Serbí Maromak neʼebé fó liberdade mai ita
Serbí Maromak neʼebé fó liberdade mai ita
“Ita-nia domin ba Maromak mak neʼe: katak ita halo tuir nia ukun-fuan sira. Nia ukun-fuan la susar mai ita.”—1 JOAO 5:3.
ITA BELE HATÁN?
Satanás hakarak ita atu hanoin saida kona-ba Maromak nia ukun-fuan sira?
Tanbasá mak ita tenke hili kolega ho didiʼak?
Saida deʼit mak ajuda ita atu laran-metin nafatin ba Maromak neʼebé fó liberdade mai ita?
1. Oinsá mak Jeová uza ninia liberdade? Adão ho Eva iha liberdade oinsá?
MAROMAK JEOVÁ deʼit mak iha liberdade neʼebé la iha rohan. Maski nuneʼe, nia nunka uza sala ninia liberdade, no nia mós la uza ninia kbiit atu kontrola buat hotu iha ninia atan sira-nia moris. Duké halo nuneʼe, Jeová fó liberdade ba ninia atan sira atu halo desizaun rasik no moris ho haksolok. Porezemplu, Maromak fó Adão ho Eva ukun-fuan ida deʼit, neʼe mak atu labele han ai-fuan husi “ai-hun koñesimentu nian kona-ba diʼak no aat”. (Gên 2:17) Sin, maski Adão ho Eva presiza halo tuir Maromak nia ukun-fuan neʼe, maibé sira iha duni liberdade barak tebes!
2. Tanbasá mak Adão ho Eva lakon liberdade neʼebé Maromak fó ba sira?
2 Tanbasá mak Maromak fó liberdade barak ba Adão ho Eva? Neʼe tanba Jeová kria sira tuir ninia ilas no fó ba sira kbiit atu hatene buat neʼebé loos no sala tuir ninia haree. Jeová hakarak sira atu hatudu domin ba nia nuʼudar Kriadór hodi foti desizaun neʼebé loos. (Gên 1:27; Rom 2:15) Maibé, Adão ho Eva la hafolin liberdade neʼebé sira-nia Kriadór fó ba sira. Duké hafolin liberdade neʼe, sira hili atu halo desizaun rasik kona-ba buat neʼebé loos no buat neʼebé sala. Sira hanoin katak hodi halo nuneʼe sira sei hetan liberdade barak liután, maibé tuir loloos, sira-nia desizaun halo sira no sira-nia oan no bei-oan hotu sai atan ba sala, no rezultadu mak sira hetan terus no mate.—Rom 5:12.
3, 4. Satanás hakarak ita atu hanoin saida kona-ba Maromak nia ukun-fuan sira?
3 Tanba Satanás konsege halo ema perfeitu naʼin-rua no anju barak atu la simu Maromak nia ukun, nia mós bele halo hanesan neʼe ba ita. Satanás la troka ninia dalan atu lohi ema, no nia nafatin hakarak ita atu hanoin katak Maromak nia ukun-fuan sira hatodan ita no halo ita-nia moris la livre no la kontente. (1 Joao 5:3) Ema iha mundu neʼe iha hanoin hanesan neʼe, no se ita ransu beibeik ho sira, neineik-neineik ita mós bele hanoin hanesan sira. Porezemplu, irmán ida ho tinan 24 hatete: “Hodi ransu ho kolega sira neʼebé hahalok la diʼak book haʼu makaʼas, liuliu tanba haʼu taʼuk atu iha hanoin neʼebé la hanesan ho sira.” Rezultadu mak nia monu ba sala-foʼer. Karik ita mós hasoru ona situasaun hanesan ho irmán neʼe no hatene katak ita-nia kolega sira bele book ita atu hanoin hanesan sira.
