maski ninia inan-aman la simu lia-loos no la apoia nia. Ikusmai, ami kaben iha 31 Dezembru 1957, no ami hela mesak iha uma misionáriu ida iha parte súl iha Paraguai.

Ami-nia uma la iha torneira no ami presiza kuru bee husi bee-matan iha uma kotuk. Tan neʼe, ami la iha hariis-fatin iha uma laran no la iha mákina atu fase roupa. Ami mós la iha jeleira, tan neʼe ami hola hahán neʼebé ami presiza ba loroloron. Maibé, tanba ami halaʼo ami-nia moris simples no iha relasaun diʼak ho irmaun-irmán sira iha kongregasaun, ida-neʼe halo ami-nia moris sai kontente tebes.

Iha tinan 1963, lakleur depois ami fila ba Austrália  atu vizita haʼu-nia inan, nia hetan atake-fuan, karik tanba nia kontente demais atu haree ninia oan neʼebé tinan sanulu la hasoru malu. Kuandu loron neʼebé ami atu fila ba Paraguai besik daudaun, ami hasoru desizaun boot iha ami-nia moris. Ami hakarak fila ba Paraguai, maibé ami sei husik haʼu-nia inan iha ospitál hodi hein ema seluk mak atu tau matan ba nia ka lae? Haʼu no Elsie halo orasaun kona-ba neʼe no deside atu tau matan ba ami-nia inan iha Austrália. Ami halo nuneʼe toʼo nia mate iha tinan 1966, maibé ami bele kontinua pioneiru.

Iha Austrália, haʼu hetan knaar atu vizita kongregasaun sira nuʼudar katuas área nian no katuas vizitante, no hetan mós knaar atu hanorin eskola ba katuas no atan ba kongregasaun. Depois neʼe, ami iha mudansa boot ida tan. Haʼu hetan knaar atu serbí nuʼudar membru ida iha Grupu Koordenadór ba Sukursál Austrália. Tuirmai, kuandu atu harii uma sukursál foun, haʼu hetan knaar nuʼudar koordenadór ba grupu neʼebé tau matan ba projetu neʼe. Haʼu serbisu hamutuk ho irmaun barak neʼebé iha ona esperiénsia, no ikusmai ami harii uma sukursál neʼebé kapás.

Tuirmai, haʼu serbí iha Departamentu Serbisu nian, neʼebé tau matan ba serbisu haklaken. Haʼu mós hetan knaar espesiál atu vizita sukursál sira seluk iha mundu tomak nuʼudar katuas zona nian. Ida-neʼe fó oportunidade mai haʼu atu hametin liután haʼu-nia fiar hodi hasoru irmaun-irmán sira neʼebé uluk tama iha komarka ba tinan barak tanba sira halo tuir Jeová ho laran-metin.

AMI-NIA KNAAR OHIN LORON

Iha tinan 2001, kuandu ami fila husi viajen naruk nuʼudar katuas zona nian, haʼu hetan konvite atu bá Brooklyn, Novaiorke, atu serbí iha Grupu Koordenadór ba Sukursál Estadus Unidus. Haʼu ho Elsie halo orasaun no deside atu simu konvite neʼe. Husi tempu neʼebá toʼo agora, ami serbí tinan 11 ona iha Brooklyn.

Haʼu kontente ho haʼu-nia feen neʼebé prontu atu halo buat naran deʼit neʼebé Jeová hakarak. Maski ami agora tinan 80 liu ona, maibé ami-nia saúde sei diʼak. Ami hein katak ami sei haksolok ba nafatin ho Jeová nia hanorin no simu bensaun sira neʼebé nia sei haraik ba ema neʼebé halo tuir ninia hakarak.

[Liafuan neʼebé foti husi pájina 19]

Dala ruma haʼu saʼe bís, dala ruma saʼe komboiu ka karreta, no dala ruma haʼu mós saʼe iha motór nia kotuk hodi lori pasta boot neʼebé tau sasán no ida seluk neʼebé uza ba haklaken

[Liafuan neʼebé foti husi pájina 21]

Ami hein katak ami sei haksolok ba nafatin ho Jeová nia hanorin

[Dezeñu iha pájina 18]

Liman-karuk: Nuʼudar katuas área nian iha Austrália

Liman-loos: Haʼu ho haʼu-nia inan-aman

[Dezeñu iha pájina 20]

Ami-nia loron kazamentu, 31 Dezembru 1957