4 Triste katak dala ruma ema balu iha kongregasaun mós bele book ita atu iha hanoin no hahalok neʼebé la diʼak. Irmaun joven ida hatete katak uluk nia kolega diʼak ho joven balu iha kongregasaun neʼebé namora ho ema mundu. Nia ransu beibeik ho joven sira-neʼe, no neineik-neineik ninia hanoin mós sai hanesan sira. Nia hatete: “Haʼu-nia relasaun ho Jeová sai fraku. Haʼu ladún sente kontente atu tuir reuniaun, no mós la toman ona atu bá haklaken. Ida-neʼe halo haʼu hanoin fali katak haʼu tenke para atu ransu beibeik ho haʼu-nia kolega sira, no haʼu para duni!” Ita mós hatene ka lae, katak ita-nia kolega sira bele book makaʼas ita? Entaun, mai ita hanoin ezemplu ida husi Bíblia kona-ba neʼe.—Rom 15:4.
NIA MANÁN SIRA-NIA LARAN
5, 6. Oinsá mak Absalão lohi ema? Ninia planu hetan susesu ka lae?
5 Bíblia konta ezemplu barak kona-ba ema neʼebé book ema seluk atu iha hanoin no hahalok neʼebé la diʼak. Ezemplu ida mak Liurai David nia oan, naran Absalão. Nia mak ema neʼebé bonitu tebes. Maibé hanesan Satanás, Absalão haburas hakarak aat atu hadau ninia aman nia kadunan maski nia la iha direitu atu sai liurai. * Tan neʼe, Absalão lohi povu Israel atu fiar katak nia hakarak ajuda sira maibé ninia aman la hanoin sira. Sin, Absalão hatudu hahalok hanesan ho Diabu neʼebé koʼalia bosok iha jardín Eden, nia halo finje katak nia hanoin ema no koʼalia bosok kona-ba ninia aman rasik.—2 Sam 15:1-5.
6 Absalão nia planu hetan susesu ka lae? Sin, nia hetan susesu balu. Bíblia hatete: “Absalão nafatin manán ema Israel sira-nia laran hodi lohi sira.” (2 Sam 15:6) Maski nuneʼe, Absalão nia hahalok foti-an lori susar ba ninia an. Ikusmai, nia ho ema rihun ba rihun neʼebé nia lohi mós mate.—2 Sam 18:7, 14-17.
7. Ita bele aprende saida husi istória kona-ba Absalão? (Haree dezeñu iha pájina 14.)
7 Tanbasá mak fasil ba Absalão atu lohi ema Israel sira-neʼe? Karik tanba sira hakarak buat neʼebé Absalão promete, ka tanba Absalão mak ema bonitu tebes. Maski ita la hatene ho loloos kona-ba neʼe, ita bele fiar duni katak sira monu ba Absalão nia lasu tanba sira la hatudu laran-metin ba Jeová no mós ba liurai neʼebé Jeová mak hili ona. Ohin loron mós Satanás uza ema hanesan Absalão atu lohi Jeová nia atan sira. Ema hanesan neʼe karik hatete katak Jeová nia matadalan sira halo ema la livre no katak ema neʼebé la serbí Jeová mak moris kontente. Kuandu ita rona liafuan hanesan neʼe, ita hatene kedas ka lae, katak sira bosok? No ita hatudu laran-metin ba Jeová ka lae? Ita rekoñese ka lae, katak Jeová nia “ukun-fuan loloos” ka Kristu nia ukun-fuan deʼit mak lori ita ba liberdade neʼebé loos? (Tgo 1:25) Se nuneʼe, mai ita hafolin ukun-fuan neʼe no uza ita-nia liberdade iha dalan neʼebé halo Jeová kontente.—Lee 1 Pedro 2:16.
8. Ezemplu saida deʼit mak hatudu katak la halo tuir Jeová nia matadalan la lori haksolok?
8 Maski Satanás koko atu lohi ema hotu, nia hakaʼas an atu lohi liuliu ema joven sira. Irmaun ida neʼebé tinan 30 liu ona hatete katak uluk kuandu nia sei joven, nia la hanoin katak Jeová nia matadalan mak hanesan protesaun ba nia. Duké hanoin hanesan neʼe, nia sente katak nia la iha liberdade, no ikusmai nia halo sala-foʼer. Maibé ida-neʼe la halo nia kontente. Nia hatete katak ba tinan barak ida-neʼe halo nia sente sala no sente ladiʼak kona-ba buat neʼebé nia halo ona. Irmán ida neʼebé uluk halo sala-foʼer, hatete: “Iha tempu neʼebá, haʼu laran-tun tebes no sente haʼu-nia moris la iha folin. Maski tinan 19 liu tiha ona, haʼu nafatin hanoin kona-ba akontesimentu aat neʼe.” Irmán ida seluk hatete: “Kuandu haʼu hanoin filafali oinsá haʼu-nia hahalok uluk halo ema neʼebé haʼu hadomi nia laran kanek, ida-neʼe halo haʼu triste no laran-susar. Nuneʼe, susar tebes se ita lakon Jeová nia bensaun iha ita-nia moris.” Satanás lakohi ita atu hanoin kona-ba rezultadu aat husi ita-nia hahalok sala.
9. (a) Pergunta saida deʼit mak ita bele husu ba ita-nia an atu hatene ita-nia haree ba Jeová no ninia matadalan sira? (b) Tanbasá mak importante atu ita hatene didiʼak Maromak?
9 Triste katak joven barak no ema boot balu iha lia-loos neʼebé buka haksolok ba sira-nia an, sira hetan susar barak no depois mak rekoñese katak la halo tuir Maromak nia matadalan lori rezultadu neʼebé aat. (Gal 6:7, 8) Tan neʼe, husu ba ita-nia an: ‘Haʼu hatene duni dalan neʼebé Satanás uza atu lohi haʼu ka lae? Haʼu haree Jeová nuʼudar haʼu-nia belun neʼebé diʼak liu, neʼebé sempre hanoin haʼu-nia diʼak no haʼu bele koʼalia buat hotu? Haʼu fiar ka lae, katak Jeová nunka hanetik haʼu atu labele hetan buat diʼak neʼebé halo haʼu kontente?’ (Lee Isaías 48:17, 18. *) Atu bele hatán ‘Sin’ ba pergunta sira-neʼe, ita presiza hatene didiʼak Jeová. Ita presiza rekoñese katak ukun-fuan no matadalan iha Bíblia, ida-neʼe laʼós atu hanetik ita-nia liberdade, maibé hatudu Jeová nia domin ba ita.—Sal 25:14.
SAI MATENEK NO PRONTU ATU HALO TUIR
10. Tanbasá mak ita presiza hakaʼas an atu halo tuir Liurai Salomão nia ezemplu?
10 Kuandu Liurai Salomão sei joven, nia halo orasaun ho haraik-an ba Jeová hodi dehan: “Haʼu labarik kiʼik deʼit. Haʼu seidauk iha esperiénsia.” Depois neʼe, nia husu Jeová atu fó matenek no laran neʼebé prontu atu halo tuir. Tuirmai, Jeová hatán ba ninia orasaun. (1 Reis 3:7-9, 12) Maski ita sei joven ka idade ona, se ita mós husu Jeová atu fó matenek mai ita, nia sei rona ita-nia orasaun. Klaru katak Jeová sei la halo milagre ruma atu fó matenek mai ita. Maibé, nia sei ajuda ita atu sai matenek kuandu ita hakaʼas an atu estuda ninia Liafuan, husu espíritu santu, no halo tuir matadalan sira neʼebé ita simu liuhusi kongregasaun kristaun. (Tgo 1:5) Tuir loloos, Jeová halo ninia atan joven sira sai matenek liu fali ema seluk neʼebé la halo tuir nia, inklui mós “ema matenek sira” iha mundu neʼe.—Lc 10:21; lee Salmo 119:98-100. *
11-13. (a) Ita bele aprende saida husi eskritura iha Salmo 26:4, Provérbios 13:20, no 1 Korinto 15:33? (b) Oinsá mak ita bele aplika matadalan sira-neʼe iha ita-nia moris?
11 Agora, mai ita haree eskritura balu neʼebé fó sai Jeová nia matadalan kona-ba hili kolega, no haree oinsá mak estuda Bíblia no hanoin didiʼak bele ajuda ita atu koñese didiʼak Jeová. Salmo 26:4 hatete: “Haʼu la tuur hamutuk ho ema bosok-teen; no ho sira neʼebé laran-makerek haʼu sei la ransu.” Provérbios 13:20 hatete: “Ema neʼebé laʼo hamutuk ho ema matenek sei sai matenek, maibé ema neʼebé hamutuk ho ema beik sira sei hetan buat aat.” Eskritura ida seluk mak 1 Korinto 15:33, neʼebé hatete: “Hela hamutuk ho ema laran-aat sira halakon lisan diʼak.”
12 Ita bele aprende saida husi eskritura sira-neʼe? Primeiru, ita aprende katak Jeová hakarak ita atu hili didiʼak kolega sira. Nia hakarak proteje ita husi hahalok aat neʼebé lori susar ba ita no estraga ita-nia relasaun ho nia. Segundu, ita mós aprende katak kolega sira bele book ita atu halo buat neʼebé diʼak no mós buat neʼebé la diʼak. Ida-neʼe mak realidade neʼebé akontese iha ita-nia moris. Eskritura sira-neʼe hatudu katak Jeová koko atu book ita-nia laran. Haree toʼok, eskritura sira-neʼe hotu la hakerek nuʼudar ukun-fuan hanesan “Labele halo ida-neʼe” ka “Labele halo ida neʼebá”, maibé fó sai deʼit buat neʼebé realidade. Ida-neʼe hanesan Jeová hatete mai ita: ‘Realidade mak nuneʼe. Entaun, ó sei halo saida? Ó hanoin oinsá iha ó-nia laran?’
13 Tanba eskritura tolu neʼe hakerek deʼit realidade neʼebé simples, eskritura sira-neʼe iha folin duni toʼo ohin loron no ita ida-idak bele aplika matadalan sira-neʼe iha ita-nia moris. Entaun, husu ba ita-nia an: ‘Iha situasaun saida deʼit mak haʼu bele hasoru ema neʼebé “laran-makerek”? Oinsá mak haʼu bele sees husi sira?’ (Prov 3:32; 6:12) ‘Sé mak “ema matenek” neʼebé Jeová hakarak haʼu atu sai kolega? Sé mak “ema beik” neʼebé Jeová hakarak haʼu atu sees?’ (Sal 111:10; 112:1; Prov 1:7) ‘Se haʼu hili sala haʼu-nia kolega, haʼu sei lakon “lisan diʼak” saida deʼit? Haʼu hetan “ema laran-aat” ka kolega neʼebé la diʼak iha mundu deʼit ka lae?’ (2 Ped 2:1-3) Ita hatán oinsá ba pergunta sira-neʼe?
14. Oinsá mak ita bele halaʼo ita-nia Adorasaun Família nian iha dalan neʼebé diʼak liután?
14 Hanesan ita foin koʼalia kona-ba eskritura tolu neʼe, ita mós bele lee no hanoin didiʼak kona-ba eskritura seluk atu buka-hatene Maromak nia hanoin kona-ba tópiku oioin neʼebé importante ba ita-nia moris no ba ita-nia família. * Diʼak atu inan-aman sira koʼalia kona-ba tópiku sira-neʼe iha Adorasaun Família nian. Kuandu ita halo hanesan neʼe, diʼak atu la haluha katak ita-nia hakarak mak atu ajuda ema ida-idak iha família laran atu komprende katak Maromak nia ukun-fuan no matadalan sira hatudu duni Jeová nia domin ba ita. (Sal 119:72) Loos duni, estuda Bíblia iha dalan hanesan neʼe bele ajuda ita atu hametin liután ita-nia relasaun ho Jeová no mós relasaun ba malu nuʼudar família.
15. Oinsá mak ita bele hatene katak ita sai matenek no prontu liután atu halo tuir Jeová?
15 Oinsá mak ita bele hatene katak ita sai matenek no prontu liután atu halo tuir Jeová? Dalan ida mak hodi kompara ita-nia hanoin ho Maromak nia atan sira iha tempu uluk nia hanoin. Porezemplu, Liurai David hatete: “Oh, haʼu-nia Maromak, atu halo Ita-nia hakarak mak buat neʼebé halo haʼu haksolok, no Ita-nia ukun-fuan iha haʼu-nia laran.” (Sal 40:8) Ema neʼebé hakerek Salmo 119 mós hatete: “Haʼu hadomi tebes Ita-nia ukun-fuan! Loron tomak ida-neʼe mak haʼu-nia hanoin.” (Sal 119:97) Domin hanesan neʼe la mosu mesak deʼit iha ita-nia laran, maibé ita presiza haburas ita-nia domin hodi hakaʼas an atu estuda Bíblia, halo orasaun, no hanoin didiʼak. Ita mós bele haburas ita-nia domin ba Maromak nia matadalan hodi haree oinsá mak halo tuir Jeová nia hakarak lori bensaun barak ba ita rasik nia moris.—Sal 34:8.
LUTA BA ITA-NIA LIBERDADE KRISTAUN!
16. Se ita hakarak manán funu ba ita-nia liberdade kristaun, ita labele haluha kona-ba saida?
16 Husi tempu uluk toʼo ohin loron, nasaun barak halo funu atu hetan liberdade. Nuneʼe mós ho ita, ita presiza sai prontu liután atu halo funu iha dalan espirituál hodi defende ita-nia liberdade nuʼudar ema kristaun! Ita labele haluha katak ita-nia inimigu sira laʼós deʼit Satanás no mundu aat nia hanoin, maibé ita mós presiza luta hasoru ita rasik nia fraku, inklui mós ita-nia laran neʼebé bele lohi ita. (Jer 17:9; Ef 2:3) Maski nuneʼe, ho Jeová nia ajuda, ita bele manán funu neʼe. Kuandu ita hili atu halo buat neʼebé loos, maski desizaun neʼe kiʼik ka boot, ida-neʼe lori rezultadu diʼak. Primeiru, ita bele halo Jeová nia laran kontente. (Prov 27:11) Segundu, ita bele haree katak Maromak nia “ukun-fuan loloos” lori diʼak ba ita-nia an rasik, no ida-neʼe ajuda ita atu sai laran-metin liután atu laʼo nafatin iha ‘dalan kloot’ ba moris rohan-laek. Sin, lakleur tan, ita hotu sei haksolok ho liberdade barak liután neʼebé Jeová promete ba ema neʼebé laran-metin ba nia.—Tgo 1:25; Mt 7:13, 14.
17. Tanbasá mak ita labele laran-tun demais kona-ba ita-nia sala? Kuandu ita halo sala, ajuda saida mak Jeová fó mai ita?
17 Klaru katak ema hotu dala ruma halo sala. (Ecle 7:20) Maibé, kuandu ita halo sala, ita lalika laran-tun demais no sente katak ita la vale ona. Se ita monu ba sala ruma, ita presiza hamriik fali no laʼo ba oin, maski karik ita tenke husu katuas kristaun sira-nia ajuda. Tiago hakerek katak sira-nia “orasaun neʼebé ho fiar sei kura ema neʼebé moras, no Jeová sei halo nia hamriik. No mós, se nia halo tiha sala, nia sei hetan perdua.” (Tgo 5:15, MF) Sin, ita labele haluha katak Jeová mak Maromak neʼebé laran-diʼak duni no nia hakarak ita atu hela nafatin iha kongregasaun tanba nia haree ona buat neʼebé diʼak iha ita-nia laran. (Lee Salmo 103:8, 9. *) Loos duni, se ita hakaʼas an atu serbí Jeová ho laran tomak, nia sei ajuda ita nafatin.—1 Crôn 28:9.
18. Saida mak ita tenke halo atu hetan Jeová nia protesaun?
18 Iha kalan antes Jesus mate, nia halo orasaun hamutuk ho ninia apóstolu naʼin-11 neʼebé laran-metin, hodi hatete ba ninia aman: ‘Haʼu husu atu Ita hadook sira husi aat-naʼin.’ (Joao 17:15) Jesus la hanoin deʼit kona-ba ninia apóstolu sira, maibé nia mós hanoin kona-ba ninia dixípulu sira hotu, inklui ita neʼebé moris ohin loron. Tan neʼe, ita bele fiar katak Jeová sei hatán ba Jesus nia orasaun hodi proteje ita no tau matan ba ita iha tempu susar neʼe. Provérbios 2:7, 8 hatete: “[Jeová] mak eskudu ba sira neʼebé laʼo ho laran-metin, . . . no nia sei proteje ninia ema laran-metin nia dalan.” Sin, maski dala ruma susar atu halo tuir Jeová nia matadalan, maibé hodi laran-metin nafatin ba Jeová mak ita bele hetan moris rohan-laek no liberdade neʼebé loos. (Rom 8:21) Tan neʼe, mai ita la husik ema seluk atu lohi ita!
[Nota–rodapé]
^ par. 5 Kuandu Maromak promete ba David katak nia sei hetan oan ida neʼebé sei sai liurai tuir nia, Absalão moris tiha ona. Tan neʼe, ita bele fiar katak Absalão hatene ona katak Jeová la hili nia atu sai liurai neʼebé troka ninia aman.—2 Sam 3:3; 7:12.
^ par. 9 Isaías 48:17, 18: “17 Ida-neʼe mak liafuan husi Jeová, Ida neʼebé Sosa Fali ó, Ida neʼebé Santu ba Israel: ‘Haʼu, Jeová, mak ó-nia Maromak, Ida neʼebé hanorin ó atu hetan buat neʼebé diʼak, Ida neʼebé halo ó laʼo iha dalan neʼebé ó tenke laʼo. 18 Oh, se ó fó duni atensaun ba haʼu-nia ukun-fuan! Hodi nuneʼe, ó-nia dame sei sai hanesan mota neʼebé suli, no ó-nia justisa sai hanesan laloran tasi.’”
^ par. 10 Salmo 119:98-100: “98 Ita-nia mandamentu halo haʼu matenek liu fali haʼu-nia inimigu sira, tanba mandamentu neʼe haʼu-nian toʼo tempu neʼebé la bele sura. 99 Haʼu iha matenek boot liu fali haʼu-nia mestre sira hotu, tanba haʼu hanoin nafatin Ita-nia liafuan. 100 Haʼu-nia hahalok hatudu matenek liu fali ema katuas sira, tanba haʼu halo tuir Ita-nia mandamentu sira.”
^ par. 14 Eskritura balu neʼebé diʼak atu koʼalia hamutuk nuʼudar família mak 1 Korinto 13:4-8, neʼebé Paulo hakerek kona-ba domin, no Salmo 19:7-11, neʼebé koʼalia kona-ba bensaun sira neʼebé ita bele simu hodi halo tuir Jeová nia ukun-fuan.
^ par. 17 Salmo 103:8, 9: “8 Jeová mak laran-sadiʼa no laran-luak, neineik atu hirus no hatudu laran-diʼak neʼebé nakonu ho domin. 9 Nia la kontinua buka sala ba nafatin, no la rai hirus toʼo tempu neʼebé la bele sura.”
[Pergunta estudu nian]
[Dezeñu iha pájina 14]
Oinsá mak ita bele hatene ema neʼebé hatudu hahalok hanesan Absalão no proteje ita-nia an husi sira?
